اجمل مدن الشمال التركى

[سندريلا]

بعد البحث والتمحيص وطلعان بؤبؤ العين على اللاب توب، قررنا جدول رحلتنا كالتالي






ليلتين اسطنبول​

9 ليال فى الشمال التركي مقسمة كالتالي​

• ليلتين في اكيزدراIkizdere​
• ليلة فى آيدرAyder​
• ليلة فى اوزنغول Uzungol​
• 3 ليالي في اوردو Ordu​
• ليلة فى كولاكيا Kolakya​
• ليلة في طربزون Trabzon​

4 ليال في اسطنبول

حجزنا تذاكرنا على طيران العربية واللي كان سعرها منافس جدا فكانت التذكرة 1150 درهم اماراتي للشخص شاملة 30 كيلو وزن وحجز المقاعد كمان. أنا أصلا من عشاق طيران العربية لأنه فعلا ممتاز والكراسي واسعة ومريحة ورحلتنا كانت رائعة ولكن يعيبها فقط توقيتها.



وصلنا مطار صبيحة الساعة 12 وربع بعد منتصف الليل ولما دخلنا على المطار مالقينا موظفي الجوازات والاضاءة شبه مطفيه بس على طول اجو وفتحوا كاونتراتهم ومشونا بسرعة فائقة لأنه ما في حد غيرنا والشنط طلعت بسرعة الحمد لله.


حجزنا بفندق مطار صبيحة ISG Airport Hotel ليلتين عن طريق بوكينج وكانت الليلة ب 100 دولار تقريبا ومع أني عارفه انه الفندق ينراحله مشي بس ما كان فيه اشارات للأسف تدل على الطريق وطبعا الدنيا آخر الليل فأخدنا تاكسي وطلع حسابه 7 ليرات. وأتاريه الفندق لما تطلع من المطار على شمالك تمشي أقل من 5 دقايق وتلاقيه،بس مكتوب عليه Airport Hotel

وصلنا بحدود الساعة وحده بالليل وكنا هلكانين دخلنا غرفتنا ونمنا على طول.


سامحوني أنا من التعب نسيت حتى أصور الفندق فممكن تشوفوه على بوكينج. عموما الفندق جميل ومناسب جدا جدا للي عندهم رحلة ثاني يوم وبيني وبينكم انا غلطت اني حجزت ليلتين كان ممكن نحجز ليلة وحده وعلى طول نسافر الشمال بس مو مشكلة كسبنا يوم في اسطنبول.


صحينا الجمعه الصبح تعبانين جدا ونزلنا فطرنا وماشاء الله الفطور متنوع وجيد وأحسن شىء فيه انه فى مكان خاص للمربيات اللي بدون سكر والأكل قليل الدسم.


طلعنا من الفندق على المطار مشي وشربنا قهوة عند كوفي شوب دنيا القهوة Kahve Dunyasi أنصحكم تجربوه رائع جدا وياعيني على القهوة بالمستكة عندهم خطيرة جدا وأكلنا كيكة بالكستناء عجيييييبة.

وبعدها اشترينا كرت اسطنبول من الكشك اللي برا المطار وطلعنا بباص هافاتاش اللي يودي كاديكوي، تذكرة الباص 8 ليرات على الشخص. واللي حابب يروح تقسيم ممكن يطلع بباص تقسيم اظني 13 ليره على الشخص.


وصلنا كاديكوي وعلى طول ركبنا الباخرة المؤديه الى امينونو. كان الجو رائع والحمد لله وكان نفسي ما نوصل الا بعد ساعتين بس وصلنا بسرعة. كان نفسي أمشي، مشينا من اميونو الى السلطان أحمد و أول شىء سويناه كعادتنا فى اسطنبول هو الصلاة فى مسجد السلطان أحمد الحمدلله.

وبعدها طلعنا على قصر توب كابي وكان زحممممممممه فما دخلنا كل الغرف لأنه احنا أصلا داخلينه قبل هيك بس دخلنا غرفة شكلها جديدة فيها مخطوطات قديمة جدا تتحدث عن سيدنا محمد صلى الله عليه وسلم وحاطين معها أناشيد تتناسب مع الوضع العام للمكان، لفينا شوي فيه وطلعنا لأنه صار كتير شوب وحر.

هدول عيلة ايطالية جايين يحتفلوا بعيد ميلاد امهم ال 70 في اسطنبول و ماشاء الله مو مبين عليها

وأكيد بعدها رحنا تغدينا فى مطعم سلطان أحمد كوفتجي التاريخي Tarihi Sultanahmet Kofteci أنا متهيألي انه كل زائر لاسطنبول عليه فرض انه ياكل فى هالمطعم لأنه فعلا لذيذ مع ملاحظة أنه السنة أغلى من السنة الماضية.

كنا متفقين مع الغالية شهرزاد للقائها فى تقسيم فبعد الغداء طلعنا على تقسيم والتقينا معها وتسامرنا فى حديقة غزي Gezi Park، بتصدقوا اني أول مره انتبه للحديقة وما حسينا بالوقت أبدا برفقتها والا الوقت صار بعد المغرب. ودعناها على أمل اللقاء وطلعنا على باصات هافاتاش من تقسيم الى مطار صبيحة ورجعنا فندقنا.



فى صبيحة يوم السبت أفطرنا وعملنا خروج من الفندق وبوجهنا على المطار. طلعنا بكير شوي علشان نقدر نقعد نشرب قهوة عند صاحبنا دنيا القهوة.

حجزنا على طيران بيجاسوس Pegasus لرحلة اسطنبول طربزون و لأنه العودة رح تكون على اسطنبول الاروبيه فالأفضل ننزل في مطار أتارتورك فحجزنا على انور اير Onur Air وطلعت التذكرة للشخص 600 درهم تقريبا للوجهتين.



كتير ارتحنا بطيران بيجاسوس الكراسي واسعة ومريحة



المهم خليني اسولفلكم شو صار بالطيارة، طلع معنا شخص شكله ذكرني بأثرياء اليونان وذكرني أكثر بأحد أثرياء العرب القدامى ، دخل الزلمة على الطيارة آخر واحد، ووقف يمكن خمس دقايق وهو يمشط شعراته وطبعا قاعد هو ومرته أول كرسي وأتاري كل اللي حواليه ربعه وموظفي شركته. واللي يشلحه الجاكيت واللي يحمله الجاكيت واللي ينظفله الكرسي واللي يجيبله الماي واللي يدلل فيه واللي يتحدث مع مرته وأنا وأبو معن طول الرحلة نضحك .

ونقول سبحان الله كيف بعض الناس بيتعاملوا مع صاحب العمل وكأنه صاحب النعمة، طبعاهون لازم أوضح أنه الاحترام مطلوب جدا بين كل الناس بس بدون تذلل.



وصلنا مطار طربزون بعد ساعة ونص وأخدنا عفشاتنا وطلعنا على شركة ايفيس لتأجير السيارات Avis لأنه كنا حاجزين عندهم سيارة من موقع www.rentalcars.com ومن فضل الله أعطونا سيارة أحسن من اللي طلبناها بسعر 160 درهم لليوم الواحد شامل التأمين. ميزة هذا الموقع أنه ممكن تشوف من أي شركة رح تستأجرالسيارة قبل كل شىء والعيب انه يتم سحب المبلغ كامل مباشرة عند الحجز. هلأ هون لازم أحكيلكم اني كنت مرعوبة ليش ياترى....



