فضحك الأب / الله المستعان .. انتم يا النسوان ما عندكم غير تسوق !! نجرب المتحف العلمي مثلاً
( تذكرت الأخ / أبو مشاري ممبز ماليزيا , عند وصوله أول يوم لندن كان أول طلب لزوجته الذهاب لهارودز هههه )
جلست الأم وهي تنفخ الهواء من فمها / يعني يا حسرة احنا حنشتري !! حنتفرج فقط
فانفرجت اسارير الاب وقال / اذا كذا ممكن
أرادت المدام أن ترد الصاع / رحلة اسطنبول يادوب 11 يوم , نبي شهر في لندن
الأب / على اساس اني طالب مدرسه !! هي 15 يوم مافي غيرهم , ظروف عملي ما تسمح .
وكانت البدايه ..
ها شقه أو فندق ؟؟
شقه طبعاً .. الفندق يمكن يعطينا غرف بعيده عن بعض !! أخاف على بناتي .. وكمان نجيب فطور من برى ونفطر مع بعض وقت ما نبغى على راحتنا .
قالت البنت الكبرى / الله لو كمان تكون بتراس زي حقة اسطنبول , رووووعه
اوكي .. قال الأب .. مضيفاً / ونكب العصيرات براحتنا , خابره بتنك الصغرى أم الكاسات طاخ طيخ !! ما بقت كاسه لنا في البيت إلا كسرتها
وبدأت رحلة البحث والتقصي وجمع المعلومات >>> جريمة قتل مو رحله سياحيه !!
انتقلنا لمرحلة شراء التذاكر , ولكن أية خطوط ؟ وما هو الموعد المناسب للاقلاع والهبوط ؟
بمساعدة موقع ( skyscanner ) وهو موقع يبحث عن الرحلات المتوجهة من جدة إلى لندن .. أصابت الأب حاله من القلق لأن جميع الرحلات إما صباحيه أو مسائية , والمطلوب رحله تصل بموعد دخول الشقه ..
الأب / بالله شوفي تعليقات النزلاء !! يقولك جينا بدري الصباح وما دخلونا الشقه الا الساعه 2 الظهر !! ولا جينا في الليل وما لقينا صاحب الشقة ورحنا له مكان بعيد ودفعنا حق تاكسي بالشئ الفلاني عشان نجيب منه مفتاح الشقه !!
فتضايقت المدام , وهي ما يحتاج على أي حاجه أنواع القلق !!!
لا الله يخليك شوف لنا رحله توصل بالتمام على موعد الدخول , وين تخلينا بلندن في الشوارع وتروح ؟؟ وش نسوي بعفشنا وشناطنا ؟؟ ما معايا أحد غير البنات وها الصغير ؟؟ وحده جيعانه ؟؟ وحده تبي دورة المياه ؟؟
قايلكم أنواع القلق !!!
وبتكثيف البحث والتدقيق وجد الأب رحلة على متن الخطوط القطرية ترانزيت ( جده - الدوحه - لندن ) تصل لندن الساعه الواحده ظهراً , وعند الانتهاء من اجراءات السفر يكون الوصول للشقه مناسب لموعد الدخول , فحمد الأب الله سبحانه وتعالى , وتم شراء التذاكر , وهكذا تجاوز أول مطب في الرحله .. وليته لم يختر هذي الرحله !!
البنات / وشي ذي المنوبولي ؟؟ فتنزل دمعة من عين الأب ويجيب / هذي من أيام الطيبين يا جيل الاي باد .. >>> مصدق نفسه !!
المدام / هارودز بأي منطقه ؟
الأب / ياذي هارودز !!
فتضع المدام يدها على كتفه وتقول بكل حنيه / شوف جنبه ...
فيلتفت عليها الاب ويقول / يسلم عليك موقع ( بوكنج ) ويقولك الشقق غاليه هناك .
اتركوني دعوني لحالي اسبوع امخمخ واشوف الشقق .
بعد اسبوع ......
الأب متكئ أمام الكمبيوتر كحاله كل يوم يتصفح مواقع الشقق , والبيت هدووووء .. يحدث نفسه كمان وكمان ..
غرف صغيره سعرها مبالغ فيه !! غرف اكبر سعر أكبر !!
المنطقه الذهبيه شقق فخمه وواسعه لكن غاليه !! وبدأ نطاق البحث يبعد شيئاً فشياً ..
وفجأة يكسر حاجز الصمت !!
ها لقيت جنب هارودز .....
الاب/ ايش رايك تاخذي قيلوله ؟
فعادت قائله / أختي تقول خذوا جنب شارع اكسفورد .. الماركات كلها هناك .
فيمسك الاب يد زوجته / يا حياتي السفر ليس تسوق فقط , وإنما طبيعة ومتاحف وثقافات جديده .
المدام / يا سلام لو الشقه على شارع اكسفورد !!
فيصرخ الاب على ابنته/ تعالي خذي أمك !!!!
................
زادت الضغوط على مدار الايام على الاب المسيكين لكي تتحق مطالب المدام حيال موقع الشقه , ولكنه لم يرفع الراية البيضاء وظل صامداً .. لأن الحساب البنكي هو اللي يتكلم .
بعد اسبوعين من الحيره والتردد ...
يابابا أهم شئ الشقه يكون فيها نت , ولا تنسى موضوع التراس .
