السياحة فى جورجيا تفاصيل ومعلومات
المناطق السياحية بجورجيا
هنقول الاول شويه معلومات عامه عن دولة جورجيا ودى موجودة علي النت عادى جدا بس بنجمعلكم كل شي فى البوست هنا [ATTACH=full]494238[/ATTACH]
هي دولة ذات سيادة في منطقة القوقاز من أوراسيا. تقع عند ملتقى أوروبا الشرقية مع غرب آسيا، يحدها من الغرب البحر الأسود، و من الشمال روسيا، ومن الجنوب تركيا وأرمينيا ، وأذربيجان من الشرق. تغطي جورجيا مساحة 69.700 كم2 ويبلغ تعداد السكان 4.385.000 نسمة.
المدن الرئيسيه فى جورجيا والى بيزورها السياح هما كالاتي
المدن الرئيسية في جورجيا هي:
تبليسي - برجومي - باتومى - غوري - اخالتسيخيا - كاخيتي - كوتايسي - كازبيجي - - قوبلاتي -
هنبدا كلامنا الاول فى السياحه والناس الى حابه تيجي
اجرارءات فيزا جورجيا للمصريين المقيمين فى مصر لازم تاخد فيزا من السفاره الجورجيه ومقرها
11 ميدان اسوان، الحويتية، الجيزة، مصر / رقم التليفون: 0020233044768
اية الاوراق المطلوبه للفيزا ؟ ( حجز طيران مبدئي - حجز فندق مبدئي - تامين طبي لمدة السفر - كشف حساب لاخر 3 شهور - جواب اتش ار لو موجود - ايداع مبلغ 20 دولار فى حساب البنك - صوره شخصيه بخلفيه بيضا مقاس 4*5 )
رقم حساب السفارة فى بنك cib 5360300106
التقديم بيكون خلال الموقع الالكترونى للسفاره https://www.geoconsul.gov.ge/
بتفتح وتعمل ابلكيشن وبترفع نسخه من كل الورق الى قلناه فوق دة بمعنى كله حته ايصال الايداع وبتملي الابلكيشن وبعدين بتحمله وتمضي علي اخر ورقه وتعيد رفعه تانى مع الورق ودى خطوه مهمة
وبتكون معاك نسخه مطبوعه من كل الاوراق وانت رايح معاد السفاره
الفيزا سهله جدا يا شباب المشكله فى التصريح الامني
طيب الاجراءات دى لكل فيز السياحه بس للاسف الطلاب او الناس الى مكتوب فى جواز سفرها حاصل علي عنده مشكله فى التصريح الامني
فلازم يجيب فيزا دعوه مش سياحه ودى لازم دعوه من مواطن جورجي تتبعتله عشان يقدر يحصل علي التصريح الامني
لكن لو موظف يتكل علي الله ماعندوش مشاكل طالما الوظيفه مثبوته علي جواز السفر
هيروح بعد الحصول علي الفيزا لمجمع التحرير الدور الارضي الاول بعد مايكون صور جواز السفر والفيزا ومعاه جواب اتش ار وبرينت من مكتب التامينات ومعاه اسم والده خماسي ودة مهم جدا هياخد استماره من شباك جورجيا الى فى الارضي هيملاه ويطلع الدور التانى مكتب 15 ياشر عليه من الظابط ويستلمه بعد 4 ايام
طيب لو انت عندك شركه اية الحل ؟ لازم السجل التجاري والبطاقه الضريبيه يكونه قيمتهم فوق ال 100 الف جنيه اقل من كدة هيرفض للاسف
التصريح الامنى للاعمار بين 18-45 سنه اقل من 18 او اعلي من 45 معفي من التصريح وبالتالى بيسافر بيفزا الكترونى عادى جدا
ياريت اي حد يتاكد من المجمع فى التصريح الاول قبل الحصول علي الفيزا عشان يكون ضامن كل اجراءاته
لو بقي مسافر من برا مصر لجورجيا فممكن تقدم فيزا الكترونى من خلال الموقع دة https://www.evisa.gov.ge/GeoVisa/en/VisaApp
ومش بتحتاج غير صوره الجواز وصوره شخصيه 4 في 6 خلفيه بيضه حديثه ومصاريفها 20 دولار وبتطلع فى خلال 5 ايام عمل
لكن لو مقيم فى دول الخليج تقدر تيجي لجورجيا بالاقامه الخليجي بس يفضل تترجمها وبتاخد هتم دخول بدون فيزا مسبقه
لو معاك فيزا شينجن صالحه انت معفي من فيزا جورجيا بس المشكله فى التصريح الامني هما بحالات فلازم تتاكد من مجمع التحرير
