السلام عليكم ورحمة الله وبركاته
اولا اعتذر من جميع اعضاء المنتدى لان ماكان في بالي ابدا اني اكتب تجربتي
فـ موضوعي هذا راح يكون شبه مختصر ان شاء الله بس راح يكون فيه الافاده
تاريخ السفر : 9/4/2016 لغاية 22/4/2016
الطيران : الاماراتيه
المرافقون : لايوجد ^_*
الاشياء الاساسيه الي تحتاجها معاك :
أهم شي تاخذه معاك في السفر بالنسبه لي هو باور بانك للجوال وشنطه صغيره تكون تشيلها معاك لما تطلع تتشمى تحط فيها اغراضك + حذا مناسب للمشي عن نفسي كنت اسخدم جزمه من ريبوك
بالنسبه للأمان ف ماليزيا بلد امن جدا جدا ولله الحمد والطقس شبه حار في ابريل مع رطوبه عاليه وتساقط الامطار من حين لاخر .
للي حاب يسافر سواء لماليزيا او غيرها من الافضل انه يعتمد على نفسه سواء في التخطيط للرحله او حجز الفنادق ومن المهم انك تكون حاط في بالك ومرتب جدولك شو الاماكن اللي حاب تزورها وشو الاشياء اللي تقدر تسويها في البلد اللي حاب تزوره
من الافضل ان الفنادق اللي بتحجزها ماتكون غير قابله للاسترداد يمكن لما توصل البلد نفسه تحصل فنادق احسن او يمكن المنطقه ماتكون عاجبتك
مخطط الرحله :
لم التزم فيه 100% في اشياء لما وصلتـ هناك شفتـ مالها داعي وفي اشياء اكتشفتها هناك
برنامج لطلب التكاسي رهيب جدا ويفكك من استغلال اصحاب التكاسي يعني لدرجة اني مره جربت استخدمه بعد ماطلبت التاكسي وصلني ب 20 رينجت وفي الرجوع رحت اسال تاكسي واقف بكم بترجعني يقولي ب 60 هههه
والبرنامج الثاني
غني عن التعريف فادني جدا وقت ماكنت امشي في الاتجاهات والمسافه
البرنامج الثالث
جميل جدا جدا يساعدك في استكشاف الاماكن القريبه منك من مطاعم وانشطه ويعطيك تقييمها وصور منها
ان شاء الله باقي التفاصيل وصور الفنادق والانشطه ونصائح احطها في الردود القادمه
السلام عليكم ورحمة الله وبركاته
اشكر جميع الردود المشجعه وان شاء الله ان الموضوع يكون قد ثقتكم
بس حاب انوه ان الموضوع ماراح يكون مثل يومياتـ
يوم السفر كان تاريخ 9/4/2016 يصادف يوم السبت وكانت رحلتي فجر السبت الساعه 4 الفجر والوصول لمطار كوالالمبور الدولي الساعه 2 تقريبا العصر بتوقيت كوالا
من وجهة نظري انه افضل وقت للوصول للبلد المراد السفر له العصر عشان لاتخسر اليوم الاول ويروح عليك
قبل كل شي بطاقة الاتصالات اللي استخدمتها هي من شركة Celcom كانت عباره عن 4 قيقا نت وسعرها كان 75 وشحنتها ب 30 رينجت والحمدلله كفت معاي لاخر اليوم كنت اتابع مباريات في التلفون واتصفح ... الخ ومستغرب ان النت ماخلص
المهم اليوم الاول كان في سيلانجور وكنت نازل في فندق
فندق وأجنحة هوليداي فيلا سوبانغ *****
مقارنه في سعر الفندق فـ الفندق كان جدا جميل والغرفه كبيره واطلالتها جدا جميله
هذه الصورة تم تصغيرها . الحجم الافتراضي لها هو 1068x600.
