اجمل مكان فى العالم سنغافورة

[بسنت]

بسم الله الرحمن الرحيم

وكل عام وانتم بخير اخواني اعضاء المنتدى الغالي


اكثر من سنتين وانا اتابع تقارير سنغافور و متحمسه جدا جدا لزيارتها .. ولكن الجميع كان يقول حدها حدها 5 ايام
ولازم تكون مع دوله ثانيه

فأجلت فكره السفر لسنغافوره لانه السنتين اللي طافت وجهاتي كلها كانت بعيده عن اسيا

حتى قررت منذ بدايه عام 2015 انه تكون العطله الشتويه هالسنه بأسيا علشان خاطر سنغافور

خصوصا اني حافظه تقاريرها من كثر ماكنت اعيد واقرا فيهم

اخص بالذكر اخونا ابو سعود وتقاريره المميزه بالمنتدى اللي تسكر الله يذكره بالخير فعلا فعلا استفتدن منه كثيييير الله يوفقه يارب ماقصر


وللاسف بالمنتدى هذا تم نقل واحد بس من تقاريره بس هم التقرير شامل و خدمني كثر





كان التخطيط للسفر و البحث عن الحجوززات من شهر سبتمبر

الوجهه الاولى سنغافور ... وكان بخاطري اروح تايلند (اشتقت لها

) بس بما اني بهذي السفره باخذ الاطفال معاي فقررت تكون الوجهه الثانيه ماليزيا


هذي تعتبر رابع زياره لي لماليزيا بس تعتبر الاولى لي مع الاطفال .. كل مره كنت اروح انا وبوبدر بروحنا ...




بعد البحث عن اماكن يديده وقراءه تقارير الاعضاء تم التخطيط التالي:




( سنغافور- سنتوزا- جوهر بارو- ليغولاند- كوالالمبور-سلانجور سن واي)


الوصول بمطار سنغافور والعوده من ماليزيا على الطيران القطري من تاريخ 12-12 وحتى 1-1







ان شالله ارتب التفاصيل والصور واحطها لكم

انتظروني

​

 

[بسنت]

اليوم الاول:


بعد الاتفاق على ان تكون الرحله بين سنغافور وماليزيا

تم الاتفاق على الوجهات .. وبما انه بنروح جوهر بارو اللي تعتبر مدينه حدوديه بين سنغافور وماليزيا وبعد السؤال عنها وكيفيه الوصول اليها تبين لنا انها اقرب الى سنغافور ففضلنا نروح لها عن طريق الجسر ..

فصار البحث عن الخطوط الجويه

الوصول الى مطار سنغافور
والعوده من كوالا لمبور


واغلب البحث كان عالخطوط القطريه ..

وفعلا تم الحجز عالقطريه

من تاريخ 12-12 الى 1-1


الوجهات تم تقسيمها كالتالي:

سنغافور العاصمه (شارع اورشارد) من 13-15 ديسمبر

جزيره سنتوزا من 15 - 18 ديسمبر

وباقي الايام في ماليزيا

السكن:

سألنا وبحثنا من الاشخاص اللي سافرو من قبل واجمع الكل على السكن في شارع اورشارد لانه فيه محلات ومطاعم ويعتبر شارع حيوي

الا اني كنت ابي اسكن في المارينا لكن الكل قال مافي شي بالمارينا


وطبعا في سنتوزا السكن في منتجعات الريسورت وورلد (على راي اخونا ابو سعود)



انطلقنا في يوم السبت 12-12 الساعه 5:40 دقيقه متجهين الى مطار حمد الدولي

وبعدها ترانزيت اقل من ساعتين


والى سنغافور


تم الوصول الى مطار سنغافور الساعه 9 ونص صباحا بتاريخ 13-12.. مده الرحله 7 ساعات ونص


اخذنا تاكسي والى الفندق

فندق اورشارد بشارع الاورشارد
الحجز عن طريق موقع بوكينق الليله ب 53 شامل الافطار

سوينا اجراءات الجيك ان و قالولنا تسليم الغرفه الساعه 1

تجهيزات الكريسماس

طبعا كانت الساعه قريب ال11 و تسليم الغرف الساعه 1 ففضلنا نروح نستكشف الشارع و نتغدى لانه مو ماكلين شي من غدا اليوم اللي قبله ..

