حد جرب يطلع التصريح الأمني لتركيا وهو عامل...

  • بادئ الموضوع بادئ الموضوع Omnia Ahmed Abdallah
  • تاريخ البدء تاريخ البدء
O

Omnia Ahmed Abdallah

:: مسافر ::
حد جرب يطلع التصريح الأمني لتركيا وهو عامل فيزا اونلاين؟
 
فىً مصر التصريح الأمنى مشً بيطلع الا ب فيزا ع الجواز..سافرى من برا مصر احسن
 
مفيش مشكله روحي المجمع التحرير اهم حاجه المهنه في الباسبور متكونيش حاصل علي
 
فيزا اون لاين يعني معاكي شنجن او امريكا ؟؟
لو كده بتاخدي التصريح الأمني عليها عادي
 
مفيش تاشيره اون لين .... أقل من 18 و اكتر من 45 غير كده لازم السفاره
 
انا كنت مطلعه فيزا اونلاين عشان معايا فيزا أمريكا و رحت المجمع و طلعولي التصريح الأمني. بس اهم حاجه يبقى مكتوب مهنه في الباسبور ماتكنش طالب أو حاصل علي
 
هي الفيزا ممكن تطلع اونلاين او عند الوصول لو مسافر من برا مصر.؟.؟
 
حضرتك موضوع التصريح الامنى
فعلا لو معاكى امريكا أو شنجن
على البصبور مفيش مشكله
ولو لقدر الله معرفتيش لو مفيش مهنه او اى سبب تقدرى تطلعى ترانزيت على اى دوله بالنسبالك دبى او لبنان وتدخلى تركيا عادى جدا موضوع التصريح الامنى ده يخص الجوازات فى مصر بس ملوش اى علاقه بدخولك تركيا
عن تجربه .ولو حضرتك بتيجى تركيا كتير اعملى اقامه
 
هو يعني اَي تصريح أمني. ومين بيطلبه. مصر ولا الدوله المضيفة. وليه لم اسمع عنه طيله حياتي إلا من سنتين. لم اسمع ان اَي عربي عدا المصري مطلوب منه شهاده تحركات وتصريح أمني. وهل وزاره الداخليه اللي بتعمله. وهل مجرد دفع فلوس ولا احنا بقينا شبه ولازم نثبت اننا مواطنين آمنين بهذا التصريح. وهل التصريح الأمني هو شهاده التحركات. شكرًا جزيلا
 