بس لو عايز نصيحتى عشان الجورجين اغبيا شويه كموظفين لو معاك شينجن وطلع مالكش تصريح طلع فيزا الكترونى وماتذكرش ان معاك اي شينجن ساريه وهتكلفك 20 دولار مش هيخسره بس عشان مش تيجي وموظف غبي يرجعك ولسه حاصله مع واحد معرفه من اسبوع للاسف
دى المعلومات عن الفيزا واي سوال ممكن فى الكومنتات وانا معاكم
#معلومه يفضل معاك حجز فندق موكد وتامين سفر وانت رايح عشان الجوازات فى جورجيا بترخم حاليا
الطيران بقي
عندنا طيران مباشر من الغردقة وشرم كل يوم سبت مدة الطيران 3 ساعات وسعر التذاكر بيبدا من 5600 تقريبا ودة طيران اير كايرو
وعندنا ترانزيت التركيه من القاهره واسكندريه عادى
جه وقت نتكلم عن السياحه بقي هنا
اية المدن الى انصح الكل يزورها فى الصيف
تيبليسي
هتقضي فيها يومين هتزور فيها منطقة شردانى بالكامل الصبح (الحمامات الكبريتيه - الشلال - مسجد الجمعه المسجد الوحيد فى تيبليسي - حديقة البوتانيكال - قلعه ناريكا? وتمثال ام الجورجين ونشوف منظر المدينه كلها من فوق ونركب التلفريك وننزل )
بليل بقي نتمشي في شارع روستافيلي الشهير لحد مانوصل لتمثال الحرية ( تمثال مارجرجس ) وممكن نتمشي شارع شردانى من اخره لحد مانوصل لمطعم ماشخيلا
نتصور عند جمله i [ATTACH=full]494239[/ATTACH]<3 tbilisi
ونعدى الكوبري نروح لمنطقه التلفريك الجو بليل بيكون تحفه فى حديقة الاوروبين وكوبري السلام ونتصور وممكن نقعد بعد كدة فى مناطق الكافيهات فى شردانى القعدة بليل تحفه
تانى يوم ممكن نطلع بحيره كوستبا وناخد المركب نتمشي فى البحيره وبعدين نتمشي حولين البحيره وبعدين ننزل نتمشي في حديقه فاكى وناخد بعضينا ونطلع جبل تاتسميندا ونقضي اليوم فى الملاهي عند برج البث التلفزيونى
فى خيارات تانية الى حابب يروح مجمع الاكوا بارك وحمامات السباحه الصبح ويعمل جوله اليوم التانى بعد الظهر ينفع برضة والمنتجع تحفه وهيعجبكم جدا
فى اقتراح تانى ممكن تشوفه شركات اليوم الواحد تعمله معاهم رحله الصبح لجبل جفاري تشوفه التقاء نهرين الاراجفي ومتكفاري وتنزله مدينه متسخيتا العاصمه القديمة لجورجيا وترجعه تطلعه تاتسميندا بعد كدة
طبعا شارع مارجنشفيلي دة شارع المطاعم الحلال كله مطاعم تركيه وعربيه وهتتبسطه فيه بليل وخصوصا لو كملته لمنطقة الكافيهات
تالت يوم بقي ناخد بعضينا الصبح ونطلع رحله جبال القوقاز ودى يفضل مع شركات اليوم الواحد دى شركات بتعمل رحلات يوميه باسعار ثابته هتلاقوها كتير في منطقة شردانى
هتزوره قلعه انانورى وتشوف منظرها التحفه علي نهر الاراجفي وبعدين جوداوري ونشوف البانوراما والى حابب يركب البراشوت اشطة بس غالي بحوالي 120-150 دولار
وبعدين نروح جبال القوقاز ناخد عربيه من تحت ايجارها حسب عدد الافراد بس بتبدا من 50 لاري بطلعك الجبل علي ارتفاع 5000 متر ونرجع تيبليسي نبيت فيها
ناخد بعضينا بعد كدة بقي الصبح بدري يا نركب قطر ونطلع مدينه برجومي يا نروح موقع ديدوباي نركب مارشوتكا منها لبرجومي
الى حابب يشوف قلعه الرباط يبقي يشوف عربيه توديه وترجعه هياخد من 40ل50 لاري ويرجع يقعد شويه فى البارك بتاعت برجومى ويشوف غابات ليكانى وعلي اخر النهار يركب القطر ويطلع مدينة كوتايسي
كوتايسي بقي عنده 4 حاجات نقدر نعملها فيها
وادى مارتفيلي - ووادى اوكاتيسي - وكهف ستابليا - وكهف وبروميتيه
ما اظنش هتلحق تعمل الاربعه في يوم واحد تقدر تعمله 3 لو طلعت من 9 ونص الصبح
