لندن والطبيعة الخلابه

[روكا]

السلام عليكم

شوا أخباركم حبايبي

اليوم حبيت أعطيكم من أرشيفي تفاصيل رحلتي اللندنيه لما فيها فايده

واتمنى تنال رضاكم


الفهرس

بترك هالجزء للفهرس بعد ما أخلص من التقريران شاءالله






​

 

[روكا]

​

المسافرون

انا وبناتي كوكي وتوتو الله يحفظهم ، وبنت عمي فوفو

تاريخ رحلتنا

من 29 / 3 الى 12 / 4

الطيران

حجزت ع طيران الامارات

حصلت التذكره بـ 2800 ع السياحيه في شهر 1 وعقبها بأسبوع أرتفعت التذاكر وصارت 4200

( حركات بعد طيران الامارات )

والمشكله الوحيده اللي صادفتني اني ماحصلت ترفيع ع البزنس ولا حتى شراء تذكره

لا في السيره ولا في الرده

وطول الوقت وانا أحاتي لأني متعوده اسافر ع البزنس وهالشي ضايقني

وكان عندي أمل أحصل وانا في المطار

لأنه عندي البطاقه الفضيه من سكاي وورد فأقدر أترفع من المطار ولكن

ماحصلت والبزنس فل

استخلفت الله وقلت خلاص هذا نصيبي ، وكانت طيارتنا 380 الايرباص

والحمدالله انه هاي الطياره كراسي السياحيه فيها مريحه وابدا ماتضايقت...


بالنسبه للسكن

كانت هاي أصعب مهمه

لأنه كنا نحتاج شقه تكون قريبه من سكن أخويه يعني نبا في الأجوررود

في البدايه كنت ناويه بسكن في فندق ثيستل أنا وبناتي كوكي وتوتو الله يحفظهم

ولكن انضمت معانا في الرحله بنت عمي فوفو

وشفنا لازم ناخذ شقه لأنها أوفر وبعد عشان اذا بغينا نطبخ

وبدأت عمليه البحث

بذلت جهد كبير وانا ابحث عن سكن مناسب وكنت ابا نظام شقق


فندقيه ويكون في أجوررود أو قريب منه

وبعد البحث لقيت شقق عجبتني ولكن كانت غاليه وكانوا اغلبهم في منطقة ماي فير

ولقيت غيرهم بس بعيد عن أجور رود

ولقيت قريبين من أجور رود بس ماعجبوني

ولقيت شقق عجبوني وسعرهم مناسب بس ماحصلت فيهم حجز

وعقب لغيت فكرة اني أدور شقق فندقيه

وبدأت مرحله ثانيه وهي البحث عن شقه عن طريق السماسره

لجأت للخيار الثاني وهو البحث عن شقه عن طريق السماسره

ماقصر اخويه موادع عطاني رقم سمسار وصديقتي عطتني بعد كم سمسار

وأخويه القطري عطاني رقم مريم

جمعت أرقامهم وقمت أتصل وأراسلهم

حد مارد عليه

وحد قاللي قبل ماتوصلين بيومين خبريني

ومريم هاي هي اللي لعوزتني

بعد اتصالات ومراسلات لاحظت انها ماتتجاوب بسرعه ع مسجاتي وتتأخر في ردودها

ومره طرشت لي صور لشقتين أخترت وحده بس قلتلها

هاي شرات شقة اخويه بس عندج السعر أغلى ممكن تنزلينا شوي

قالت بتكلم وياراعي الشقه وبخبرج

واتريا واتريا وماردت وقمت أطرش مسجات ع الواتس اب وعقب قالتلي

الشقه انحجزت

الصراحه قهرتني وقلتلها كيف انا قلتلج اوكي بس شوفي اذا في مجال تنقصين السعر

وقالت بشوفلج غيرها ، وبعد نستني

وانا أطرش لها مسجات واتصل ع مكتبهم ولما يأست منها تركتها

وعقب كلمت سمسار ثاني وقاللي


عنده شقه فخمه بس غاليه تقريبا بـ 20 الف درهم

قلتله بشوفها وانا باجر يايه لندن واذا عجبتني بآخذها

وقبل سفري بيوم تفاجات انه مريم مطرشتلي صور لشقه أم غرفتين وعن طريق مكتبها

والشقه أعتقد بـ 1200 باوند في الأسبوع

وكلموني المكتب وقالولي اذا تبينها الحين حولينا المبلغ كله عشان نحجزها لج

قلتلهم الحين ليل عندنا والصرافيين سكروا وباجر انا يايه لندن

ومن اوصل بتصل عليكم وبنسير الشقه وبعطيكم سعرها كامل اذا عجبتني

بيني وبينكم قلت بعد افضل أشوفها يمكن ماتناسبني

ومن ناحيه ثانيه عندي فرصه أشوف الشقه الغاليه

وكان هذا اتفاقنا


عقب بخبركم بالتفاصيل ..