الاطلاله كانت ع البحيره مع اني كنت حاجز غرفه عاديه
وصلت الفندق تقريبا الساعه 3 ونمت ساعتين بعدها توجهت لمطعم الفندق
وهذا مطعم في الفندق ملاحظه ان موظفين المطعم جدا متعاونيين
وبعد ما اكلت ولله الحمد توجهت لمدينة الالعاب i-city
للي حاب يشوف صور وردود اكثر عنها عن طريق tripadvisor
هذا موقع مدينة الالعاب I-City للي حاب يشوف التذاكر وشو تشمل
رائي الشخصي انها ماتصلح للشباب اقصد ان مافيها الاشياء اللي ممكن تبهرك هي مناسبه جدا جدا للعوائل والاطفال وانصح فيها بشده لهم بس كـ شباب لا كان يوم ممطر ف الالعاب الخارجيه كانت مسكره بس الالعاب الداخليه مفتوحه للاسف اني ماصورت شي تقريبا
في الليل تقريبا ماكان فيه شي اسويه غير اني اتابع مباريات في لوبي الفندق بما انه يوم سبت
وهذا لوبي الفندق
اليوم الثاني
كان في فندق
فندق وسبا صن واي ريزورت *****
الفندق فخم جدا جدا وخاصه انه مقابله مول + حديقة العاب الصن واي لاجون اللي هي من الاسباب اللي شجعتني ازور ماليزيا هههه
للاسف اني ماصورت الغرفه بس هذي الاطلاله كانت
وفي الليل لما جيت انام المكيف ماكان يبرد زين نزلت الاستقبال وقلت لهم المكيف مايبرد وارسلوا فني وجى يعاين الغرفه وقالي خلاص بنرسل لك واحد يصلح المكيف بس بيجي بعد 10 دقايق شليت اغراضي ونزلت تحت الاستقبال وقلت لهم انا تعبان وابي انام اعطوني اي غرفه وبعدها المشرف كان موجود والحمدلله انهم رقوا غرفتي لغرفه اكبر واوسع وهذي كانت اطلالتها
هذه الصورة تم تصغيرها . الحجم الافتراضي لها هو 1067x600.
المهم بعد ماوصلت الفندق ع طول بدلت ورحت على حديقة الالعاب المائيه الصن واي لاجون
Sunway Lagoon Theme Park
سعر التذكره كان 150 والقفل ب 22 وشحنت ربطة اليد الي عطوني اياها ب 50 عشان اشتري منها داخل الحديقه اكل ومشروبات
للي حاب يشوف صور وردود اكثر عنها عن طريق tripadvisor
رائيي الشخصي انها اجمل حديقة العاب مائيه ممكن ازورها في حياتي للعلم اني في الامارات زرت ياس وترورلد في ابوظبي ووايلد وادي في دبي و ايسلاند في راس الخيمه و دريم لاند في ام القيوين
بس الصن واي غيييير كبيييييييره جدا جدا وشامله لجميع الالعاب حتى اني كنت العب العاب واستغرب انها مشموله بسعر التذكره الرخيص جدا
دخلت الساعه 2 وماخلصت الا الساعه 5 العصر وكانت فرصه حلوه اني التقيت مجموعه شباب من السعوديه وتعرفتـ عليهم وتمينا نلعب مع بعض وهذي احلى ما في السفر الوحيد انك تقابل اشخاص جدد وتتعرف عليهم
للاسف اني خليت التلفون في البوكس وماصورت اي صوره من داخل بس ان شاء الله رابط tripadvisor فيه الفايده
في هذا اليوم ماكان فيه شي يذكر لانه كان يوم زايد تقريبا بالنسبه لي بس جربت المساج والسبا في الفندق وكان جدا رهيب للي حاب يقدر في هذا اليوم يروح لـ ذا ماينز وندر لاند يفتح من الساعه 5 لغاية 11 الليل او IOI City Mall