لأنه فى أحد الأشخاص كتب تعليق سلبي عن الموقع فى أحد المنتديات وأنا صرت أضرب أخماس فى أسداس

لأنه كنا حاجزين ودافعين بس الحمد لله الموقع كان تعامله ممتاز وشركة Avis كان موظفيها قمة فى المهنية وسلمونا السيارة معبأة بالكامل ديزل على أن نعيدها بنفس التعبئة وهذا طبعا فى مصلحة العميل. طلبنا منهم تأخير وقت التسليم بدل 11 صباحا لتصير 2 بعد الظهر وهذا ما حصل بالفعل بدون أي رسوم اضافية.



طلعنا من المطار

وبوجهنا على حبيبة القلب اكيزدرا وطبعا فى الفندق الرائع ريدوس Ridos Thermal Hotel and Spa حجزنا عن طريق بوكينج وكانت الليلة 136 دولار مع انه اليوم اللي قبله وبعده بيومين السعر كان 160 دولار. وصلنا الفندق ولقينا موظفين مختلفين عن السنة الماضية وبعد دقائق طلعت نسلهان تلك الموظفة الرائعة في مكتب الاستقبال ولما شافتنا انبسطت كتير واستقبلتنا بترحيب تركي رائع.

كنا نتصور ونبعت للأولاد ونتمنى أنهم معنا بس فاجأني معن بسؤال : هو اللي ساكنين هون كيف ممكن توصلهم طلباتهم؟ وفعلا صدقوني ما شفت طرق حواليهم

لما تنزلوا من الفندق ب 3 كيلو تقريبا فيه كوفي شوب صغيييير ولوحة مكتوب عليها Maden Su يعني مياه معدنية أرجوكم اللي يوصل هناك يزور المنطقة لأنه فيها شىء غريب ، مياه النهر جارية عذبة ماشاء الله ولما تشرب منها بتقول طيب يارب كيف رح تكون عذوبة أنهارالجنة والغريب انه طالع من الحائط مياه معدنية مختلفة تماما عن مياه النهر طعمها يلسع اللسان كأنه فيها صودا سبحان الله وطبعا مفيدة جدا.

وحبيبي وزوجي الغالي أبو معن

ماقصر ونزلني عند النهر وشربت حتى ارتويت



اللهم اسقني وزوجي وذريتي وكل من قال آمين من أنهار الجنة

اللهم ارزقنا الجنة وما قرب اليها من قول أو عمل وأعوذ بك من النار وما قرب اليها من قول أوعمل




رح أحكيلكم شوية ملاحظات واللي بحب يعرف تفاصيل أكثر عن المنطقة والفندق ممكن يرجع لتقرير السنة الماضية



ملاحظاتي:



هذا الفندق رائع جدا جدا بس لو يجددوا العفش الله يهديهم


ضروري تجربوا برك المياه الحارة وانتبهوا انه ما تقعدوا بالبركة أكثر من 10 دقايق بعدين ترتاحوا وترجعوا مره ثانية عشر دقايق


شكلهم جايبين شيف جديد لأنه الأكل كان أكثر من رائع سواء بالفطور أو العشاء وشفت مساعد شيف سوري عندهم فشكله الله أعلم هو اللي عامل الحركات اللذيذة


خلال فترة وجودنا كان فى تصليحات فى الطريق وأعتقد اللي حيروح الصيف القادم رح يكون الطريق مريح جدا للوصول الى الفندق


قضينا يومين رائعين جدا والحمد لله

استنوني رح أرجع قريبا وأستكملكم التقرير ان شاء الله​

​

 

[سندريلا]

الحلقة الثانية

ودعنا فندق ريدوس وقرية اكيزدرا على أمل اللقاء قريبا، وبوجهنا على آيدر بس قبل ما نوصل آيدر ميلنا على مطعم فرتينا شربنا قهوتنا عنده لأنه كنا متغديين فى مطعم Kara Deniz اللي فى بداية اكيزدرا


ميلنا تعني مرينا أو عدينا .... بتعرفوا تذكرت اغنية قديييييييمة لنجاح سلام من زمان أول


ميل يا غزيل يا غزيل ميل
ميلك ميوله قيلك قيولك
بسقيك فنجان قهوة
بعملك تبوله

كملنا مشوارنا على آيدر وعلى الطريق شفنا هذا الشلال الرائع واتفقنا انه نرجعله بكره واحنا مروحين من آيدر.

وصلنا على فندقنا واللي كنت منشنة عليه من السنة الماضية

Kackar Resort Hotel فندق كاجكار

وهو فى بداية محمية آيدر. حجزنا الفندق عن طريق زاد المسافر للحجوزات بسعر 160 دولار تقريبا والحقيقة انه السعر كان أقل من بوكينج.

وهاي غرفتنا الجميلة

الغرفة حلوة وواسعة والبلكونة فيها جميلة جدا والجلسة فيها ترد الروح

​

 

[سندريلا]

طلعنا تمشينا فى المحمية فوق كان الجو غير عادي، كان السحاب والغيم يحضن فينا واحد واحد ويلم شملنا ويخلينا نسبح رب العباد في كل ثانية وكل شوي ربنا يرزقنا بمطر جميل ويوقف ويرجع المطر وعلى هالحال

أكلنا ذرة كانت مدهشة من كتر زكاوتها (زاكي يعني لذيذ) والحقيقة الذرة فى آيدر أطيب ذرة أكلتها ومنظر الذرة اللي ناس ناشرينها على البلاكين عشان ينشفوها وبعدين يطحنوها منظر مدهش

. طحين الذرة مشهور عندهم كتير وبيعملوا منو خبز الذرة وحلويات بالعسل كمان.


طلعنا بالسيارة لفوق كتير لغاية ما صار الطريق مش مسهمد
​

وكان فيه شلال صغيرون وحلو وقفنا هناك وتأملنا بجمال خلق الله سبحان الخالق

اللهم ارزقنا لذة النظر الى وجهك الكريم


لاحظنا انه فيه شجرة عبث بها العابثون، فاستغربنا كتير لأنه آيدر محمية طبيعية وممنوع العبث أو تخريب الشجر.

قربنا على الشجره ومديت ايدي أشوف ليش الناس عاملين هيك، لقيت مادة لزجة مسكت فى ايدي وتتخيلوا شو طلعت

مستكة والله مستكة

ريحتها بتعقد


حطيتها بتمي وعلكتها هاي عنجد طلعت مستكة

يا الله أول مرة بحياتي أشوفها على الطبيعة هيك


نزلنا ووقفنا عند الشلال الكبير وتصورنا والتقينا بعائلة سورية جايين سياحة من غازي عنتاب بالسيارة، سلمنا على بعض وتسامرنا شوي وودعناهم على أمل أن نلتقيهم في سوريا وهم سالمين وغانمين ان شاء الله، ورجعنا على الفندق.


على سيرة لقاء العرب والسلام عليهم، في ملاحظة لاحظناها أنه ما ندر تلاقي خليجيين يسلموا، بتلاقي الزلمه داخل على المصعد وما في قدامه غير زلمه تاني ما يقول السلام عليكم أوحتى سيدة اجت عيني بعينها وابتسمت لها وما تبتسم أو تسلم. حتى فى أحد المواقف فى ست كانت عم تدور وشكلها تايهة فلما كلمتها عشان أساعدها، خافت وصدت فى البداية فقلت لالالالا هاي نهايتنا نخاف نحكي مع اللي بيحكي عربي.