الجو

في الفتره اللي سافرنا فيها كان الجو واااايد باااارد وحتى هم مستغربين انه السنه طول الشتاء عندهم

وطبعا كنا ماخذين ثياب غليظه وهاي ماتاخذ وزن ولكن تاخذ مكان

وانتوا تعرفون كيف نحن نحتاج المكان ورانا سوق لندن مب أي سوق


استعدادات السفر

لأنه بنسكن في شقه في الأجوررود فكان أهم شي ناخذ معانا ...

1- مخدات يديده ( طبعا انا هنيه أقصد حقي وحق بناتي وبنت عمي )

وشراشف ولحافات ولبس الكفرات والمخدات وفوط كبيره وصغيره

وكلهم هاذيل خذيتهم مستعمل وقديم عندي عشان اتركهم هناك وما أرجعهم

ماعدا المخدات فخذيتهم من كارفور وهم مضغوطات ومشفوط عنهم


الهواء مجرد نقص البلاستيك بالمقص وينتفخون ...

2- خذيت عزكم الله نعله للحمام ومن غير نعله حق الشقه ( سليبرات )

3-خذيت 2 قوز ما أعرف شو تسمونه المهم اللي نستعمله حق الغسول في الحمام

ولكن ما استعملناهم لأنه حصلنا هناك 2 الظاهر حد من الخليجين تركهم ، وكان فيه شطاف وماكان لهم لازمه

4-خذيت بعض الأكل حق الطبخ

عيش + علب تونه + علب جبن كرافت + كاسات جبن كرافت وبوك + بهارات + حليب رينبو وشاي وزعتر وزنجبيل مطحون

الصراحه ماكثرت لأني عارفه انه كل شي هناك متوفر

ولأني عارفه انه مابنطبخ وايد أكثر شي بيكون اعتمادنا ع المطاعم

5-غير شنطنا الكبار انا خذيت معاي 3 هاندباك وهاذيل بنحتاجهم حق مشترياتنا وحق السوق

لأنه لما نسير السوق لازم ناخذ هاندباك عشان نحط مشترياتنا فيها وندزها ماعنثرنا ع الشل ...

بنت عمي من غير شنطتها يابت هاندباكتين ..

ع فكره أضطريت أشتري من غير شنطه وهاندباك

دي لندن ياجماعه

تقريبا هاي اهم الاشياء اللي حسيت انه لازم أخبركم عنها والباقي عادي ...




تابعوني ...​

 

[روكا]

يوم المغادره ووصولنا لندن

كانت طيارتنا الساعه 9.40 صباحا

لما وصلنا حاولت أشوف اذا في ترفيع لي ع البزنس فقالولي انه فل

سوينا اجراءات الدخول ودخلنا وتيلسنا في الكوفي وتريقنا

وعقب ركبنا طيارتنا والحمدالله كانت رحلتنا مريحه

شوفوا كراسي السياحيه محلاتها

وطلبت من المظيفه تعطينا كروت لأنهم نسوا يعطونا ياهم

وهاي الكروت مهمه نعبيها قبل لانوصل مطار هيثرو

فلاتنسون تاخذونها من المظيفين وترفقونها ويا الجواز عند الدخول

لأنه اذا ماشافوا الكارت ومعبأ بكامل بياناته بيخلونكم تطلعون من

الطابور وتسيرون تعبونه

الحمدالله تمت اجراءات الخروج بكل سهوله

وعقب ماطلعنا استقبلنا السواق اللي حاجزين عنه السياره

( كان أخويه حاجزلنا السياره 9 راكب بـ 70 باوند )

وهنيه بدأت مشكلتي

بعد ماركبنا السياره قمت أتصل ع السماسره

أتصلت بمكتب مريم وتلقيت أول صدمه

قاللي الموظف :