بيطلع ع الفيزا الاونلاين عادي المهم مزاج اللي بياخد منك الورق
 
القول الفصل في التصريح الأمني
لو عاوز تعرف أنت مطلوب منك تصريح أمني و لا لأ قبل السفر , لازم تقرا الموضوع للأخر
أولا : ايه هو التصريح الأمني ؟ ده تصريح بالسفر مطلوب منك سواء كنت ولد أو بنت سنك من 18 الى 40 سنه و حتسافر من مصر ( فقط ) لبعض الدول و بيتم استخراجه من مجمع التحرير
ثانيا: هل فيه فرق بين التصريح الأمني و تصريح السفر من الجيش ؟ أه طبعا تصريح السفر من الجيش ده خاص بالشباب فقط اللي مكتوب في جواز سفرهم انه مطلوب للتجنيد أو خلص جيش و مازال في فترة الأحتياط
ثالثا : هل مطلوب مني تصريح امني للسفر ؟ كوباية شاي و كحكتين و ركز في الكلمتين اللي جايين فيهم الخلاصه
حنقسم دول العالم لقسمين القسم الأول: دول بدون تصريح أمني زي أوروبا كلها و امريكا و كندا و أستراليا و هونج كونج و الصين و سنغافورة و امريكا الجنوبية و المالديف و الهند و سيريلانكا و نيبال و فيتنام و غيرها
القسم الثاني: دول تحتاج تصريح أمني و حنقسمهم نوعين :
النوع الأول ( الدول الصريحة ) تركيا و جورجيا : لو مسافر تركيا أو جورجيا فمطلوب منك تصريح أمني للسفر حتى لو كنت وزير بس حتقابلك حالتين :
الحالة الأولى : لو مكتوب في باسبورك مهنه محددة ( تقدر تطلع فيزا سياحة ) و بيها تقدر تاخد تصريح أمني بسهولة
الحالة الثانية : لو مكتوبلك طالب أو حاصل على مؤهل عالي فلازم الفيزا بتاعتك تكون فيزا زيارة ( عن طريق دعوة من البلد المسافر اليها ) أو فيزا مرافق ( يعني تكون زوجه أو ابنه مثلا مسافرة مع زوجها أو والدها المكتوبله مهنه في باسبوره) علشان تقدر تاخد التصريح الأمني و لو قدمت بفيزا سياحه للأسف مش حتاخد تصريح أمني
دي حالات تركيا و جورجيا فقط و اتمنى تكون واضحه للجميع , الكلام اللي جاي مالوش اي علاقة بتركيا و جورجيا
..........................................................................
النوع التاني باقي دول العالم و بسميها (الدول المايعه) و أهمهم : لبنان و الأردن و تايلاند و ماليزيا و أندونيسيا و دي بردو حتقابلك حالتين :
الحالة الأولى : ان يكون مكتوبلك مهنه محدده أو مكتوبلك حاصل على مؤهل عالي في الحاله دي مش بيكون مطلوب منك تصريح أمني بنسبة 99% و تقدر تسافر عادي جدا و لكن يفضل لو مكتوب عندك انك حاصل على مؤهل عالي أنك تاخد معاك ما يثبت انك بتشتغل زي شهادة لمن يهمه الأمر ( اتش ار ليتر )
الحالة الثانية : أن يكون مكتوبلك طالب أو حاصل على مؤهل متوسط أو مهنة فنية مثل ( نجار أو طباخ أو سواق أو عامل أو فني أو نقاش ) في الحالة دي بتحتاج تصريح أمني للسفر بنسبة 99% , و علشان تاخد التصريح الأمني لازم يكون معاك فيزا زيارة ( عن طريق دعوة من البلد المسافر إليها و دي للأسف مش بتطلع الا في حالة أنك رايح تدرس أو تشتغل و معاك ما يثبت ذلك و بيتم توثيقه من السفاره نفسها و تاخد بيه فيزا زيارة للدوله ) بعدها تقدر تاخد تصريح أمني
حالة خاصة ( بالدول المايعه فقط ) : لو بنت و متزوجه و مسافره شهر عسل مع زوجها و مكتوبلها طالبة فتقدر تسافر بدون تصريح أمني و لكن لازم يكون معاكم عقد زواج أو ما يثبت أنكم متزوجين فعلا و مسافرين شهر عسل , أو بنت و مسافرة مع اهلها سياحة و مكتوبلها طالبة في الحالة دي بردو مش بيكون ضروري الحصول على تصريح أمني
........................................................................
الخلاصة : التصريح الأمني ده من وجهة نظري المتواضعه تم وضعه للتحكم في سفر بعض الفئات و منع سفرهم لو اقتضى الأمر ( و كله بالقانون ) و الأمر بشكل كبير متروك لرؤية و وجهة نظر ظابط الجوازات علشان كده قلت ان فيه ( دول مايعه النسبة فيها 99% ) , و للأسف ليومنا هذا لو سألت بنفسك 5 أشخاص مسؤولين مختلفين ما بين مجمع التحرير و ظباط جوازات في مطارات مصر المختلفه كل واحد حيقولك كلام مختلف تماما عن الأخر لأن التصريح الأمني مالوش قانون ثابت للأسف , لكن الكلام المذكور في البوست ده ينطبق على 99% من الحالات اللي بتسافر بالفعل و بعد ألف تجربة حقيقية
أتمنى أن يكون الموضوع ده وضح استفسارات كتير و مفاهيم مغلوطة و الناس مش لاقيه ليها اجابات محددة و كل سنة و أنتم طيبين
[HASHTAG]#travelsecrets[/HASHTAG] #التصريح_الأمني
 
أعلى