طبعا هذا الكلام لاينطبق على الجميع لأننا التقينا بعائلات خليجية رائعة جدا وتعرفنا عليهم وتبادلنا ارقام الهواتف ومن فضل الله في عائلات زارونا في بيتنا في الامارات وصاروا من أعز الأصحاب.

أعتقد أنه السبب أنه احنا فى المنتديات بنحذر المسافرين من التحدث مع أي حد بيحكي عربي خوفا عليهم من أن يكون نصاب أو حرامي وبالتالي صاروا ما يفرقوا، هذا تحليل شخصي بحت.

يلا نكمل


رجعنا غرفتنا الجميلة وقررنا نتعشى بالفندق وكان هو القرار الصائب، الأكل كان لذيذ جدا وتنسيقه قمة في الذوق

رجعنا وجلسنا على البلكونه الجميلة لفترة طويلة ونمنا براحة وأمان من فضل الله


هذا مطل غرفتنا

​

 

[سندريلا]

صحينا الصبح ماشاء الله مرتاحين لأنه السرير مريح جدا ونزلنا فطرنا ذلك الفطور الشهي

وشوي وجانا زائر الحب والجمال والرزق نزل المطر واستمتعنا فيه جدا الحمد لله

طلعنا تمشينا شوي عند النهر الجميل

ظلينا قاعدين فى الفندق مستمتعين بما رزقنا الله به وشربنا قهوتنا والحمدلله

عملنا خروج من الفندق الرائع واللي أنصح الكل فيه وخصوصا العرسان لأنه مريح ورومانسي جدا

في طريق العودة مرينا على الشلال الجميل اللي شفناه امبارح

اللهم ارزقنا شربة ماء من يد رسول الله صلى الله عليه وسلم لا نظمأ بعدها أبدا



توكلنا على الله الى اوزنغول



أشوفكم قريبا ان شاء الله​

 

[سندريلا]

وصلنا اوزنغول وكنا حاجزين بفندق ميرج Meric عن طريق بوكينج بسعر أعتقد 110 دولار فى بداية القرية وهو مطل على النهر ولكن للأسف غرفتنا ما كانت مطلة.


الفندق جيد والموظفين محترمين ومتعاونين




حطينا أغراضنا ونزلنا تمشينا فى القرية شوي

رحنا تغدينا بمطعم اوزنغول أضا عشان هو مطعم زاكي فعلا وجربناه السنة الماضية وأسعاره معقوله


على فكره الصورة أدناه اعتمدها موقع مستشار الرحلات www.tripadvisor.com لتمثل المطعم وهو موقع باللغة الانجليزية

من فضل الله الأكل كان لذيذ جدا



وهنا العروسين أنا وأبو معن

وطبعا مش أنا اللي صورت الصورة طلبنا من شاب سعودي شكله طالب جامعي تصورينا وقعد يطقطق فقلته والله شكلك عم تضحك علينا صورنا منيح يازلمه والحق يقال انه صورنا كم صورة حلوين كتير

جزاه الله خير

طلعنا بالسيارة للمنطقة اللي ورا المسجد

هون كان نفسي يكون معي كاميرا متخصصة لأنه اوزنغول من الأماكن اللي بتساعد على التصوير الجميل

ثاني يوم طلعنا من الفندق من الصبح متوجهين الى مرتفعات السلطان مراد لأنه السنة الماضية لما رحنا كان ضباب شديد جدا فما قدرنا نوصل لفوق.



على الطريق للمرتفعات مرينا على الكشك اللي يبيع قهوة وشاي وسمك وبيض طازج وشربنا عنده شاي وقهوة

وشفناه زارع كوسا كبيرة كتير وهاي زهرة الكوسا، والستات اللي بيحضروا قناة فتافيت برنامج جيمي اوليفر Jimmy Oliver حيعرفوا هاي الزهره بيغمسها بتغمسية خاصة وبيقليها بس ما سألته اذا طيبه ...

أكبر حبة كوسا رأتها عيني

الله يرضى عليه صاحب الكشك نبهنا انه نرجع قبل الساعة وحده الظهر عشان الضباب بيبدأ بهالوقت


طلعنا لفوق وكان الجو رائع والمناظر خلابة سبحان الخالق ولكن بالربيع أحلى بكتير بسبب وجود الزهور ومن فضل الله انهم زبطوا الشارع وسفلتوه و صار كتير أحسن وأريح من أول

وهاي كم صورة من هناك

​

وكان ختام الرحلة فى طريق العودة مسك


لقينا العلم الفلسطيني يرفرف جنبا الى جنب مع العلم التركي فى حديقة أحد بيوت الأتراك

​

هيك خلصنا الجزء الأول من شمال تركيا ... خليكم بالقرب ولاتروحوا لبعيد لاني رح أرجع بإذن الله بجزء جديد ومختلف من الشمال التركي الجميل


​

​

 

[سندريلا]

الحلقة الرابعة


الجزء الأول




شكلي ما قلتلكم احنا وين رايحين اليوم




احنا رايحين على




اوردو Ordu




كلما تذكرت أوردو تذكرت أغنية من أغاني الكويت الوطنية القديمة في أيام الصبا اللي رسخت فى قلوبنا قبل عقولنا



لقيناه يا أحلى أيام العمر لقيناه

وعشناه فرحة على قلوبنا تمر وعشناه


ألف صلي وسلم عليك يا حبيب الله محمد ألف صلي وسلم عليك يا حبيب الله محمد







وتلك هي اوردو هي من أحلى أيام العمر وهي فرحة القلب


لا خلا وعلا عدم حبيبتي اوردو


يلا خلينا نرجع لمسلسلنا التركي

(العشق المسموح)

لأنه شكله فى أحداث كتيرة جاية


والله عجبني اسم المسلسل شو رايكم أغير عنوان التقرير وأسميه




العشق المسموح





توكلنا على رب العباد ونزلنا من السلطان مراد باتجاه البحر وخلينا البحر على يمينا ومشينا باتجاه طربزون قاصدين اوردو

بعد طربزون بعشرين كيلو تقريبا لقينا هذا المطعم فى أكشبات Akcabaat وكان على يمين الطريق وقررنا ننتغدى فيه

لقيناهم حاطين أسماك أشكال وألوان من أسماك البحر الأسود الطازجة واخترنا سمكه وسط وصحن من السمك الصغير جدا المشوي (همسي) الذي يؤكل كما هو بلحمه وشوكه، وقررنا نقعد فى الجلسة الداخلية اللي بتطل على البحر لأنه ماشاء الله عنده عدة جلسات داخلية وخارجية والمطعم 3 طوابق. على فكرة لقينا صور للرئيس التركي السيد رجب طيب اوردغان يتغدى عندهم

الأكل كان لذيييييييييييييذ جدا جدا والله أنا عم بكتب وأشعر بطعم السمك وخصوصا أنه السمك هون سمك بحري مو سمك نهري مثل مطاعم اسطنبول و ياعيني على المخلل يمااااا دمار عاطفي ونفسي، من زمان ما أكلت مخلل زاكي هيك.



معلش أنا ما صورت الأكل هالمرة بس هنزلكم صورة العشاء اللي تعشيناه عندهم لما رجعنا من اوردو

ضيفونا بقلاوة وطلع حسابنا 42 ليرةطبعا احنا انصدمنامن السعر لأنه لو أكلنا نفس الأكلة في أحد مطاعم اسطنبول كان طلع حسابنا 150 ليرة.