الشقه انحجزت

قلتله كيف الشقه انحجزت وانا أمس مكلمتنك فليل وخبرتك اني اليوم يايه

قال خلاص بحاول اشوفلج غيرها

وعقب اتصلت في السمسار الثاني اللي قال بيعطينا الشقه الفخمه الغاليه

وعطاني الصدمه الثانيه

الشقه انحجزت

لاحول ولاقوة الا بالله

ياريال انا أمس مكلمتنك فليل واليوم تقوللي انحجزت وانا الحين طالعه من المطار

تأسف وقال ماعنده شقه ثانيه

وقمت اتصلت في سمسار ثالث وهذا اللي قاللي اتصلي فيني قبل

لاأتين بيومين

وكنت متصله فيه احتياطي قبل لا أسافر

اتصلت ورد عليه وقلته أنا توني وصلت وانا في الطريج

قال عندي شقه من توصلين براويج ياه

الحمدالله فرجت

قلتله خلاص من أوصل بخبرك

المشكله شقة أخويه صغيره ( غرفتين وصاله )

قلت لبنت عمي أسوأ الظروف بنحجز في أي فندق وبندور شقه اذا هاي الشقه ماناسبتنا

واتفقنا ع هذا الرآي

طبعا نحن سرنا ع طول عند أخويه

والحمدالله انه نحن عندنا مكان نسيرله

يعني لو كنا يايين وبدون مايكون أخويه موجود

وين كنا بنسير وبنلفلف بأغراضنا وشنطنا ومن غير نحن تعبانين من الرحله ...

وصلنا عند أخويه ونزلنا شنطنا في شقتهم وبعد الاستقبال الحار قلت لأخويه

تعال معانا أنا مكلمه سمسار بيراوينا شقه

قال : ليش تكلمين حد أنا مرتبلج شقه مع السمسار اللي اتعامل وياه

صباح الخير بو أحمد وليش مارمست من قبل

( انا ماطلبت من أخويه يدورلي شقه الصراحه

مابغيت أضغط عليه بهاي الشغله وهو مضغوط هناك مع مراجعات المستشفى )

قلتله أتصل عليه الحين وبنشوف الشقه اللي عنده

وبعد بنشوف الشقه اللي مجهزنها السمسار الثاني

قال أوكي بس اول ايلسوا ارتاحوا وتغدوا وعقب بنسير نشوفهم

قلتله لابرتاح ولا بآكل لين أتطمن وين برقد اليوم

وطلعنا أنا وأخويه وبنت عمي ويانا السمسار ( ابو سامح ) ريال طيب

والنعم فيه من السودان وودانا الشقه
الموقع ممتاز

الشقه أثاثها حلو بس

عيبها انه فيها حمام واحد وصغيره وايد

والمطبخ في الصاله

وأجارها 900 باوند في الاسبوع

قلناله يابوسامح اسمحلنا بعد بنشوف شقه ثانيه وعقب بنقرر

(وهو مصادق أخويه ووايد يعزه )

قال شوفوا الثانيه واذا حبيتوا هاي خبروني وعشان أخوج انا بعد مابآخذ تأمين

رجعنا وطلعنا من عمارتنا وطلعت الشقه الثانيه قريبه من هاي العماره

والسمسار الثاني اسمه بو أحمد من العراق

شفنا الشقه الثانيه

موقع ممتاز

3 غرف

واعتقد حمامين

مطبخ مستقل

نظيفه بس

أثاثها عادي وشكلها قديمه وأجارها 1200 في الاسبوع

حسينا انه شقة ابوسامح لو انها أصغر هي الاشرح واللي تفتح النفس

وقررنا ناخذها ونقبل بحمام واحد

والحمدالله نحن كلنا كبار ومابيننا غريب ولا أطفال يعني بنقدر نتكيف ويالوضع

أرتاحت النفوس وهدأت وردت الابتسامه ع ويهي

ورجعنا شقة أخويي بعد ماكلمنا ابوسامح نبشره انه بناخذها

وسرنا هجمنا ع الأكل اللذيذ وريحنا

واستسمحناهم انه نبا نسير شقتنا ونرتاح

وبدأت مرحلة التعب الحقيقي

أول شي أخويه قال سيروا شقتكم وانا بييبلكم الشنط

وماقصر بوسامح حمل الشنط في سيارته وتعاونوا ويانا شباب العيله

وعقب ماوصلت شنطنا واستقرينا في شقتنا بدأت مرحله ثانيه من التعب ماتوقعناها



تابعوني ...

