الحب بريطانيا

[روكا]

اخيرا قررت اسوي تقرير عن الحب بريطانيا اول روحه لي 2012
وارد لو القليل للمنتدى الغالي الي كان سبب بعد الله في اني اشوف الجزء الاخر من العالم

بعد مشاورات بيني وبين نفسي لمده طويله قررت اني اطرح اول زياره لي الى المملكة المتحدة (لندن)
مواقف طريفه و عفويه وسفريه لشخص اول مره يطلع من ديرته
غطيت فيها اغلب معالم لندن
اذا الموضوع ما كان فيه فائده اتمنى ان يرسم ابتسامه على وجه اي شخص


وقبل لا ابدأ لا تقرأ التقرير الا وانت فاضي ومعك شي تحرك فيه شدوقك

الموضوع احكي فيه عن تجربتي فقط ولكم حرية التسميه تقرير ، قصه ، الخ..
ان غلطت في اي وصف ارجو التصحيح
و ارجو انو تصبرو شوي لين يتحمل كامل الموضوع بيكون ثقيل التصفح

استمتعو

​

قبل ابدأ احب انوهـ على كم شغله فالسفريه :-


1: لم استخدم الاندرجراوند او الباصات.

2: جميع المعالم السياحيه تم زيارتها عن طريق المشي يعني كعابي ( السبب تعرفونه من الموضوع )
ونقطة انطلاقي كانت الفندق الي موقعه قريب من الهايدبارك ولكم ان تتصورون المسافات الي مشيتها .

3: تم الاستعانه بخرائط الايفون .

4: قبل اي يوم راح يكون فيه خريطه موضح عليها الطريق الي مشيت معه
الاحمر المتقطع خط الروحه ------
الاحمر المتصل خط الرجعه ـــــــــــ

5: كل معلم سياحي يتم ذكره
راح يكون قبله :
*موقعه على الانترنت وحجز التذاكر اونلاين
*اقرب محطة اندرجراوند للمعلم
*اوقات العمل ولا تشمل ايام الويك اند والعطل .

6: السفر كان من 30 نوفمبر 2012 الى 17 ديسمبر 2012

[gdwl]التخطيط والرغبه[/gdwl]


عشق بريطانيا منذ الصغر ليش ما ادري كل واحد وله عشق و احلام متعلقه بمكان ما !!


وراح يكون التقرير على شكل نقاط
الاسعار والميزانيه نسيتها وراح اذكر الي اتذكره
وبسم الله نبدأ

2010 طحت على منتدى العرب المسافرون

بديت اتصفح واتابع تقارير وكنت استمتع فالقراءه ومتابع لكل التقارير فالبوابه البريطانية
كل يوم تقريبا الساعه ٣ الفجر اتكي على المنتدى ومعاي كوب قهوه او شاي
كان معي قلم ودفتر ملاحظات اي شي يعجبني اسجله اي موقع سياحي او مدينه حلوه اسجلها
الاسعار كنت اسجلها
بعد ما تشبعت بالمعلومات وجمعت معلومات وسويت مخطط صغير
بديت بالاستفسارات
وخاصه الاستفسارات المتعلقه بالفيزا
وما قصرو الاخوان هذيك الايام تم الاجابه على جميع استفساراتي

وبعدها جلست اخطط على رواقة الى 2012

بالاصح ما عمري طلعت خارج السعودية حتى الدول الخليجيه ما طلعت فكنت خايف والي زاد الخوف حاجز ضعف اللغة الانجليزية
كانت اللغة عندي ضعيفه ومحد راح يروح معي فخفت اتوهق
فكل مره اقول انتظر شوي

[gdwl]اجرائات استخراج الفيزا[/gdwl]

جاء ذاك اليوم فشهر اكتوبر 2012 وامسك القلم واتابع شرح لتقرير كيف اعبي الابلكيشن للفيزا البريطانيه
وبديت اشتغل واعبي الابلكيشن

قررت طبعا اني اعبي الابلكيشن بنفسي بدون الاستعانه بمكتب
لاني شفت تقارير كثير تقول سهله وما يحتاج مكاتب
وبالفعل كانت سهله ما عادا ان الابلكيشن كان انجليزي فكنت شغال اترجم الفقرات الي فيه

وبعد ما انتهيت الابلكيشن قلت خلني اشوف الطلبات الثانيه من صور وتعريف بالراتب وحجز موعد و و و الخ ،

وبديت حبه حبه لين صارت جميع الطلبات مكتمله

وكان عندي خوف شديد من الروحه لمكتب استخراج التأشيرات الموحد فالرياض
لاني ما شفت اي تقرير يشرح ويتكلم بالتفصيل عن الاجراآت الي داخل المركز
فكنت احسب الشغله ليش رايح وكيف ومين وتعرف مين
ولازم انجليزي وتفتيش و و الخ !
وكنت احسب المركز هو السفاره نفسها !!!