وهذا الفندق من برا

​

 

[بسنت]

وبعض الصور من الشارع ..

الجو كان حلو كلش ماكان في شمس والجو حلو مو حار ولا رطب

مانعرف بالشارع شي وهذي اول زياره ندور مطعم ماكو الاغلب كفيهات

واحنا ويوعانين مانبي قهوه وكرواسون


لين دخلنا احد المجمعات و اول مكان لقيناه قعدنا فيه

الاكل ماكان يشجع وايد بس الحمدلله


حتى بيبسى ماعندهم

سوالف اورغانيك و هلثي فود

لين صارت الساعه 1 اخذنا تاكسي وردينا الفندق

الحمام اعزكم الله

مافي هوز (شطاف)

ماعجبتني الغرفه وايد بس يالا كلها ليلتين تتقزر

عقب ما غسلنا وبدلنا وصلينا نزلنا تحت باللوبي سألناهم عن السفاري

وقالولنا في رحله بتطلع اليوم

الساعه 6 ونص التجمع و بالباص نروح ونرجع الساعه 10


قلنا تم


حجزنا ورجعنا نتمشى بالشارع على ماتصير الساعه 6

هذا مووول بالشارع

ورجعنا بعد ما تسوقنا عالخفيف


وانطلقتنا من الفندق بباص اخذنا لي منطقه المارينا

الفندق العجيب اللي كنت بسكن فيه

بعدها نزلونا بالمارينا وتم تقسيمنا

ناس بتروح السفاري وناس جوله بالنهر

والى السفاري



الرحله عباره عن قطار يمشيكم في ارجاء الحديقه وفيها حيوانات تشوفونها ...


المكان وااااايد ظلمه وصعب نشوف الحيوانات عدل وماتبين بالتصوير


وفي بعدها عرض فرقه يسون حركات بالنار وفي بعض المحلات والمطاعم

وايد ظلمه ماقدرت اصور شي


ويقولون لا تستخدمون الفلاش و لا تطلعون اصوات

تزعجونهم


.

هذا الستيكرز اللي عطونا علشان يعرفون كل شخص بأي رحله

شرينا بعض الاشياء البسيطه التذكاريه

وطق مطر


عالساعه 9 و تكنسل العرض الناري


انزين ردونا الفندق

ماردونا الى الساعه 10




مع انه كان في كثير تنوع بالمطاعم هناك لكن ماتعشينا


ردينا الفندق

وبعدها دورنا بالشارع ولقينا ماك


قريب من فندقنا

تعشينا فيه بعد التأكد من انه حلال

والحمدلله انتهى اليوم الاول

​

 

[بسنت]

اليوم الثاني:

14ديسمبر2015

اليوم ثاني يوم لنا بسنغافور ومن باجر بنروح جزيره سنتوزا ..

نزلنا نتريق من بوفيه الفندق

الاكل متنوع كل شي فيه بس البوفيه صغير حجما لكن متنوع

بس انا ما احب انوع من كل شي بس يكفي صنفين او ثلاث والحمدلله



اول وجهه ...

لازم

السوووق


طلعنا مع التاكسي

ناس تفكر .. ملبسه كبوس عن الشمس

وعلى فيفو ستي موول

المول كبير و حلو كل شي فيه واسعاره مناسبه جدا


انا وايد سمعت من اللي رايحين سنغافوره انها غاليه بس انا اشوف اسعارهم زينه

حتى بعض المحلات تحط السعر بالماليزي والسنغافوري

دعايه لفلم ستار وارز اللي بينزل بتاريخ 17

والعيال ما خلو شي بالمحل

هالمحل وايد اشتري منه وموجود بماليزيا واسعاره مناسبه

طبعا الوضع كان شوبينق بشوبنق اليهال تعبو ..

زين لقينا مكان للاطفال فوووق


لعبناهم شوي

بعدين من المول فيفو ستي متفرع يمه مول ثاني ..