بس ك نصيحه يومين كافيه في سيلانجور وبالنسبه لي فندق هوليداي فيلا سوبانغ جدا مناسب وسعره حلو وتقدر تحجز فيه ليومين واليوم الثاني تروح حديقة الالعاب المائيه وترجع له الليل مش شرط تحجز في فندق الصن واي لان سعره جدا غالي مقارنه ب فندق هوليداي فيلا سوبانغ وخاصه المسافه بينهم مش بعيده يعني التكاسي ب 20 رينجت تقريبا
الصراحه اجد صعوبه في كتابة اي شي عن هذي الجزيره من الصعب انك تقدر توفيها من الكلام باختصار هي لنكاوي
كانت رحلتي عن طريق طيران آسيا طبعا طيرانهم اقتصادي لاتتوقع الكثير في طياراتهم اهم شي تقول الحمدلله اني وصلت سالم لاغير
الرحله كانتـ بتاريخ 12/4/2016 والرجوع تاريخ 16/4/2016
وقت الرحله الساعه 12 الظهر الوصول الساعه 1
السعر 330 ذهاب وعوده
يعتبر السعر مرتفع بس لاني اخترت اضافة المقعد واللي هو كان اول مقعد في الطايره كبير ومريح مقارنه بالمقاعد الخلفيه الصغيره مع وجبة ساندويتش تندوري كان طعامه حلو
المرافقون : الشباب اللي تعرفتـ عليهم في العاب الصن واي لاجون في واحد منهم قرر يجي معي لنكاوي ف حصلت لي مرافق وهذا احلى مافي السفر منفردا
الحمدلله وصلت لانكاوي الساعه 1 تقريبا
المطار صغير اجرائتهم سلسه جدا مافي تعقيد الجو كان حار مع رطوبه والارض شبه جافه وسمعت من هناك ان اخر ثلاث شهور مطرت بشكل قليل جدا جدا
قبل لا اوصل لنكاوي كنت حاط في بالي استأجر سياره واجرب القياده جهة اليمين قريب المخرج حق المطار في كذا مكتب بس خليكم منتبهين من الاشخاص الواقفين واللي ياجرون روح ع المكاتب افضل وخلوه يعطيكم كشف بالسيارات واسعارهم يكون معتمد استأجرت هذي المزيونه ب 60 رينجت باليوم والحمدلله انها فادتني كثير في تنقلاتي افضل من التكاسي و اوفر
نصيحة للاخوان اللي حابين يروحون لنكاوي بالنسبه لي لنكاوي هي هذا الشاطئ بانتايْ تْشينانغ والشارع اللي خلفه الحياه تستمر فيها للفجر والمطاعم والحركه ماتهدء ابدا وانشطه بحريه وكل شي فيه افضل شي انك تسكن
بعدها توجهتـ لفندق malibest resort * *
نرجع للفندق اللي اخترته بعد ماشفتـ موضوع الاخت ام زياد وفادني كثير في اختيار الفندق وتقريبا صارلي موقف في الحجز نفس اللي صار لها
في غرف تكون ع الشارع العام اللي هو مبنى الفندق لا انصح فيها ابدا لان الفندق بدون خدمات تقريبا وسعرها ب 160
وفي اكواخ موجوده ع الشاطئ لاكن ليست مواجهه للشاطئ سعر الليله 170
وفي اكواخ مواجهه للشاطئ من الصعب انك تحصل حجز فيها حاولت قبل السفر احجز ب شهر ونص وكانت فل سعر الليله 200
وفي اكواخ تكون مرتفعه في الاشجار وهي افضل شي بس صعب تحصل حجز سعر الليله 260
