بسم الله الرحمن الرحيم
السلام عليكم ورحمة الله وبركاته
بداية أود أن أتوجه بالشكر الجزيل لكل الاخوان والاخوات في هذا المنتدى الرائع وأخص هذه البوابة الحبيبة إلى قلبي فبتوفيق من الله ثم منكم تكللت الرحلة بالنجاح ولله الحمد فلكم الشكر ولكم مني خالص الدعاء ....
وأتوجه بالشكر الخاص لاخواني عبدالله وأبو عمر وعسكر الهاجري فجزاكم الله عني كل خير
لست بكاتبا ولا مبدعا ولكن سأكتب كل ما يمليه علي قلبي فمنكم تعلمت ومنكم اكتسبت فهذا التقرير البسيط منكم وإليكم وهو من باب رد الجميل ... فأقول وبالله مستعينا : السفر ذكاء وليس صرفية ,,,,
زرت ماليزيا عام 2012 وكنت مع قروب شباب وها أنا أزورها مرة أخرى ولكن مع الغالية أم سعد ....
حلم كل منا هو السفر ... فالسفر متعة والسفر خبرة ......
قبل عدة أشهر عندما سجلت في هذا المنتدى الرائع وفي أحد الأيام دخلت بوابة ماليزيا وإذا بالتقارير اللي تفتح النفس
والتقارير اللي تشجع للسفر
وما حسيت نفسي إلا وأنا ماسك ورقة وقلم وأحسب كل صغيرة وكبيرة وافتح المواقع على اللابتوب وكمبيوتر العمل والجوال إلى أن استقريت وقررت السفر إلى أرض الأحلام
بعد أن قرأت تقارير الإخوة والاخوات وبعد معرفة برامج ومواقع الحجوزات بدأ البحث عن رحلات الطيران وحجز الفنادق
استفدت منه في اختيار رحلة الطيران
كان عندي genus خصم 20% على أغلب الفنادق في معظم دول العالم
نيكون d3200 وما استعملتها كثير
أغلب تصويري بالايفون
الناقل الرسمي
الناقل الرسمي الداخلي ولي إن شاء الله معاه تجارب راح أذكرها لاحقا
توفقت ولله الحمد في تجربته وكل الشكر لأخوي مزمز
برنامج آخر ورائع جدا
من البرامج الأساسية اللي استفدت منها في رحلتي
لتحديد القبلة ولكن ما استخدمتها إلا في آخر فندق وبقية الفنادق كانت حاطة اتجاه القبلة
للمعلومية ,,,, جميع الصور من تصويري باستثناء بعض الصور اخذتها من الانترنت ....
كانت رحلتي من تاريخ 17 سبتمبر - 30 سبتمبر بعد أجازة عيد الأضحى مباشرة ,,,,
بدأت بالبحث عن الرحلات من موقع wego وكنت أريد خطوط الاتحاد بحكم تجربتي لها سابقا ولكن يعيبها الترانزيت في أبو ظبي 9 ساعات
وبالفعل لقيت الترانزيت طويل فألغيت فكرة خطوط الاتحاد وبعد بحث طويل ولعدة أيام حصلت الخطوط القطرية ترانزيت في الدوحة 4 ساعات وكذلك في العودة 4 ساعات لقيت السعر للشخص الواحد 1630 ريال سعودي وأشوف انه سعر ممتاز وتم شراء تذكرتين بقيمة 3260 ريال ...
كما أسلفت سابقا تم شراء التذاكر قبل السفر بقرابة 4 أشهر وكان كل حجوزاتي من فنادق وتذاكر دولية وداخلية عن طريق اللابتوب وما رحت مكتب ولا شيء أبدا ....
ما خبرت أم سعد وما كنت ناوي أخبرها قلت أخليها مفاجأة لها وأخبرها في مطار الرياض ,,,,,
بعد ما شريت التذاكر ورجعت من عملي دخلت البيت وقلت راح أفاجئ أم سعد بسالفة السفر بس بطريقة ثانية :
أبو سعد : أم سعد حاب أقلك راح نسافر لدبي في إجازة عيد الأضحى ... ( نصاااب )
أم سعد : ها ,,, دب دب دب دبي
أبو سعد : ايه دبي وشبك مرتبكة ؟؟
أم سعد : لا ما فيه شيء بس حاسك تمزح
أبو سعد : من متى وأنا أمزح ها
أم سعد : أسفة والله وحقك علي وما كنت متوقعة
أبو سعد : خلاص أنا زعلان
أم سعد :
.