كملنا مشوارنا لأكثر من ساعتين ونص وأخيرا وصلنا

حجزنا فندق أنيمون اوردو لمدة 3 ليالي من حجوزات زاد المسافر بسعر 110 دولار لليلة والحمدلله الفندق شكله تمام التمام. أعطونا غرفة في القبو غرفة رقم B3 للوهلة الأولى ما عجبنا يعطونا هيك غرفة بس لما نزلنا وشفناها كتيييير عجبتنا فقررنا نبقى فيها.



كنا حاجزين فندق زفين فى كولاكيا لليلة واحدة ولما شفنا فندق انيمون قررنا نمدد كمان ليلة ونلغي ليلة كولاكيا.




صورة غرفتنا وجبتها من النت لأني من فرحتي بالغرفة نسيت أصورها والصورة هاي مطابقة للواقع

الغرفة جميلة جدا وواسعة جدا جدا وتكرمون الحمام واسع متهيألي حمامهم نفس حجم بعض غرف إسطنبول

غرفتنا على البحر مباشرة وكل شىء فيها رائع الا شىء واحد انه ما فيها خصوصية على الاطلاق فمثلا اذا بدنا نفتح الباب أو حتى البرداية فأكيد لازم أكون بحجابي على طول وبصراحة مو مهم كرمال هالقعدة الرائعة.



الأفضل للعائلات انهم ياخدوا الغرف العلوية علشان موقع الغرف فيها خطورة على الأطفال.



وتفضلوا شوفوا قعدتنا الرائعة اللي خلتنا ما نطلع من الفندق

طلعنا تعشينا في مطعم الفندق وأكلهم جيد بس مش واو كتير



طبعا نمنا مثل الملائكة من التعب




فى ملاحظة على غرفتنا كان في الحمام حشره اسمها الحشرة الكسولة Lazy Fly وكانت متواجده بكثره فبلغناهم وعلى طول اجوا ونظفوا كل المكان.​

 

[سندريلا]

الحلقة الرابعة



الجزء الثاني



ثاني يوم طلعنا فطرنا فى مطعم الفندق وكان جيد جدا الحمدلله


طلعنا بالسيارة على موقع التلفريك، طبعا الشباب والصبايا ممكن يروحوا مشي لانه قريب كتير، صفينا السيارة فى موقف التلفريك وطلعنا، أعتقد تذكرته ب 5 ليرة طلوع ونزول



كان الغيم معبي السماء



​

شربنا قهوة فى أحد المقاهي طبعا المنظر خيالي ورائع جدا وتمشينا واشترينا شوية هدايا تذكارية من هناك ورحنا أكلنا مهلبية عند Royal 52 Boztepe Tesisleri ورجعنا نزلنا.


وبما انه السيارة فى موقف التلفريك قلنا خليها ومشينا على السوق لأنه مقابل التلفريك على
طول. السوق فى تركيا حلو كتير ورائع ومن حسن الحظ انه أغلب المحلات عاملين تنزيلات على الصيفي لأنهم بدهم ينزلوا الشتوي وصاحبتكم ما قصرت اشتريت أشياء كتير وطبعا كل شوي مطر رائع. لما اجى وقت الغداء دخلنا على مطعم شاورما . أنا اكتشفت فعلا اني ما بحب الشاورما فى تركيا لأنه أبو معن عجبته الشاورما بس أنا لا. والله ما فى أزكى من شاورما ريم فى عمان



رجعنا الفندق لاحظنا انه الحشرات رجعت على الحمام. على طول طلبنا منهم تغيير الغرفة وبالفعل ماقصروا وغيروها وخيرونا اذا نحب نطلع فوق فقلنا لا احنا حابين القبو فأعطونا غرفة B7.

ريحنا شوي بالغرفة الجديدة وكانت ممتازة جدا

طلعنا بعدها تمشينا على البحر يا الله ما أجملك يا اوردو وما أجمل بحرك حسيت انها اسطنبول الصغيرة اللي ما توسخت بالعولمة.

أنا لما كنت أقرأ شو كاتبين الشباب عن أوردو أستغرب وأقول مش لهاي الدرجة يعني شكلهم عم ببالغوا ، وأتاري معهم حق والله
وكتر خير أبو صهيب اللي عرفنا على هالمنطقة الرائعة جدا بكل ما فيها.


أوردو جمعت الجمال كله

الصيادين فى اوردو بعلموك الصبر والفرح بالرزق من الله


رجعنا أخدنا السيارة من الفندق ورحنا تعشينا في مادو، احنا كتير بيعجبنا مادو

حتى قائمة الطعام حلوة على شكل مجلة

هذا كان عشانا وهذا الشىء الأبيض شوربة لذيذة جدا جدا جدا وقلاية اللحمة مع البندورة حسيت أني أنا طبختها.

طبعا رجعنا سهرنا على باب غرفتنا الرائعة



​

 

[سندريلا]

الحلقة الخامسة






صحينا بكيرعشان نروح



مرتفعات بارشيمبا Persembe yaylasi





وفعلا طلعنا باتجاه فاتسا واتبعنا اللوحات الارشادية

واحنا على الطريق مرينا من احدى القرى وكان فيه محل خضار وفواكه مثل محلات المناطق الواو، وانك تشوف هيك محل فى هاي البلاد شىء طبيعي ولكن الغير طبيعي انك تشوفه فى قرية صغيرة. محل كبير جدا وفى قمة النظافة والترتيب وطبعا قمة الاغراء للشراء ماشاء الله تبارك الرحمن. طبعا ما قدرنا نقاوم واشترينا شوية فواكه لذيذة جدا.



بعد ساعتين من اقلاعنا من الفندق تقريبا وصلنا الى Aybastikent Ormani غابات كنت وماكان حدا غيرنا هناك غير صاحب المطعم والموظفين ارتحنا شوي وطلبنا شاي ولما جاء وقت الحساب كانوا مذوقين كتير وما رضيوا ياخدوا حقه أبدا.

شفنا عندهم عسل فقلنا نشتري من عندهم والا الكيلو ب 1600 ليره فما فكرنا على طول دقينا سلف وطرنا بالسيارة

وبعدها طلعنا لفوق شوي وتغدينا بمطعم Gulec Izgara وهو مطعم بسيط جدا جدا ومع أنه شكل اللحمه عنده رائع بس للأسف كانت قاسية كتير وما بتتاكل ولكن الحمد أكلنا لبن نعاج مع العسل رائع وعجيييييب، على فكرة فيه مطعم شكله جديد قدامه.

يعيب المطعم انه كتير فى كلاب وانتوا بكرامة حول المطعم


طبعا طول الطريق مساحات خضراء على مدى نظرك وخرفان مشهية الله يباركلهم

هذا الخروف شكله حبنا وقف يتفرج علينا ويقولنا صوروني

رجعنا وكان مطر طول الوقت ومش رح أضحك عليكم أنا كتير كنت أتعب والله يرضى عليه أبو معن مراعيني كتير وداير باله علي.


رجعنا على أوردو وقررنا نروح نتعشى في

الجلسة الخارجية

المطعم بعد فندق أنيمون يمكن ب 300 متر يعني تخلي الفندق على يمينك وتمشي حتلاقي المطعم على يمينك


مطعم راقي جدا واستقبالهم النا غير شكل وخصوصا كنا العرب الوحيدين وأعتقد الغير أتراك الوحيدين. شكل الأتراك هون غييير ... أقلكم فى أوردو الناس فعلا راقية كتير. جلسة رائعة ومطلة على البحر ... المطعم يقدم مطبخ البحر الأسود Black Sea Cuisine اللذيذ والمختلف جدا

هاي دجاج فيليه محشي بالجبنة اللذييييذة وكان طبق خيالي الحمد لله



لما رجعنا على الامارات سويتها بالجنة النابلسية وكانت رهيبة بفضل الله

شفناهم بيقدموا لطاولة قريبة منا هاي المعجنات الرائعة

وتخيلوا طلع حسابنا 62 ليره

​

 

[سندريلا]

رجعنا على الفندق وكملنا سهرتنا فى غرفتنا الجميلة

ثاني يوم صحينا بكير على أساس نطلع على كولاكيا بس أبو معن كان تعبان من كتر السواقة فاتفقنا انه خلص ما فى داعي خصوصا انه صار عنا تشبع من المرتفعات والبحيرات والشلالات بفضل الله.




