احب اسيا وبالاخص تايلند

[دودى]

بوابة السفر الى تايلند

بوكت ... رحلة سريعة لكن ممتعة بقلم احلى من العقد

يسعد أيامكم



سفرة لم يتم التخطيط لها

ولا التفكير فيها



ولم تخطر في البال ولا على الخاطر



نعم احب البحر



احب الجزر



احب اسيا



لكن كانت بالنسبه لي غائبة عن تفكيري لان اعرف ان صعب تحقيقها على الاقل في هذه الفتره


في يوم من الايام



كلمتنى خالتي وقالت شوفي لنا حجوزات لتركيا


وفجأه وبدون تخطيط سابق


ردت قالت لي شوفي لنا في بوكت


وليش ماتجون معانا


تعالو نروح كلنا جماعه نستانس


طبعا



انا ماصدقت خبر ووافقت حتى قبل مااشاور اهلي خخخ


عقب تذكرت لازم اشاورهم



والحمدالله الامور تسهلت والاهل وافقو



وخلاص كلها كم يوم ونطير الى بوكت

رتبنا الحجوزات


واخترنا فندق كانت ساكنته خالتي وعائلتها من قبل ومدحت لي اياه وطبعا مافي وقت للبحث


وجاء موعد السفر



وطرنا الى بوكت بالخطوط القطرية دايركت الى بوكت مروراً بكوالالمبور والتوقف لمدة ساعة واحدة بدون النزول من الطائرة ...


بدت ملامح بوكت تبين بين الغيم والبحر جزر خضراء رائعة الشكل

ونزلت الطيارة في مطار بوكت ...

خلصنا الاجراءات بسلاسه وخذنا الشنط وتوجهنا للباب عشان ندور تاكسي وشفنا شركات عند الباب توصل الى الفندق يا إما بمواصلات خاصه او بمواصلات مشتركه (( باص)) وكان عددنا كبير
ومافي سيارة حاليا خاصه فقلنا بنروح بالباص المشترك وسعر الشخص 180 بات (( مايعادل 19 ريال قطري))


ركبنا الباص و حظنا كان حلو بنفس اللحظه الي ركبنا فيها الباص حرك على طول وكان في واحد اجنبي قاعد بالكرسي الي جدامي وقال انتو محظوظين اول ماجيتو مشى الباص انا صار لي ناطر ربع ساعة ...


بعد مامشى الباص وعبرنا شوارع وطرقات توقف الباص عند محل تابع لشركة سياحيه هي نفسها الي أجرنا منها الباص المشترك الي راكبينه حاليا


وقالو لنا شخص واحد من كل قروب ينزل عشان ناخذ معلومات الفندق الي تبون تروحون له


نزلت انا من قروبنا لان الاوراق كانت عندي وانا مسويه الحجوزات


واستقبلوني داخل وخذو عنوان الفندق وقامو يعرضون علي عروض سياحيه


عجبني عرض للجزر وطبعا انا ماعرف الاسعار برع شلون بس قررت احجز لبكره من عندهم


ودفعت لهم مقدم سعر 1300 بات (( يعادل 140 ريال تقريبا )) لشخص واحد و الباقي بندفعه لهم بكره قبل مانروح للرحله .. وطبعا هم راح يمرون علينا الفندق ياخذونا ...


وعقبها ركبت الباص وكان الكل ينطرني والبعض كان يتحلطم اني وايد تأخرت داخل

الاجنبي الي قالي انتو محظوظين يقول ان هالشركة ماتعتبر ارخص شركه وكان ممكن نلقى خيار ارخص اذا دورنا في الشركات الي في الباتونق .. بس الوقت ضيق واحنا نبي نروح بكره للرحلة فمافي وقت للبحث ...


المهم


وصلنا الفندق ...


حجزنا كان في فندق اسمه


Le Flora Resort


موقعه على شاطئ الباتونق مباشرة على الشاطئ بدون مايفصل بينه وبين البحر شارع
وحوله محلات مساج ومطاعم و مغاسل واسواق وشارع حي وجميل جدا جدا جدا


يعني بختصار الجهه الاماميه للفندق هي على شارع حي والجهه الخلفيه مباشرة على الشاطئ الرائع

يمين الفندق مطعم ماكدونلدز ويساره ستاربكس

وامامه مباشره شارع جميل ياخذكم الى فندق كي ومنه الى شوارع متفرعه حيه جدا

وهاي واجهة الفندق من الخارج

دخلنا الفندق .. وكان الاستقبال مفتوح ومكشوف

والموظفين كانو وايد بشوشين ورحبو فينا وقالو لنا ساديكااااا مادري شنو يعني بس اعتقد مرحباااا وقالو لنا تفضلو جلسو هنا واحنا بنجيب لكم الاوراق وكل شي لين عندكم

هذه الصورة تم تصغيرها . الحجم الافتراضي لها هو 815x611.

الفندق يصنف بأنه ذو 5 نجوم ... لمعرفة المزيد عن الفندق وعن الرحلة تابعو الجزء القادم

• 

 

[دودى]

مرحبا جميعاً


شلونكم ان شاء الله بخير


بصراحه دام ان عندي وقت بكمل التقرير وان شاء الله اقدر اكمله بسرعه


لاني اخاف انشغل عقب ومااحب اتأخر عليكم احس ينقطع حبل افكاري


المهم


اخر شي وصلنا له ان احنا دخلنا الرسبشن وقعدونا على الكراسي الي راويتكم اياها


وقدمولنا اطواق الياسمين وعصير انناس بااااارد ومنعش يبرد عالقلب وفوطه بارده منعشه

بعد ماخلصنا اجرائات الشيك ان اخذنا موظف الى غرفتنا ..وقبل مااكمل خلوني اقولكم انواع الغرف


توجد 3 انواع للغرف


النوع الاول وهو الارخص .. غرفة تطل على المسبح وفيها بلكونه بالطابق الثاني
النوع الثاني الاغلى من الاول .. غرفة مباشرة على المسبح وفيها شكل ماتقولون بلكونه عليها كراسي شيزلو عالمسبح وتقدرون تطبون بحمام السباحه مباشرة وهالغرفة بالطابق الارضي وجزء من المجموعه كان ساكن بهالغرفه وهي غرفة واسعه .((الليله بـ 961 ريال قطري ))
النوع الثالث .. غرفة بالدور الثاني بإطلالة على الشاطئ والبحر وهاي كانت غرفتي وهي اغلى من الغرف الي فوق سعر الغرفة ((الليله ب 1259 ريال قطري ))
النوع الرابع .. فيلا بغرفة نوم واحده مع مسبح خاص.
النوع الخامس .. فيلا بغرفتين نوم مع مسبح خاص (( اعتقد هالخيار موجود اذا انا مب غلطانه))


---------------


شكل ماقلت لكم ان غرفتي كانت من النوع الثالث والي تقع في الدور الثاني وهي غرفة باطالاله مباشره على الشاطئ كنت متخيله انام عالسرير وافتح الستاره واشوف البحر جدامي لان الطوفه كلها قزاز واشوف الشروق او الغروف والمنظر الخلاب ... المهم


رحنا ورا الموظفه الي بتراوينا غرفتنا وركبنا السلم وراها


وكانت تعرفنا على مرافق الفندق

ووصلنا الغرفة ..