.
.
أبو سعد : أم سعععععععععد اشم ريحة حريق
أم سعد : يووووه الغدا احترق
أبو سعد : الشرهة على اللي يجيب طاري سفر دبي
أم سعد :
وتغدينا غدا محروق ذيك اليوم
طبعا قبل السفر بأسبوع علمت أم سعد بالسفر إلى ماليزيا وأن السفر لدبي كان مزحة طبعا الوضع صار كذا
وصاحت بقوة بعد ... قلت الحمد لله ما خبرتها في المطار وإلا كانت صاحت بقوة
بعد ما خلصت من حجوزات الطيران بدأت في البحث عن الفنادق والطيران الداخلي بنفس الوقت وبعد استشارة عدد من الإخوة ممن سبق لهم التجربة والسكن فيها تم اختيار الفنادق التالية :
الغني عن التعريف ( الصنواي لاجون ) لمدة 3 ليال شاملة الإفطار . ( الصورة من النت )
منتجع بيرجايا لنكاوي لمدة 3 ليال من دون فطور . ( الصورة من النت )
منتجع البارك رويال لمدة 4 ليال شاملة الإفطار . ( الصورة من النت )
سكن E&O لمدة 3 ليال من دون فطور ... من اختيار الأخ المبدع عبدالله ..( الصورة من النت )
كانت حجوزات الفنادق مغامرة خطيرة لأني اخترت حجز غير مسترد وتم دفع المبالغ وهذا خطأ ما راح أكرره مرة أخرى .... قبل السفر بأسبوع حصل لي ظرف عائلي وكنت راح أكنسل كل السفرة ولكن بتوفيق من الله زانت أموري
بعد ذلك قمت بحجز رحلات الطيران على خطوط اير اسيا عدد 6 تذاكر من كوالا إلى لنكاوي ثم إلى بينانج ثم عودة إلى كوالا ,,,,
.
.
.
.
.
اقترب موعد السفر وفي يوم الجمعة الموافق 17 سبتمبر كانت موعد إقلاعنا في تمام الساعة 4 فجرا إلى الدوحة ثم ترانزيت مدة 4 ساعات في الدوحة ثم الإنطلاق إلى كوالا في رحلة استمرت قرابة 7 ساعات ....
من عادتي دايما أكون قبل الرحلة بوقت كافي حتى اخذ راحتي وتحسبا للظروف .. لما وصلت مطار الملك خالد وجيت اشحن الشنط ومرر جوازي على الجهاز رفض يقبل ومرة ثانية ومرة ثالثة وانا
ايش السالفة قال الجهاز رافض جوازك قلت : داري انه رافض لكن ايش المشكلة وينادي مديره ومدير مديره ومدير مدير مدير مدير جد اللي ما أدري مين , ماني فاضي وجع راس بعدين قالوا خلاص انحلت المشكلة عاد انا ما صدقت خبر ولا سألت أصلا ليش
وصلنا ولله الحمد إلى مطار حمد الثاني وكان تحفة معمارية ومن شدة الإرهاق والتعب نسيت أصلا حتى التصوير ومن حسن حظي لما نزلت من رحلتنا من الرياض توجهت للصالة المغادرة الى كوالا وطلعت أمامي مباشرة وأقرب كرسي وأحط راسي نوم .... ما حسيت نفسي إلا أم سعد تقول يالله الوقت قرب وناظرت الساعة وبالفعل كان الوقت وصل وتوكلنا على الله على كوالا أو ما ركبت الطايرة لقيت المقاعد اللي على الدريشة عددها اثنين بجنب بعض وكنت قد اخترت مسبقا المقاعد والوجبات وصاروا المضيفين يجيبوا لنا الوجبات في صحون خاصة ويعطونا الوجبة لحالنا غير عن بقية المسافرين عاد اللي بجنبي يناظرني يقول وش عندهم ذولا عاد أنا حسيت إني فخم بصراحة
كان أغلب الرحلة نوم ومهما نمت بالطيارة ما رأح احس بالراحة إلا على السرير
كل شوي وأناظر في الخريطة ودي أمسك الطيارة وأحطها على كوالا على طول
وبدأت تظهر معالم الفاتنة ......