تمشينا على البحر وقعدنا فى أحد الكوفي شوبات اللي هناك ورجعنا كملنا تسوق ورحنا بعدها تغدينا عند مادو ورجعنا فندقنا ما طلعنا بس قعدنا فى حديقتنا وبحرنا والحمدلله.



للعشاء جبنا معجنات من عند اكتشلار

نمنا بكير علشان بكره هو اليوم الأخير في اوردو



صحينا واحنا بنقول ياريت توها بدت رحلة اوردو



اليوم للأسف حان وقت الرحيل ووقت الوداع لمدينة أحببناها وأحبتنا مدينة الجمال اوردو



فطرنا وعملنا شيك آوت على طول لأنه قدامنا طريق على طربزون. وعلى الطريق مرينا على مصنع ساجرا للشوكلاته Sagra واشترينا منه كتير أشياء طيبه وتوكلنا على الوكيل.



حبينا أوردو كتير وهي ما قصرت معنا كانت تلك المدينة تبثنا كل يوم بالطاقة والنشاط والحب اللامنتهي.





اشوفكم قريبا فى طربزون​

 

[سندريلا]

الحلقة السادسة




ودعنا اوردو على أمل اللقاء بها قريبا ودعناها بعد ما وعدناها انه الرحلة القادمة سيكون لها النصيب الأكبر من الأيام ان شاء الله




توكلنا على رب العباد ومشينا باتجاه طربزون كنا حاجزين بفندق نوفوتيل Novotel Trabzon Hotel لليلة واحدة فقط عن طريق بوكينج بسعر 160 دولار غرفة غير مطلة.



معلومة: في فندق جديد اسمه Three Pearl Hotel عم يفتح أو يمكن فتح مقابل نوفوتيل، شكله كتير حلو من برا وياربتكون أسعاره معقولة ويخلصنا من نوفوتيل



معلش يسامحوني عشاق نوفوتيل أنا ما حبيته



لما وصلنا جيرسن Giresun وقفناعند مطعم وكوفي شوب جميل وأنيق جدا ومرتاديه كلهم أتراك نشرب فنجان قهوة.

قبل المطعم مباشرة فى محطة بترول شل

​

لو بنعرف انه في هيك مكان بعقد كان ما أفطرنا في الفندق
​

ولأنه ما شربنا قهوتنا الصباحية طلبنا كل واحد فنجانين قهوة

​

 

[سندريلا]

قربنا على طربزون شوفوا ما شاء الله لاقوة الا بالله السماء ما أحلاها وعنجد أول مره أشوف سحب بهذا الشكل

الشمس مصرة تنور دنيانا وطريقنا




اللهم نور لنا طريقنا بالايمان وطاعة الرحمن

وصلنا الفندق ودخلنا غرفتنا ارتحنا شوي




وبوجهنا على شارع اوزن Uzun Sokak وموقعه عند في مركز المدينة Şehir merkezi عند ميدان طربزون.






يا الله شو هالشارع حلو وشو التسوق فيه مش معقول وممتع جدا. انبسطنا كتير فيه وتغدينا معجنات لذيذة فى أحد المطاعم المنتشرة بالسوق. واحنا قاعدين طلعت ريحة حلووووووة فاحنا فكرنا انه احد الشباب رش عطر ... وبعد شوي رجعت طلعت نفس الريحة وأبو معن يقولي بدي أشوف مين اللي عم يرش علشان أسأله شو نوع العطر أشتري منه شوي .... ونشوف شباب قاعدين على طاولة جمبنا عم يعصروا ليمون



نعم ليمون وهاي الريحة المذهلة كلها منه فرحنا طلبنا ليمون وصرنا نشم ريحته وناكل فيه. يا جماعة عمري ما شميت ريحة ليمون بهالروعة الله يبارك لهم يارب

بعد الغداء رجعنا كملنا تسوق



وبعدها قعدنا بالميدان وكان الجو خيالي






رجعنا حطينا أغراضنا بالفندق وتمشينا شوي فى الحديقة لأنها بصراحة أحلى شي فى الفندق وبعدها رجعنا طلعنا على أكشبات Akcaabat على مطعمنا المفضل

ما بتصدقوا شو فرحوا لما شافونا، قال يعني صرنا زباينهم

وهالمرة قعدنا في الجلسة الخارجية.





طلبنا سمكتين مشويين لذيذتين (اسم نوع السمك Levrek) وصحن سلطه فقط وباقي الأشياء ضيافة منهم وطلع حسابنا 50 ليره والله العظيم 50 ليرة فقط

​

 

[سندريلا]

رجعنا على الفندق فى محاولة للنوم وللأسف لأكثر من ساعتين واحنا فى عذاب، كان فى طفل فى الغرفة اللي جمبينا عم يبكي وهذا شىء طبيعي وبيحصل عادي بس المش عادي لما فندق زي نوفوتيل ما يكون فيه عازل للصوت.



​

تاني يوم الصبح حضرنا شنطنا للعودة الى اسطنبول و نزلنا فطرنا والفطور كان جيد كمان





طلعنا بعدها تمشينا بالحديقة الجميلة

وهناك شفت مراجيح كبيرة الحجم والله وما قصرنا أنا وأبو معن قعدنا نلعب ونتمرجح وكأننا لسه أطفال صغار.


كنت لما أطير بالمرجيحة يطير قلبي معها كان نفسي أوصل للسماء وأمسك السحاب فيها، سعادتي مابقدر أوصفها.






كان خالي دايما يقولي أحلى ما فيك تلك الطفلة الصغيرة ذات السبع سنوات بداخلك وأنا أرد عليه و أنا بحبها كمان.

أولادي وبناتي اخواني وخواتي عيشوا حياتكم وانبسطوا اليوم اللي بروح ما بيرجع فاستغلوا كل لحظة سعادة بتمر عليكم






وكان فى عائلة سعودية بيتمشوا وأطفالهم مساكين بدهم يلعبوا وأنا لسه بدي ألعب بس قلت حرام خليهم يلعبوا وحبايبي الأطفال ركضوا على المراجيح ركض.





أوعكم يكون حد من هاي العيلة عم يقرأ هلأ

وما حدا يخبر حفيداتي شو عملت

عملنا شيك آوت من الفندق ولا أخفيكم اني ما حبيت غير الحديقة فقط عندهم





بعد ما طلعنا ميلنا على محطة لغسيل السيارات وغسلنا السيارة لتسليمها نظيفة زي ما سلموها النا نظيفة ذوقا منا وليس الزاما علينا.





