صباح الفل من فينيسيا "مدينة البندقيه" من...

[Moheb Radwan]

صباح الفل من فينيسيا "مدينة البندقيه" من مواقع التراث العالمي اغلب مبانيها تعود الى عصر النهضه و عمرها ك مدينه حضريه تقريبا 1600 سنه و هي عباره عن 118 جزيره يتخللها حوالي 158 قناه مائيه يربطهم 400 جسر.
بعيدا عن الصور اللي الكل يعرفها عن فينيسيا زي الجسور و الجندول و البيوت المطله على القنوات المائية،
النهارده هنتفرج على تفصيله صغيره عن حياتهم اليوميه و هي ثقافة نشر الغسيل بين البيوت عن طريق حبل يتم جذبه من طرف و نشر الملابس على الطرف الاخر و ده موجود في منطقة كانناريجو Cannaregio و بالتحديد الجيتو اليهودي في فينيسيا او ال Ghetto Ebraico و ده المكان اللي تم إجبار اليهود في العام 1516 على الاقامه فيه و ليس غيره و بالمناسبه ده يعتبر اسوأ مكان في المدينه كلها و لما بيحصل المد المكان ده اول منطقه بتغرق في المدينه.

 

[Adm Harris]

زي عندنا بالظبط اصول نشر الغسيل القصير قدام والطويل ورا

 

[Wael Elmasry]

اكيد يهود مصريين

 

[Wael Elmasry]

بس يعني ايه الجيتو

 

[Shireen Abdul Azeem]

طب ما يعملوا منشر زى بتاعنا

 

[Wafaa Abdelrazeq]

السؤال بس يلح عليا
ليه التنشير بين العمارتين ..ليه مش في حبل البلكونه زي عندنا مثلا

 

[Moheb Radwan]

علشان مفيش بلكونات في بعض البيوت او بلكونات صغيره. و كده برضه المساحه المتاحه اكبر بكتير و هوا بقى

 

[Hany Abu Elyazeed]

هو مين اللى بيطلع ينشر الغسيل كدا ازاى يعنى

 

[Moheb Radwan]

شد الحبل على البكر . تشد ناحيه و تنشر على ناحيه

 

[Mahmoud Ahmed Elalfy]

يعني انت سبت الحضارة و ال 1600 سنه نهضه و كل التفاصيل الحياتيه و جايبلنا نشر الغسيل
روح يا شيخ و تعالي بسرعه ^_^

 

[Moheb Radwan]

الحضاره و النهضه الكل شافها قبل كده يا ريس.

 

[Khaled Noor]

سيبنا مع السيسى يا شكس

 

[Abeer Mohamed Haggag]

انا عندى سؤال بس .. ليه كل الصور من خلال الغسيل وتقريبا هو البطل فيها؟؟؟ .. رؤية مختلفة لڤينيسيا بصراحة اول مرة اقابلها

 

[Moheb Radwan]

هو فعلا البطل .. هو موضوع البوست :]

 

[Aya Mohamed]

بصراحة انا روحت فينسيا بس شكل محدش كان غاسل ساعة ما روحت ما كانش فيه حبال كده خالص