مدينة نين بين في فيتنام

[سامح]

النهاردة انا عايز احكيلكم عن تجربتي في مدينة مفضلة ليا في فيتنام (نين بين)!
قبل اي حاجة احب اشكر سفارة اسبانيا اللي رفضت الفيزا اللي قدمت عليها لانها مش بس غيرت خططي واتجهت لفيتنام بدل ما اروح اسبانيا والبرتغال، لا كمان غيرت عقليتي بالنسبة للسفر..
سفري لفيتنام ولاول مرة لقارة اسيا فتح عيني علي حقيقة مهمة ان اوروبا جميلة وكل حاجة بس في اماكن تانية في العالم اجمل بكتير وفي تنوع وثقافات مختلفة لازم تشوفها خارج اوروبا
لو كانت اوروبا جميلة فبالنسبالي اسيا مبهرة فعلا بطبيعتها اللي صعب تبقي موجودة في اي قارة تانية والثقافات والديانات والعادات والتقاليد المختلفة اللي هتقدر تشوفها هناك وطبعا قبل كل دة (الاكل)

قبل سفريل فيتنام كان في 6 مدن مخطط ازورهم خلال 10 ايام ولقيت ان عشان مضيعش وقت ان اكتر الطرق اختصارا للوقت اني اسافر طيران من جنوب فيتنام لشمالها وبعد كدة لوسط فيتنام وارجع تاني للجنوب ومنها علي مصر ( الطيران الداخلي رخيص في فيتنام )
بعد ما حددت اليوم اللي عايز ازور فيه المدينة الجميلة دي، سالت اصحابي الفيتناميين ايه ارخص طريقة ازور بيها المدينة دي؟ ازورها لوحدي ولا شركة سياحة تعملي one day trip
وقالولي الافضل تروح تبع شركة سياحة عشان ال activities اللي ممكن تعملها هناك
المهم شقت شركة سياحة في وسط العاصمة هانوي والرحلة كلفتني اليوم دة 200 جنيه شاملين الغدا

الاكل الفيتنامي جميل بجد!
وكالعادة لما بسافر بنام اقل عدد ساعات ممكنة 4 او 5 ساعات بالكتير
صحيت 7 الصبح وجهزت الكاميرا والشنطة واستنيت الاتوبيس يعدي عليا قدام الهوستيل و8 بالدقيقة الاتوبيس وصل وبدأنا رحلة ال3 ساعات ونص من العاصمة هانوي ل نين بين
واحنا في الطريق خصوصا كل ما نقرب من نين بين الجبال بتزداد الخضرة عليها والبيوت الريفية البسيطة متحاوطة باللون الاخضر واللي حسسني بالامان في فيتنام وانا راجع للعاصمة اكتر من مرة كنت بشوف اغلب البيوت الريفية بليل فاتحين باب البيت وتلاقيهم بيتفرجوا علي التلفزيون وقاعدين ممددين جوة البيت عادي جدا

المهم وصلنا للمدينة الجميلة اللي كلها عبارة عن جبال خضراء ونهر وشوية بيوت منتشرة علي ضفتين النهر...
اول ما وصلنا خدنا جولة في المدينة لمدة ساعة ومش قادر اوصفلكم السلام الداخلي اللي حسيته جوة المدينة دي! وبعدها خدنا قارب لمدة ساعتين ولفينا حوالين اغلب المدينة بالقارب
بعدها 3 ساعات عجل لفينا فيهم المدينة كلها!
كانت اجمل تجربة ركوب عجل عملتها في حياتي تقريبا

اللي عجبني جدا في فيتنام انها دولة فقيرة بس جميلة جدا، طبيعة جميلة وبيوت اغلبها ملون بالوان مبهجة وزرع في اغلب البلكونات واهلها في ابتسامة دايما علي وشهم واكلهم خصوصا ال Noodles رهيبة بجد

اكتر حاجة عجبتني في فيتنام انك ممكن تلفها كلها بالموتوسيكل لو بتعرف تركب موتسيكلات
كانت اول مرة في حياتي اركب موتسيكل واسافر بيه من مدينة لمدينة! وكانت تجربة ممتعة جدا والاجمل انك هتلاقي حواليك كل الجنسيات اسيويين ولاتنيين وامريكان واوروبيين قابلتهم اثناء رحلتي لفيتنام
ورجعت بعدها مصر بعدها عندي اقتناع ان البساطة هي قمة الجمال!
تحديث:
بالنسبة للطيران انا سافرت علي طيران الاتحاد والتذكرة كانت من 29 ابريل ل 8 مايو ب 4100 جنيه
والفيزا انا قدمت عليها في السفارة وكانت محتاجة جواب من الشغل وطيران مبدئي وصورة وكشف حساب بنكي وتمنها 700 جنيه
وممكن تطلع الفيزا اونلاين من هنا: http://www.vietnam-visa.com/