توكلت على الله وكان موعدي 8 الصبح
ومشيت من الساعه 6 لان اول مره وحبيت اسوي اني مجتهد
والحمدلله طلعت خيره لاني رحت موقعهم القديم وبعد لف و دوران دلوني على الموقع الجديد الي هو الحالي فأم الحمام
وبختصر الموضوع لاني كتبت فالمنتدى القديم تقرير عن تجربتي بالتفصيل
ومحد كان كاتب مثله فكل المنتديات
التقرير بالصور وشرح من اول ما تدخل مع الباب الين تخرج
علشان الي بيكون مثل حالتي قبل التقديم يتطمن ويتوكل على الله

وكانت الامور سهالات وطلعت الفيزا خلال 4 ايام

[gdwl]وقت الجد وحجز التذاكر وما قبل السفر [/gdwl]



بديت اول شي اتقضى ملابس لان شهر ديسمبر برد وموسم ثلوج

بعد الملابس جاء وقت اني اشتري كاميرا احترافيه اوثــق فيها سفرتي
وكنت ابحث عن الافضل بسعر معقول
و استقريت واشتريت كانون D650
كاميرا جميله فالصور وانصح فيها فوقتها الحين فيه الافضل
لكن الفيديو حقها ما عرفتله مرات يضبط ومرات يصور على مزاجه

بعد ما خلصت شوبنق واخذت الكاميرا جاء الوقت الي احجز فيه تذكره اي عادي وشفيكم مستغربين

انا من النوع الي ما يحجز تذاكر طيران وفنادق الا قبل السفره بكم يوم​

واكون قبلها اشيك والحمدلله تطلع نفس الاسعار وكنت استغرب من الناس الي تقول تحجز بدري ارخص

ممكن يحجزون قبلها ب ٨ شهور واكثر
يمكن مسألة حظ لا احد يصير مثلي ويتوهق



[gdwl]موقف[/gdwl]

كنت عند واحد من اخوياي فالرياض بما اني مو من سكان الرياض كنت عنده والرجال ما قصر جهزلي الشنطه ورتب الشنطه واعطاني نصايح ايش اخذ معي وايش اخلي
لانو ما شاءالله رايح لكل الدول قبلي
وراعي سفريات

بعد ما خلصنا ترتيب الشنطه

طلعت الايباد وفتحت موقع الخطوط السعودية
وقالي تشيك على حجزك قلت لا توني بحجز هههههههه
بغى يصفقني
المهم حجزت اليوم الي بعده رايح جاي بقيمة 2600 ريال على الخطوط السعودية

بعد ما دفعت قيمة التذكره وخلصت الشعور لا يوصف الي هو ما فيه تراجع ورايح رايح الله لا يعوق بشر

[gdwl]المطار ويوم السفر الذي لن ينسى[/gdwl]

[gdwl]
30/11/2012[/gdwl]


كانت رحلتي فالمساء الساعه 11 بتوقيت السعودية

طلعت الى مطار الملك خالد الدولي بالرياض بدري من الساعه 8 مساءً
وخلصت اموري ورحت الراجحي لصرف العملات واخذت من عنده مبلغ صغير كاش بحدود 600 باوند
وهنا بعض ما تبقى من الفلوس ، صوره متأخره

وجلست انتظر موعد صعود الطائره
طبعا ما يحتاج اوصف حماس لشخص اول مره يطلع من ديرته
ومايحتاج اوصف شعور المسافر لاوربا وبالتحديد لبريطانيا
اخيرا الحلم بيتحقق لندن !!



[gdwl]موقف[/gdwl]

من الحماس كنت جالس على الكرسي قدام البوابه وحاط الفلوس الي صرفتها بين رجولي وكنت اطقطق فالجوال
وتم النداء للصعود للطائره ،، وكانت الكلمات لا توصف
رحله رقم ….. المتجهه الى لندن هيثرو ، وااااو شعور عجيب
ما اقدر اوصفه
قمة ونسيت الفلوس على الكرسي ههههههه واتذكر ناس من الجنسيه الهنديه ينادون علي وانا مسوي ثقيل ومتجه للبوابه