هذا اسمه

صغير واغلبهم كشكات بس والله تلاقون عندهم اشياء زينه

اللي يبيعونهم علينا بالانستغرام

وفوق بالمول في حديقه

فيفو ستي قريب من سنتوزا .. والقطار المعلق اللي داخله يوصلكم لي سنتوزا



وهذا منظر على سنتوزا ومنتجعات الريسورت وورلد

هذا فندقنا اللي باجر بنسكن فيه

وهذا التلفريك اللي يوصلكم لي سنتوزا

سنتوزا

بعد التسوق ... تغدينا بمطعم ما اذكر اسمه حتى ماصورته

بس من الوجبات السريعه يقدم فيش اند شيبس


وبعدها اغرانا منظر التارت وقلنا لازم نحلي هني

هبتي اليديده بهذا السفره



الايس تي

​

 

[بسنت]

بعد فيفو ستي

ردينا الفندق وكنا امس سألنا عن الرحله النهريه

قالولنا بالليل علشان عرض الليزر


فقررنا نروح احنا بدون لا نرتبط بأحد المارينا باي و نقعد هناك نشوف العرض

لانه كنت ابي اروح قبلها مول مارينا سكوير اللي بالمارينا


هذا المول

المول كبير بس كل المحلات مسكره اقصد للحين مو فاتحين محلات

كافيه مستر بن

بسرعه خلصنا وطلعنا نلحق عالعرض لانه قالولنا الساعه 7 العرض



وهذا الفندق لاصق بالمول

مشينا شووووي لين وصلنا الى

قلبي خفق

المنطقه شرررررحه


غلطان اللي يسكن بشارع الاورشارد ويخلي المارينا




اخدعوني الناس

وضيعو علي لحظات الاستمتاع



انا عبالي الاورشارد نفس الشانزليزيه من كثر ما قالو سكني فيه احلى من المارينا



بس ان شالله السفرات القادمه ما اسكن الا هني

ناس تتمشى وتسوي رياضه بالمكان الجميل


وكلما غابت الشمس وكلما كان المنظر خيااااالي

غابت الشمس وصارت 7 ونص والعرض ما بدا للحين

وبدا العرض الساعه 8

خلص العرض الجميل


دخلنا المول اللي بالمارينا

المول ملاصق لفندق مارينا باي ساندس

المول ماركات كبيره ومتوسطه الاسعار بس هم حلو للتسوق وخصوصا الموسم هذا اغلبه تنزيلات



وحاطين للاطفال

ماني متأكده اذا المول في مطاعم او لا

بس الاغلب اللي مريت عليه كفيهات



وحنا نبي نتعشى


ردينا الى الواقع


شارع الاورشارد

تعشينا بهذا المطعم

وتصبحون على خير

باجر رحله الى سنتوزا ايلاند






​

 

[بسنت]

اليوم الثالث:


15 ديسمبر 2015


اليوم اخر يوم لنا في سنغافوره العاصمه .. بننتقل الى جزيره سانتوزا


كلمنا الفندق البارح انه يحجزون لنا سياره كبيره .. لانه عندنا شنط ماراح تكفي التاكسي


اقترح علينا الشخص اللي كلمناه من الفندق انه ناخذ سيارتين تاكسي .. ليش ؟؟؟


يقول انه السيارات الكبيره لها تسعيرات ثابته .. وسنتوزا قريبه مو بعيده

فلو ناخذ سيارتين تاكسي بنوفر وااااايد فيها


مشينا على شوره ..



قعدنا الصبح على راحتنا وتريقنا

وبعدها سوينا الجيك اوت وطلعنا

اخذنا سيارتين تاكسي

والحمدلله كفت


طلعت بالسياره انا والاطفال وبعض الشنط قبل بو بدر

وانطلقنا



ووصلنا عند البوابه

جان يقولي التاكسي وين الحجز ؟؟ قلت له مع زوجي

جان يقول لازم نوريهم عند البوابه


المهم نزلت الجام جان اكلم الموظفه قلت لها احنا حاجزين في هارد روك و الاوراق مع زوجي بالسياره الثانيه


جان تفتح لنا البوابه

وصلنا الريسورت وورلد .. عباره عن سلسله فنادق متفاوته اسعارهم



تم الحجز عن طريق مكتب سفريات بعد مقارنه الاسعار بين بوكينق و موقع الفندق نفسه


الاسعار تقريبا ببوكينق والموقع نفس الشي الا انها غير شامله الافطار

علشان جذي حجزنا من مكتب ومع افطار بحدود ال 70 شي و 70 دينار كويتي لليله الوحده

عند الفندق

وهذا فندقنا ..