وافتحت الباب واول شي لما شفت الغرفة فرحت وعجبتني

و دخلنا الغرفة وكانت واسعه وشرحه وأول مالتفت يمين الا القى الجاكوزي جمب الطوفه ومافي طوفه تستره عن الغرفة

يعني عندي خيار من اثنين يا اما اطرد اختي واخذ راحتي بالجاكوزي
او اني اطب في الجاكوزي بكامل ملابسي خخخخخ


وهاي المكتب وعنده في باب اعتقد بلكونه تطل عالشاطئ بس تصدقون اني ماخذت بالي من الباب الا الحين كنت مصدومه من الجاكوزي والحمام

نظرة اخرى على الجاكوزي وتلاحظون ان الي يفصل الجاكوزي او الحمام بالاصح عن الغرفة عباره عن خزانه او ارفف صغيره وقصيره

وهاي السرير .. واذكر اني طلبت سريرين ف الغرفة بس ردو علي بإيميل اعتذار ان هم ماعندهم سريرين منفصلين في كل الغرف لكن الموظفة قالت لي ان احنا عوضناكم وعطيناكم لحافين و 4 مخدات منفصله وكان خيار جيد وفكره ممتازه

وهاي المغاسل و ادوات الحمام والفرشاه والمعجون وشغلهم مرتب

هذه الصورة تم تصغيرها . الحجم الافتراضي لها هو 815x611.

وهاي الميني بار وكان مجانا الجمل بما حمل كل الي فيه مجاني وفوقه غلاية ماي وشاي وقهوه وحليب وسكر وكوفي ميت وكل يوم فوق ال6 غراش ماء مجانا وطبق فواكه

مستعدين للمفاجئة ..


شوفو الحمام

الجاكوزي والشاور و المرحاض وانتو بكرامه مفتوحين عالبحري لاطوفه تستر ولا ستاره تفصل ولا حتى بارتشن وفوق هاي كله مافي شطاف او هوز للغسيل والمغاسل بعيده جداً انصدمت صدمت حياتي


وقمت اقول للموظفة


How >>How can i use the toilite
HOw How How Hooooowwww


قمت انابح هاو و هاو خخ


قامت اعتذرت لي وقالت كل الغرف الي تطل على البحر بهالطريقه سوري


قلت لها ماااقدر شلون استخدم الحمام


جيبي لي بارتشن او اي شي يستر


الموضوع صعب


وكان يوجد امامنا حلين لا ثالث لهم


الحل الاول يا إما اختي تطردني برع الغرفة عشان تستخدم الحمام ..


او انها


تراويني درس عملي عن طريقة استخدام الحمام

الموظفة حست ان قلبي الصغير لايتحمل هالحمام


وقالت لي دقيقه بتصل اسأل اذا في امكانيه نبدل الغرفة


واجرت اتصال وعقب قالت اوكي عندنا غرفة فاضية بس انتظرو 10 دقائق في الاستقبال لين يجهزونها لكم ..


ونزلنا الاستقبال ننتظر الغرفة الجديده تجهز ..


في الجزء القادم .. تفاصيل الغرفة الجديدة ...








​

 

[دودى]

قلت لكم ان في ناس من ضمن مجموعتنا كانو حاجزين غرفة مباشرة على المسبح ..

خلوني اتكلم عن غرفتهم

للاسف ماصورتها

بس حمامهم مستور ويتغطى وعادي خخخخ

والسرير يشبه سريرنا وعندهم سوفا كبيرا في الغرفة تتحول سرير للشخص الثالث .. بختصار هالغرفة المباشره على المسبح تستوعب 3 اشخاص وطبعا ككل غرف الفندق الغرفة كبيرة وشرحه و عندهم بلكون فيه شيزلونين مباشرة على المسبح وفي الليل يغطون رجولهم من بلكونتهم في المسبح ..


اما الان


بقولكم عن غرفتنا الجديدة ...

قالت لنا الموظفة الغرفة جاهزه تعالو معاي

ومروراً بحمام السباحه الجميل الي يتوسط كل غرف الفندق وفي نهايته تشوفون البحر بس يمكن مايبين في الصوره

و دخلنا لغرفة في الدور الارضي وعلى حمام السباحه مباشرة


وانا حدسي يحدثني ويقولي يا ترا هل هاي الفيلا

ووقفنا عند الباب وقالت لنا الموظفة نعتذر عن حمام الغرفة السابقة و عملنا لكم ترقية وعطيناكم فيلااااا بمسبح خاااااااااص


ياحلاوه يا بقلاوه

بصراحه اهل شرق اسيا وايد اجاويد ويكرمون الضيف والزباين ويحبون يحافظون عليهم تخيلو عطونا فيلا مقابل الغرفه وبنفس السعر

حسيت انهم فعلا يهمهم سعادة العميل اكثر من الاستغلال المادي خلونا نشوف الغرفة .. وطبعا مثل ماقلت لهداوه في ردي عليها ستايل الفندق عصري تايلندي .. ستايل فنادق الجزر

المهم

هاي هو السرير ويحليلهم حاطين بعد لحافين و مخدات ومجهزينه بشكل جميل

وطبعا في هالوقت كنت مهتمه جداً اطمن عالحمام وانتو بكرامه ورحت له

شوفو هناك ممر مؤدي للحمام مفتوح مافيه باب بس فيه ستاره تتسكر والحمام صاد يعني فيه خصوصيه

يوجد مغسلتين وحده يمين ووحده يسار

وهاي الحمام المرحاض وجزء من الجاكوزي

ملاحظين ... الله عوظنا بحمام مستور و فيلا وفوق هاي كله الحمام فيه شطاف او هوز للغسيل

وهاي الجاكوزي

هذه الصورة تم تصغيرها . الحجم الافتراضي لها هو 815x611.

تصدقون اكتشفت اني مصوره خرابيط ماصورت الحمام عدل ولا غرفة النوم عدل كله سريع سريع ماصورت لكم الشاور وللعلم الحمام يطل على بركة الفيلا ويفصل بينهم حاجز زجاجي ... يعني شفاف يعني اذا حد يبي يروح الحمام الي في البرجه يدشون داخل لين الانسان يخلص شغله من الحمام .. بس هالشي كلش ماكان مزعج بالنسبه لنا وماصادفنا هالشي الا مره وحده ..

المهم

عقب ماتطمن قلبي بالحمام وفرح بوجود الهوز

قمت اركز شوي عالغرفة لقيتهم حاطين عالسرير ضفدع خشبي
و في حلجه ورقه كل يوم تتغير فيها حالة الطقس والانشطه المقترحه لهذا اليوم

اما الخزانات فتحتها اشوف اش فيها

لقيت في الاولى صندوق امانات ومضلات و مصباح كهربائي وارواب وسليبرز و فوط

والخزانه الثانيه وفيها الميني بار الي هو مجاني و ادوات اعداد الشاي والقهوة مجانا

وكما في كل الغرف على الاقل 6 غراش ماي في اليوم مجانا

مقابل الكبتات يوجد سلم خشبي للاعلى

ركبنا السلم ووصلنا فوق

غرفة جلوس وفيها ساوند سستم وتلفزيون و مشغل ام بي ثري وميني بار ثاني مجاني وكراسي فات بوي عالارض

رحت افتح الستاير عشان اشوف المنظر طلع المنظر مش بطال بس ممكن نشوف البحر اخر شي

هذه الصورة تم تصغيرها . الحجم الافتراضي لها هو 815x611.

هذه الصورة تم تصغيرها . الحجم الافتراضي لها هو 815x611.

وعقب ماشفنا الصاله نزلنا مره ثانيه ورا الموظفة وودتنا عند المكان الجميل ...