اخر شي واحد مسكني مع ايدي وقال فلوسك يالطيب
انا صار وجهي مدري كيف !!
شكرته بقوه وماعاد تفرق معي اهم شي ادخل الطائره

[gdwl]في الطائره[/gdwl]

المهم ركبنا الطياره واقلعت وكانت شبه فاضيه ما كان فيه ناس كثير وكنت ما خذ راحتي للاخر
سرداحي مرداحي مره اتسدح ومره اتشقلب وتاره رجولي طالعه فالمرر

الخطوط السعوديه بعد عدة تجارب بشكل عام فالرحلات الدوليه حلوه ما عليها كلام خصوصا ما فيه ترانزيت

وزعو علينا كرت دخول بريطانيا وعبيته من بدري وارتحت علشان فمطار هيثرو اصف طابور وخلاص
بعض الناس ينسى يطلب الكرت فالطائره وما يعبيه او ما يوزعونه من الاساس، صارت كثير انهم ما يوزعونه ،
او يوزعونه مع الهبوط
او ما يوزعونه نهائي ويلقاء مثله قبل منطقة الجوازات وتعبي ويروح وقتك على الفاضي



الرحله كانت كويسه مع الخطوط السعودية وما فيها ، شي مريحه

[gdwl]الوصول لمطار هيثرو واجرائات الدخول[/gdwl]

بدينا بالهبوط لمطار هيثرو وانا مع شباك الطائره اشوف الطبيعه وابداع الخالق
نقله نوعيه من تراب وطعوس الى غيوم وطبيعه آسف لكنها حقيقه

نزلت للمطار وكنت مثل الاطرش بالزفه الحق وراء الناس لين وصلنا منطقة الجوازات

وصفيت معهم وخلال الانتظار كنت اراجع الاجابات والكلمات الي حفظتها ههههههههههه
يوم جاء دوري نسيت كل شي وخليت الاجتهاد ينطلق من عندي
كانت اسئله خفيفه وسريعه ليش جاي ووين بتروح وتعرف احد ووين بتسكن وكم معك كاش واعطيته الاجوبه وبعدها ويلكوم تو لندن
الكلمه الي خلتني اخق بقوه

رحت اخذ الشنطه وللحين مو مصدق
اخذت الشنطه وطلعت لمنطقة التكاسي
كنت افكر اخذ اندرجراوند بس قلت اخاف اجيب العيد واضيع وما جربته قبل كذا
قلت اختصر الموضوع واخذ تاكسي
اخذت تكسي تقريبا ب ٦٠ باوند

[gdwl]الوصول الى الفندق و الطريق للهايدبارك و شارع العرب و شريحة الانترنت[/gdwl]

وصلت للفندق قالو ما فيه تسجيل دخول الا 2 الظهر قلت يالله ما عليه
حطيت شنطتي عندهم وما كان فالجوال انترنت ولا مفعل شي
فكان شغلي بدائي سألت الريسبشن عن الهايدبارك والمنطقه المحيطه بالفندق ايش فيها
واحلى شي الشغل البدائي خريطه وتخطيط بالقلم وكل شوي موقف واشيك فالخريطه لها متعه غير
وما قصرو خدومين جدا وضحولي موقعي الحالي والهايدبارك والمنطقة المحيطه
عرفو اني داج ويمكن اجيب العيد
اعطوني كرت الفندق علشان اذا ضيعت اخذ تاكسي ويرجعني
طلعت من الفندق بأتجاه الهايدبارك
مشيت بعد باب الفندق ٢٠ متر ولقيت واحد واقف واسأله الهايدبارك من هنا صح هههههههه ايه علشان ما اضيع وكل ٥٠ متر اسأل وصلت الهايدبارك كان شعور الهيبه حاظر اشجار كبيره عملاقة خضراء مع سماء ملبده بالغيوم وجو بارد وكراسي جميله

جلست اتمشى فالهايدبارك وتقريبا غطيت نصها طبعا متحمس وما فيه اي تعب
اكتشفت بعدها اني ما مشيت شي من كبر الحديقه
بعدها جلست استريح وطلعت الماب الي معي وشفت شارع العرب قريب مو بعيد كثير كنت اسمع عنه كثير وكنت واعد نفسي اني بروحله مره وحده وبعدها خلاص ( ما احب اشوف ربعنا براء ) احس للحين مو فلندن لو شفت احد من ربعنا
والغرض من الروحه علشان اخذ شريحة بيانات
واذا لقيت محل فيه شخص يتكلم عربي باخذ من عنده علشان يفعل لي البيانات الانترنت ويضبط وضعي