اوكي اوكي عارف عارف .. أنا عندي فكره .
فقالت المدام / هات
فوضع الاب رجلاً على رجل وقال / نحن جالسون في لندن (12) يوم , بناخذ شقتين من باب التغيير .. الاولى بالقرب من المعالم السياحيه والثانيه بتراس لكنها غاليه وبعيده .. وش رأيكم ؟
قال الرسول صلى الله عليه وسلم (إنهما يومان - الاثنين والخميس - تعرض فيهما الأعمال على الله، وأحب أن يعرض عملي وأنا صائم) .. خلينا نعمل حاجه تنفعنا في اخرتنا ..
واردف الاب قائلاً وهو يطالع زوجنه / حتى الصيام مفيد لانقاص الوزن
>>> ضاع الأجر !!
ماهي أخبار الشقق ؟ الوقت راح !! تتحدث الزوجة بقلق كالعاده !!
يضع الأب قطعة كنافة بالقشطة في فمه .. ويعدها رشفة من القهوة ويهمهم .. أفطر وأعلمكم .
........
الجميع أمام الكمبيوتر .. وكلهم شوق لرؤية السقق وغرفها وأثاثها ..
يبدأ الأب بالحديث / شوفوا الشقة ذي ؟ وذي ؟ وذي ؟ وذي ؟
الأب / أنا على ها الحيره شهر عداً ونقداً !! فقررت انتظر نزول شقه جديده .. نضمن نظافة اثاثها وأدوات مطبخها .
المدام / مافي أمل هارودز
..............
بعد يومين تنزل شقة جديدة على موقع ( بوكنج ) 2 غرفة نوم وصوفه بالصاله تقلب سرير لشخصين , وفي المربع المطلوب رقم 2 خلف شارع العرب .. بالضبط بنفس المكان الذي يرغب فيه الأب
[/IMG]
الشقه على شارع ( praed st ) الحيوي , وبجوارها مطاعم وكافيهات ومحطة مترو (بادنجتون ) لصيقة بها دقيقة سيراً على الاقدام لسهولة التنقل .. فالمعروف عن مترو لندن تواجد محطاته بكل لندن ..
تم الحجز 8 أيام من تاريخ 30/7/2016 .. وهي مدة كافيه لتغطية معالم لندن .. هكذا فكر الأب ..
والشقة الثانيه تكون بتراس للروقه والاسترخاء ..
وجد الأب مراده في شارع ( ليفربول ) شقه 3 غرف نوم واسعه وتراس ( شقق بارك لين سيتي ) وحجز بها الاربعة أيام المتبقية ..
المدام / طيب , باقي 3 أيام ؟؟ انت مو قلت الرحلة 15 يوم !!!
الاب / 3 أيام في مانشيستر ان شاء الله .. منها يوم نزور مدينة ليفربول , نروح الصباح ونرجع المساء , أنا قريت أن المسافة بينهم نصف ساعه بالقطار .
فتنظر المدام نظرة ريبة / ايش معنى مانشستر يعني ؟
الأب / عشان تشوفي أكبر مول في اوروبا .
فتنظر المدام مرة أخرى نظرة ريبه / مول !! ولا بتروح نادي مانشيستر !!
ياسلام عليك يا فاهمتني .. مدينة مانشيستر فيها أعرق فريقين في العالم .. معقوله ما نزورهم !!
مانشيستر ستي ومانشيستر يونايتد , لا وكمان نادي ليفربول بازوره ان شاء الله .
الطفل يرقص فرحاً / فرفور .. فرفور
البنت الوسطى / شقه برضوا يا بابا ولا فندق ؟
فيرد الاب / المره ذي بنغير وبنجرب الفنادق , واخترت لكم فندق ( بريميير مانشستر سيتي سنتر - شارع بورتلاند ) جميل وغرفه واسعه وفطوره جيد .. حسب الصور والتعليقات .
البنات / جواب نهائي يا بابا ؟
يتنهد الأب وكأنه نفض عن جسمه حمل ثقيل وقال / جواب نهائي .. خلاص الحمدلله انتهينا من موضوع السكن ..
يراجع الاب متطلبات الرحلة .. كله مزبووووط .. التوجه للمطار بكل سعاده وأحلى مشوار
الإقلاع الساعه (3.30) الفجر .. وصلنا الدوحة الساعة (5) بحفظ الله ورعايته .. مطار كبير وجميل ..
يابابا لا تنسى التصوير مع الدب .
اوكي اوكي .. ان شاء الله نحصله قي طريقنا
دخول لصالة الاقلاع وإذا بفرحة البنات الدب الدب هههههه ..
وهاتك يا تصوير وسنابات .. طبعاً الدب ذا .. دب دميه ,, أكبر دب دميه في العالم
حلو اللي سناب مع دب حقيقي !!
الاقلاع الساعه (6) الصباح وكان المخطط أن ننعم بنوم هادئ خلال الرحلة الممتده حوالي (7) ساعات .. ولكن للأسف كان نوم مرهق وصعب !!