تخيلوا مطل المحطة

وهاي شمسيتنا نسيناها هناك عن قصد عل وعسى أن يستفيد منها حد

كملنا طريقنا الى اكشبات عشان نتغدى في مطعم نهات اسطه كنا سمعنا عنه وموقعه قبل مطعم فوزي هوجه بخمسة كيلو تقريبا

والحمد لله قضينا وقت كتير حلو عندهم وأكلنا كفته طيبه وقعدنا قعدة ترد الروح

هاي الصورة من كتر ما حبيت الصفاء والنقاء فيها كان نفسي ما أحط توقيعي عليها

رجعنا على المطار وطلعنا بطيران انور اير Onur Air



طلع معنا وزن زيادة 21 كيلو ودفعنا 63 ليرة




قعدنا في أحد الكوفي شوبات وطلع حسابنا 30 ليرة فقط أبو معن 100 ليرة قام رجع الشاب 60 ليرة ولما سألناه صار يقول sorry sorry بس كانت الحركة كتير واضحة انها مش بالغلط



طيران اونور اير مش مريح أبدا، الكراسي ضيقة جدا والمسافة بين المقعدين قصيرة فما صدقنا ايمته وصلنا اسطنبول.





سأحدثكم عن العشق والهوى فى إسطنبول





فانتظروني​

 

[سندريلا]

الحلقة السابعة



​

عن اسطنبول ... عن العشق والهوى




​

وصلنا مطار أتاتورك وأخدنا تاكسي من المطار ب50 ليرة، طبعا احنا عارفين وين فندقنا بالزبط لأنه لما وصلنا فى بداية الرحلة مرينا على المنطقة نتأكد من الموقع.


​

حجزنا فندق اورينت اكسبرس Orient Express Hotel من بوكينج لمدة 4 ليالي، الفندق يقع بين جولهانه وسيركجي على الشارع ا لرئيسي على خط الترام يعني من محطة ترام جولهانه مشي 3 دقائق.
​

سواق التاكسي للأسف ما عرف الشارع اللي ممكن يوقف فيه قدام الفندق مع أنه أبو معن كان يدله بس عاد تركي وركب راسه المهم انه وقفنا على الزاويه واضطرينا نمشي مسافة 5 دقائق تقريبا بالشنط.

​

وصلنا على فندقنا الرائع
​

الصور جبتهم من النت

​

واستقبلنا هذا الموظف الرائع جدا طبعا كل من يعمل فى الفندق بيحكي انجليزي وفى موظفة رائعة رائعة ما شاء الله عليها بتحكي عربي وانجليزي وفرنسي اضافة الى لغتها التركية.

​

​

اعطونا غرفتنا بالدور السابع
​

وشوفوا شو عاملين

​

وحاطين صحن فواكه وصحن حلقوم ضيافة
​

يييييييي أنا ما قلتلكم اليوم ذكرى زواجنا ال 31

​

اللهم اجعلني قرة عين لزوجي واجعله قرة عين لي



​

وهذا مطل غرفتنا

​

طبعا أنا تواصلت معهم وخبرتهم لترتيب الأمور وترتيب عشاء مرتب يليق بالمناسبة

​

طلعنا على الروف على مطعم امبات Imbat Resturant
​

قعدنا وعلى يمينا مسجد السلطان أحمد وأيا صوفيا وعلى يسارنا برج غلاطه
​

ضيفونا عصير وبعدها جابولنا العشاء الرائع

​

وبعدها جابولنا هذا الحلو اللذييييييييييذ جدا جدا اللي ما حدا يسألني شو اسمه لأني مش عارفه ضيافه برضه من عندهم

​

المطعم كان ماشاء الله فل ولا طاولة فاضية لأنه المطعم بالحجز وعندهم فترتين للعشاء من 7 – 9 أو 9:15 – 11:15. كان فيه جنسيات مختلفة أمريكان على ألمان على فرنسيين على مكسيك على أتراك واحنا العرب الوحيدين.
​

قضينا وقت رائع جدا جدا ونزلنا غرفتنا ونمنا على طوووووووول.



​

تصبحوا على خير


​

وأشوفكم قريبا في يوم جديد من أيام اسطنبول عن العشق والهوى​

 

[سندريلا]

الحلقة الثامنة





أصبحنا وأصبح الملك لله والحمد لله ولا اله الا الله وحده لاشريك له لك الملك وله الحمد وهو على كل شيء قدير




مطل الغرفة في النهار

نزلنا فطرنا وكان فطور ممتاز ومتنوع ما شاء الله

وهاي صحني

طلعنا شربنا قهوة على الروف نفس مكان اللي تعشينا فيه امبارح بس كانوا عم ينظفوا المكان وما فرقت معنا قعدنا وشربنا القهوة لأنه الجو كان خييييال



آيا صوفيا على يمينا

برج غلاطة على يسارنا

شوفوا هاي الصورة وشوفوا ما أشطرني، مسجد السلطان أحمد وآيا صوفيا على زجاج الروف وأنا عم بصور ببرج غلاطه



تخيلوا كل هاد من موبايلي جالاكسي S5 كيف لو معي كاميرا بروفيشنال كان كسرت الدنيا بصوري

طبعا ما تصدقوني لأني ما لي خص بالتصوير ولا بفهم فيه والصورة هاي طلعت بالصدفة معي

طلعنا بالترام على كاباتاش وقطعنا الشارع وخلينا البحر على يسارنا ومشينا تقريبا 200 مترو وصلنا على




دنيا القهوة Kahve Dunyasi




المقهى المفضل لدينا




الصور من النت

شلالات الشوكلاته معروضة للناس

اشترينا ضيافة العيد من شوكلاته وترافيل Truffle وحلقوم محشي بالفستق الحلبي ومغطى بالشوكلاته

واشترينا كمان بكرج القهوة الكهربائي (رائع لعشاق القهوة)

كانوا عاملين عرض اللي يشتري بملبغ معين بيعطوه علبه بسكويت ويفر مغطى بالشوكلاته ومارح أحكي كم المبلغ علشان أبومعن ما يتذكر كم دفع

للعلم هذاالبكسويت الويفر Gofretim من ألذ الويفرات ان لم يكن الألذ




ولأنه معانا أغراض كتير اضطرينا نرجع الفندق ضبينا أغراضنا ورجعنا نزلنا​

 

[سندريلا]

طلعنا على بيازيت بالترام ونزلنا على السوق المجاور لجراند بازار كنت بدي أشتري صواني كنت اشتريت منهم السنة الماضية لأني لقيتهم فى القرية العالمية فى دبي أكثر من ضعف السعر وصينيتي أخدتها بنتي معها على نيوزلندا




اشتريت الي ولوالدتي ولبنت حماي




كملنا مشي باتجاه سوق الجملة



مشينا لما انهرى وبرنا



أكثر من 4 ساعات بالآخر حسيت أبو معن رح

كل هذا عشان أوصل على سوق محمود باشا والسوق المصري، بدي أشتري لجارتي لبس سباحة محتشم يغطي كامل الجسم وبلوزته طويلة وصتني عليه، وللأسف ما لقيت المحل.