دخلت محل والله ناسي اسمه وناسي موقعه بالضبط لكن لقيت وحده بنت حلال متحجبه قلت لها في شريحة جوال قالت ايه قلت وش افضل شي علشان الانترنت قالت الي يريحك معي فودافون وتمام وقلت لها عادي تشتغل فاسكوتلندا هههههه اول مره اروح عادي لازم استفسارات
قالت يب طبعاً المحادثه بالانجليزي

بعدها اتذكر توهقت في كلمة ما عرفت اقولها بالانجليزي وقلت تتكلمين عربي ضكت وقالت ايه
عاد انا ما انعطي وجهه دقيت سوالف بالعربي واستفسر عن اماكن قريبه ولا بعيده وكيف اروح
المهم ما قصرت اعطتني خرايط وكتيب باي باي لندن وكلها ببلاش
واشتغل النت وشكرتها ومشيت
طبعا رجعت لنفس المحل واخذت من عنده شريحه لكن في زياره ثانيه
لحسن اخلاقهم
للاسف ما اعرف اسم المحل اعرف شكله واذا وصلت شارع العرب اعرف اروحله

والرجوع كان بتجاه الهايدبارك وجاء موعد تسجيل الدخول للفندق وراح الوقت وما حسيت
ورجعت للهايدبارك
والمره هذي استلمتها كلها ما خليت شبر فيها الا مريته واترككم مع الصور من جميع ارجاء الهايدبارك Hyde park
و حدائق وقصر كنسينغتون kensington gardens
Kensington Palace

وهنا تمثال
The Albert Memorial

وهنا Royal Albert Hall

Kensington Palace

Kensington Palace Official Website - Tickets, Events & History

كانو يجهزون للكريسماس بالشجر والانوار الي فيه

وكملت جولتي وبعض الصور من الجوله

بعدها قلت ياولد خلني ارجع الفندق خلاص يكفي
لا اضيع

رجعت الفندق على الساعه ٤ او ٥ ما اتذكر بالضبط
مريت سوبرماركت واخذت من عنده عصير و بطاطس ديريتوس
طبعاً اول وجبه لي من اول ما وصلت الى لندن من الفرحه نسيت حتى اشرب

ما رحت مطعم لاني خايف من الحلال والحرام وما ادري وش الوجبات
ومن هالامور
ما دريت ان الوضع سهالات
المهم وصلت الفندق
قالو حسبناك سحبت توك تجي هههههههه

اخذت شور ساخن اليم بعد برد اليم
بعدها سبرايت وبطاطس وخريطه لندن

وبديت اخطط لليوم الثاني وش بيكون ووين اروح
عاد الحين شكلي بتصفق من جد

ايه عادي مثل حجز الطيران ما حجزت الا قبل السفره بيوم والحين بدون مخطط
كنت مسوي مخطط بس استغنيت عنه اخر لحظه وقلت اجرب شغل اني اخطط كل نهاية يوم لليوم الجديد
وكنت مسجل اههم الاماكن السياحيه فقط
وعلى الخريطه
اشوف القريبه من بعض واحطها من ضمن مخطط اليوم القادم
كنت استمتع بالشي هذا
بعد ما خلصت حطيت راسي على المخده وما حسيت الا وانا صاحي لليوم الثاني في لندن

​

 

[روكا]

[gdwl]اليوم الرابع[/gdwl]

3 ديسمبر 2102

المخطط كالتالي :-

اكواريوم لندن
لندن دنجن
جسر البرج
المرور بجانب لندن آي + بق بن
عشاء من كنتاكي
سوبرماركت


صورة المخطط

اليوم الرابع وما زال النشاط مستمر وما زال اصراري على الروحه للمعالم السياحيه مشي
علشان اتفادا موقف الضياع الي صارلي فالاندرجراوند

صحيت الصبح اخذتلي فطور خفيف ساندوتش دجاج مع عصير

وطلعت من الفندق
بأتجاه الهايدبارك
واقتحمت الهايدبارك واحلى تمشيه فيها لين وصلت عند محطة Hyde Park Corner

ومسكت شارع البيكاديلي

لين اخذت يمين مع شارع James's St
وسيده لين قابلني شارع Pall Mall واخذت من عنده يسار

انا حاليا في تخبط مع الخرائط كل شوي كان يطلع مكان وطريق جديد
انا من زود الحرص قلت بمشي معه علشان لا اضيع

وتعديت الوجهه الي كنت بروح لها الي هي الاكواريم

وفجأه طلعت من ميدان ترافلجار

ومسكت شارع Northumberland Ave
متجه لنهر التايمز
وصلت للنهر واطالع يمين واشوف لندن آي والبق بن واخذت لها صوره للحين مامليت من تصويرها