بالاضافه لأنواع الأفلام على متن الطياره .. مره كثيره وحديثه
وصلنا مطار هيثرو بلندن الساعه (2) الظهر .. ثم وكأننا ناقصنا ارهاق .. ساعتين كامله بالملي واحنا واقفين من باب الطياره وحتى وصولنا لختم الجوازات .. تم خلالها الاتصال على السيدة الانجليزيه التي تنتظرنا أمام الشقه لكي تسلمنا مفتاح الشقه ( سبق أن ارسل لي صاحب الشقه رقمها عبر البريد الالكتروني لكي اتواصل وانسق معها بموعد ومكان المقابله ) وأخيراً وبعد الانتهاء من سرى طويل ومتعب تم تختيم الجوازات وأخذ الشنط والانطلاق سريعاًَ إلى قطار هيثرو اكسبريس السريع ( كلفنا 62 جنيه ذهاب والعوده 36 جنيه ) عبر موقعهم .. نصف ساعه ونحن في محطة (بادنجتون ) التي تبعد دقيقتيت فقط مشي عن الشقه ..
تم مقابلة السيدة وأخذنا المفتاح وكان معها جهاز نقاط البيع مثل اللي في المطاعم والمحلات .. أدخلت البطاقة الائتمانيه به وخصمت المبلغ المتبقي ..
بابا الشقه حمام واحد !!!
بابا خلاص هذي هي الشقه !!!
وش السالفه !!
الشقه كانت جديده وأثاث ممتاز .. ولكن للأسف موقع (بوكنج ) لم يذكر أنها ذات حمام واحد فقط ونحن 6 أشخاص !!!!!
احم احم تتنحنح الأم
فهم الأب وأصبح في نص هدومه .. وانتصار أخر لحدس المراة .. مع وعد بالسكن جنب هارودز السفريه القادمه ..
لكن الشوق واللهفة لمشاهدة لندن .. والتمتع بالاجواء الخيالية كان أكبر من التعب والارهاق ..
أخرج الأب من جيبه جدول الرحلة وقال / البداية من شارع قريب من هنا اسمه ( كوينز واي ) كان شارع مشهور من السابق ..
بسم الله .. تبدأ الانطلاقة .. آجواء بارده .. غيوم .. وجوه جديده ..
باص لندن المشهور أمامنا يقطع الشوارع
الشارع متوسط الطول .. كافيهات ومطاعم ومقاهي .. عربيه وغربيه وهنديه
بنهاية الشارع كانت الحديقة المشهوره .. أبرز معالم لندن السياحية ..
حديقة ( الهايد بارك )
وأخيراً .. بصوت واحد يقول الجميع .. وصلنا
حديقة الهايد بارك جزئين .. الأول الهايد بارك .. والثاني حديقة كنسينغتون .. وتفصل بينهم بحيره كبيره
لكن كل الحديقتين في حوش واحد
احنا الان أمام حدائق كنسينغتون .. دخلنا وكانت الساعه تشير إلى السابعة مساء
وكانت الحديقة وكأنها الساعه 4 عصراً !!!
أشخاص بكل مكان .. هذا يلعب وهذا يقود دراجه وهذا يمارس الرياضه ..
وربعنا زي ما قالوا .. مربعين ورشف بالشاي والقهوه
أشجار كبيره .. ورود .. بساط أخضر
رمينا أنفسنا على الزرع الأخضر الجميل .. ونظرنا للغيوم التي فوقنا ..
سبحان الله
كنا فين وبقينا فين !!
تذكرنا الشمس اللاهبه .. والرطوبة الخانقه في ديرتنا
حمدنا الله على كل حال .. وحمدنا الله أن يسر لنا المال لنصرفه على متعتنا الحلال ..
وها نحن
يضع الأب يديه خلف رأسه ويمدد رجليه بعد ارهاق يوم طويل .. ويقول يا سلااااام , الحمدلله .
كنا صرعى ومرميين على الأرض .. ولكن سعداء .
لفه صغيره بالحديقه مع الايس كريم
ثم خرجنا حوالي الساعه الثامنه محاذين للحدبقة باتجاه شارع العرب للعشاء
نصف ساعه أخرى سيراً على الأقدام .. تخللها العديد من التوقف
ما احنا متعودين هههه .. تونا أول يوم !!
( أحب انوه هنا لأهمية عربية الطفل , فقد افادتنا كثيراً في السفره , على الرغم من ابني كان عمره ست سنوات ويستطيع المشي ., لكن في لندن المعالم السياحيه قريبه من بعض وتقدر تغطيها سيراً على الأقدام , يعني جزمة رياضه والهمه الهمه يا بطل ) .
نهاية الحديقه طريقين .. واحد يودي شارع العرب , والثاني يودي شارع اكسفورد المشهور حق التسوق اللي درعمنا معاه !!!
كان هذا حال الجميع بعد يوم مرهق .. قال الاب / لن اكرر تجربة الترانزيت أو تكون الرحله بدون نوم كافي ..
31/7 كان يوافق يوم الأحد ..
ولذلك كان المخطط الذهاب لحي ( كوفنت قاردن ) الذي يكون مميز بهذا اليوم , ويمتلئ بالسياح .. والانجليز أنفسهم .. وكذلك يشمل سوق للخضار والفاكهة .
فطرنا بالشقه .. نزلنا للمترو القريب .. أخذ الاب تذاكر المواصلات .. واسمها ( Oyster Card ) تستخدم لكل مواصلات لندن البريه والبحريه .. تعبيها بأي مبلغ تريده حسب احتياجك ومدة رحلتك , وتوجد عروض عليها وباقات , ويمكن للشخص الرجوع لموقعهم في النت لمعرفتها , علماً بأن تكلفة المترو 2.5 باوند لكل شخص في الرحله الواحده والطفل أبو 6 سنين مجاناً .