وصلت للمطار واستلمت الشنط وعلى طول على محلات الاتصالات وشريت شريحة اتصال ب 30 رينجت وشريحة 3 جيجا انترنت هوت لينك بسعر 70 رينجت , وبعد ذلك توجهت لمكاتب التاكسي وأخذت تاكسي ألى الصنواي بسعر 130رينجت ....
وصلنا ولله الحمد إلى الفندق
عملت تسجيل دخول وكان سريع وللأسف الموظف كان تعامله سيء للغاية ...
أول ما دخلت الغرفة كانت المفاجأة سريرين منفصلة والغرفة أعزكم الله متسخة وقمت نظفتها وكانت الخزانة عطلانة وهي أهم شيء عندي . بصراحة كانت صدمة ولكن رغم هذه السلبيات يبقى الفندق الأول بكل شيء فيه , قلت ما فيه حل إلا أنام والصباح بإذن الله راح أتفاهم معاهم عاد قبل النوم مدة ربع ساعة أجهز محاضرة كاملة علشان أوريهم اليوم الثاني
.
.
.
.
.
بإذن الله سوف أكمل معاكم لاحقا ما حصل معي اليوم التالي ...
أصبحنا وأصبح الملك لله , استيقظنا وصلينا الفجر ونزلت أول ما فتح المطعم وكانت هذه عادتي أصحى بدري وأفطر بدري ,,,,
الفطور ما شاء الله تبارك الله منوع ما بين عربي وأسيوي وكل ما تشتهيه النفس الله يديمها من نعمة ويمنعها من زوال .....
المطعم رائع جدا وأعتبره هو الاختيار الأول بالنسبة لي شخصيا ,,,
الجوع كان واصل لحده والحمد لله على نعمته التي لا تحصى ,,,
الطبق المفضل لأخوي عبدالله وما ألومه بصراحة ,,,,,
بعد أن أفطرنا وحمدنا الله وشكرناه توجهت للاستقبال علشان المشكلة اللي واجهتني الليلة الماضية وقابلت الموظف قلتله أبغى المدير المناوب تغير وجهه على طول وقال ليش وايش تبغى وش أسوي لك قلت مشكلتي ما راح يحلها إلا مديرك أعطني مديرك وإلا جبت ( الفنتاستك فور تبع الأخ أبو عبده يفتروسونك ويأكلون رأسك )
......
طبعا نسيت ما أذكر المعلومة ذي : لما سويت تسجيل دخول الموظف خبرني أن الأسرة ماهي كبيرة إذا حاب نغير الغرفة ونحط لك سرير كبير وراح تدفع 500 رينجت
طبعا أنا رفضت رفضا قاطعا لأني أصلا أنا مختار الغرفة بسرير كبير .....
المهم الموظف نادى المدير المناوب وكانت حرمة والشهادة لله ما قصرت أولا قدمت اعتذار لي وقالت اللي تبغاه احنا حاضرين قلت أنا شوفوا لي حل غرفة وسخانة وأسرة صغيرة وخزانة عطلانة ... قالت ولا يهمك راح أنا أول شيء أسويه أبلغ كل العاملين ما أحد يدخل الغرفة في الوقت الحالي , الشيء الثاني ممكن تعطيني وقت إلى الظهر وراح أضبط أمورك قلت تمام , أنا أصلا راح أطلع مشوار وراجع الظهر ,,,,,
طلعت التقطت كم صورة واعذروني على ردائة التصوير ,,,,,
للمعلومية : أحب أن أذكر كل التفاصيل والصور اللي أقدر عليها فأرجوا أن تتحملوني
خرجت برا الفندق عند البوابة الرئيسية وكنت أتواصل مع بعض السائقين للقيام بجولة وكلهم كانوا مشغولين قلت أنتظر أشوف ايش الحل .... قابلت سائقين أمام الفندق وكلهم أسعارهم 250 رينجت 6 ساعات جولة طبعا أنا ما وافقت لأني ما أحب أزور أكثر من مكانين في اليوم الواحد يعني أستمتع في مكان واحد ولا أتعب وأروح لعدة أماكن وكان هذا هدفي في الرحلة متعة من دون تعب ....