هارد رووك

اللوبي

هذول اخذتهم من عند الفندق

المسبح بروووحه سياحه

والله وماطولنا عطونا الغرفه بسرعه

رقم الغرفه ..

الغرفه مطله عالمسبح وفيها بلكونه

الغرفه مساحتها كبيره

اهم شي تكفينا وتكفي الشنط


والسرير اللي عاليمين في تحته سرير جرار تسحبونه


يعني السراير كااافيه لنا احنا 4 اشخاص

الحمام عزكم الله (مافي شطاف)


والاطلاله

​

 

[بسنت]

احنا بنقعد 3 ايام في سنتوزا


التخطيط كان كالتالي


اليوم الاول نشوف المكان ونتمشى فيه

ثاني يوم يونيفرسال ستديو

ثالث يوم باقي انشطه الجزيره كلها



لمن كنا نبحث عن اسعار الفندق دخلت على موقعهم .. والحلو بالموقع يحطون كل الفعاليات اللي بتصير عالجزيره


شفت انه في وقتنا في عرض مسرحيه موسيقيه .. مسرحيه سندريلا

والعرض ياي من اوربا

عاد قلت حق بوبدر بحجز ما عجبه ... قالي سندريلا

روحي انتي والاطفال بروحكم



عقب شفت انه في باكيج ( سعر عائلي يشمل 2 كبار و2 صغار ) ب 404 دولار سنغافوري جان احجزه

واقوله في عرض حجزته كيفك اذا منت ياي انا بروح




فكان حجزنا يوم 17 ديسمبر يعني اخر يوم لنا بسنتوزا نفس اليوم اللي حددناه للانشطه


واصلا كان هذا اليوم الوحيد اللي متوفر




المهم


بما انه اليوم حددناه للتمشي والاستكشاف


قررنا نسبح بالمسبح حتى وقت الغدا

خلصنا تسبحنا

وطلعنا

على يمين الفندق على طول تبدي الانشطه والمطاعم واليونيفرسال كل شي قريب

المحلات والمطاعم

وهني عن المسرح

اجزاء مختلفه من المكان

ترا كل شي قريب مشي

واللي مايقدر عالمشي في القطار المعلق ينقلكم من محطه لي محطه ببلاش

والمحلات المغريه

حبيب الاطفال جلي بلي

وهذا اليونيفرسال

وسندريلا بعد

​

 

[بسنت]

فضلو الاطفال وبوبدر يتغدون بماك بس انا ماكنت ابي فاخذتلي خفايف من بريد توك

والكولا من ماك

وبعدها كملنا الاستكشاف


وهذا تمثال الاسد (ميرلايون)

هني بالليل يصير عرض ليزر وماي

كروز

وهذا الووتر بارك


يبيله يوم بروحه

التلفريك

في واحد ينقل من سنغافوره لي سنتوزا

وفي واحد ثاني داخل سنتوزا بس

الميرلايون بالليل

والممشى ورا الاسد

عيد الحب عندهم مو كريسماس

وهذا القطار المعلق

وصلنا لل

اي فلاي

للاسف كان مسكر

كان ودي اجرب

وهذا خط مسار القطار المعلق

كل محطه يبين شنو فيها



واللي مايعرف يقدر ياخذ بروشور الانشطه فيها كل نشاط بأي محطه

حيل سهل كلش مو صعب

بما انه الانتقال مجاني لسكان سنتوزا


قلنا نلعب بالحلال نروح فيفو ستي نتمششى ونتسوق عالخفيف
ونتعشى

وهذي المحطه عند فيفو ستي


طبعا اذا بترجعون سنتوزا لازم تدفعون تذاكر

الا اذا كنتو من سكان الجزيره بكون مجاني


والتذكره المجانيه لازم تكونون ماخذينها من الفندق قبل لا تطلعون ولا تتوهقون بالرده

وانتهى اليوم


بعد ما تشوقو الاطفال على بريد توك

اخذناله منه

وتصبحون على خير





​

 

[بسنت]

اليوم الرابع:


16 ديسمبر 2015

اليوم خصصناه لليونيفرسال ستديو


شرينا من محل يبيع تذاكر

تذكره اسمها


2Day Pass


التذكره من اسمها ليومين

وفي عندهم ليوم واحد

او 3 ايام حسب الانشطه المرغوبه


تقدرون عند الحجز تشوفون الانشطه

احنا اللي اخذناها يوم لليونيفرسال ستديو ويوم ثاني ل 20 نشاط اخر .. بس كل شي لدخول مره وحده

الانشطه بذكرها بالجزء الخامس


التذكره اللي اخذناها بقيمه 139 دولار للكبير والطفل ب 99 دولار



قعدنا الصبح مبجر وايد

وهذا مطعم الريوق

المكان فاضي بعدين يصير زحمه

الريوق متنوع وكل شي فيه

نسبح شوي على مايفتح اليونفيرسال

وهذا بالسنتر

نصور على مايفتح اليونيفرسال

الوضع شكله زحمه

فشرينا تذكره اسمها اكسبرس باس

تدخلون قبل الناس وماتنطرون طوابير حتى بالالعاب

صج وفادتنا في العاب الدور عليها ساعه


احنا ما كنا ننطر كلش

قيمه التذكره للشخص 50 دولار

وفتح الستديوووو


وبدينا اللعب


يتبع .....





​

 

[بسنت]

نشوف الخريطه

ونتعرف عالمكان

ستاربكس موجودد

وبدينا اللعب من يمين الخريطه

هذول عيالي

بدر وانيس

وهذي اللعبه استانسو عليها دخلناها اكثر من مره

وهذي يدخلونكم موقع تصور وبعض الخدع

والكشكات بكل مكان

والمسرح هذا عندهم مواعيد لظهور شخصيات سيسمي ستريت




وهني وصلنا حق

ترانسفورمارز

عجيييييييييييييبه

من كثر ماحبيتها شريت لي قلاص علي الشخصيه

وهذي للكبار فقط


بعد عجيبه

في اليونيفرسال يشوفون الطول قبل الدخول للاطفال

طبعا في العاب ما احس انها تحتاج طول

او وجود الاب او الام مع الطفل مثل الصوره اللي بحطها الحين

لكنهم رفضو ان الاولاد يركبون بروحهم لازم شخص كبير معاهم

والجانب الشرقي

والحضاره الفرعونيه

اهم شي انهم مشغلين اغاني نانسي عجرم

العابهم اغلبها فيها اكشن

يتبع .... ​

 

[بسنت]

منطقه فارفار اواي

شخصيه شريك وربعه

لين صار وقت الغدا

تغدينا بنفس المنطقه اللي احنا فيها

فار فار اواي


حق اللي يسالون عن الاكل

هذا المطعم

وتصوير مع الشخصيات

والكشكات اللي تبيع سناكات خفيفه

وغراااامي

يعني لا تشوفون ثلاجتنا

و وصلنا لي

قدمولنا عرض واغاني وبعدها تصوير

والستيج هذا يقعد فيه باب نويل وبعض الشخصيات للتصوير


طبعا كلهم معاهم مصوين يصورونكم ويطبعون لكم الصور


كل شي بسعره


لكن في نهايه اليوم يسوون خصم عالصور

اشتر وحده الثانيه مجانا

او خصم من 20 لي 15 دولار وجذي

احنا بالصدفه صورنا الصبح وشرينا

وبالليل لمن صورنا قالولنا عن الخصومات

يتبع...​

 

[بسنت]

هني احنا خلصنا اللعب كله وكانت الساعه تقريبا 5

والستديو يسكر الساعه 10

بس ما طلعنا


دخلنا المحلات نشتري


و ردينا لعبنا الالعاب اللي عجبتنا


الستديو مو وايد كبير ... يقول بو بدر انه اللي بامريكا اكبر واحلى بواااايد

و ياحليلها وحده من الامهات الاسيويات تدور ولدها ضايع وتقولي عن الاولاد انها ماتقدر عليهم ومايقعدون معاها


لين لقته امنتهم عندي وراحت تشتريلهم غدا

ورجعنا لبعض الاماكن

دخلنا واحد من المحلات بنشتري

ولا اشوف لعبه داخل قلت حق بو بدر دخل اليهال يلعبون على مانشتري


وراح


ادوره وينه وينه


ولا

راكب معاهم


شلوووون كفى

يقول ما رضو يدخلونهم بروحهم

لازم احد كبير


شدعوه ترا اللعبه ماتخرع ولا فيها شي ليش هالدقه يعني


و صار المغرب

يتبع ...