المهم اضطريت اني احجز في الكوخ اللي ع الشاطئ لاكن ليس مواجه للشاطئ لمدة ثلاث ايام وتم خصم مبلغ اول ليله وبعد الحجز باسبوع قلت خلني اراسلهم واقولهم اني ابي كوخ بس ع الشاطئ لان في الموقع يعطيني ان مافي حجز متوفر وسبحان الله من حسن حظي ردوا علي وقالوا ان في كوخ موجود ع الشاطئ راح يكون متوفر بس بتدفع الفرق اول ماتوصل قلت موافق على طول رجعوا قالوا يعني ناكد ترقية الحجز قلت لهم اكيد
لاكن هني الصدمه الاولى بعد ماوصلت طبعا مكتب الاستقبال صغير جدا وخارج الفندق تقييمه بالنسبه لي صفر وفي بنتين في الاستقبال قلت لهم عندي حجز شافوا عندهم قالوا حجزك كوخ بس مش على الشاطئ قلت صح لاكن انا ارسلت لكم وقلت لكم ابي ارقي الحجز وفي حد رد علي ان عندكم كوخ على الشاطئ لاكن بسريرين منفردين وقلت لها تم ماعندي مشكله بعدها قالوا لي لا ماصار هذا الكلام واصلا مافي اكواخ ع الشاطئ فاضيه هههههه هني الصدمه تميت ناشب لهم والمشكله ان الايميل عندي فل وحاولت اطلع الايميل اللي هم ارسلوه وماحصلته قالت لي خلاص شو رايك تروح تشوف الغرفه اللي انت اصلا حاجزها وانا هني ماسك اعصابي قلت يالله بروح اشوف رحت شفت كانت حلوه بس مش ع البحر
رجعت لهم قلت لا ماعجبتني وانا مش متحرك من هني الا لين ماتعطوني الكوخ اللي ع البحر قالت بس هذا حجزك انا هني بنجلط قلت لها خلاص تمام انا بطلع الايميل اللي انتم ارسلتوه وابيك تطلعون الشخص اللي ارسلي اياه والحمدلله اني حصلت الايميل ووريتهم قلت يالله انا ابي هالشخص يجيني الحين طلعت مالهم المديره او المشرفه مدري عنها المهم الحمدلله انهم دخلوا عندها وشوي اللا يجون ويعطوني المفتاح ويقولون يالله توكل هههههه
طبعا بعد مادخلت الغرفه وشفتـ هذا المنظر زال كل التعب والعصبيه اللي كنت كاتمها
تخيل يوميا تقوم على هذا المنظر
المهم اني حطيتـ اغراضي ورتبتـ نفسي وكنت حاط جدول في هذا اليوم اني اروح جبل Gunung Raya
المنظر في الصعود كان جدا جميل والاجواء بارده بس نصيحه للي يبي يشوف لكناوي بشكل كامل لايصعد لين القمه لانك ماراح تشوف شي من هناك في منطقه معينه تقدر تشوف فيها هذا المنظر لان في البدايه انا صعدت لين القمه لاكن ماشفت شي وتحطمت وبعدها وانا نازل شفت مجموعة سياح واقفين على جنب ويصورون ووقفت والحمدلله شفت كل شي
المهم هني صور اكثر وتعليقات اكثر من موقع tripadvisor
اليوم الثاني في لنكاوي كنت مخطط اني اروح احد الرحلات اللي بالقوارب ف أخترت رحلة التنقل بين الجزر لان وقتها قصير وراح يكون فيها سباحه وهذا اللي حمسني
تشمل الرحله : الذهاب لاول جزيره وسباحه لمدة ساعه وبعدين تروح بالقارب وتشوف جزيرة المراه الحامل من بعيد وبعدها تروح اطعام النسور وبعدها يودونك جزيره ثانيه وسباحه فيها ساعه ويرجعونك