كان المشوار إلى ( شلالات تمبلر بارك ) فأنا من محبي الطبيعة والمشي ... عرضت على أكثر من سواق ورفض إلا جولة 6 ساعات واحد فقط اللي وافق على المشوار ولكن ب 150رينجت بعد عدة محاولات وتنزيل السعر كان يبغى 200 رينجت ... بصراحة أنا ما كان عندي أي خيار ثاني ووافقت وتوكلت على الله ....
وصلنا إلى الشلالات وبدأنا بالصعود وأخذت منا الرحلة حوالي ساعتين ونصف وقدرنا نوصل للشلال الخامس وكانت رغبتي نكمل السادس والسابع ولكن أم سعد أخذ منها التعب مبلغه ....
وقت صعودي للشلالات كنت أصور سناب وكان يوم الأحد والوقت بدايات الدوام أول يوم دراسة وبصراحة جتني ردود في السناب وقمت قفلت السناب على طول كلهم زعلانين
المسافة بين الفندق والشلالات .....
كثرت عليكم بالحكي ولكن أترككم مع الصور تحكي لكم الواقع ....
على كف القدر نمشي ولا ندري عن المكتوب عبارة كنت أرددها صدق من صاغ معناها
وانتهت جولتنا الرائعة واستمتعت فيها متعة والله يرزقنا الجنة .... ورجعت الفندق على صلاة الظهر
رجعنا للفندق بعد صلاة الظهر ... وتوجهت للغرفة على طول وريحنا إلى العصر ...
نزلت بعد صلاة العصر وقابلت المديرة وخبرتني أنهم عملوا ترقية بنفس السعر السابق إلى غرفة كوين وتأسفت وقالت أي شيء تحتاجونه خبروني شكرتها وتوكلت على الله وإلى الغرفة الجديدة ...
الغرفة الجديدة وما شاء الله كانت كبيرة ورائعة ...
صورة ليلية كمان للغرفة ... والحمام أعزكم الله رائع جدا وفيه شطاف وللأسف ما صورته لكم
مطل الغرفة الجديدة
رسالة اعتذار مع وردة وصندوق شوكلاته .... أنا بصراحة بعد كذا قررت أسوي مشكلة في أي فندق علشان أحصل أشياء زي كذا
وجا قت السباحة ( water proof ) يحمي الجوال من الموية وقت السباحة ويصور كل شيء جوا الموية وبتوصية من أخوي عبدالله تم شراؤه مسبقا من أمازون بقيمة 190 ريال فقط مع التوصيل علما بأن سعره في مكتبة جرير 350 ريال
أذن المغرب وصليت المغرب والعشاء جمعا وقصرا وتوجهت بعد ذلك إلى البرايميد مول للعشاء ...
العشاء في منهاتن فيش ماركت
وهذا حساب العشاء فقط ....
تعشينا وحمدنا الله وشكرناه ورجعنا للفندق للنوم والاستعداد لليوم الثاني ....
نسيت أذكر نقطة المصاريف وهي كالتالي :
اليوم الأول :
130 رينجت تاكسي من المطار إلى فندق الصنواي لاجون
110 رينجت شريحة اتصال وانترنت
المجموع / 240 رينجت
اليوم الثاني :
150 رينجت جولة إلى شلالات تمبلر بارك
75 رينجت موية وعصيرات وموكتيلات
140 رينجت عشاء مانهاتن فيش ماركت
المجموع / 365 رينجت
إلى هنا وأقف وألتقيكم بإذن الله في الجزء الآخر من يوم الغد ....
أصبحنا وأصبح الملك لله .... استيقظنا للصلاة والنزول للإفطار وهذا اليوم الأخير في الصنواي ....
يا إخوان هذا إدمان في السفر وصار خويي طول الرحلة
بعد الفطور مريت أخذت كم صورة وسبحت في مسبح الفندق ....
في المخ بصراحة
بعد ذلك تجهزنا وتوجهنا للألعاب المائية حيت ثم شراء تذكرتين مسبقا من موقع اسيا ترفل بسعر 196 رينجت ....