​

 

[بسنت]

و صار الليل

البارك يسكر الساعه 10

واللي شفته انه الناس تكون موجوده من الظهر لي المغرب


يعني اول الصبح مافي احد وعقب المغرب هم مافي زحمه


رجعنا لي السيسمي ستريت عشان العرض اللي عالمسرح


طبعا العروض والشخصيات متى تكون موجود كلها مطبوعه على اوراق هناك وعند المسارح موجود ساعات العروض

التصوير ممنوع

انا صورت لمن خلص العرض

هني صور المصور بدر واخذنا الصوره بنص السعر

ومره ثانيه حق العروض اللي شفناها

مره الصبح مره بالليل

واخيرا

مسكنا واحد من المصورين وقالنا انه لازم يسكر الكاونتر وبيصور اخر صوره
فقال بعطيكم الصوره بخصم

جان نصور ...


على فكره ... كل صوره يصورونكم اياها المصورين وتنطبع يعطونهم رقمها وتدخلون على موقع يعطونكم اياه تقدرون تنزلون الصور اللي صوروكم اياها


والساعه 10 بعد ماسكر

ظل المين ستريت مبطل

فتعشينا وطلعنا

بهذا المطعم

وبس كان يوووم فل اكشن وحركه


ردينا الفندق ونمنا على طووول


تصبحون على خير ...​

 

[بسنت]

اليوم الخامس:




17 ديسمبر 2015


اليوم الثاني لنا من بطاقه ال (فن باس)



يشمل على 20 نشاط مختلف من متاحف و انشطه رياضيه وحركيه و حدايق وغيره

اللي مايناسبه يقدر ياخذ كل نشاط بروحه ويدفع تذكره


بس هذي التذكره شامله و اووووفر بكثير



يعني حتى لو ما دخلت كل الانشطه مو خساره انت الربحان





مع بدايه الصباح


نفتح البلوكونه ونستنشق الهوا العليل

وريوق خفيف

وبعدها الى الانشطه



اول شي بدينا بالاكواريوم

بدايته في عرض للملابس الشعبيه والحياه والرحلات التجاريه وغيره

وهني في عرض لفلم عن الطوفان او التسونامي مادري شنو بالضبط لانه ماحضرنا الفلم

سفونيرات واشياء

العلاقات مع الهند

ومسقط

من كثر ما الدوله نظيفه


الغواص نازل ينظف الجامات من داخل

والغوص على الولو بالخليج العربي

​

 

[بسنت]

بعدين طلعنا نكمل باقي الانشطه


من رايي ويمكن غيري يختلف معاي


الاكواريوم مضيعه للوقت


يعني ماكو شي يديد


كله سمج وقرش و بس

صح حجمه كبير ومرتب


بس الفكره وحده




انطلقنا بعدين الى تمثال الاسد

والصعود الى القمه

ومنظر من فم الاسد

ووين مارحنا الحقونا المصورين ويصورون


ونقولهم مانبي معانا كاميرا


ويقولون نصوركم واذا عجبتكم اشترووو

بصراحه الصور بروحها يبيلها ميزانيه


ومن راس الاسد

باريس لاحقتني كل مكان

ومن خلف تمثال الاسد

الممشى

والى الانشطه الحركيه

احلى شي بينهم كلهممم

تركبون التلفريك المكشوف


ولمن توصلون فوق


تنزلون بواسطه هذا الاسود مادري شسمه بس شي شي

نفس الصوره

وبعدها هذا السكوتر

يتبع....