المهم في اول يوم لي في لنكاوي رحتـ فندق AB Motel في عندهم مكتب صغير في الزاويه وعندهم جميع الرحلات المهم الرحله حق التنقل بين الجزر ب 25 رينجت للشخص واستغربتـ من سعرها الرخيص وعندهم رحلتين الساعه 9 الصبح و الساعه 2 بعد الظهر اخترت اللي بتكون الساعه 9 المهم ان تم السحب عليها في الصباح لان قمنا متأخرين الساعه 12 من التعب ههههه والحمدلله رحنا لهم الساعه 1 وحصلنا حجز للرحله اللي في الساعه 2 طبعا الحجز الاول يروح عليك ف لازم تدفع من جديد والحمدلله انها جت من صالحنا لان الاجواء كانت احلى في فتره العصر ف انصح اللي حاب يروح انه يروح بعد الظهر لان لنكاوي جدا حاره ف الصبح راح تكون متعبه
وهنا نصيحه لنكاوي حلاتها نوم الصبح وسهر لين الفجر لاتفكر انك تخلي برامجك السياحيه فترة الصباح
هذا الفندق وفي الزاويه المكتب
طبعا بعد ماعطونا استكر نعلقه ولازم يكون معاك لحد يضيعه قبل الرحله
ودونا لمكان القوارب
وانطلقنا بالقارب يضم تقريبا 14 شخص اكثر او اقل الصراحه ماحسبتهم ههههه
ووصلنا لاول جزيره وكانت في غاية الجمال روووعه
تمينا نمشي صعود لمكان نفس الجبل بس قبلها في مكان تدفع فيه رسوم بسيطه 2 رينجت ماذكر كم بالضبط عشان تدخل المشي في الدرج متعب شوي والقرود في كل مكان
قربنا نوصل
المكان عباره عن بحيره تقريبا والغابه محاطه فيها
ع اليسار يأجرون كايك ب 30 رينجت واجرت واحد يكون حق شخصين متعه ماتتعوض
و على اليمين ياجرون هذا ينفع للعوايل
بعد ماخلصنا الساعه رجعنا مره ثانيه للدرج المتعب والممتع بنفس الوقت ووصلنا وانتظرنا القارب لان كان عاده ماجى
في هذي الاثناء شفتـ
كانت لحالها تقراء كتاب المهم اني استغربت ان في هذي المناظر الحلوه وهي مشغوله في قراءة كتاب المهم الفضول خلاني اروح اشوف شو تقراء وتبادلت الحديث معها المهم عرفت انها من ايسلاندا وجات لحالها ماليزيا في نفسي اقول عادي هذا انا جاي لحالي هههه بس الاغرب انها قالت هذا الاسبوع العاشر لها في اسيا ف استغربت منها والمهم بدت تقولي انها راحت هونق كونق وتايلند و كمبوديا والحين ماليزيا وبعد 3 ايام بتكون سفرتها ل اندونسيا وبعدها بترجع ل ايسلندا تدرون الاغرب من هذا كله ان عمرها كان 20 وانا لما قلت حق اصحابي واهلي اني بسافر لحالي كل واحد عطاني من الكلام الزين هههه شو بتسوي لحالك وبتمل ... الخ المهم اني تمنيت لها التوفيق في رحلتها وجى القارب وانطلقنا للمكان الثاني
بعد ماخلصنا من المكان الاول رحنا نطعم النسور لاكن قبل لانوصل اللي كان يسوق اشر على جزيره وقال هذي المراه الحامل شكلها نفس وحده نايمه ع ظهرها وبطنها منتفخ للاسف اني ماصورتها
اطعام النسور
وبعدها رحنا لاخر مكان رمال بيضاء وشاطئ صافي وتجلس فيه لمدة ساعه سبحت في اغلبها ورجعنا
وبعدها رجعت الفندق نمت وصحيت الساعه 9 الليل من التعب وتمشيت في شارع بانتاي سينانج ومول Cenang Mall
ملاحظه: الصور اللي في الاسفل مش من تصويري عدى آخر صوره
عندهم مقهى ستاربكس اللي ع اليسار اول الصوره وفي مقابله نفس البار او المقهى الصغير بس مكشوف ع الشارع عندهم فعاليات غنائيه جدا حلوه وجهة اليمين في كنتاكي ومقابله ماك يبيع ايسكريم بس