وصلنا لمحطة ( كوفنت قاردن ) .. حي جميل .. محلات تسوق ذات طابع جديد ..
شوفوا الحلاوة يا اخوان !! دققوا النظر في الساعه !!
نعم إنها الساعه الواحده ظهراً !!
يا ويل قلبي ويلاه
لو اطلع بالديره الساعه وحده قسم دجاج مشوي انا وعائلتي
تمشينا في المكان .. الغيوم فوقنا .. والجو البارد المنعش يحفنا .. ساعتين كانت كافيه ..
الحي به حاجات كثيره ولا يمكن تغطيته بالقليل من الصور , ولذلك انصح بالبحث في صور قوقل عنه وستجد صور جميله للحي وما يحتويه .. وهو يستحق الزياره .
بواسطة الخريطه توجهنا سيراً على الاقدام إلى ( الهدف الثاني ) .. ربع ساعه .. ميدان أو ساحة ترافلجار أو الطرف الأغر وبالانجليزي ( Trafalgar Square )
قضينا فيه حول الساعه ..
ثم توجهنا إلى ( الهدف الثالث ) .. ربع ساعه .. كله سيراً على الأقدام ..
ونحن في الطريق كان هناك ماراثون سباق .. وأنواع التصفيق والحماس ..
تلاحظون ساعة بيج بن في الخلف
وصلنا ..
ساعة بيج بن المشهورة ..
شعور غريب راودنا ونحن نقف أمام الساعة المعلم المشهور عالمياً .. احدى عجائب الدنيا
الساعه فقط للفرجه والتصوير , وغير مسموح بالدخول لها ..
الساعة تقع على نهر التايمز , وبجوارها المراكب السياحية ( هدفنا الرابع )
دقت الساعه الرابعة عصراً .. أخذنا مركب أبو لون أزرق .. 6 أشخاص 44 باوند .. الجولة ساعه كامله .. نص ساعه رايح ونص ساعه راجع
متعه أخرى من متع لندن
الغيوم من فوقنا .. لا أمل أبدا من هذه المقوله .. الغيوم فوقنا وفوقنا وفوقنا .. أشكال وأشكال
سبحان الخالق المبدع
هواء منعش جميل .. اجواء رومانسيه
طبعاً السناب شغاااااال .. كل مبنى وكل غيمه وكل منظر يتم تصويره واحنا رايحين واحنا جايين ..
انتهت الساعه وليتها لم تنتهي !!
نزلنا مكان ما طلعنا امام ساعه بيج بن , واخذنا الجسر المؤدي لمعلم اخر مشهور وهو ( هدفنا الخامس ) ..
لندن آي
اطول طابور رايته في حياتي !! لو يوزعون فلوس يا شيخ !!
اعتقد طابور ركوب لندن آي كان واصل المطار !!
طيب منا ولا منا !! واسطه !! شوف ولد عمك !! شوف رحيمك !!
كان فيه طابور صغير .. رحنا له قالوا / هذا اللي دافع أكثر ..
( تنويه / تذاكر لندن آي تباع عن طريق النت أو من نفس الموقع , وفيه عندهم تذكرة سريعه تمسك بها طابور صغير لكن فلوس زياده عن التذكره العاديه )
( تنويه اخر / وزارة السياحه في لندن شطار , مقدمين عروض لفعاليات لندن السياحيه , اذا دخلت على موقع أي معلم سياحي تلاقي عروض باقات لباقي المعالم , يعني كل ما تحجز معلم يطلع أرخص , شيل يا حبيبي اللي تقدر عليه وتطلع ارخص من انك تاخذ كل معلم لوحده )
قال الموظف للأب / التذاكر اللي معاك هذي من النت , لازم تغيرها من المبنى المجاور !!
ذهب الأب وطابور طويل استغرق 20 دقيقه !!
الموظف / بتطلع لندن آي اليوم ؟
الأب / ما ظنيت الطابور اليوم زحمه , احتمال اخليه يوم ثاني , انت بدلي التذاكر وانا اشوف اموري .
الموظف / لا يا حبيبي , ما يمشي ذا الكلام !! التذاكر كل يوم بيومه !! اليوم اللي تقرر فيه تركب لندن آي تعال عندي بدل التذاكر !!!
الأب / الحين واقف عشرين دقيقه وهذي آخرتها !!
رجع الأب لعائلته ووجدهم في قمة الوناسه والسعاده
غيوم .. جو جميل .. ساعة بيج بن .. لندن آي .. نهر التايمز .. جسور .. مراكب .. سفن ..
كلها في عين واحده
حركة بشريه هائله .. أصناف البشر من كل أنحاء العالم
دقت ساعة بيج بن بصوتها المشهور معلنة الساعه السابعة مساء , فكتب الأب ملاحظة في جدوله / تأجيل لندن آي ليوم آخر , وقال / ربما هذا من حسن حظنا لكي نعود لهذا المكان الرااااائع .
الاب / ها نرجع الشقه ؟
العائله / والله ما ودنا نمشي من هنا , وش أحلى من كذا , ممكن نتعشى هنا .