طلعنا من السوق المصري وقلنا نروح نتغدى بمطعم حمدي اللي جمبه



المطعم ماكان زحمة بس الخدمة عندهم مش ولابد يعني أقل من جيدة ولاتليق بمطعم سمعته زي مطعم حمدي بالإضافة الى انه الأكل كان عادي جدا جدا وكملوا علينا بالفاتورة



حسابنا طلع 110 ليرة على صحنين كباب وكولا وماي



والأخ قال أعطانا كلمة السر للواي فاي بس ما أشتغل فلما خبرناه قال مهو مو شغال ... طيب يا محترم ليش ماحكيت من الأول

لا أنصح أبدا بالأكل عندهم والله لقمة باذنجان عند مطعم الملك أحسن من كل حمدي




نزلنا من عندهم واحنا مستائين




دخلنا على الكوفي شوب اللي جمبهم مباشرة والحمدلله

قعدنا جوا



طلبنا قهوة



وبعد نص ساعة تقريبا



قامت الدنيا وما قعدت



رياح وعواصف ومطر وكراسي ومظلات تطير وأكواب تتكسر



والناس كلهم دخلوا عنا



وبس هديت الدنيا شوي روحنا على الفندق على طول




شوفوا شو لاقيناهم عاملين لنا اليوم

ارتحنا شوي


وما بعرف شو اللي خلاني أفتح تذكرة السفر وأتأكد من موعد الطيارة



وأتفاجأ أنه احنا سفرنا الخميس بالليل مو الجمعه بالليل

والخربطة صارت لأنه موعد الطيارة الساعة وحدة بالليل وأنزل ركض على الاستقبال لأنه احنا حاجزين أربع ليالي والحمد لله زبطولنا الحجز لثلاث ليال فقط وكلموا بوكينج وزبطوا معهم كمان.


يعني لو ما انتبهت كان راحت الطيارة واضطرينا نحجز تذكرة جديدة




الحمد لله





أحيانا بتمر علينا نعم ما بنحس بقيمتها




والحمد لله هدي الجو ونزلنا على سوق محمود باشا مره ثانية بس هاي المره دخلنا عليه من امينونو والحمد لله يدوب مشينا شوي ولقينا المحل واشتريت لجارتي أحسن من اللي بدهياه كمان.





وهناك قلنا ناخد تاكسي على اورتاكوي




سألنا تاكسي كم تاخد رد علينا بطرف عينه وشكلنا مو عاجبينه ... شكله كان يدور على حد غيرنا



فيفتي ....50 أنا سمعتها فيفتين 15 فقلت لأبومعن خلاص فيفتين اوكي



السواق قالنوووووووووو فيفتي 50



بدون ما أحس رديت علي بالتركي




elli


hayır kardeşim


sadece on beş





الترجمة مع شوية بهارات

خمسين ليرة


لالالالالا ما حزرت يا أخي والله انك نصاب عالمي

همه بس 15 ليره بدك ولا ما بدك

رحنا على واحد ثاني طلب 35 ، قلت لأبو معن يازلمة تعال نطلع بالترام على كاباتاش وهناك ناخد باص والحمد لله هيك عملنا وطلعت رحلتنا ب 8 ليرات فقط


طبعا لو كنا أربع أشخاص كان التاكسي الثاني كويس




وصلنا عند ست الكل




اورتاكوي




وكان الجو بارد كتير



دخلنا صلينا العشاء بالمسجد الرائع بعد التجديد والترميم

وأكلنا بطاطا مشوية وبعدها حلينا عنا مادو




وروحنا بنفس الطريقة




وخلص يلا بدنا ننام




لحظة لحظة قبل ما ننام اتصلت فينا أخت أبو معن الكبيرة اجت على اسطنبول من عمان هي وعمته وزوج عمته وكمان قريبة لهم فدعيناهم لليوم التالي على يوم اسطنبولي ممتع




تصبحوا على خير
​

 

[سندريلا]

الحلقة التاسعة


يوم اسطنبولي عائلي جميل جدا






امبارح قلتلكم انه اخت أبو معن اجت من الاردن بصحبة عمة أبو معن وزوجها وقريبة لهم.


اتفقنا معهم نتلاقى فى ميدان تقسيم ولما أبو معن قابل أخته وعمته صارت ابتسامته من الدان للدان، سبحان الله الانسان بين أهله سعادته بتكون كبيرة كتير.

أخدناهم وطلعنا بالباص على اورتاكوي ولما وصلنا أكيد قعدنا فى مادو ونصحتهم بالبوظة التي أعشقها هناك وبالكنافة وطبعا القهوة.

وهاي طيارة هي وبنتها عم يتمشوا بالسماء – ياريتني معهم

وبعدها تمشينا هناك وتسوقنا من أكشاك الاكسسوارات ولأول مرة بنقابل أردني بيشتغل بأحد المحلات (طبعا عرفنا انه أردني من كشرته

) والله ياخوف قلبي احنا الأردنيين ورثنا كشرتنا من الأتراك من أيام الحكم العثماني وياريتنا ورثنا جهدهم وعملهم الدؤوب. لا حرام ما بدي أظلم الشاب كان كتير تعامله كويس ومؤدب وفى آخر اللقاء ابتسم


أذن الظهر فدخلنا المسجد وصلينا


الصور اهداء خاص لأخي العزيز ابن صاهله وأختي وحبيبة قلبي ندى

كان فى معرض فني للرسامين من عدة دول فى العالم منها فلسطين ومصر من الدول العربية، كانوا كلهم عم يرسموا اورتاكوي وأكتر لوحات عجبوني كانوا لفنانة من ماكادونيا (لما سمعت اسم بلدها تذكرت فيلم The Terminal للممثل المبدع Tom Hanks – فيلم يستحق المشاهدة)

تمشينا وتسوقنا وانبسطنا كتير


على فكره اورتاكوي في الصباح خياااااااال


رجعنا بالباص على تقسيم وأخدناهم على مطعم المدينة فى شارع الاستقلال



اسم عائلة أبو معن على الخبز

من بين المقبلات طلبنا هذه الكبب اللذيذة

واحنا قاعدين سمعنا صرت زلمه سعودي بصيح عليهم ويقولهم جيبوا الشرطة الآن

بسبب سعر الفاتورة الخيالي وصار المدير يقوله خلص ما بدك تدفع لاتدفع فرد عليه الرجل وقاله لا أنا بدي أدفع، بس بدي أدفع السعر الحقيقي ... أنا دكتور مو جاي تتصدق علي . ما عرفنا بعدها شو صار، بس أثارنا جدا استياء الرجل.


اشترينا من عندهم شراب الورد وشراب التوت اللذيذ ولما وصلت الفاتورة فقلت اشيك عليها وللأسف لقينا انهم زايدين في عدد قناني الشراب وبالتالي زيادة في قيمة الفاتورة. نادى عليهم أبو معن وصاروا يعتذروا بس لا أخفيكم احنا حسينا أنها حركة مقصودة جدا ومش بالغلط فأرجوكم انتبهوا على فواتيركم في جميع مطاعم اسطنبول.


بعد ما طلعنا من المطعم دخلنا محل شنط نسائية واشترينا ولما اجت عمتو تدفع صارت تقول انسرقت انسرقت
سحاب الشنطة مفتوح والمحفظة مش موجودة وأغلب الظن أنه السرقة حصلت واحنا فى الباص لانه كان زحمة كتير.
حسبي الله عليهم
طبعا انسم بدنا وانقهرنا بس الحمد لله الله ستر كانت حاطة بس 500 ليرة بالمحفظة وباقي فلوسها كانوا بالخزنة بالفندق.


قلتلها عمتو حبيبتي ما يهمك تعالي أشربك فنجان قهوة يعدل المزاج وفعلا طلعنا من تقسيم على كاباتاش وقعدنا فى Kahve Dunyasi


بعدها أخدناهم على السلطان أحمد وبالفعل هذا ما حصل ومرينا من أمام فندقنا وطلعنا أغراضنا، وكتير حبوا موقع الفندق وحبوا المنطقة وحيويتها وقربها من كل شيء تقريبا.