حمام السباحة الصغير الخاص بالفيلا

​

ماتتخيلون شلون كنا مستانسين وحسيت ان هاي مفاجئة و خيره من الله ان الحمام في الغرفة القديمه كان مب جميل.
البنات ماصدقو راحو شرولهم مايوهات ايشي احمر وايشي اصفر وايشي فسفوري خخخخ من المحلات الي عالشارع وعاشو حياتهم وخصوصيتهم التااااامه في حمام السباحه
واذكر يوم من الايام شرينا عشا متأخر من ماكدونلز و اجرنا فلم و تجمعنا في الصاله فوق نشوف الفلم وقبل العشا والفلم تسبحنا في البرجه الخاصه ...

الجدير بالذكر .. ان الانترنت مجاني في الفندق

وبهاي اكون خلصت معاكم جزء الغرفة الجديدة .. القاكم لاحقاً​

​

 

[دودى]

بعد مادخلنا الفندق وريحنا شوي وصلينا ونعنشنا


تجهزنا ورحنا ندور لنا مطعم ناكل فيه


وبدأت متعت التمشي في شوارع بوكت ..

هالمحل للمساج من جيت وانا حاطه البال عليه وابي اجربه بس يعتبر غالي يمسجون الساعة بـ 40 ريال بس كل مكان الساعة ب 30 او حتى 25

وقفنا عند اول مطعم قريب من الفندق وفيه عزف حي بس مادش قلبنا وكملنا مشي بس عقب اكتشفنا انه تابع لفندقنا

هذه الصورة تم تصغيرها . الحجم الافتراضي لها هو 815x611.

طول ما احنا ماشيين نشوف اشكال والوان من الناس ونسمع اصوات مره موسيقى ومرى سوالف ومرا دعايات عندهم سيارات تمر تسوي دعايه لمنتج ويتكلمون بالمغرفون المكان مفعم بالحياه

هذه الصورة تم تصغيرها . الحجم الافتراضي لها هو 815x611.

وهاي فندق قريب من فندقنا وايضاً مباشر على البحر بس ماعرف شلون غرفه

لقينا هالمطعم وخالتي كانت مجربته وتمدحه .. قلنا يالله نجرب بالذات ان بطنا خاااالي ويصفر من الجوع

عاد احنا ماشاء الله علينا قدم الخير عالمكان الي ندشه ... اي مكان فاضي ندشه نلقى ورانا عشره داشيين

المطعم كان فاضي .. بس عقب مادخلنا جو الناس وقعدنا على طاوله مطله عالشارع والمطعم مفتوح فنسمع اصوات الشارع والحمدالله ماحسينا بالحر او الرطوبه كان الجو زين


هاي المنظر من طاولتنا

جاتنا القرسونه خذت الطلبات

وهاي الطاوله خخ

واول طلب شوربة توم يوم بالربيان
لذييييييييييييييييييييييييييييييذه وتفتح الخشم والبلعوم

نراقب الشارع في انتظار الاكل

وبينما نحن نراقب الشارع الا نسمع حشره و صوت هبان جاي من بعيد وواحد يتكلم يقول ثيرزدي نايت (( توموووووورووووونايت )) تووووومووووروووو نايت وصوت هبان


واخر شي يجينا هالبيكم وحاط فوقه هنود معصقلين ماسكين القفاز مال البوكسنج وطلعت هالحشره دعاية لمباريات يوميه لرياضة البوكسنج تصير في بوكت

هذه الصورة تم تصغيرها . الحجم الافتراضي لها هو 814x504.

ووصل الاكل


طلبي الاول ارز مقلي بالخضار فقط وكااااااان لذيييذ ويذوووب في الحلج ولو طلبته بروحه كنت باكله بتلذذ

كاري اخضر بالربيان بيني وبين خالتي

ربيان مقلي بالثوم والفلف الاسود لذذذذذذذذذذذذذذذذذذذذذذذذيذ بعد كان بيني وبين خالتي

وهاي اطباقي انا و خالتي

وهاي ام الربيان مقليه بالمكسرات بعد لذييييييييييييييذه مع رز ابيض

وهاي طبق ربيان ماعرف اسمه حلو بس حاااااااار فلفل بطريقه الواحد مايقدر يطعم الاكل يذوق بس فلفل

هذه الصورة تم تصغيرها . الحجم الافتراضي لها هو 802x415.

ام الربيان مشويه

هذه الصورة تم تصغيرها . الحجم الافتراضي لها هو 852x616.

المائدة كامله

طلعت الفاتوره تقريبا 650 ريال قطري اعتقد السعر معقول مقارنة بكم الطلبات وكلها اكل بحر ويقولون ان اكل البحر غالي .. بس للعلم هالمطعم مايعتبر مطعم رخيص في بوكت ..


عقب الاكل والاستمتاع بمذاق الاكل التايلندي ... قمنا نتمشى في الشارع وندخل المحلات الالوان جذابه كلشي ملون وفسفوري او ابيض زاهي لامكان للالوان الغامجه والكاتمه

خذتلي مليون نظاره من هالنظارات كل يوم البس لون في بوكت


النظاره الوحده ب 20 ريال تقريبا تقليد درجه مليون لري بان بس حلوه الالوان وبما اني بستخدمها في بوكت فقط فمافي مانع

وبعد المشي والمناقز من محل لي محل ورحلة الطياره الطويله قررنا نروح نسوي مساج ونختم يومنا لان بكره ورانا قومه من الصبح والساعة قريب ال 10 دخلنا محل مساج وقلنا لهم الي يبي مساج للرجل والي مساج بالزيت والي مساج تايلندي .. واسدحونا كلنا جمب بعض وبينا ستاره كل شوي نطل على بعض وهاتها ضحك و المساج بدال مايكون للاسترخاء صار للضحك حتى الي يمسجونا كانو هبلات يستهبلون ويضحكون ويضحكونا معاهم ويسوون حركات هبله بصراحه ذاك اليوم فطسنا من الضحك وكل شوي احاول اندمج واركلس الا يصير شي يضحك وانفجر من الضحك معاهم

و عقب ساعه خلصنا المساج وطلعنا وهاي الاسعار

​

<B>

​

بصراحه استانسنا وايد في هالمحل بس قررنا مانروح لهم مره ثانيه لانهم هبلات مايخلونا نسترخي طول الوقت ضحك​

​

وعقب المساج خذو كروت تيلفون للبلاك بيري (( نسيت اسم الشركه )) مسبقة الدفع والاتصال محلي فقط ولازم تفعيل خدمة البلاك بيري عن طريق الاتصال بمركز الاتصال والضغط على رقم 77 للتحدث بالانجليزيه وعقب تطلبون منهم يفعلون النت او البلاك بيري مقابل مبلغ معين لمدة معينه وخلاص ماتمر ساعة الا البلاك بيري شغال ان شاء الله ...



وعقبها ردينا البيت ننام ونرتاح لبكره ... لان ورانا مغامره جديده ..



قبل ماانهي هالجزء



خلوني اوضح لكم نقطتين



الاولى : عدد ايام السفر كانت فقط 4 ليالي 5 ايام


الثانيه : سفرتنا لبوكت كانت لكسر الروتين و الاسترخاء وتغيير الجو



وللسببين الي فوق يمكن راح تشوفون التقرير مش مليان بالفعاليات والمعلومات بس قد يعطيكم فكره بسيطه عن اجواء بوكت



وسلامتكم​

​

</B>

 

[دودى]

أعتذر عن التأخير ..​

اليوم هو يوم جديد في بوكت يوم خاص للجزر حجزت امس رحلة ل 4 جزر من ضمنها جزر جمس بوند وزيارة الكهوف والتجديف في البحر .. الشخص بـ 1300 بات مايعادل تقريبا 140 ريال ومدة الرحلة يمكن اكثر من 7 ساعات يعني يوم كامل تقريبا شامله الغداء ..