​

 

[بسنت]

وبعدين وصلنا الى متحف الشمع

وبالنسبه لي (بعد مضيعه للوقت)


اللي متابع تقاريري يعرف انا ما احب السكون والشياء الجامده والمتاحف كلش


انا احب اللويه والحركه والاكشن والمغامره


فوايد انشطه ماتناسبني بس عشان الاطفال


والله استانسو اهم شي

وشافو لاعبينهم اللي يحبونهم والممثلين

قبل لا ندخل ودونا مكان مثل فلم تمثيلي عن سنغافور


الفلم يقوم شخص بتمثيله جدامنا عن سنوات تطور سنغافوره

وندخل من غرفه لي غرفه يتغير الشخص و الملابس

حسب التطور



السالفه مو جذي


سألونا من وين قلنالهم من الكويت

جان يسألون الناس اللي معانا

ولا كلهم يقولون انهم سنغافوريين بس عايله وحده اندونيسيا


المهم




جان يسألون شنو يعني سنغافوره


انا جاوبت الكل ساكت


وبعدين سألو عن احد السنوات شنو صار جان بو بدر يجاوب انه صارت مستعمره بريطانيه


والسنغافوريين ساكتين


مادري مايعرفون تاريخ بلدهم ولا مايعلمونهم بالمدرسه




...

ودخلنا متحف الشمع

ربعي الهنود

وطلعنا الى


برج النمر.. يصعد الى فوق ويدور

وتشوفون سنتوزا


حسيتها تركيا بهالصوره

وبعدها الى حديقه الفراشات والحشرات

واللي يبي يصور

يتبع...​

 

[بسنت]

وبعدها رحنا الى

4D adventure land

3 افلام على طريقه ال 4 دايمنشن


حلوين

مده الفلم من 15 لي 20 دقيقه

يمكن 3 او 4 انشطه ما دخلناهم


وهذا اخر نشاط دخلناه

عباره عن حرب اسلحه ليزر بين فريقين

المكان صغير توقعته اكبر من جذي


لانه انا داخله بماليزيا ليزر واااايد اكبر من هذا واحلى




المهم صارت الساعه 5:30

وردينا الفندق بسرعه


لانه ورانا شي مهم

على مابدلنا وطلعنا صارت الساعه 6:30



وعلى مسرحيه سندريلا



العرض موسيقى


بس انا الوحيده اللي استمتعت فيه



اليهال كانو بينامون


و بوبدر مو عاجبه سندريلا

اهم شي اني حاجزه اول سطر

ولانه ماتغدينا بسبب الانشطه اللي ورا بعض


تعشينا عشاء دسم



في هارد روك كافيه

وخلص اليوم​

 

[بسنت]

اليوم السادس:


18 ديسمبر 2015


اليوم الانطلاق من سنغافوره الى مدينه جوهور باهرو الماليزيه



طبعا فكره السفر الى جوهور باهرو من تقرير ابو مشاري اللي كتب عن الاوتلت وانا حطيتها ببالي




بحثت كثير عنها مالقيت شي ..

بحثت بالانجليزي لقيت بعض الاجوبه للاسئله اللي ببالي


واهمها طريقه الوصول اليها


اول شي جوهور بارو عاصمه لسلطنه او ولايه جوهور

وتعتبر اقرب الى سنغافوره


والوصول لها عن طريق البر او الجو


طبعا الجو اقرب مطار لها اهو سيناي


والبر اما عن طريق الباص او تاكسي




ولقيت انه ليغولاند يقع في ولايه جوهر بعد

وصلنا خير



اخترنا النقل من سنغافوره لي جوهور بارو عن طريق تاكسي خاص

اغلى بالسعر لكنه افضل


مانقدر نروح بالباص واحنا معانا جنط وايد و الباص يوصلنا لي مكان ومنه ناخذ تاكسي ..

ليش من البدايه ناخذ تاكسي اريح لنا



طلبنا تاكسي قبل يوم من الفندق بقيمه 200 دولار سنغافوري

ولمن كنا بنطلع من فندق هارد روك

قالنا احد العاملين ديرو بالكم بمنطقه جوهر بارو عالاطفال والفلوس


ما اهتمينا لكلامه وايد

ومشينا مع التاكسي

وايد كان يتكلم

والى الحدود

المسافه من هارد روك سنغافوره الي فندقنا بجوهر بارو اقل من ساعه

بس زحمه عالحدود كثيره تعطلنا يمكن ساعتين

يقول السايق انه وايد ناس تعبر الحدود تاكل وجبتها وترجع لانه الاكل ارخص بماليزيا


الله يعينهم


وعبرنا الجدود

الحين بنتقل بالقسم الماليزي لتكملة التقرير





وشكراااا شكراااا من القلب على كل كلمه حلوه و كل متابع

احبكم كلكم

​