فقال الاب / للاسف مافي أكل هنا غير اللي ما يتسمى , وما ابغى اقول اسمه عشان ولدك ما يمتحنا ( ماك دونالدز ) !! ثم أضاف الأب / برنامج الجدول لهذا اليوم انتهى , لكن باقي النهار ما انتهى , فيه مكان قريب من هنا خلونا نتعشى فيه .
في نفس الموقع توجد محطة مترو ومنها إلى ( الهدف السادس )
ليستر سكوير .. Leicester Square ..
عالم أخر وكثافة بشريه اخرى !!
مسارح .. سينما .. مطاعم .. كافيهات ويا كثرها في لندن
عروض فنيه في الشوارع .. موسيقى .. رقص
يا زينك يا لندن
لا تمل أبداً أبداً أبداً
قال الأب / هنا يوجد مكان بينبسط عليه ولدك وبيتشقق من الفرحه
محل ( m & m ) للحلويات .
للاسف المحل كان مغلق ( المحل يغلق يومياً الساعه 12 مساء .. ما عدا يوم الاحد يغلق الساعه 6 مساء )
بالله عليكم في محل في اوروبا كلها يقفل الساعه 12 بالليل !!! لا وكمان محل حلويات حق اطفال !! الساعه 8 بالكثير وتدور فندقك في بقية مدن اوروبا !!!
إنها لندن .. انها الحياه .. نهارك ليل وليلك نهار ..
قالت الأم / ربما هذا من حسن حظنا أن المحل مغلق لكي نعود لهذا المكان الجميل .
خطوتين وشارعين ونحن في الحي الصيني ( Chinatown ) ( الهدف السابع ) وهو يعتبر داخل ( ليستر سكوير )
اسم على مسمى , مثل شارع العرب , كله صيني في صيني
لفيناه سريع لوجود رائحة مزعجه صادره من بعض المطاعم الصينيه , وحاجات غريبه معلقه في مطاعمهم !!
الحمدلله على النعمه
زاد الجوع .. وتضاربت الاراء
وفجأة يقف امامنا مطعم تركي .. وتعود بنا الذاكرة للأكل التركي .. ودخلنا
كان اختيار موفق جداً
مطعم من دورين .. راقي .. أكل لذيذ جداًً .. وأجمعت العائلة ان اكله ألذ من اكل اسطنبول نفسها لخلوه من الدسم .. كانت الفاتوره 70 باوند ( ماسكه مع المطاعم 70 باوند .. وهذا ملاحظ كون الوجبه للشخص تكلف 10 باوند تقريباً , ما عدا الاخ ماكدونالدز , رخيص في لندن يكلف حول 4 باوند للشخص , لكن دا بُعده اني أكله
)
المطعم اسمه / Istanbul pide salonu
وموقعهم في لندن / 53 shaftesbury avenue
نبغى نلحق على ( متحف مدام توسو للشمع ) موعدنا الساعه (11) ص
فقالت المدام مقترحة / واالله ودنا اليوم بفطور انجليزي .. نبي نغير عن البيض والجبنه والكورن فليكس .
الشارع مليان كوفيهات .. دخلت العائلة أحدها ..
English breakfast please
بيض !! فاصوليا !! شرائح لحم خنزير !! سجق خنزير !!
نظر الأب لزوجته
في النهاية كان الفطور برضوا بيض !! وساندوتش جبنة حلوم مع الطماطم والخس .
وجهة العائلة لهذا اليوم متحف الشمع .. ولحسن الحظ فهو قريب من شارع العرب .. (20) دقيقه سيراً على الأقدام .. وضلنا تقريباً على الموعد .. ومعانا التذاكر من النت .
ويا لطيف الطف !!!!!
طابووووووور طويل !! يمين ويسار !! شمال وجنوب !!
ما تعرف أوله من اخره !! بوابات عديده !!
باب لشراء التذاكر وباب لتذاكر الشباك .. وباب لتذاكر النت العاديه .. وباب لتذاكر النت المستعجله اللي دافع أكثر
وقفت العائلة مع طابور تذاكر النت العاديه .. (45) دقيقه !! ساعه الا ربع !! طبعاً مافي مشكله مع الغيوم والجو الزين , لو نوقف كمان ساعه على قلبي زي العسل , لكنها متعبه للاطفال !!
وصلنا , اخذوا عربية الطفل عند المدخل , دخلنا
المتحف يضم شخصيات من كل الفئات .. وبالفعل أشكالهم كأنها حقيقي
تضايق الأب / حاطين رونالدو !! وأحسن لاعب في العالم لخمس مرات ميسي مو في !!!!!
فرحت البنت الوسطى بفرقة ( ون دايركشن ) وهي فرقة موسيقية بريطانيه , وهاتك يا سناب وتصوير مع الفرقة.
رأى الاب الرئيس الامريكي اوباما فقال كلها شهرين ويحطون هيلاري كلينتون بدالك .. جلس الاب على مكتب اوباما وقال لنفسه / اممممم ماذا كنت سأفعل ؟
سوريا !! العراق !! اليمن !! مصر !! تونس !! ليبيا !!!!
فقام الاب وهو يقول / اللهم اصلح أحوال المسلمين .
المتحف به عرض سينمائي رباعي الابعاد لمدة عشرة دقائق , روووووعه جداً , وكأنك بوسط الفيلم
كما يوجد لفه بالقطار على مجسمات لندن القديمه , وتؤخذ لك صورة بالقطار , ذكرى جميله .