في تفاصيل هذا اليوم المتعب ​

 

[روكا]

مساء الاحساس والطيبه

مساء الحب

خلوني اليوم أخبركم عن...


جولاتنا في اليوم الثالث

اليوم طلعاتنا كلها متاحف ، وزرنا في هذا اليوم 3 متاحف


* متحف الطبيعه

Natural History Museum



* متحف العلوم

Science Museum



* متحف صدق او لاتصدق

Believe It or Not

قبل لاأخبركم تفاصيل هذا اليوم أحب انبه انه

زيارة المتاحف لازم تكون في أيام منفصله

عشان كل متحف يباله ساعات عشان تفهمون وتعرفون وايد معلومات

مب شراتنا ركضنا ركيض فيهم كأنه بس سرنا عشان نقول سرنا

وياريت شفنا عدل شرات الناس

اصلا فيه أشياء ماشفناها ولاطفنا عدالها

تفاصيل هذا اليوم

قمنا بدري وتريقنا ريوق بيتي وشيكنا ع الجو

درجة الحراره كانت 2

البسوا يابنات كله اللي في الكبت

عقب ماتجهزنا ، سرنا لين محطتنا ماربل آرش

ومنها خذينا الخط الأحمر

لين محطةNOTTING HILL GATE

وعقب بدلنا القطار

وتقدرون تاخذون الخط الاخضر أو الأصفر

لين محطةSOUTH KENSINGTON


يوم وصلنا المحطه تبعنا اللوحات اللي داخل ممر طويل واللي تدلنا ع المتاحف

وشفنا انه فيه 3 متاحف

اخترنا المتحف الأولي

متحف الطبيعه

وخذينا جوله سريعه في وماتذكر شو اللي شفته من كبره

ومن ناحيه ثانيه بسرعه طلعنا منه

​

 

[روكا]

متحف العلوم

وعقب رجعنا لنفس الممر

وكملنا مشي لين متحف العلوم

وهذا أكثر تمينا فيه بس ماعطيناه حقه

كل شي ع السريع

هو كبير ومن عدة أدوار ويباله بارض ويباله وقت

تفرجوا ع صور أكثر من صفحة جوجل للصور


متحف العلوم


في رآيي الشخصي

ماكان مناسب لنا نزور هالمتحفين لأنه المده اللي بنيلسها قصيره

والشي الثاني عندنا وايد برامج واهمها تسوق وهذا يباله وقت

ومثل ماخبرتكم زيارة المتاحف لازم تعطونها حقها من وقتكم عشان تتثقفون وتكسبون وايد معلومات

ومتاحف لندن كبيره وايد ويبالها وقت

وأهم شي وهو اللي خلاني أحس اني غلطت في هاي الرحلتين

انه البنات كانوا متمللات ويبون بسرعه يطلعون وانا أبا أتفرج

واعرف وايد معلومات

واضطريت أطلع غصبن عني

​

 

[روكا]