تجربة السباحة بالجوال جوا الموية
بعد ذلك توجهنا للألعاب المائية وأول ما دخلت قال ممنوع ... قلت : ايش ؟ قال : ممنوع العباية .. اي والله هذا اللي صار قلت انت وش تقول قال : لازم تشيل زوجتك العباية وتلبس الملابس المخصصة عندهم قلت : طيب من تحت العباية قال : لازم تشيل العباية .... أنا بصراحة ما تحملت باقي شوي والله وأكفخ العامل وقلت وين المشرف وجا ونفس الكلام كنت أنا وزوجتي و3 سعوديين كل واحد وزوجته معاه ... استغربت من اللي صار
..... المهم ما لعبنا بالألعاب المائية واكتفيت أنا بالسباحة ... والأخلاق صارت قافلة لا أنا ولا زوجتي وتوجهنا إلى حديقة الحيوانات وتفرجنا عليها وخرجت بعد الظهر توجهت للفندق للراحة وسألت العاملين بالفندق قالوا ما يحق له عادي تلبس الحرمة الملابس تحت العباية ... المهم قلت لعل في الأمر خير
ارتحنا بعد ضربة الشمس وضيقة الأخلاق وصحينا العصر نزلنا وطلعنا برا الفندق فيه مسطحات خضراء للجلسات وتقهوينا هناك إلى أن أذن المغرب وصلينا واتجهنا بعدها للبرايميد مول للعشاء ...
بتوصية من الأخت قصة حب كان عشانا في هذا المطعم ولها تقرير رائع عن المطعم هذا... له فرع ثاني في بينانج ولكن حبيت أزور هذا دامه قريب من الفندق .....
نظام المطعم بوفيه مفتوح خذ من الأكل على قد حاجتك وراح تسويه انت على طاولتك
إن حبيت المشوي أو المطبوخ وكلها حلوة
صلصة الصويا على الروبيان دماااااااااار
لافتة معلقينها في المطعم وهو أن الاكل الزايد راح يكون عليه غرامة لذلك لازم تخلص الأكل
الحساب كان 105 رينجت
في طريق العودة مرينا على مطعم تاهي وإن شاء الله أخونا عبدالله راح يخبرنا عن تجربته للمطعم
كذا خلص يومنا على خير ....
مصاريف اليوم الأخير :
196 رينجت تذاكر ألعاب صنواي لاجون
100 رينجت عصيرات وكيك في مقهى الفندق
105 رينجت عشا في مطعم سيؤول قاردن
المجموع /401 رينجت
التقيكم إن شاء الله في جزء آخر والرحلة القادمة إلى .......... يتبع
استيقظنا كالعادة لصلاة الفجر وأفطرنا وتجهزنا وعملت تسجيل خروج على الساعة 10 صباحا ورجعوا لي التأمين وقيمته 600 رينجت طبعا دفعت كاش ....
طلبت تاكسي عن طريق جراب وإلى مطار KLIA2 وبسعر 65 رينجت , وكعادتي أحب أروح المطار بدري في كل رحلاتي وكان إٌقلاعنا الساعة 1 ظهرا ...
كنت قد عملت تشيك ان مسبقا في طيران آسيا عن طريق تطبيقهم بالجوال وكان سهل جدا ولله الحمد
للمعلومية : طيران اير آسيا متشدد في جميع إجراءاته من شحن عفش لذلك لابد من أخذ الحيطة عند القيام بالحجز بشراء وزن أنا في جميع رحلاتي شريت 20 كيلو وزن لكل شنطة احتياطا لأنه لو زاد نصف كيلو ما راح يمشي الحال وبيخلوك تدفع مبلغ جامد والأمر الآخر مسألة الوقت عندهم لو تجي متأخر ثانية وحدة ما راح تطلع الطيارة وكثير من السائقين لما أطلع معاه للمطار أول شيء يسألني على أي طيران أقله طيران اير اسيا على طول يقول متى إقلاعك ويحذروني واجد من التأخير ولكن ولله الحمد ما حصل معي أي تعقيدات
طريقة عمل تشكن ان قبل الرحلة ب 14 يوم :
الصفحة الرئيسية ونختار كلمة check in
بعد ذلك نعبي الفراغات : اسم العائلة - رقم الحجز - محطة المغادرة
يظهر لنا المربع وفيه أسماء المسافرين - والمربع الاخير نحط الايميل لاستلام صورة البوردنق
وهذا هو البوردنق ....