قضينا به ساعتين
خرجنا .. وكان المطر الخفيف يتساقط
قال الاب / الجماعه مضبوطين في توقعاتهم , مو زي ربعنا !! هاتوا المظلات .. عائلة حريصه ماخذه احتياطها , ومطلعه على مواقع المناخ .
توجهنا نحو الهدف الثاني حديقة ( ريجنت بارك )
الحديقة تقع خلف المتحف .. عشر دقائق تقريباً وصلنا .. وتستقبلك بحيره جميله بها البط والوز والحمام من فوقها .
ويحيط بها كراسي للاسترخاء والاستمتاع , ومن خلفك الاشجار والورود أشكال والوان .
نصف ساعه ونحن نلاعب البط والوز والمطر من فوقنا ونحن مستمتعين ولا كأنه في مطر .
توغلنا في الحديقة وإذ ببساط أخضر كبير يشرح الخاطر ..
وفي اخره تل وفوق التل كافيه ومطعم يطل على كامل الحديقة ( يا عيني يا عيني )
الاب / ممكن نأخذ كم كرسي بره ؟
فتعجب عامل الكافي من طلب الاب , فالمطر مستمر , والمنطق أن تجلس داخل المحل لا خارجه !! فوافق .
ما يدري الاخ أن المطر والخضار ذا نشوفه بالافلام فقط !!
ساعه كامله من السواليف .. والمتعه .. منظر يرد الروح
سناكات .. كافي لاتيه .. ايس كريم .. عصيرات
بعدها توجهنا إلى الهدف الثالث ( حديقة الحيوانات )
وهي تعتبر داخل الحديقة ولكن باب الدخول من خارج الحديقة .. ربع ساعه وصلنا ..
الموظف / الحديقة تحتاج ساعتين على الأقل عشان تخلصونها !! وأنتم جايين بوقت متأخر !! واحتمال ما تشوفون الحيوانات , لانها بتكون داخل بيتها بسبب المطر .
قالت المدام / خلينا نلحق باقي البرنامج , لا يقفل علينا السوق كمان .
رجعنا مخترقين الحديقة وبدأنا بشارع ( ريجنت )
شارع طوووويل والمطر لا يزال يتساقط بين الحين والاخر , رأينا العديد من السفارات الاجنبية . محطة bbc المعروفه وكان عندها ستار بكس ريحنا فيه , ما اتعودنا على المشي الكثير
وصلنا الساعة السابعة مساء للهدف الرابع ( شارع اكسفورد )
شارع التسوق المشهور .. كانت أغلب المحلات على وشك الاغلاق , والبعض منها أغلق ..
كملنا المسير مع وعد بالرجوع .
الاب يكلم زوجته بصوت منخفض / لا تطالعين يسار !!
فتعجبت المدام وقالت / ايش فيه !!
فرد الاب / على يسارك محل (هامليز ) أكبر محل ألعاب في لندن , لو يشوفه ولدك الصغير ذا والله ننشب في المحل ما نطلع الا بكره !!
توجهنا نحو الهدف الخامس ( ساحة البيكادلي )
ملتقى عدة شوارع .. عروض فنية في الساحه
الساحة تكون بالمساء أجمل مع الأضواء والشاشات الكبيره
جلسنا حول الساعه
بلغ بنا التعب والجوع .. أعتقد مشينا خمسين كيلو هذا اليوم !!
رجعنا الشقه بالمترو .. كان يوجد اللي ما يتسمى ( ماك ) جنب الشقه .. تعشينا .
يا بنات ناموا !!
انتظر يابابا .. نحمل السنابات !!
يادي السنابات !!
يابنات بكره بنروح استوديوهات ( هاري بوتر ) وتراها خارج لندن .
دخلنا المبنى وكان الجميع في شوق لمعرفة ما بداخل هذي الاستوديوهات
ويا لطيف الطف !!
400 شخص وجدناهم أمامنا !! سرى طوووووويل !!
الناس جايه من بدري !!
كان الدخول على دفعات وحسب الموعد .. ولكثرة الناس دخلنا تقريباً الساعه الواحده والربع !!
هذي غرفة هاري بوتر , وهذا مكتب الساحر (دمبلدور ) وهذي وهذي ..
وهذا شفناه بالجزء الاول , وهذا فاكره من الجزء الثالث , وغيره وغيره ..
الصورة الاخيره / للقصر الرئيسي الذي تدور أحداث الفلم فيه , وتلاحظون أن حجمه صغير !!
والكمبيوتر والتقنية الحديثة تكفلت بالباقي !!
بابا ابغى العب بالعصا السحريه .. فين ؟
يوجد ركن لتعليم الاطفال كيفية تحريك العصا السحريه , وهاتك يا تصوير وسنابات .
كل اللي شفته بالاجزاء الثمانيه للفلم تراه امامك .. السيارات والسيوف والحيوانات والوحوش
حتى لعبة الشطرنج بحجمها الكبير موجوده !!
كل شئ كل شئ ..
في بداية الجوله قال أحد المشرفين ان الوقت المتوقع للجوله 3 ساعات !!
تعجب الاب ومعه عائلته من ذلك
معقوله 3 ساعات !! ساعه بالكثير ونخلص .. ايش حنشوف يعني !!
3 ساعات ويا دوب خلصنا
3 ساعات من السحر والخيال
انبهار بالتقنية والمعرفه .. وكيفية تأثير الكمبيوتر وتطبيقاته ..