وما صدقت على الله قلت خلاص انا دليله فلندن

وعبرت مع جسر Golden Jubilee Bridges
للجهه الثانيه من النهر الي فيها الاكواريوم وعين لندن

ومشيت لين وصلت للاكواريوم


مواعيد العمل من 10 الصبح الى 7 المساء

اقرب محطة اندرجراوند Westminster

للامانه ما استهواني كثير مليت بسرعه حاولت اني اطالع يمين ويسار علشان احلل مبلغ التذكره
واخذت كم صوره لكن اغلب المكان كان ظلام
وانا ما قصرت شغال بالفلاش اتوقع ممنوع التصوير بفلاش لسلامة الاسماك

بس انا ولا همني

بعدها خلصة الجوله وكالعاده تنتهي بمحل فيها اشياء تذكاريه وبصراحه فيه اشياد احسن من الاكواريوم

جلست فالمحل اتفرج نص الوقت الي قضيته داخل الاكواريوم ومع ذالك ما شريت شي
وطلعت من المحل والجو فيه بروده لا يعلمها الا الله جاكيت قفازات دبل ملابس ما ينفع البرد داخل داخل فالعظام


قلت اخذ كم صوره من زاويه جديده للبق بن

الصور هذي بعد جسر Westminster Bridge
رجعت وكملت مع امتداده يعني خليت الجسر وراي ولندن آي يسار وكملت خلف لندن آي الخريطه فوق توضح

كملت مشي لين صار فندق بارك بلازا قدامي

كملت سيده وتعديته وصار خلفي الفندق ومشيت ومشيت بمتعه وبمناظر تنسي الواحد اي تعب وعطش وجوع

وصلت لجسر لندن او لندن بردج وكان على يساري بس قلت اول شي اروح الى London Dungeon
كملت طريقي شوي ووصلتوما كان فيه زحمه وما صدقت على الله سيده دخلت


مواعيد العمل من 10 صباحا الى 5 مساءً
تنبيه الموقع الحالي والي فالمخطط قديم
وضحت فالمخطط الموقع الجديد الي هو بجنب الاكواريوم

اقرب محطة قطارات Westminster

طبعا دخلت وخلوني انتظر لان فيه ناس قدامي فالنظام كان يدخلون مجموعه مجموعه
وانتظرت شوي لين تجمعو ناس معي ودخلونا وللآسف التصوير كان ممنوع لان فيه اشياء دمويه ووسائل تعذيب من القرون الوسطى
عاد انا خربتها مع الاكواريوم والسمك الي اعميته بالفلاش قلت ياولد صوره وحده ما تظر

كان جدا ممتع الجوله فيه نستني الجوع والبرد والتعب
واحلى شي فيه اللعبه الي فالاخير الي تطلع فوق وفجأه بدون سابق انذار تنزل تحت وبقوه كان الواحد طايح من فوق بيت
عاد كان شعور عجيب وناسه وقمطه بنفس الوقت علشان كذا قبل لا تركبونها بيخلونكم تحطون جوالاتكم وشنطكم فمنطقه قبل ادخول للعبه

وطلعت وكالعاده متجر
لفيت فيه فيه اشياء حلوه كثير واخذت لي كم غرض بس يوم شف الصور الحين استحيت ما اقدر انزلها

بعد ما طلعت كان فيه برج اعجبني قلت خلني اروح اصوره

لين وصلت وكان برج شارد الي كان لي زياره له فزياره لاحقه
طبعا كنت اشوفه اقول واو ايش هذا ما كنت اعرف اسمه

رجعت بعدها لجسر البرج Tower Bridge
وكان جميل جدا فالشكل
وكان فيه دخول للجسر والصعود للاعلى لكن للآسف ما كنت ادري عن الشي هذا


مواعيد العمل من 10 صباحاً الى 5 ونص مساءً

اقرب محطة قطارات London Bridge

كان فيه بجانب الجسر الججهه المقابله المنطقه التجاريه فلندن الي فيها الابراج واخذت كم صوره لها
طبعا فيه ابراج مبين انها تنبني حاليا خلصت

وفالجهه المقابله من النهر كانت البارجه بلفاستHMS Belfast والي كان لي زياره لها فروحه ثانيه


مواعيد الدخول من 10 صباحا الى 5 مساءً

وانصح فيها وبقوه ممتعه

رجعت من الجسر واخذت يمين متجهه الى مبنى بلدية لندن city Hall
شكل المبنى جميل والمنطقه الي حولها حلوها كلها مباني تجاريه كبيره