رحنا بعدها على كوفي شوب درويش Dervis

ومع انه كل سنة بنيجي هون بس ولا مرة عرفت انه هاي الشجرة هي شجرة

كستناء

خالتو قريبة أبو معن هي اللي عرفتها، وطلبت يقطفولها منها وفعلا بس قالوا لاتاكلوا منها لأنه نوع الكستناء هذا مش كويس

تعشينا وتسلينا وتمشينا عند النافورة وانبسطنا كتير معهم



ودعناهم على أمل اللقاء فى عمان

ورجعنا على الفندق مشي طبعا

جهزنا شنطنا وحضرنا حالنا للرحيل بكره

اتصلنا على السائق أبو مصطفى نأكد عليه موعدنا بكره الساعة 10 صباحا عشان ياخدنا على سابنجا ومنها على مطار صبيحة.

أشوفكم بكره فى يوم حافل جدا بالأحداث​

​

 

[سندريلا]

الحلقة العاشرة
والأخيرة



أظني بتتذكروا أبو مصطفى، و اللي مش عارف مين هو



أبو مصطفى
هو ذلك السائق الرائع والمحترم جدا جدا اللي تعاملنا معه السنة الماضية


من أول ما وصلنا تركيا اتصلنا فيه وخبرناه انه بدنا ياخدنا على سابنجا فى اليوم الأخير النا فى اسطنبول فاعتذر لأنه رح يكون مشغول فى هذه الأيام رح يجي مسافر كويتي ورح يكون معه طول الأيام، وصرنا نبحث عن شخص مناسب وللأسف ما حصلنا حد.


كانت فكرتنا انه نعمل شيك آوت بكير ونطلع على سابنجا ومنها نرجع على مطار صبيحة لأنه طيارتنا الساعة وحده بعد نص الليل.


وسبحان الله رجع اتصل فينا وخبرنا انه الرجال الكويتي مش رح يجي (الحمد لله

) واتفقنا معه انه يجينا الساعة 10 صباحا.


أبو مصطفى معه سيارة مرسيدس بتوسع 8 أشخاص وبياخد 150 ليوم كامل داخل اسطنبول و 250 دولار خارج اسطنبول.


ترى أبو مصطفى مش قليل طلع عنده انستغرام وحركات ...


لقيت واتس اب من بنتي فى نيوزلندا بتقولي انه صاحبتها وبنتها اجوا على اسطنبول ورح تتصل فينا. وسبحان الله شوي ولقيت صاحبة بنتي بتحكي معي واتفقنا نتلاقى خلال نص ساعة ولمدة نص ساعة علشان لازم نطلع.


كان لقاء مش قادره أحكيلكم عنه، فجأة لقيت حد من ريحة بنتي عندي


وكمان معها بنتها ديما اللي هي صاحبة حفيدتاتي ليلي ومايا

حضنتهم وكأنهم بنتي وحفيداتي

قعدنا فى مادو لأنه كان نفسها تاكل كنافة وتحدثنا كتير كتير... ما سكتنا ولا ثانية


واجى وقت الوداع

حسيت كأني بودع بنتي هلأ
حسيت كأنه ليلي بين ايدي ومايا عم تحضني
حضنتهم وحضنتهم وحضنتهم
وقلتلهم احضونهم وبوسوهم وقولولهم هدول من تيتا وجدو


احضنوهم وقولولهم اشتقنالهم كتير
ديما قولي لليلي تيتا اشتقاتلك كتير
كتير
كتير



يارب وفقهم لما تحب وترضى يارب نجحهم فى دينهم ودنياهم وعلمهم وعملهم ورجعهم بأعلى الانجازات واجمعنا فيهم عاجلا وليس آجلا يارب
يارب يسر عليهم كل أمورهم يارب ووقفلهم الصحبة الصالحة يا الله


سامحوني بس الشوق غلبني


رجعنا على فندقنا الرائع ونزلنا أغراضنا على مكتب الاستقبال ولقينا أبو مصطفى عم يستنى فينا. اجينا بدنا ندفع بالبطاقة الائتمانية


ما لقيناها لالالالالا


ندور وندور وندور ، فتحنا الشنط ، دورنا بالمحافظ، دورنا بجيوب البلاطين وأبدا ما فى أمل


قلبي كان حيوقف من الخوف


طلعنا وأنا والموظفة الرائعة على الغرفة وطلعت معنا فى المصعد ست أمريكية فقالتي مالك؟ قلتلها مش ملاقية الكردت كارد... ايش تتخيلوا ردت علي...


Just have faith in ALLAH and you will find it, don’t worry
خلي عندك ايمان بالله ورح تلاقيه ما تقلقي


أنا طبعا عيوني طلعت لبرا أولا انه وحده شكلها لايوحي بأنها مسلمة بتحكيلي هيك جملة وثانيا لأنها استخدمت لفظ الجلالة ALLAH مش كلمة God وبنفس الثانية حسيت ربنا عم يبعتلي رسالة وبقولي أنا معك ما يهمك. لقيت نفسي ببتسم وبقولها الحمد لله أنا يقيني بالله يقيني may faith in ALLAH will protect me


دخلنا الغرفة وصرنا ندور فى كل مكان وأبدا ما لقينا الكرت
كل هذا وأبو معن هادىء ويحاول يهديني ويقول اصبري أكيد بنلاقي حل


طبعا أنا كنت ميته خوف لأنه احنا ما استخدمنا الكرت الا للفنادق والطيران وقبل بيوم فى مطعم المدينة ووقتها أبو معن قالي خليه معك فرحت أنا الشاطرة حطيته بجيبة البنطلون لأنه أصلا ما كنت حامله شنطة علشان الحرامية ما يفكروا يقربوا علينا. وشكله لما اشترينا من محل الشنط أنا حطيت الكرت بشنطتي الجديدة والله أعلم انه وقع مني أو حد سرقه.


المشكلة انوا احنا خايفين حد استخدم الكرت وخايفين لانه ما معنا فلوس كفاية ندفع للفندق كامل القيمة.


صارت الموظفة تخفف علي وتقولي ما تخافي احنا بنحل المشكلة. وأول شىء عملته اتصلت على بنكنا اللي مصدر البطاقة فى الامارات وخلتنا نحكي معهم والحمد لله وقفوا الكرت والحمد لله ما حدا استخدمه.


طيب كيف بدنا ندفع للفندق

فقام أبو مصطفى وقال أنا بدفع عنكم وانتوا ابعتولي مو مشكلة
فعلا ان خليت بليت، هذا أبو مصطفى مثال للمسلم التركي الحقيقي


والحمد لله احنا دائما بنخلي معانا فلوس فى خزنة الفندق لانستخدمها الا للطوارىء و للضرورة القصوى يعني ما بتكون من ضمن ميزانية الرحلة.

أبو معن شكر أبو مصطفى وقاله مومشكله أنا معاي دراهم اماراتي خلينا نروح نصرفهم وفعلا صرفهم أبو معن ورجع دفع للفندق والحمد لله.

ودعناهم وشكرناهم شكر جزيل جدا جدا على استضافتهم الرائعة وعلى حسن تعاملهم الانساني والمهني، بصراحة ما توقعت أبدا انهم يتصلوا على الامارات عشان يسهلوا امورنا.

بتعرفوا رح أحكيلكم سر طول ما احنا فى الشمال وكنا نقدم ما نستطيع تقديمه لمن يستحق باذن الله فكان الجزاء من رب العباد أنه أنقذنا من السرقة ومن المواقف الصعبة الحمد لله

الحمد لله انه ربنا معنا فى كل وقت وفى كل زمان و فى كل مكان

​