انبهار بعدد الاشخاص اللذين نفذوا الفلم ..
انبهار بكمية المواد المستخدمه في صناعة الفلم ..
انبهار بكيفية صناعته واخراجه !!
في نهاية الجولة توجد غرف بها المكنسة السحريه الطائرة ,, يجلس عليها الشخص وتتمايل به يمين ويسار .. تطلع له صوره أو فيديو ولها خلفية سماء وبحر وقصر وكله بسعره , ذكرى جميله جداً .
قصر باكنغهام هو المقر الرسمي لملوك بريطانيا , وحاليا يعتبر مقر السكن الرسمي لملكة بريطانيا الملكة إليزابيث الثانية ..
وهو يعتبر مكاناً لجل الأحداث المتصلة بالعائلة البريطانية المالكة، ومكاناً لانعقاد العديد من الإجتماعات وزيارات قادة الدول ..
بالإضافة لكونه مزار سياحي ..
زين قصر باكنجهام بالعديد من التحف الفنية التي لا تقدر بثمن , والتي تشكل جزءاً من المجموعة الملكية, أحد أهم المجموعات الفنية في العالم .
وفي شهري أغسطس وسبتمبر من كل عام ، عندما تسافر الملكة إلى اسكتلندا للإقامة في بالمورال ،
يفتح قصر باكنجهام أبوابه للجمهور لمشاهدة غرفة الأنيقة الـ 19، وقاعة الاحتفالات الفاخرة وحدائق القصر التي تعد أكبر حدائق خاصة في العالم.
يمكن زيارة غاليري الملكة , والاسطبلات الملكية التي تؤوي الخيول الملكية طوال العام ,
كما تجري مراسم تغيير الحرس الشهيرة خارج قصر باكنجهام في الصيف يوميا وفي الشتاء كل يومين ..
وتجد السواح مكتظين امام ابواب القصر لمشاهدة هذا الحدث مع تواجد الشرطة لتنظيم السير .
بعد هذه المقدمه من الاب قالت المدام / معقوله بنشوف قصر ملكه بريطانيا ؟؟
فتبسم الاب وقال / نعم ولكن جزئي .. بمعنى أن المسموح فقط كما قلت هو ثلث القصر حوالي 19 غرفه ..
وأزيدكم من الشعر بيت , عندما دخلت على موقعهم بالنت لشراء التذاكر ذكروا أن الملكة اليزابيث هذا العام سيبلغ عمرها 90 عام .. وسيكون هناك عرض لملابس الملكة التي ارتدتها طيلة حياتها .. وترى موعد زيارتنا للقصر الساعة ( 11.45 ) ..
وياليت الاب لم يحجز على هذا الموعد !!!
انطلقنا بالمترو كالعادة بعد شحن بطاقات المترو من المكائن الموجودة بالمترو
نزلنا في محطة مترو ( قرين بارك GREEN PARK STATION ) القريبة من القصر
البنت الكبرى / ما شاء الله هذي الحديقة مليانه !! عكس حديقة ريجنت بارك !!
فقال الاب / بسبب الشمس اللي طالعه فوق راسنا اليوم !! ما صدقوا ها الانجليز وهاتك يا تبطح على الزرع ومقابلين أشعة الشمس !!
فقالت الام / نعم صحيح , يوم ريجنت بارك كان مطر , عشان كذا كانت الحديقة شبه فاضيه
أخرج الكل نظاراتهم الشمسية بعد أربعة أيام من بقائها في الشنط ههههه , وتوجهوا نحو القصر مخترقين الحديقة
ويالطيف الطف مليون مره !!!
خمسة الاف شخص امام القصر !!! وحوله وفوقه وتحته !! ويمكن أكثر من خمسة الاف شخص !!!
تعجبت المدام وقالت كل هؤلاء سيزورون القصر !!
فتذكر الاب أن تغيير حرس القصر يكون 11.30 أي قبل موعدهم بربع ساعه , وقال لم أكن اتوقع أن تغيير الحرس وشوية خيول بيجيبون كل ها البشر !!!
قالت المدام بقلق / الان كيف بندخل القصر ؟؟ لا يروح علينا الموعد , تعرف الانجليو ونظامهم !!
احتار الاب , ولم يعرف أين بوابة الدخول , ولم يجد أحد يسأله !! فالعسكر مشغولين بتنظيم الناس , وما حد يعطيك وجه !!
اخترقت العائلة الصفوف متوجهة نحو البوابة الرئيسية لعله يكون باب الدخول , وبعد عدة محاولات لسؤال المشرفين والعسكر , أخبرهم أحدهم أن باب الدخول في الجهة الجانبية للقصر , وان عليهم الدوران حول القصر والحديقة للوصول للباب القريب ..
تلاحظون في الصوره أعلاه ان باب الدخول كان قريب من البوابه الرئيسيه ولكن العسكري لف بنا لفه محترمه
20 دقيقة سيرا ً على الاقدام والعائلة تبرطم ومحتقنه على العسكري !!
وين الباب !! وين الباب !!
راح الموعد علينا ! راح الموعد علينا !!
واخيراً وصلنا الساعة الواحده ظهراً وموعد دخولنا قبل ذلك بساعه وربع !!!