متحف صدق أو لاتصدق

عقب ماتجولنا في المتحف العلمي

رجعنا نفس المحطه اللي يينا منها وهي

South Kensington

مرينا في المحطه ع شباك التذاكر

وحجزنا من عندهم تذكره حق متحف صدق أو لاتصدق

ويومها سألنا عن استديوهات هاري بوتر

كانوا حاطين الاعلانات عنه في كل مكان

ونسيت كم قالت سعر التذكره

واعتقد فيه مكان معين نسيرله ونركب باص يودينا مع قروب



بعد ماتشاورنا قلنا بنصبر وبنفكر وبنشوف متى يناسبنا

وفي نفس الوقت بنشوف اذا عيال أخويه بيون ويانا

وقلنا ممكن نمر ع المكتب السياحي اللي في شارعنا ونحجز من عنده

ومره مرينا عليه وكان مسكر

وكل مره نقول بنسير ومانسير وفي الأخير قررنا نحجز من النت

وكان المفاجأه

فل

ماتوقعنا انه مابنحصل حجز وأقرب وقت بيكون بعد سفرنا

ولغينا الفكره

عقب خذينا الخط الكحلي لين

بيكادللي سيركس

ولما وصلنا محطة بيكادلي دورنا ع مخرج 4 اللي يطلعنا مباشره ع

متحف صدق أو لاتصدق

اول ماطلعنا من المحطه شفنا جدامنا المتحف

وشفنا ريال يسوي عرض

عقب ماخلص العرض عطانا كوبونات خصم لدخول المتحف

قلنا خساره لو ما اشترينا التذاكر من المحطه جان حصلنا هالخصم

ع طول دخلنا بالتذاكر اللي عندنا وماكان فيه وايد ناس


جولتنا في المتحف

موقف يضحك

ونحن نمشي بين الاقسام كنت أنا متجدمه البقيه

شفت ريال يالس يصور تمثال لحرمه

قمت وقفت لين يخلص عشان اطوف

وتميت واقفه فتره اترياه وعقب

ههههههههههههههههههههههههههههههههه

لاتضحكون عليه

طلع هو بعد تمثال ع هيئة ريال ويصور الحرمه

واغلب اللي يوصلون عند هالمكان ينخدعون هاي الخدعه

حتى بناتي

شوفوا الصوره وتخيلوا الموقف

ونحن نمشي دخلنا مكان ومشنا ع جسر متحرك

وهو مظلم شوي وفيه اضاءه فسفوريه

لما مشينا هنيه كانت كاميرا تصورنا وماكنا ندري وعقب ماطلعنا

شفنا كاونتر وريال واقف ويراوينا صورنا اذا نبا نشتريهم

عاد شفنا صورنا خايسه وقمنا كل شوي نسير نمشي فوق الجسر

ضحك وحركات استهبال

وزين ماكان فيه ناس ويانا

وعقب ماصورنا ما أدري كم صوره اشترينا كم وحده

والباقي صورناهم من الشاشه

وحليله الريال ماقال شي خلانا نصور

وعندهم مكان ندخله كله مرايا

واااايد استانست فيه ع قولة بناتي وايد تحمستي ماما

قمت أركض بين المرايا واموت من الضحك اذا حسيت اني بدعم

واااايد استانسنا في هاي اللعبه

الصراحه هذا المتحف وايد حلو وعجبنا واستانسا فيه

وكان خاطري أراويكم صور أكثر بس ماشاءالله بناتي رازين عمارهم في كل صوره

وهذا المتحف اللي طولنا فيه

عشان خاطر بناتي الحلوات يالسات يتصورنا

مليون صوره عند كل مجسم أو حركه

​

 

[روكا]

محل أم آند أمز

عقب ماخلصنا متحف صدق او لاتصدق كنا ميتين من اليوع

فشفنا في ويهنا ماكدونالد وجان تقول بنتي كوكي بناكل في ماك

أنا وبنتي توتو ماتشجعنا نآكل في ماك ودورنا عداله مطعم ثاني وماحصلنا

ومن اليوع دخلنا وكلينا وياهم

وعقب أكتشفنا انه في الجهة اللي ورا متحف صدق أو لاتصدق وايد مطاعم
والمطاعم اللي أباها

هذا ماك من بعيد

وهذا غدانا

أول ماتطلعون من المتحف خذوا يسار وامشوا في الشارع اللي وراه وعقب بتحصلون


محل أم أند أمز

ودخلنا محل أم اند أمز

وطبعا طولنا والبنات تجننوا ، ماصدقوا

المحل كبير ومن طوابق وفيه الكثير من الاشياء حتى نحن الكبار حبيناها


وعقب ماخلصنا تسوق طلعنا وشفنا بعض الناس تسوي عروض



نتابع هاليوم

شارع بيكادللي شارع جميل ووايد حلو ويستاهل نزوره مره ثانيه

وكررناه في الاجزاء اليايه

عقب رجعنا شقتنا بس في التكسي

ماحبينا نرجع في القطار خفنا يكون فيه سكارى وفي نفس الوقت كنا تعبانين

وصلنا الشقه وريحنا ودق في راس هداوه تسوي

مرقوووووووووووقه

الله يسلمكم نحن يايبين ويانا من الامارات خبز ايراني وقلت خليني اسوي مرقوقه

ماياب راسي الماك

ودخلت المطبخ

سويتها بالخضار


وكانت النتيجه

تابعوني ...

​