الاماكن بتفتح من عشره الصبح
وادى مارتفيلي فيه رافتنج
نصيحه ممكن تشوف كهف من الاتنين وخليك فى مارتفيلي واوكاتيسي
قضي يومين فى كوتايسي واطلع علي باتومى بقي قضي فيها يومين تلاته حسب حبك للبحر
اية الانشطة فى باتومى انشطة البحر ( يخوت وهكذا وفى طيارات كمان )
حديقه البوتانيكال وعرض الدولفين وبرا باتومى ب 25 كيلو تقريبا شلاللات ماخونسيتي
وطبعا ماننساش الممشي السياحى بليل
انا بالنسبالي دول اهم المدن والمزارات
لكن عندنا مدينة غوري وفيها متحف جوزيف ستالين والقطر الى كان بيستخدمة للانتقال بيه وقت الحرب العالمية
وكهوف اوبليس تسيخا) ودى كهوف اتبنت من حوالى 3000 سنه واسمها قلعه الالهه
وفى برجومي ممكن منها نطلع لكهوف فاردزيا بس دى لو هتبيت لانها بعيده عن برجومى بتاخد حوالى ساعتين ونص تقريبا
واقليم كاخيتي ممكن نزور مدينه تيلافي نتمشي يها وممكن مدينه سغناغي ودى مدينه الحب عنها ومشهوره بالنبيذ والسجاد اليدوي
فى مدن تانى بس دى احلاهم والاهم فيها والى بيزورها السياح دايما
بالنسبة بقى للسياحه الشتوية فجورجيا اكتر مدة تقدر تقعدها علشان تنبسط فيها هيا 7 ليالي بس
ودى ممكن تقسمهم انك تقعد ليلتين في تبليسي وليلتين في منتجع جليد سواء منتجع جوداوري او منتجع باكورياني
منتجع جوادوري دا موجود اعلى جبل للناس الى بتحب تقعد في الجبال
منتجع باكورياني دا موجود في قرية ريفيه بتقع في منطقة مرتفعه وانا الحقيقة بفضلها علشان بتتميز بالجو الريفي وانها فيها حياة بليل اكتر من جوادوري بكتير
بعدها ممكن تروح كوتايسي ليلة تزور المازارات الى هناك وترجع تاني تبليسي ليلتين
طبعا بقى في الشتاء انت بتستمتع على اد ما تقدر بأنشطة الجليد سواء بقى ركوب التلفريك في المنتجعات الى بيوصل ساعات ارتفاعه ل 3500 متر فوق سطح الماية وبيكون على 3 مستويات مختلفة اول وتاني مستوي بيكون تليفريك مغلق و3 مستوي بيكون تلفريك مفتوح الى بيبقي زي الكنبه كدة [ATTACH=full]494240[/ATTACH] وطبعا بقى لازم تعيش مغامرة التزحلق على الجليد بالالواح الخشبية والى اكيد هتعجبك بس خلي بالك لتاخدها وقوع من اعلى الجبل زى حالاتي في اول مرة [ATTACH=full]494241[/ATTACH] وعندك طبعا بقى موتسيكلات الجليد وعربيات الجليد ودول ليهم متعه تانية برضو
غير أنشطة تانية كتير تقدر تيجي وتمارسها في الجليد زى ركوب الهليكوبتر بس مشكلتها تكلفتها عالية جدا
اة بالنسبة لاهم الاماكن الى نقيم فيها انا شخصيا بفضل فى تيبليسي شارعين روستافيلي ومارجنشفيلي والاتنين فيهم هوستيلات كتير وبتبدا من 12 لاري الشخص
كوتايسي فى هوستيل نضيف جدا اسمه lion ودة بيكون ب 20 لاري بس عشان فعلا فعلا نضيف ويستاهل فى اقل منه و ب 15
وهكذا دة متوسط الهوستيلات
اسعار تذاكر الاماكن رخيصه جدا متوسطها 1 دولار ل 5 دولار اغلي شي بيكون حوالى 8 دولار ودول مكانين تلاته عموما منهم وادى مارتفيلي عشان الرافتنج وانشطة التزحلق بتبدا من 5 دولار كمتوسط والبراشوت زى ماقلنا حوالى 100 دولار واوقات كتير بيقل او بيزيد حسب الموسم
اي استفسار ما تتاخروش فى الكومنتات او الرسايل وهكون معاكم
شركة top Glory Travel للسياحة فى جورجيا شركة موثقه بالحكومة الجورجية تقدم جميع الخدمات السياحية داخل دولة جورجيا
للاستفسار عن طريق موقعنا الالكترونى
www.topglorytravel.com
او عن طريق التليفون والواتس اب :
+995557066633
نسعد دائما بخدمتكم <3