وقت الحجز دفعت لشخص واحد فقط واليوم دفعت باقي المبلغ للمندوب الي جاني الصبح من الشركة ..

اول ماقمنا من النوم الصبح الساعة 7 ونص لبسنا وتجهزنا ورحنا نفطر من بوفيه الفندق وللعلم حجزنا شامل الفطور ... مكان المكعم جميل يطل عالمسبح

هذه الصورة تم تصغيرها . الحجم الافتراضي لها هو 1023x767.

هذه الصورة تم تصغيرها . الحجم الافتراضي لها هو 1202x1203.

وهالصباح كان هادي جدا جدا



بالنسبه لاختيارات الفطور في البوفيه بصراحه كل دول شرق اسيا بصراحه الفطور مايعجبني وذلك لقلة الجبن الي فيه وانا وجبتي ماتحلو الا بالجبن .. البوفيه منوع بس ماعجبني فماتريقت فيه الا مره وحده والباقي كنت اخذ لي كورواسون جبن من ستاربكس

هذه الصورة تم تصغيرها . الحجم الافتراضي لها هو 819x548.

بعد الفطور قعدنا في اللوبي لين وصل الباص و اخذنا

وانطلق الباص و اليوم هو اول يوم نشوف شوارع بوكت و شواطئها وغاباتها نهارا

شوفو معاي الشوارع والشواطئ و الغابات .. المناظر جميله ولا تخلو من البدائية الجميله

هاليوم هو اليوم الوحيد الي شفنا فيه الشمس وكانت خجوله تطلع شوي وتختبأ وراء الغيم شوي​

وبعد رحلة بالباص حول بوكت وصلنا لمكتب استقبال انتظرنا فيه الى ان يحين موعد انطلاق السفينة يمكن انتظرنا فيه ربع ساعة قعدنا اهني​

وأكمل لاحقاً​

 

[دودى]

جلسنا ننتظر بدء الرحلة في الجلسات الخارجية للاستراحه​

​

قلنا نغير جو وندخل سوبرماركت الاستراحه نشوف ايش يبيعون

كانو يبيعون ملابس بحر وملابس صيفيه خفيفه و قبعات و اكلات خفيفه وشاي وانصح وبشده انكم تشترون قبعات عن الشمس الي من تحت فيها لاستيك يمسك القبعه عشان ماتطير

وحان وقت الرحله وقال لنا واحد من الموظفين الحقوني ولحقناه باتجاه البحر و الاكشاك الي تبيع القبعات والمرطبات والاكسسوارات الخفيفه طول الطريق

​

وبين البحر الجميل

​

وصلنا لجسر يمر وسط البحر ومشينا عليه باتجاه السفن

البحر مغري

منظر الميناء والبحر والسفن والجبال في الخلف روعه

هذه الصورة تم تصغيرها . الحجم الافتراضي لها هو 979x419.

ووصلنا عند السفن وركبنا سفينتنا

ودخلنا سفنا بسلاسه ويسر

و لما قعدنا شفناهم حاطين لنا فواكه مجانا و ماء وبيبسي وعصير مجانا وشاي وقهوه مجانا و للبيع شبس برنغلز و مشروب غريب ماعرفته

​

قعدنا ننتظر المركب يتحرك وكانت الشمس موجوده فكنا نحس بالحر ...


اراكم لاحقا
​

 

[دودى]

وركبنا المركب ..

و مشى المركب


ومن مشى هب علينا ذاك الهوا الزين ماناقصنا الا فراش وننام فوقه ونمخ مخ

هذه الصورة تم تصغيرها . الحجم الافتراضي لها هو 851x619.

هذه الصورة تم تصغيرها . الحجم الافتراضي لها هو 908x541.

بعد مامشينا بشوي جانا مدير الرحلة وقام يشرح لنا عن الاماكن الي بنروحها وقال ان احنا بنوقف في 4 جزر وبندخل كهوف وبنقوم بتجديف المراكب الصغيره الي يسمونها كانوي و قال ان راح يكون هناك غداء من ضمن الرحله والماء والمشروبات الغازيه ببلاش والفواكه ببلاش
و اول جزيرة راح نوصل لها بعد 45 دقيقه ...

هاي خريطة رحلتنا​

وبعد ماخلص مدير الرحله بدأنا بالاسترخاء والاستمتاع والتصوير

البحر حلو .. والجزر البعيده رائعه مناظر جدا جميله العين والروح تفرح لما تشوفها .. قمة الاستمتاع والهدوء النفسي​

هذه الصورة تم تصغيرها . الحجم الافتراضي لها هو 854x680.

هذه الصورة تم تصغيرها . الحجم الافتراضي لها هو 843x820.

سبحان الله الي عطانا هالجمال شيء يبهر العين ويسعد القلب

كل ماتأملنا الغيوم .. شفنا فيها اشكال مختلفة مره ورده ومره حصان ومره وجه بنت ونفس الشي الجبال والصخور في وسط البحر كل ماشفناها وتأملناها شفناها تكون اشكال غريبه كلن وخياله وحده تخيلت الجبل كأنه انسان منسدح والثانيه وجه يطالع السماء

لحضات سعيده عشناها في التأمل ..​

 

[دودى]

وصلنا لاول محطة​

توقف المركب .. ونزلونا منه بس ركبونا على قواب صغيرة فيها واحد يجدف

ركبنا في المركب الصغير بحذر و بدينا نبتعد عن مركبنا​

واقتربنا من الصخره الكبيره او بالاصح الجزيرة الي على شكل صخرة كبيره

وقربنا من الكهف شووووفووووه

شوفو شلون الفتحه ضيقة والدخول كان بالنسبه لنا تحدي شلووون بندش

هذه الصورة تم تصغيرها . الحجم الافتراضي لها هو 851x682.

خلاااص بيننا وبين الدخول للكهف مسافة قريبه جدا جدا

​

<B>

واكمل بعدين ​

</B>

 

[دودى]

وبدت المغامره​

و خلاص بندخل الكهف​

شلون... شلون​

​

يدوووووب السقف شوي ويطق راسنا من كثر ماهوقريب​

​

​

​

وعلى قولت محمد عبده ( جاك علم صحيح وراح هرج المزوحي ) صار لازم ننفذ الخطه الخماسيه وقال لنا الي يجدف سليب سليب .. يعني انسدحو عشان ماتطق الصخره راسنا​

​

​

​

كل شوي نشوف صخره جدامنا نازله جدا و احساسنا يقول مافي مجال نمر واختي قاعده جدام كلش هي كل مالاحت صخره في الافق تنبهنا وتقول نو نو .. ويه ويه ماقدر اخااف ويه ويه ماحب ماحب خخخخخخخ​

​

​

بصراحه مادري شلون كنا نمر الصخور نازله مرينا على صخوركنت احس لو رمشت رموشي بتطق الصخره من قربها​

​

ولمحنا النور من بعيد واخيرا بنطلع للوسع من عقب الضيق​

​

وقربنا من النور اكثر​

​

وطلعنا ..​

الا ذاك المنظر العجيب الغريب الصخور محاطة فينا على شكل دائرة و الاشجار تغطي الصخور ومن فوق السماء الزرقاء تبين​

