صباح الخير انا عضو جديد معاكم في الجروب...

[Selvia Saeed]

صباح الخير
انا عضو جديد معاكم في الجروب وبصراحة استفدت جدا من حاجات كتير وكنت محتاجه رأي اهل الخبرة فى السفرية اللي برتب لها.
انا انشاللله برتب اروح باريس شهر 6 /2018 وفى الغالب هكون لوحدى عايزة اقعد 4 ليالي وبعدين اروح ليلتين فى هولندا او بروكسيل لسه مقررتش اسئلتى بقى
- ممكن تفيدوني هولندا افضل ام بروكسيل من حيث الاسعار و الفنادق و السياحة والمسافة من باريس وسهولة المواصلات
- ايه افضل وارخص طريقة اتنقل بيها من باريس الي هولندا او بروكسيل وامتي وازاى اقدر احجز الوسيلة ديه يعنى من هنا اونلاين او من هناك افضل
- التحرك من والي المطار ايه افضل وارخص تاكسي عادى والا الفندق يبعت لي وسيلة والا فى حاجه تانية
انا بدور علي وسائل رخيصة لاني مسافرة لوحدى وده طبعا هيكلفنى قوى فى الفنادق واول مرة اروح دولة اوروبية فمخبيش عليكم خايفة شوية انى اتلخبط فى التحرك ولما دخلت الجروب فرحت قوى ان فى ناس ممكن تسندني
شكرا جزيلا ويوم سعيد

 

[Alfaro Mario]

هولندا اجمل. بالنسبه للمواصلات عموما ابعدي عن التاكسيات المترو موجود في معظم مطارات العالم دلوقتي اختاري فنادق في اماكن قريبه من المزارات السياحيه والمواصلات العامه بالنسبه للتنقل بين فرنسا وامستردام سعات كتير الطيران الداخلي بيبقي ارخص من القطار

 

[Medhat Zaid]

انا طلعت رحلة زي دي بس قبل التعويم الصراحه حقولك شوية حاجات كده حتنفعك و تريحك اول حاجه و اهم حاجه يكون معاكي كريديت كارد عشان حينفعك اوي في المواصلات و المشتروات و تكوني عارفه الLIMIT بتاعه اد ايه و تخلي البنك يفتحهولك دولي طول فتره السفر و تاكدي عليهم مره و اتنين و لو معاكي اتنين فيزا او اكتر يبقي كده تطمني و زي الفل تاني حاجه لو حتطلعي مع شركة سياحه متكسفيش فاصلي معاهم في الأسعار لحد ما تجيبي اخرهم تالت حاجه تحاولي تعملي جدول للمزارات بتاعتك اللي حتعمليها في كل بلد و اهم حاجه تحجزيها من علي النت يعني علي سبيل المثال تروحي باريس اول حاجه تعمليها تحجزي HOPE on HOPE OFF ده باص بيلف بيكي معالم باريس كلها و طبعا معروفه احلي شركه فيهم big bus و تلاحظي ان الحجز ممكن يكون يوم او اتنين و ممكن تلاقي اليومين عليهم عرض طب و تحجزي منين عندك كذا موقع مضمونين زي getyourguide , 360 ticket , viator ,و غيرهم تقارني بين الأسعار و تختاري الأرخص طبعا عشان العروض بتختلف و انتي المستفيده و بردوا لو رحتي ال gravin ( متحف الشمع ) , و ده ضروري يكون في البرنامج بردوا تحجزيه من النت بيوفرلك طوابير و دوخه في التيكيت لأن معظمها بيكون skip the line نصيحه لو ملكيش في الفنون مالهوش لازمه متحف اللوفر انا رحته بس عادي بالنسبه لي ماليش في الرسم و لا اللوحات لو حنحجزي ديزني بردوا من النت و لو يومين افضل حتنبسطي هناك جدا طبعا الشانزليزيه و برج ايفل و قوس النصر و ميدان الكونكورد كل ده حتشوفيه من الباص و عادي جدا انك تنزلي تتمشي و تتصوري و تاخدي الباص تاني بس بردوا لما تحجزي من النت تبصي علي ال voucher كويس عشان بعض الأماكن بتطلب نسخه مطبوعه و بعضهم بيكتفي باللي علي الموبايل و اماكن تانيه بتروحي توريله الفوتشر و هو بيديكي التذاكر نسيت اقولك في بيبقي عرض الباص مع جوله في نهر السين لو العرض كويس تمام لو غالي حتلاقيه في هولندا ارخص بالنسبه للفنادق مش حفيدك كتير انا رحت فمدق جميل و تحفه بس ربنا فتح عليه دلوقتي و بقي غالي اوي اسمه timhotel montmarte الميزه فيه حاجتين مهمين جدا انه جمب كنيسه القلب المقدس sacre coeur ,و الشارع بتعاها فيه موسيقي و اكل و منظر باريس من فوق روعه نيجي للنقطه اللي بعد كده و اهم النقط علي الأطلاق و هي لما تحجزي فندق يكون قريب من الموصلات الفندق اللي كنت فيهكان جمبه خطين مترو 2 و 12 و ده سهلي كتير عشان المترو هي وسيلة المواصلات الأساسيه متفكريش في تاكسيات خالص حتدفعي كتير اوي حتي ديزني ليها مترو السفر من باريس لأمستردام طيران احلي و ارخص انا سافرت علي KLM في هولندا انا نزلت في غندق نضيف و معقول اوي اسمه OMEGA HOTEL انا ملفتش كتير الوقت كان ضيق بين CENTRAL STATION و DAM SQUARE و طبعا نذكر بالخير الجبنه اولد امستردام هناك اكل و شرب و شوبنج زي الفل و شوية اسواق و و تاني يوم كنت حاجز رجلة يوم من هولندا لبروج في بلجيكا هي زي قريه بس حوار تاني خالص غير القري اللي احنا نعرفها اهم حاجه تضوري علي عروض الشيكولاته و حوارها جامد معظم فنادق اوروبا مفيهاش تلاجات في الغرف و لو لقيتي يبقي حظك انا طولت اوي معلشي لو حضرتك اي استفسار اهلا و سهلا بيكي

 

[Medhat Zaid]

تحت امرك حضرتك و رحلة سعيده باذن الله حاجه اخيره لو خليتي الرحله نص سبعه يكون افضل عشان الSALE بيكون احلي

 

[Medhat Zaid]

دي خريطه BIG BUS PARIS

 

[Ali Baba]

بروكسل ارخص و اقرب و اسهل بس امستردام امتع كسياحة.لو سفاريتك لسه بدري او كده عليها في حاجات كتير تتعمل توفر فلوس كتير في الطياران و الاقامة و التحركات.