العشى في هذا اليوم كان في هذا المطعم بس ماعجبني اكلهم طلبت بيتزا وباستا
وبعدها في محل حلى فرنسي جنبه انصح فيه بشددده طلبت نفس هذا
ان شاء الله في هذا الرد راح احط اشياء عامه عن لنكاوي وشو النشاطات اللي ممكن تمارسها للاسف اني ماصورت اغلب الاشياء فـ اعتذر
كان المخطط اني اروح بعد الظهر ل القريه الشرقيه Oriental Village
هني صورت من التلفريك
اللي حاب ينزل للجسر في تكتين الاول انك تنزل مثل الدرج وسط الاشجار وهو متعب جدا الصراحه في النزول والطلوع او الطريقه الثانيه انك تركب نفس اللفت وهو مريح جدا
بعد ماخلصتـ من التلفريك كنتـ ناوي اروح واسبح في الشلالات بس مانكتب لي لان الارض كانت جافه ف اللي يروح موسم امطار لايفوت هذا الشيء
الصور ليست من تصويري*
هذه الصورة تم تصغيرها . الحجم الافتراضي لها هو 963x576.
بعد ماخلصت من القريه الشرقيه كان المخطط اروح مغامرات Skytrex Adventure
انصح فيها اي حد يروح لنكاوي من اجمل الفعاليات في الجزيره ك مغامره انصح فيها سواء الشباب او حتى المتزوجين
وقت المغامره كان الساعه 3 طبعا هم يبدون من ساعه 9 الصبح واخر حجز 3 العصر
عندهم 3 مستويات مبتدء ومتوسط و متقدم
كان الاختيار ع المستوى المتقدم وسعر التكت اونلاين كان 65 + 20 درهم لو حاب تضيف قفازات اليد و غرشة ماي ونفس المطاره تحط فيها الماي وانصح بالبكج كامل افضل ب 85 رينجت
المستوى المتقدم كان 32 مغامره تقريبا بدينا المغامره وكنا تقريبا 11 شخص اللي انهينا كل الجولات تقريبا عددنا 5 هههه الباقيين انسحبوا من التعب والخوف
طبعا ك معلومه درجة الامان جدا عاليه وقبل لانبدء هم يعلمونا كل شي وطريقة استخدامه وبعدها بدينا لحالنا
صور ليست من تصويري *
اكره شي كان تسلق مثل هذي الاشجار جدا متعب
واصعب شي المشي على هذي الاشياء
هذه الصورة تم تصغيرها . الحجم الافتراضي لها هو 822x582.
واحلى شي في المغامره كلها هذي اللحظات
هذه الصورة تم تصغيرها . الحجم الافتراضي لها هو 964x585.
هذه الصورة تم تصغيرها . الحجم الافتراضي لها هو 969x584.
وبعدها في الليل التوجه ل نايت ماركت في ايبوه و مول Langkawi Fair Shopping Mall في الطابق الثاني في محل شوكلات كبير جدا والتسوق فيه وبعدها محل Al-Ikhsan Pulau Langkawi عنده ملابس واحذيه رياضيه اصليه بسعر ممتاز وبعدها محلات العطور Cote De Parfume
اليوم الاخير ف لنكاوي كنت حاجز في فندق أوانا بورتا مالاي لانكاوي ****
هذي الاطلاله من الغرفه من تصويري
الفندق حلو ونظيف وفي الليل في انشطه غنائيه جهة البحر بس انه الفندق بعيد عن الشاطئ ومعزول لحاله بشكل عام ماعجبني والحمدلله اني بس كنت حاجز فيه لاخر يوم
واخر يوم في لنكاوي كان عباره عن انشطه بحريه في Cenang Beach