عند البوابه أخرج الاب تذاكر الدخول مطبوعة من النت , رحب المشرف وتبسم وقال / انتم حاجزين كمان دخول ملابس الملكة . الدخول القادم سيكون الساعه 2 , وبعدها ستدخلون للقصر ,
زين ما جاب سيرة ان احنا متأخرين !!
باقي ساعه على الساعه 2 , وكان بالقرب من البوابة كافيه ..
3 ساندوتش بيض وجبنه , الواحد 6 باوند !! يعني 18 ريال الواحد !!
على أساس انه ساندوتش ملكي جنب القصر !!! الله يخلي كافتيريا القريات الواحد 2 ريال فقط ويزود الشطه كمان
دخلت العائلة الساعه 2 وكانت البداية بفساتين الملكة
وبعدها حديقة القصر , تعجب الاب عندما رأى مطعم وكافيه ملاصق للقصر داخل الحديقة !!!
وكراسي وناس جالسه ولا كأنهم في القصر الملكي !!!
استمرت الجولة حوالي ساعتين ونصف .. وبعدها محل وهدايا يبيع تذكارات راقيه عليها شعار القصر الملكي
اشترينا عسل ومربى وشكولاته وبعض التذكارات ..
وبعدها توجهنا للهدف الثاني الذي يقع بالقرب من القصر
حديقة ( سانت جيمس بارك ) St James's Park
حديقه صغيره جميله تتميز بوجود ألعاب خفيفه للأطفال .. وبحيره كمان صغيره بها بط ووز ..
المدام / معاك تذاكر ( عرض شريك ) ؟
تصنم الاب في مكانه وفتح عينيه منصدماً / افاااا , كل يوم اجيبها معايا وكنت أخاف انها تضيع مني , ولما صار دورها نسيت أخذها
..
قالت المدام / طيب الحين وين ؟؟ كنا مرتبين نشوف عرض شريك , وبعدها نجلس قدام لندن آي وساعة بيج بن !!
فقال الاب / ماعليك نروح لهم .. ترى كلها 20 دقيقة مشي واحنا قدامهم
وبالفعل وقفت العائلة فوق جسر ( ويست منستر )
منظر في غاية الروعه والجمال .. والسفن من تحتنا تقطع نهر التايمز
عادت الغيوم وبكثافه وأعطت للمنظر جمال مختلف
قال الاب / الان الساعه حول السابعه وباقي ساعتين على المغيب .. خلونا نروح حديقة هايد بارك ..
من محطة مترو ( ويست منستر ) إلى محطة مترو ( هايد بارك كورنر )
وصلنا الحديقة ويا عيني ياعيني
خضار وورود وفراشات وسنجاب
بشر وعالم وركض ورياضه ودراجات
هذه الصورة تم تصغيرها . الحجم الافتراضي لها هو 1200x778.
توجهت العائلة للبحيره الكبيره
أمامها تله مرتفعه تطل علىيها بها كراسي ..
اها شوفوا ربعنا .. التله كلها مليانه ربعنا
فرشات وشاهي وقهوه .. وأطفالهم جري ولعب حولهم على البساط الاخضر وخلف الاشجار ..
تبسم الاب وأحس بالطمأنينه ..
ربما لا يجب البعض العرب ,, وربما يتجنبهم البعض.. وقد يتعجب البعض من رأيي خصوصا وانا لدي بنات وربما يتعرضن لبعض المضايقات .. ولكن الفتاه المؤدبه المحتشمه لن يتعرض لها أحد أو يكلمها .. الا اذا بدر منها ما يشجع الشاب على المغامره !!
جلسنا والغيوم فوقنا وبدأ الجو يبرد قليلاً .. كان يجلس بالقرب منا عائله , فأرسلت الام ولدها ببعض القهوه لنا ..
يا زين ربعنا
ويا زين طعم القهوه بالهايد بارك
والغيوم فوقنا والبحيرة امامنا والخضار من حولنا
المدام / شوف العائلة ذي مشيت .. يا بنات جيبوا الكراسي اللي تركوها .
وفجأة طلع شخص أفريقي .. من شجره من فوقها من تحتها من خلفها !! والله ماندري من وين طلع
لو سمحتم الكرسي عشره باوند !!!!
رفضنا وأخذ كراسيه وراح
صارت الساعه تسعه وبرد الجو شيئاً فشيئاً .. وهاجم الجوع بطن العائلة
توجهنا نحو شارع العرب قاصدين مطعم ( زعفران ) العراقي
قالت المدام / المطعم مليان وكمان انتظار بره !! فقالت البنت الكبرى / دليل انه زين يا ماما
هدف الاب كان أكلة المسقوف العراقية المشهورة .. وهي السمك المشوي
كان اختيار موفق .. وكل الأكل كان لذيذ ... الرز والكباب والايدام والسمك المشوي كان جداً لذيذ
كان الحساب أيضاً للمرة الرابعة على التوالي ( 70 ) باوند
.. طبعاً ينقص اثنين باوند يزيد اثنين باوند , لكن متوسط الحساب لعائلة خمسة أشخاص وطفل 6 سنوات ( 70 ) باوند ..
أخذت المدام ابنائها وذهبت للشقه , وبقي الاب يتمشى في شارع العرب .. يهضم المسقوف .. ثم جلس يتفرج على الرايح والجاي مع مشروب السفن اب , ويتبادل الحديث مع الجالسين من الاخوة العرب بجواره .