​

​

​

​

شوفو المكان .. بصراحه الطبيعه مبهره سبحان الله​

​

​

المياه اهني ضحله يعني مب عميقه لو ملاحظين الناس واقفين على رجولهم واعتقد لما يرتفع منسوب المياه مستحيل هالمراكب الصغيره تقدر تمر تحت الكهوف الضيقه​

​

​

​

شوفو سبحان الله​

​

واكمل لاحقاً​

 

[دودى]

ومازالت المناظر الجميله والعجيبه الي وراء الكهف تبهرنا كل ماتأملناها

شوفو شلون جذور الاشجار كبييييره​

الخضره حلوه​

وحان الوقت للعوده للمركب طبعا لازم نمر تحت الكهف .. مستعدين

​

<B>

يتبع ...​

 

[دودى]

و إلى الكهف مره ثانيه

ودخلنا الكهف وحسيناه صار نازل اكثر من لما جينا​

وطبعا صار مافي مجال اصور اخاف ارفع يدي وتضربني الحصاه .. لين بين النور

لين بين المنظر الخارجي .. كان منظر وااااو رائع صخور خضرا ومراكب ماشيه وامواج منظر فعلا رائع​

وخلاص طلعنا

باي باي يالكهف

 

[دودى]

خلونا نكمل ...

ركبنا المركب واتجهنا الى نقطتنا الثانيه و الجو زان والغيم ترس السما

هذه الصورة تم تصغيرها . الحجم الافتراضي لها هو 915x263.

هذه الصورة تم تصغيرها . الحجم الافتراضي لها هو 815x611.

يتبع
​

 

[دودى]

وصلنا لمحطتنا الثانيه وهي ركوب مراكب الكياك او الكانيون الصغيره وكل 2 او 3 في مركب مع شخص يجدف فينا ..​

واتجهنا جهة كهف اخر

والي يجدف قال لنا هير نو سلييب خخ يعني ماراح ننسدح والكهف مش نازل علينا

والمكان حولنا اكيد جميل والجو غائم جميل

الصخور والجزر مهيبه

​

ووصلنا الكهف

صحيح مانمنا بس كان ضيق

كنت ادور خفافيش يقولون هالكهوف فيها خفافيش​

بس مالقيت او يمكن من الظلام ماشفتهم

وبان لنا المخرج من بعيييد واشوفه صغغغير قمنا نتسائل شلووون بنطلع مايكفي صغير

وقربنا اكثر واكثر للمخرج

اشوه كبير نسبيا نقدر نعدي منه

وطلعنا على مكان اخر محاط بالصخور والنباتات

ا
هني مدينا ريولنا ودلدلناها في البحر وشغلنا اغاني من التيلفون و كنا مستمتعين جدا بالاجواء

وبانت لنا جزيرة جمس بوند (( تم تصوير مقطع فيها لجزء من اجزاء فلم جمس بوند))

وعدنا بعد ذلك للكهف و رحنا بالاتجاه المعاكس وماقدرت اصول الا لحضة اقترابنا من المخرج

وطلعنا للنور

واتجهنا لمركبنا الاساسي الكبير للإنتقال الى جزء جديد من برنامج الرحلة

يتبع​

• 
  • 
    
  • 
  • 
  • 
  • 

أبن السلطنةمعجبون بهذا.

آخر مواضيع فريق التطوير
- الفوكس في ربوع جنوب افريقيا ..تقرير مصور بقلم الفوكس
- جنوب افريقيا بطريقتي (لمحة .. فنادق .. توجيهات) بقلم الفوكس
- خريطة جنوب إفريقيا 2013.40 للقارمن للتحميل المباشر بقلم محيرهم
- التقرير المصور لرحلة جنوب أفريقيا 2011 بأكثر من ( 100صورة ) بقلم البارق
- رحلتي إلى ... (اللؤلؤة السمراء) ... جنوب أفريقيا بقلم 【ツ】أنا【ツ】​

​

01-06-2015, 03:53 AM #14
فريق التطوير


حيث يعمل المبدعون

تاريخ التسجيل : Jan 2015

رقم العضوية : 1046

الجنس : ذكر

المشاركات : 712

رد: بوكت ... رحلة سريعة لكن ممتعة بقلم احلى من العقد

​

ومازلنا في المراكب الصغيره متجهين بإتجاه المركب الاساسي

ووصلنا لمركبنا

واول ماوصلنا شفناهم مجهزين لنا الغداء ومجهزين السفرا كااامله وطبعا الغداء شامل الرحله و كنا نقول ماراح ناكل من اكلهم مايندرا شلون طابخينه واكيد مب حلو .. لكن مع هالوقت جعنا ومن شفنا الاكل ماتناقشنا على طول للصحون وقمنا ننجب لنا

كان الغداء عباره عن تشكيله من الارز والنودلز و الدجاج المقلي والخضار المقليه و السمك المقلي و ربيان مقلي .. كان الغداء جيد جدا واكثر شي عجبني الدجاج


كان الوقت الخاص بالغداء 45 دقيقه ... كنا نبحر متجهين لوجهتنا الثالثه وهي جزيرة جمس بوند .. كنا ناكل ومستمتعين بالمنظر والهوا الحلو

وبانت جزيرة جمس بوند من بعيد

وقف المركب الكبير و بدلنا وقعدنا في مركب صغير عشان يكون اسهل لنا الوصول للجزيرة

قعدنا في المركب

ومشى المركب الصغير

الى ان وصلنا لشاطئ جزيرة جمس بوند

ونزلنا للجزيرة الصغيره ذات الشاطئ الرملي الصغير و تمشينا بين سوقها وصخورها

فترة مكوثنا في الجزيرة كانت نصف ساعه تقريبا وهي كافيه لستكشاف الجزيرة و انا استغليت الفرصه ودخلت الحمام العمومي .. بصراحه بغيت ارجع يلوع الجبد بس كنت مجبوره عشان ابدل ملابسي والبس ملابس السباحه (( المايو الاسلامي )) لاني ناويه اسبح في المحطه القادمه


في الجزيرة صخور وتجويفات صخريه غريبه عجيبه

ومرت النصف ساعه ورحنا لنقطة الالتقاء عشان ناخذ المركب الصغير ونعود لمركبنا الكبير .. واختم هالجزء بصورة تشتهر فيها جزيرة جمس بوند​

​

 

[دودى]

بعد مارجعنا المركب الاساسي ..

سار فينا المركب الاساسي بالقرب من جزيرة صغيرة شواطئها رمليه .. وقالو لنا يا اما تختارون تروحن بالمراكب الصغيره المطاطيه وتجدفون بروحكم او تختارون مع احد يجدف لكم احنا اخترنا نجدف بروحنا ...

نزلنا المركب المطاطي

كل 3 او 2 في مركب

وقمنا نجدف و البحر يسوي لي اغراء

مااااستحملت

قمت وطبيت في وسط البحر

وطبعا كلكم تعرفون لما تطبون في الماي اول شي بفعل الوزن والجاذبيه الارضيه تنزلون للقاع ثم تطفحون للاعلى بفعل كثافة الماء ...

اول ماطبيت

نزلت نزلت نزلت و لا وصلت للقاع ... مالي مريال

ولما بديت مرحلة الطفحان تميت ارتفع وارتفع فتره من الزمن لين وصلت للسطح

تعرفون اش معناته ...

