أحكيكم قصة واحد من الشباب... طلع لدولة اوروبية محترمة درس فيها الماجستير واتخرج على الوقت بمعدل ممتاز، ونصحه الكثير بانه يكمل الدكتوراه، رفض الفكرة رغبة في عودته لبناء بلده، وهنا كانت بداية القصة، وبداية الصدمة، جا حبيبنا مسكين واكتشف انه الواقع مررر، جلس شهور وشهور يقدم عن طريق الانترنت وعن طريق زيارة الشركات والخدمة المدنية، كل ما يدخل شركة تقوله مافي وظايف ويخرج منها زي ما دخل من غير اي فائدة، راح الخدمة المدنية يقولو تخصصك غير مرغوب فيه بحجة انت مهندس ودراستك ادارة مشاريع فين نحطك وعلى اي مرتبة؟ الخدمة المدنية قالتله نوظفك فقط في حالة تنازلك عن الماجستير وتقدم بالبكالوريوس وبراتب ومرتبة بكالوريوس.. طبعا رفض يضيع سنين عمره على الفاضي وراح الجامعة قال خلاص اصير اكاديمي، طبعا مافي مكان لانه الظلمة اهل الواسطات اخدو مكان المؤهلين... طبعا الشاب المؤهل هذا صاحبنا فقد الامل وراح يقدم في جدارة لعل وعسى، قالوله من شروط التسجيل انك تقدم في حافز اول، هوا كان رافض في البداية فكرة حافز لانه كرامته وعزة نفسه ما تسمح بعد دا كله يتشحت كم الف منهم وهوا مؤهل ودارس ومتعلم وباقوى الشهادات، ولكن اضطر انه يسجل عشان لعل وعسى جدارة يساعدوه ياكل لقمة عيشه. سجل حبيبنا في جدارة وحافز، حافز رفضت تعطيه المبلغ الشهري بحجة انك كنت خارج المملكة قبل كم شهر، جدارة واجهته من اول يوم بواقع البلد (حتواجهك مشكلة.. حتوظفك الشركات والحكومة بالكالوريوس فقط) !!! لا حول ولا قوة الا بالله وحسبنا الله ونعم الوكيل... قال طيب مو مشكلة، وظفوني، طبعا حقون جدارة مو داريين عن الدنيا الله لا يباركلهم، يدوب موظف جدارة يروح يضرب حنك مع الشباب وخلص دوامه ورجع بيته وطز في العطالى... طبعا ما ساعدو صاحبنا.. وتمر السنين وصاحبنا وغيره الكثير من الشباب حاملي الشهادات جالسين في بيوتهم لا شغلة ولا مشغلة... والله الرزاق الكريم وحسبنا الله ونعم الوكيل على كل من كان السبب
