إزاى أسافر إيطاليا وإيه هى الطرق الممكنة القانونية والغير قانونية للسفر والتكلفة فى الموضوع دا هنوضح كل دا بالتفصيل
- طُرق السفر لإيطاليا "إزاى أسافر إيطاليا"
- الطريقة الأولى وهى الطريقة الأخطر
عن طريق مراكب الموت و نسبة المخاطرة فيها كبيرة جدا وناس كتير بتموت وهى أصلا شغل مافيا يعنى كلها قرف
أسعارها حسب ما سمعنا من30 ل50 الف جنيه
لو وصلت بالسلامة فى إمكانية إنهم يرحلوك على طول وفى إمكانية إنهم يدخلوك فى حجز تبع الصليب الأحمر وهيكون مطالب منك إنك تهرب وتدخل البلد بمجهودك بعد كده
ونحن شخصيا كإدارة الموقع لا ننصح إطلاقا بخوض هذه المغامرة لصعوبتها.
- الطريقة التانية
عن طريق فيزا سياحية من القنصلية الإيطالية فى مصر و هى أرخص الطرق لكن من الصعب الحصول على فيزا ومطلوب منك ضمانات كتير ومتعددة كحساب بنكى وعمل ثابت للتأكد إنك هترجع مصر وفى حالة كسر الفيزا سيكون وضعك سئ فى البلد للأسف الشديد
وللتفاصيل الكاملة تابع موضوعنا المشروح عن الفيزا السياحية لإيطاليا بالتفصيل الممل
/بالتفصيل فيزة السياحة لإيطاليا فى سؤال و جواب
ملحوظة هامة جداً
الطريقتين الأولى والثانية حضرتك لو دخلت ايطاليا هتكون من غير إقامة ومشاكل المعيشة من غير إقامة كتير أهمها
*قوانين العمل فى إيطاليا بتمنع عمل الشخص الذى لا يمتلك إقامة وبتفرض غرامة على الشخص اللى يشغل واحد من غير إقامة من 10 ل50 ألف يورو وسجن من شهر لسنة
فعلشان كده لو إنت معندكش صنعة مطلوبة وحد يغامر ويشغلك هتكون صعب جداً خصوصا الأيام دى إنك تلاقى شغل وطبعا الأرزاق بيد الله .
*سهل جدا أى حد ياكل عليك حقك وملكش تطالب بيه.
*لو حصلك حاجة فى الشغل مش هتاخد أى تعويض عن أى ضرر يحصلك
*فى إمكانيه لكنها بسيطه إنك تتمسك وتترحل لأن كل سنة بينزل ميزانية ترحيل وفى وقت الميزانية دى اللى بيمسكوه بيرحلوه مش كتير لكن بتحصل
*لو أى ظابط وقفك وعمل عليك كنترول ولقاك من غير ورق هياخدك يبيتك ليله فى القسم ويفيشك
وإنت و حظك يا تخرج يا تترحل .
-----------------------------------------------------------------------------------
- الطريقة الثالتة
وهى من أكتر الطرق أمان لكنها الأكثر تكلفة وبتاخد وقت كبير وهى عن طريق قوانين الدعاوى أو الخدم
صاحب الشركه فقط هو اللى من حقه يقدملك فى القانون لو فتح وبيتفق معاك على فلوس والفلوس دى بيكون فيها مقدم حوالى من 3 ل 5 آلاف جنيه مصرى ...المقدم ده سواء جالك الرد أو مجاش بيضيع عليك
....بعد التقديم بتستنى من سنه لتلاتة أو أقل حسب حظك على ما يجيلك الرد ...يوم ما يجيلك الرد بتدفع الفلوس كاملة للى عاملك العقد
**الأسعار
حسب اخر اسعار للقوانيين اللى فاتت كانت الاسعار من 70 ل 100 الف جنيه مصرى غير المقدم غير من 5 ل 10 آلاف جنيه مصرى تانى بتخلص بيهم ورقك فى مصرفى القنصلية وتجيب بيهم التذكرة
صاحب الشغل اللى بيجيبلك الورق يوم مايجيلك الرد ملوش دعوه بيك لا بيشوفلك شغل ولا سكن
لو جالك الرد فاكيد مافيش مشاكل وهتيجى إلا إذا كان عندك مشكله أمنية أو مع الجيش وفى الحالة دى هتضيع عليك الفلوس صاحب الشغل ملوش دعوة لكن لو معندكش مشاكل فأكيد مافيش مشاكل وهتيجى بأمر الله وتستلم اقامه بسنتين وبتتجدد وبعد خمس سنين تحولها لإقامة مفتوحة وربنا يرزقك .
-----------------------------------------------------------------------------------
- الطريقة الرابعة والأكثر بساطة وقانونية
وهى طريقة الضم العائلى يعنى تقدر تسافر لو موجود قريب ليك من الدرجة الأولى فى إيطاليا زى مثلا والدك والدتك زوج يعمل لزوجته والعكس إلخ ..
يقوم الطرف الموجود ليك فى إيطاليا بطلب التقديم ع ضم عائلى وبعد اتمام الإجراءات تقوم بالسفر.
ودا مثال للضم العائلى للزوجة بالتفصيل الممل تابع موضوعنا ع الرابط التالى
/الضم العائلى وخطواته “شرح مفصل”
----------------------------------------------------------------------------------- - الطريقة الخامسة
فيزة الدراسة
وهى فيزة يتم طلبها لغرض الدراسة ولتفاصيل أكثر عن الموضوع دا
إتفضلوا إقرءوا موضوعنا الكامل والمفصل عن الدراسة فى إيطاليا والحصول على الفيزة ومعادلة شهادتك بإيطاليا
/تقرير شامل عن التعليم بإيطاليا وكيفية الحصول ع فيزا الدراسة والمعادلة للأجانب
- الطريقة السادسة
الفيزة العلاجية
ويتم طلبها فى حالة الرغبة فى العلاج بإيطاليا وللإطلاع على تفاصيل أكثر راجع موضوعنا عن الفيزة العلاجية وكيفية الحصول عليها على الرابط التالى
/ما هى الفيزة العلاجية وشروط الحصول عليها
-----------------------------------------------------------------------------------
أخيراً وبالنسبة للشباب
*متصدقش كل اللى يقولك تعالى وملكش دعوة ولا كل اللى يقولك أنا قدمتلك فى القانون لأن فى الغالب بيكون بس كلام .. لازم تكون واثق مليون % من الشخص اللى بيقدملك على عقد
أو بيساعدك فى إجراءات السفر.
وبعد كل اللى قلناه ده ياريت اللى يلاقى أى فرصة سفر يسافر بس ياريت تكون طريقة قانونية علشان لو على الأقل ملقتش شغل تقدر تحاول فى مكان تانى فى بلد تانية أو تنزل شهرين تلاته مصر لحد ما الحال يبقى كويس
---------------------------------------------------------------------------
وللتعرف أكثر على العمل والمعيشة فى إيطاليا تابع موضوعنا التالى
/بالتفصيل العمل و المعيشة فى إيطاليا