معناته ان البحر في هالنقطه كان جدا جدا عميق اكثر من 3 امتار

بس استمتعت بالسباحه وااااايد وتميت اسبح لين حان وقت العوده للمركب العود

رحت لشاطئ الجزيرة وجدفو المركب المطاطي لين الشاطئ وركبت المركب وعدنا للمركب الكبير

وكنا تعابه وجعنا مره ثانيه

وكنت مبلله والهواء جمييييل

قدمو لنا فواكه استوائيه من ضمن سعر الرحلة جح و انناس وشمام وانا رحت قعدت جدااام كلش في السفينه عشان الهوا ينشفني وكان فيه شلة من جنوب كوريا او اليابان الله اعلم كلهم نفس الشكل مشغلين اغاني و روقان اندمجت معاهم بصراحه

وكانت المناظر راااائعه والجو يجنن كان ودي اتمدد واخذ لي غفوه

طبعا ملاحظين مافي صور ... لان البطاريه فضت فماصورت هالجزء

لين رجعنا للمرسى وخلصت الرحلة الجميلة والي سعرها جدا زهيد مقابل المده والخدمات و عقب ركبنا الباص ورجعونا لين باب الفندق ...

وشكل ماقلت لكم كنا ميتين من الجوع وانا كنت اتمطق مشتهيه اكل من نفس اكل امس فقررنا نرجع نصلي عالسريع ونطلع مره ثانيه لان لو ريحنا بننام ونكسل

صلينا و طلعنا بإتجاه المطعم

وصلنا المطعم .. وقعدنا بنفس الطاوله الي قعدنا عليها امس

طلبنا ووصل العصير

طلبنا كلاماري مقلي .. كان جدا جدا لذيييذ والسوس الابيض الي يجي معاه وااااااااااااايد حلو ولذيذ ماذقت مثله

وعقب وصلت شوربة التوم يوم

وهاي طلبي عيش مقلي بالخضار و ربيان بالفلفل الاسود والثوم ... لذذيذذ دش خاطري

وهاي طبق ام الربيان بالكازو والمكسرات

وهاي المنظر من طاولتنا عالشارع

واندمجنا في الاكل بشهيه عاليه .. وعقب ماخلصنا الاكل استرحنا في مكاننا استراحة محارب خخ

و حسينا ان الروح ردت لنا فقررنا مانرجع للفندق ونكمل تسكع ...

يتبع ..


​

​

 

[دودى]

بعد ماترسنا بطونا قررنا نكمل تمشي ..

وتذكرنا ان احنا شفنا مول تجاري واحنا جايين الفندق فقررنا نركب تاكسي يودينا للمول ..

وطبعا تكاسي بوكت غير

عباره عن سياره بيكم او بيك اب او عراوي ويقعدونكم في الدبه مثل الغنم خخخخخ

سألنا التاكسي بكم تودينا المول التجاري وكنا مانعرف اسمه بس هو عرف وقال ب 100 بات يعني حول ال 10 ريالات

وافقنا وركبنا في الدبه

و مشى التكسي والهواء يلعب بالقدله و بعينه تلوق الكحله خخخ

وناسه لما نركب في الدبه هواء واكشن وحركات خخخخخ

ووصلنا للمول وعطيناه ال 100 بات

وهاي صور متفرقه للمول

حاولو تنقشون اسم المول ماعرف اسمه بس شي قريب من جنغل خخخ

اكثر شي عجبني في المول محل مكياج وايد حلو قريب من ستايل ماك بس فيه اشياء وااايد تجنن وحلوه وفي نص المول مجموعه كبيره من البضائع المخفظه بس فيها اشياء حلوه وايد وملابس جميله وخفيفه .. بس من ذكائنا كنا جايين وجايبين معانا شوي فلوس وماجبنا بطاقات البنك .. فتقريبا ماشرينا شي

وعقب ماطلعنا من المول كان في عربات بجانب المول يبيعون فيها اكل وشفنا وحده تبيع كريب نوتيلا فقررنا نشتري من عندها كريب نوتيلا ...

وبجانبها عربه ثانيه ... يبيعون فيها فيران مشويه و لا مسلوقه و مسلوخه لاااااعت جبدي وحسيت ان الكريب فيه نكهة فيران و كلت يمكن لقمتين كريب وتم واقف على جبدي واحس بلوعه منه والسبب عربة الفيران ... تلقون الفار مسلوخ ومسوينه مثل الدجاج المسحب وذيله يتدلدل من تحت وعععع

كل شي ياكلون يلوعون الجبد ...

وعقب قررنا نرجع لمنطقة الفندق بتاكسي وقمنا نسوم التكاسي كلهم قالو لنا نرجعكم ب 200 بات يعني 20 ريال ... ولا واحد فيهم رضى بسعر اقل حسينا ان التكسي الي جابنا مسكين رخيص خخ وركبنا في الدبه وبدأت المتعه ومره ثانيه ..

الهوا يلعب بالقدله وبعينه تلوق الكحله خخخ

صورة تذكاريه لبيكمنا

ولما وصلنا قلنا بنروح نختم اليوم ونسوي مساج بس في محل ثاني غير محل الميانيين

واخترنا اليوم مساج للقدم فقط

و دخلنا محل مقابل لمحل المجانيين الي مسجونا امس ..

وماكان في مساجات على عددنا فأستعارو مساجات من محل المجانيين الي يتضحكون

مقرر علينا انهم يمسجونا

بس اليوم لان مب في محلهم فكانت صاحبة المحل واقفه لهم بالمرصاد اذا ضحكو تخزهم بنضره يصطلبون ويمسجون بهدوء

وبينما كانو يمسجون ريلي خذت لي غفوه

وعقب قمنا بخطى متثاقله ورجعنا طحنا على فرشنا ونمنا

وخلص ثاني يوم في بوكت ..

القاكم في ثالث يوم لنا في بوكت​

​

 

[دودى]

في نقطه مهمه نسيتها ...


بعد المساج وقبل ما نرجع الفندق مرينا على احد المكاتب السياحيه المنتشره في بوكت كل مترين تلقون مكتب او كشك سياحي فلا تحاتون وتفكرون شلون تلقونهم ..

حجزنا رحلة سفاري منهم والسعر مااتذكر كم بالضبط بس اقل من 200 ريال نقول 150 ريال بهالحدود .. و اخترنا وقت الرحله الساعه 2 الظهر .. لاننا ماكنا حابين نقوم من الصبح ونبي نريح ونقوم على راحتنا بالذات ان هالرحله هدفها الاساسي الاسترخاء والاستجمام ..

نمنا ...


وصار الصبح ...

وقمنا على الساعة 12 لين ماتجهزنا ولبسنا طلعنا الساعه 1 الظهر

ومبين ان اليوم الجو راح يكون غائم واحتمال ينزل مطر اصلا طول الليل كان المطر يصب صب

طبعا انتهى وقت الفطور واحنا مالنا نفس غدا نبي شي مثل الريوق فرحنا ستاربكس نقند راسنا بكراميل مكياتو و ناكل اي شي خفيف ...

وتمينا في ستاربكس ننطر لين يمرون علينا ياخذونا .. ووصلو وكانو جايينا في بيكم خخخخ

و مره اخرى .. الهوا يلعب بالقدله وبعينه تلوق الكحله

بس عاد في النهار وناسه تشوفون كلشي والهوا هوانا

والطريج هالمره مختلف كله صاعد مثل طريق الجبل والخضره حولنا والبحر نشوفه هناااك

وبينما انا اصور الشارع صورت سيارة الشرطه الا يوقفنا التاكسي وكلم السواق مادري اش قال له وعقب خلاه يروح عاد مادري وقفه لاني صورته ولا لسبب ثاني مادري والله ..