لما أوصل المطار اعطي أي موظف هذا البوردنق وعلى طول من الأجهزة الذاتية يعطيني الاوراق ويلصقها على الشنط علشان الشحن ويعطيني بوردنق ....
وهذي الطريقة في كل الرحلات المتبقية ......
وصلنا ولله الحمد مطار لنكاوي واستلمنا الشنط وحجزت رحلة مانجروف ب 250 رينجت لمدة 3 ساعات بعد ذلك أخذنا تاكسي من المطار إلى منتجع بيرجايا لنكاوي ب 26 رينجت
وصلنا المنتجع وعملت تسجيل دخول وكان سريع وطلبوا 200 رينجت تأمين وتم الدفع كاش ...
مشروب ترحيبي ...
أحد الشاليهات داخل الغابة
المنظر من الشاليه اللي سكنت فيها مطل جزئيا على البحر ...
الفلة اللي قدامي راح أذكر لاحقا إن شاء الله قصتها ,,,,
مصاريف اليوم :
65 رينجت تاكسي جراب إلى مطار KLIA2
26 رينجت تاكسي من مطار لنكاوي إلى منتجع بيرجايا
90 رينجت تلفريك
72 رينجت غدا
21 رينجت أغراض موية وعصيرات
وهووووبا على المسبح وكان أفضل مسبح خلال رحلتي ولكن كان يعيب المسبح أن فيه بار وسط مسبح الأطفال
هذي طائرة خفر السواحل الماليزي في مهمة إنقاذ
تتذكرون لما قلتلكم راح أخبركم عن قصة الشاليه اللي أمام الشاليه تبعي ؟
لما صحيت اليوم الثاني بعد وصولي لاحظت حركة غريبة وكان فيها رجال أمن والدفاع المدني ومحققين وسألت بعدين وعلموني أن شاب من الجنسية المصرية طاح من البلكونة في البحر وسحبته الأمواج وما قدروا يبدأون البحث إلا بعد يومين أو أكثر بسبب سوء الأحوال الجوية , وبعدها بكم يوم أحد عمال المطاعم أخبرني أنهم عثروا علي جثته في أحد الجزر المهجورة على بعد عدة كيلوات من المنتجع ورحمه الله رحمة واسعة وأسكنه فسيح جناته ....
صورة ختامية ليوم حافل بالحيوية والمتعة ...
مصاريف اليوم :
250 رينجت رحلة المانجروف
352 رينجت غدا
14 رينجت عصير جوز الهند .... ( الحمد لله على النعمة ما أعجبني )
المجموع / 616 رينجت
التقيكم بإذن الله في جزء جديد ولكم خالص حبي وتقديري
أسعد الله مساكم بالمسرات وعذرا على التأخير ونكمل ما تبقى من قصة الفاتنة لنكاوي ,,,,
استيقظنا كعادتنا مع آذان الفجر بعد ليلة ماطرة واستعدينا لليوم الأخير في لنكاوي
أخذت جولة حول المسبح وكانت هذي أهم شيء عندي ....
السباحة في هالأجواء كلاااام ثاني ما ودك تطلع من المسبح
كان من المفترض أنسق مع السواقين للقيام بجولة ولكن كلهم مرتبطين بسياح آخرين أو أن اختياراتي ما أعجبتهم لأن الأغلبية عنده برنامج 6 ساعات وأنا ما أبغى الشيء هذا , رحت للاستقبال وسألت عن التاكسي والجولات وقالوا فيه جولات تبدأ ب 4 ساعات والساعة 30 رينجت طبعا نفس السعر لقيته عند أغلب السواقين فسألت عن الأماكن قالوا عندهم جدول محدد مالم يرغب السائح بتغيير الجدول قلت أنا بالنسبة لي ما أبغى جدولكم ولا شيء أنا عندي جولتين وتكفيني قالوا ما عندك مشكلة ....
توكلنا على الله الساعة 10 صباحا وعلى حديقة الفواكه ...