وصلت وكان المكان مليان ناس تصور النهر وجسر البرج والمنطقه التجاريه فالجهه المقابله من النهر

جسر لندن ( لندن بردج ) من الجنب

طبعا لقيت كوفي شوب حلو وفيه جلسات جميله اخذت هوت شكولت ورجعت اشوف الناس مستعدين يصورون شي فالنهر مدري وشو رحت مسرع ما ادري وش السالفه
فالحلقه الاخيره اتضح ان الجسر متحرك وينفتح كبوابه للسفن للعبور شي اول مره ادري فيه

اول مره اشوف سفينه عالطبيعه

وحل المساء وبدت اللمبات تولع وكان منظر المساء شي جميل والمنطقه كانت جدا حلوه

وبهنا تنتهي جولتي ورجعت مع نفس الطريق وما كان لي خلق اصور ، حطيت الكاميرا فالشنطه وجالس استمتع والجوع ذبحني
اخذت صوره وحده وبالجوال

وانا فالطريق جالس اقول فنفسي والله لارجع سيده لكنتاكي وبخربها واخذ سطل مليان دجاج هههههههههه مع بوب كورن

عرفتوه صح وهذا صوره له

وبما ان الكاتشب بفلوس وصغير من كنتاكي وما ينفع
قلت اخذ من السوبرماركت واحد كاتشب كبير مع بيبسي افضل

عاد ما يحتاج اقولكم وش صار

بعد الاكل تخطيط لليوم الخامس واحلى شور
وبعدها النوم
​

​

 

[روكا]

[gdwl]اليوم السابع [/gdwl]

6 ديسمبر الى 13 ديسمبر 2012

المخطط كالتالي :-


الذهاب الى محطة قطارات London Euston والذهاب من لندن الى جلاسجو
قضى ٧ ايام في جلاسجو

جلاسجو

مدينة بريطانية تقع في جنوب إسكتلندا ويبلغ عدد سكانها 607.192 نسمة هي أكبر مدن إسكتلندا وثالث أكبر مدن المملكة المتحدة.

الساعه ٤ الفجر
قلت امشي لمحطة London Euston
علشان الحق على القطار بدري وامشي بدري واوصل لجلاسجو بدري

مع العلم اني ما حجزت اون لاين ولا شي قلت اروح اقص من محل التذاكر او من الآله
اخذت تاكسي والى محطة London Euston

ما اتذكر كم اخذ اظن ١٥ باوند

[gdwl]موقف[/gdwl]


وصلت والدنيا ظلام اقصد المحطة نزلت واسحب فالشنطه الي يشوفها يشك ان معي مصيبه

شفت لوحة المحطة وراعي التاكسي قالي وين الاقي البوابات للمحطة الي كانت قدامي فعلياً ما يحتاج وصف

رحت اشوف البوابه الدنيا ظلام اخذت لفه على المحطه من الخارج طبعا تركت شنطتي وكل العفش فالجهه الاماميه من المحطه هههههه
صقيع مت من البرد ما عاد فيني اسحب الشنطه

تركتها واخذت لفه ما فيه اي بوابه
طلع فيه ٢٠ الف بوابه بس المحطه نفسها مقفله وما تفتح الا الساعه ٧ او ٧ ونص

والله وكيلكم رجعت للشنطه ولقيتها مكانها مسكت لي زاويه عند محل وحطيت الشنطه من جهه والجدار من جهه علشان البرد وجالس انتظر وانتظر وانتظر
صرت ارتجف مو اي رجفه صرت اهز الي يشوفوني يقول هذا يرقص ههههههه
والله ما امزح

بعد انتظار بدا الناس تجي وبعضهم معاهم زي البطانيات صغيره من البرد
الزبده اكلت هواء بارد لين قلت بس

فتحت المحطه دخلت سيده مو اخذ تذكره جالس ادور كوفي شوب ابغى شي حار
لقيت كوفي شوب اخذت هوت شوكلت ما نفع رجعت اخذ واحد ثاني ما نفع قلت اغير الكوفي شوب لا يقولون هذا انهبل
رحت كوفي شوب ثاني واخذت موكا اسوي تمويه هههههههه

الزبده اني ما زلت بردان وارتجف
حتى اتذكر اني تركت شنطتي وسط المحطه ورحت اركض ابغى شي ساخن من الكوفي شوب
رجعت للشنطه لقيت الحراس الي فالمحطه واقفين قريب منها
يوم شافوني قالو الشنطه لك قلت ايه قالو ليش تاركها هنا
قلت رحت اخذ شي حار