ووصلنا لمحطة انطلاق رحلات السفاري ... ونزلنا من البيكم ... وهاي بيكمنا صوره للذكرى

يتبع​

​

​

 

[دودى]

نزلنا من سيارة التاكسي

وقالو لنا روحو ذاك الصوب

و قالو لنا اول شي بتسوونه رحلة سفاري على ظهر الفيل

واتجهنا باتجاه مكان صعود الفيل

محل لبيع الهدايا

ووصلنا لين المكان المخصص لركوب الفيل

وكانو واقفين طابور ناس ينزلون وناس يركبون
ومن ظمن الناس كان فيه صينيين

لما شافوونا هدو الفيل وهدو الطبيعه وهدو كلشي وقامو يصوروونا حسسونا ان احنا احد معالم البلد خخخخخ
قمنا نستهبل ونسوي حركات هبله عشان تطلع الصور مب حلوه خخخخخ

وقلنا لما بيشوفونا نستهبل عليهم بيتفشلون ومابيصورون الا استانسو وزادو جرعة التصوير وهم فرحانيين خخخ هبلان هالصينيين
المهم

كل اثني ركبو فوق ظهر الفيل

وتميت انا بروحي اخر وحده كله منكم اقعد اصور لكم


وهاي ناس ثانيين يركبون

وهاي ناس ثانيين يركبون

مشى الفيل وحسيت المقعد ثابت وآمن اكثر من الي ركبته في الهند وهالبنت واقفه تصورك وعقب تبيع عليك صورتك

ودخلنا الادغال

جولتنا حجزناها لمدة ساعة على ظهر الفيل بس ترا لو تاخذونها لمدة نصف ساعة كفايه لان المسار واحد بس الفرق ان السايس يترك الفيل واقف كل شوي ومايمشيه احس عشان يمر الوقت

اهني لاحظت ان الي جدامي سوو دراما وكانو خايفين بس مادريت ليش

والحين دوري عرفت ليش الخوف فيه غصن طايح عالارض والفيل لازم يشقح فوق الغصن ياااويليييي

وبينما انا على ظهر الفيل الا اسمع صوت الاذان مادري من وين طالع بالضبط في هالمكان كان الاحساس حلو سبحان الله

مافي مسجد في الافق بس الصوت كان جدا واضح ومن اكثر من مكان

وبينما انا على ظهر الفيل .. السايس هد الفيل يمشي بروحه طبعا مايحتاي اقولكم اني تخرعت ... شوي الا الفيل يروح عند شجره في الطررررف ويلزق في الشجره ويتحكك فيها ينزل ويطلع وانا فوق ظهره ميته من الخوف وانادي السايس الي مايدري شالسالفه ومب مستوعب ليش انا متخرعه .. بالله الفيل افرطت ريله ماغير اتدربح انا والفيل من فوق لين تحت ... وعقب السايس مسك الفيل وودانا مكان ثاني ..

كنا في مكان مرتبع وقاعدين ننزل كان يخوف بصراحه

والفيل ماييوز عن حركاته قام يختار الاعشاب الي في الطرف وتحت الجبل وينزل راسه لين تحت عشان ياكل الاعشاب وجسمه كله يصير مايل على جدام مثل الناقه اول ماتبرك او تقعد اهني انا صادني عقر بقر حتى ماعرفت شلون انادي السايس الغبي

وبعد ذلك جاني السايس وقعد فوق ظهر الفيل وطلع لي من جيبه صندوق فيه اساور من صدف وقالي الواحد ب 100 بات قلت له مابي بفكر لي بعدين .. واصلا ماكنت ابيهم بس قلت بفكر عشان مايحن علي ...

وعقب رجعنا لمكان النزول والصعود ونزلنا من ظهر الفيل ...

يتبع ..​

​

​

 

[دودى]

كان الجزء الاول من رحلة السفاري هو رحلة سفاري على ظهر الفيل ..
اما الجزء الثاني فهو رحلة سفاري على البانشي او البطبطه (( تذكرو البطبطه يعني البانشي ولاتقولون شنو يعني بطبطه ))​

</B>

خذونا الى البطابط وشغلولنا اياهم وقالولنا قعدو وكانو ب 4 تواير ومن النوع الكبير​

يابولنا الخوذه وقالو لنا البسو الخوذه ولبسناها

وبعدين علمونا شلون نمشيها وشلون نوقفها خخخ و كان جدامنا مرشد واحنا كنا نمشي وراه لانه هو يدل الغابات او السفاري من داخل واول شي خذانا لمكان وصورنا وعقب بدأت المغامره ..
بسم الله الرحمن الرحيم

طلعنا على شارع عام
خط واحد بإتجاهين يعني في سيارات رايحه وسيارات راجعه
وكان الطريق مثل الجبل صاعد طبعا ماقدرت اصور لكم بصراحه خطر الواحد يغفل ترجع فيه البطبطه على ورا ولا تجيني سيارة تدعمني وانا لاهيه اصور فماصورت
وعقب ماصعدنا مسافه على الشارع العام وانا كان عم يرجف قلبي يا إمي ومني بردانه
دخلنا للغابه والممر كان طيني الحمدالله يعني مايزحلق كثر الشارع الرئيسي

كانت الجوله راااائعة و طق المطر علينا والمنظر راااااائع احلى المناظر شفتها بهالرحله بس ماكنت اقدر بسهوله اصور لان لو تأخرت بيروحون عني كنت اوقف بين فتره وفتره اصور ..

وحتى واحنا وسط الغابه او الهضبه كنا طول الوقت طريق صاعد فكنا لازم نضغط ريس

ولما شافني المرشد اني مهتمه بالتصوير وقفنا عند اعلى نقطه وقال بصوركم وكان المنظر رااائع الخضره من تحتنا ومن بعيد البحر يبين روووعه المنظر والهوا والمطر

كنا في قمة متعتنا ووناستنا

هذه الصورة تم تصغيرها . الحجم الافتراضي لها هو 815x611.

بعد ما استمتعنا بالمنظر والمطر والجمال الطبيعي
عدنا ادراجنا للوراء خخ
وصار الطريق بدال مايكون صاعد
نازل
يعني منحدر نازل + رطب من المطر + غير مستوي + انا اول مره اسوق بطبطه في الجبل وماكنت اعرف ان لازم طول الوقت امسك البريك بالقوه
بينما كنت على ظهر البطبطه واحنا على شارع الرمل الرطب النازل
مادري شلون فرطت بطبطتي
وجان افقد السيطره وتروح يمين ويسار وخفت تطيح وتطير من فوق الجبل
واموت
فقفزت من البطبطه وطحت في حفره الا اشوف البطبطه تدعم شجره وتلف علي خفت تدعمني البطبطه وهي كبيره بس الحمدالله دعمت شجره ثانيه وتاير واحد طب في حفره فوقفت البطبطه عن الحركه

وبعدها قلت خل اقوم وقلت في قلبي يارب مانكسر فيني شي ولا تشمخ ويهي خخ حسيت ان كل اجزاء جسمي بخير بستثناء الم بسيط مثل الكدمات في بعض المناطق وكنت احس ان في اماكن تجرحت قلت يارب مافي جرح كبير لان عادتاً وقت الحوادث الواحد مايحس بالجروح الا عقب ماتبرد وقمت من الحفره الا اشوفهم توهم مستوعبين اني طحت ووقفو بحالة ذهول وخوف وترقب الا اطلع من الحفره واقول لهم سالمه سالمه

سألوني
فيج شي

لا سالمه سالمه

الا يجيني المرشد رقم 2 وقالي خذي بطبطتي لان قوة دفع بطبطتي القديمه كانت كبيره ... وكانو مترددين يعطوني اياها ولا لا ..

المهم من عقب هالطيحه وانا حسيت ان ركبي سابت

وقمت اسوق طول الوقت ببريك قووووووي

بكل ما أتاني الله من قوه

وانتهى طريق السفاري الطيني وصار وقت الجد

ووقت الرعب الحقيقي

وقت الشارع العام ..


تخيلو شارع عام رايح جاي

ملتوي

ومنحدر


ونازل


كنت ميتتتته من الخوف وضغطت اكثر على البريك عشان ماتفرط البطبطه واهني الطيحه مب هينه كلش لانه شارع عام سياير رايحه وجايه و منحدر وملتوي فالي جاي مايشوفنا احيانا من كثر ما اللفه قويه .. الي صار

ان بطبطة حد من الي معانا ازلقت شوي وفقد التحكم فيها وصارت تنزل طيران ويمين يسار الا الشخص الي عالبطبطه يطيح بوووسط الشارع والبطبطه تكمل طريجها وسط الغابه وطبعاً طبت البطبطه في منحدر خلاها تصير وسط الغابه ..

والشخص الي طاح وسط الشارع طلعت له شاحنه مفاجئة في وجهه لكن الله رحمه وقدر يحبي لين طرف الشارع بسرعه قويه جاته من الله ...

الحمدالله الله سلمنا و حفظنا .. بركة دعاكي يا امي

ولما صار هالموقف انا جاتني ام الركب

كان باقي لنا 6 دقايق ونوصل لمركز تسليم البطابط الي هو نفسه مكان ركوب الفيل ومكان بداية الرحلة مالت البطابط ..

في طووول هالمده وانا اقول

بسم الله الذي لايضر مع اسمه شيء في الارض ولا في السماء

وختمت القران تقريبا

ووصلنا لمركز تسليم البطابط وطبعا كلنا مصدومين ومتخرعين ومخضوضين

كل همنا العوده للباتونق بأمان

والحمدالله على السلامه ..

ركبنا البيكم الي جابنا

ورجعنا فندقنا ...

بس تبون الصراحه

الرحله كانت حلوه وااااااااااااااااايد واقول الحمدالله اني جربتها ولو لمره واحده في حياتي
و طبعا ماراح اعيدها لانها ابدا مب امنه و السيفتي منعدم .. بالذات انهم يخلونا نمشي في شارع عام مثل شوارع الجبال

واذا سألتوني هل تنصحين حد يجرب البطبطه ويعيش حلاوة التجربه الي عشتوها ؟؟

اقولكم لا ولا ثم لا ... لانها فعلا رحلة خطرة ومخاطرها وقت العوده والنزول لاتجربونها بليز لان مخاطرها اكبر من حلاوتها
​

​

​

 

[دودى]

ركبنا في دبة البيكم الي بيرجعنا لين الباتونق ..

رجعنا البيت وبدلنا ملابسنا لانها تبهدلت بالبطين .. وكنا ميتين من الجوع فقررنا ناكل في المطعم المجابل المطعم الي كل مره ناكل فيه

مشينا باتجاهه

وصلنا وهاي النافوره موجوده عند المدخل

ودخلنا

دخلنا واخترنا اقرب طاولة للمسرح

يوجد في المطعم عزف حي و مطرب ومطربه

طلباتنا .. ليمووون بارد يروق الدم

دجاج ستاي ... كان حلو

شوربة توم يوم زفرة وتلوع الجبد كلش ماحبيتها وكرهت ام الربيان بسبتها

ربيان تمبورا .. عادتاً يكون حلو بس في هالمطعم ماله طعم ولا لون ولا نكهه كأنكم تاكلون قراطيس
يعني كلش مب حلو

عيش او رز بالانناس .. حلو

هذه الصورة تم تصغيرها . الحجم الافتراضي لها هو 927x699.

ام الربيان بالبشمل .. ماذقتها

هذه الصورة تم تصغيرها . الحجم الافتراضي لها هو 927x699.

لازانيا .. ماذقتها

باستا حمره .. ماذقتها

باستا بيضه بعد ماذقتها

كاري اخضر .. اقل من عادي

قضينا وقت حلو في هالهمطعم بس الاكل كلش كلش ماعجبني وماانصح فيه

يتبع


​

 

[دودى]

مستعدين للمشي ..

من الحين ورايح كل سوالفنا واحنا نمشي

بعد ماخلصنا عشانا قررنا نقضي الليله مشي نكتشف الجزيرة مساءاً

ودخلنا اللفة المؤديه لفندق ذا كي​

هدايا تذكاريه .. للي عايز

شفنا مكان كله ليتات و موسيقى وحشره حسينا ان المكان ونيس كأنه كرنفال قلنا يالله نروح نشوف شالسالفه

الشارع كان على الجانبين كله بارات وناس رافعين لافتات



كانو ماشيين جدامي وانا كنت اصور لكم فطبيعي كنت متأخره عنهم الا يطلع لي واحد يقولي تفضلي اشتري بيره ولج دقيقه مجاناً
خخخخ

اخاف انحذف من المنتدى خخخخ

المهم

قلت له بكل براءه نووووو انا ماشرب بيره ماشرب كحوليات قالي مب مشكله تعالي دقيقه مجاناً

ماقص عليكم

افتكرت انه في عرض لكريمات او مقشر للبشره او شي من هالسوالف قلت اروح اشوف

الا يدخلني دكانهم المغطى بالستائر السوداء

وكان فيه طاوله مثل طاولة البليارد في النص خفت حسيت ان الموضوع مب كريمات وخرابيط قمت ابي اشرد الا اسمعه ينادي حد

ما وعيت الا 8 ايادي تسحبني خارج المحل

وصراخ بصوت واحد هبله انتي

شمدخلج

ولين الحين ماعرفت شنو الشي الفري

المهم جب عاشه

خلص هالشارع ودخلنا شارع ثاني

الا نلاقي 5 بنات طوااال كاشخين لابسين ملابس استعراضيه الي على شكل سندريلا والي على شكل باربي وطوااااال التايلنديين عادتاً قصار بس هذولا طوااااااال

المهم قالو لنا بكل ما آتاهم الله من رقه

تعالو صورو معانا الصوره ب 100 بات

قلنا اشكالهم تشجع

وصفينا جمبهم نصور

المهم

عقب عطيناهم 100 بات

الا تقولي اطولهم 100 للشخص يعني عطوني 200 زياده

جيت ابي اتحاجج

الا تقولي بليييييز وتنحني

الا اسمع همسات الي حولي ان هذولا يطلق عليهم ليدي بووووي

قلت وع وع وع

قطيت الفلوس عليها او عليه ورحنا بعيد وتمينا نعقر فيهم لين الحين وانا اعقر فيهم معاكم خخخخ

((عاشه جب ))

المهم

نكملل

وكملنا مشي

شوارع تنبض بالحياه

شفنا اشكال والوان من البشر

ماشاء الله عندهم تنوع خخ

ووصلنا لين المول ..

ها تبون تدخلون المول ؟؟؟

لاااااا نبي نكمل مشي اونس خخخ

يتبع

​