قالو ما تخليها في اي مكان مهما كان ممنوع

انا تآسفت وحاولت اني ما اخذ واعطي كثير خصوصا اني ما زلت ارتجف قلت لا يشكون فيني
اخذت الشنطه وللجهاز حق التذاكر
الي شكله زي هذا

وفيه الثاني حق virgin train

[gdwl]موقف[/gdwl]


يوم جيت اختار جلاسجو طلع لي اكثر من محطه
في السنترال
او المطار
او شارع كوين
انا خفت وقلت لا اجيب العيد واروح مدينه ثاني

كلها فجلاسجو اللهم ان النزول بيكون في مناطق مختلفه
ما كنت اعرف اول مره استخدم قطار

علشان لا اتوهق كان فيه وحده وراي قلت لها ابغى تذكره لجلاسجو بس ما لقيت جلاسجو فالخيارات

ما قلتلها الحقيقه علشان تضبطني

شوي وقالتلي وين تبي تنزل فجلاسجو
وقالتلي نفس الخيارات الي شفتها وتوهقت
انا رديت بكل برآه مدينة جلاسجو
قالت تبغى السنترال قلت ايه
وانا والله ما ادري وش الطبخه
وقالت خلاص ادفع
ودفعت حدود ١٢٥ باوند هذي ضريبه الي ما يحجز بدري

اخذت التذكره ورحت للموظف اسأل وين قطار جلاسجو
ما كنت اعرف ان فيه شاشات وتشوف الوقت ومدينه الوصول وهالامور

علمني الموظف الطريقه ورحت وجلست واقف قدام الشاشات لين لقيت جلاسجو
ومكتوب الوقت واي بلاتفورم
بعدها جاء القطار الي كان من شركة فيرجن

قطارارت فيرجن معروفه انها اقل توقف
فيه خيارات ثانيه لشركات القطارات بس مره متعبه اغلبها فيها تغيير قطار وتوقف كثير

وركبت ورحت مسكت كرسي فيه مدخل للشاحن

والشنطه اول ما دخلت فيه مكان مخصص لها قبل المقاعد حطيت الشنطه فيه

انا اللحظة هذي فيني شعور غريب عجيب ووناسه اول مره اركب قطار

انطلق القطار وسبحان الله مناظر ولا فالخيال طبيعه امطار ثلوج
رحلة ٥ ساعات ونصف بدون تغيير القطار
فقط توقف عند محطات معينه تحميل ركاب وامش
استمتعت بالمناظر
الى ان وصلنا جلاسجو
وهذي مقتطفات من القطار

البيوت عندهم ومنظر القرى شي اليم ودي اعيش هناك

[gdwl]الوصول الى جلاسجو والمخطط [/gdwl]

فعليا ما كان فيه مخطط خليتها تساهيل وعلى الكيف
خصوصا اني بقابل كم اسكتلندي اعرفهم من مده

والمخطط الي فوق توضيح للاماكن الي مريت عليها



شكل العمله الورقيه لاسكتلندا يختلف عن انجلترا
العملات الورقيه والمعدنيه
لكنها مقبوله في اي جزء من بريطانيا يعني ما تفرق عادي

وصلت جلاسجو اخذت تاكسي من محطة السنترال بـ ٦ باوند والى شقق كنت حاجز فيها


Dreamhouse Apartments Glasgow West End

كتبت تقرير وتقييم عن الشقق الي حاب يشوفه يتفظل

شقق في جلاسكو Dreamhouse Apartments Glasgow West End
http://www.arabtrvl.com/vb/t4032.html

[gdwl]موقف[/gdwl]

كانت تمطر اول ما وصلت والارض كان فيها طبقه جليد

قابلتني صاحبة الشقق اول ما نزلت من التاكسي

وقالت اساعدك فالشنطه قلت لا ثقيله انا بشيلها

قطعة الشارع وجيت بقطع وراها

وصار الي ما كان فالحسبان

ما كنت ادري ان فالارض جليد وقلبتها سكيتنق انا والشنطه

صاحبة الشقق ما قدرت تمسك نفسها ضحكت وقالت تبغى مساعده

انا اعطيتها ابتسامة الي مدرك الوضع

وقلت نو نو انا اوكي

والحمدلله وصلت للرصيف الي ما بغيت اوصله

حبيت الطف الجو و ارقع السالفه قلت فيه محل يبيع الجزم مانعه للتزحلق

عاد انا من جدي اذا هذس اولها كيف تاليها

دخلنا وسويت تشك ان وعرفتني على الشقه ومشت
وكانت اطلاله الشقه على التقاطع الي زحلقت فيه

وجالس اطالع للناس وابشركم حتى الناس يتزحلقون والي طايح والي ماسك عامود جلست ساعه كامله اضحك واطالع الناس

[gdwl]هنا عاد يبدأ كوكتيل من التمشيات مرات لحالي ومرات بصحبة شباب اسكتلنديين يعني ما فيه اي مخطط معين
راح ابدأ احط الصور للاماكن الي زرتها ونبدا[/gdwl]



احد اهم واجمل الاماكن في جلاسجو نهر كلايد River Clyde الي يقسم جلاسجو الى قسمين

والتمشيه جميله جدا عليه خصوصا ان فيه معالم كثيره تقع على النهر ، وانا كل يوم لازم امر عليه متعه

مباني شكلها غريب

وهنا جسر Squinty Bridge

ذي الصوره خقيت معها كيف التصوير بس والخلفيه والسياره

الصوره القادمه الي على اليمين مبنى SECC الي على اليسار تحت الانشاء ما ادري ايش بالضبط

مبنى الــ BBC

وهنا فندق Crowne Plaza Glasgow

موقعهم
Crowne Plaza Glasgow - Glasgow, United Kingdom

جسر للعبور للضفه المقابله وفيه جسور كثير

وهنا مبنيين الطويل Glasgow Science Centre مركز العلوم
والثاني المبنى الي كأنه دائري Cineworld Cinemas - Glasgow IMAX at GSC سينما

صور من بعيد لمنطقة

PARTICK

المبنى القادم هو قلب وروح صناعة السينما و التلفزيون في اسكتلندا

مبنى العلوم كان فيه زياره من روضه او مدرسه للاطفال

وهنا صور من زيارتي لمتحف الريفر سايد
Riverside Museum
متحف جميل عن وسائل النقل في بريطانيا ايامم زمان

وهنا صور من حديقة Kelvingrove Park الي كان فيها آثار للثلوج

شخص مع نزهه للكلب
وما كان منه الا ان اعطاني ابتسامه ( اشخاص ودودين جدا الاسكتلنديين )

اول مره اشوف ثلج اعطيته صور فجميع الوضعيات

نهاية الحديقة

صور من جوله في بعض الشوارع

هنا غيرت من الشقق ورحت فندق Glasgow Pond Hotel

وسويت عنه تقرير كامل مع التقييم الي يحب يشوفه يتفضل

فندق في جلاسكو Glasgow Pond Hotel

http://www.arabtrvl.com/vb/t5254.html






وهنا صور لبركه او بحيره صغيره بجنب الفندق متجمده وجميله جداً

اسمها Bingham's Pond

[gdwl] لحظة جميله [/gdwl]

يوم من الايام رجعت للفندق ولقيت عربه وسياره كبيره تنزل خيول استغربت
وجلست اشوف وش السالفه
بالاخير اتضح لي ان فيه حفل زفاف بالفندق والعربه والخيول هذي العروسه راح تركب فيها وتجي للفندق

كان جو جميل واول مره اشوف زفاف اسكتلندي وعربه وخيول

كان جدا ممتع خصوصا المزمار الاسكتلندي

هذه الصورة تم تصغيرها . الحجم الافتراضي لها هو 2187x1458.

طبعا للحين ما قد شفت ثلج يتساقط قدامي واسكتلندا معروف عنها ثلوج اكثر من انجلترا
كنت كل يوم اشوف الطقس وانتظر ثلج
لين جاء ذاك اليوم واشوف الثلج يتساقط امامي لاول مره شعور جميل طلعت الساعه ٣ الفجر وتصوير وحبتين مو مصدق

هذه الصورة تم تصغيرها . الحجم الافتراضي لها هو 1458x2187.

متحف الفنون Kelvingrove Art Gallery and Museum

كان اكلي الشبه يومي
هوت شوكلت مع ساندوتشات صغيره من السوبرماركت مع شوية فواكه ومويه

​

حان وقت الرحيل والرجوع الى لندن
جلاسجو مدنيه جدا جميله بالنسبه لي
اعجبتني كثير وتكررت زيارتي لها ٣ او ٤ مرات


اخذت تاكسي والى محطة جلاسجو سنترال و قصيت تذكره الى محطة لندن ايوستن عن طريق فيرجن

المره هذي المناظر فالطريق كانت جدا اليمه ابداع الخالق جميع انواع الطقس مرت علي

وصلت الى لندن واخذت تاكسي والى الفندق

​

​