رحلتي الي انجلترا واسكتلندا بدايه ده تقرير...

[Ahmed Rabea]

رحلتي الي انجلترا واسكتلندا
بدايه ده تقرير مبسط يمكن يفيد حد لرحلتي الي انجلترا واسكتلندا.... الرحله كانت عشر ايام هاحطلكم الجزء اللي ممك يفيد حد الخاص بالسياحه.. والي كان متوزع مابين لندن واماكن اخري بانجلترا واسكتلندا.....
بدايه انا مطلعتش من مصر فعذرا مش هعرف افيدكم بخصوص عمل الفيزا من مصر.... الناس علي الجروب موفيه حقه...
بالنسبه للرحله كانت علي خطوط KLM️ وطبعا من افضل خطوط الطيران اللي ركبتها وكتبت ده في بوست مفصل... .خاصه مع رحله طيران فوق الاربعه عشر ساعه واتنين ترانزيت..
طبعا قبل السفر اهم شيء تجهيز المعلومات والبحث كويس خاصه في مواقع حجز الطيران وعدم الاكتفاء بسَكاي سكانرskyscanner.... بصوا علي مواقع الطيران نفسها وبصوا علي cheapoir وغيره... هتلاقوا طيران مختلف واسعار كتير خاصه لو مسافر في موسم او اعياد او كده.... برده لازم تخلوا بالكم من ان جوه المدينه الواحده اكتر من مطار ولازم تشوف الانسب ليك ومثلا في لندن في اكتر من مطار....عامه خلوا بالكم من النقطه دي…انا اخترت انزل في مطار هيثرو بس لو اخترت تنزل في اي مطار تاني كل المواصلات متاحه من كل المطارات الي وسط لندن بكل سهوله:

وصلت مطار هيثرو... طبعا مطار ممتاز مش هتحتاج تسال اي حد علي اي حاجه.. كله هتلاقيه قدامك تختم وتعمل سيكورتي تشيك ان وزي الفل...ناس محترمه للغايه والإجراءات مخدتش وقت انما السيكورتي طبعا طوابير شويه..انما مش هتحس بزهق والدنيا منظمه بطريقه غريبه والناس بتقدم كل ما عندها لتسهيل الإجراءات…️

بتخلص إجراءاتك وكده مرحبا بيك في UK.. تاخد ختم الدخول... تنزل بالسلالم تلاقي Underground او القطر express. طبعا قبل ما اختار اللي تحبه مبدئياالمسافه من مطار هيثرو الي وسط لندن تقريبا 50 دقيقه بالاندرجراوند لو عاوز اقل ومستعجل وتدفع ازيد شويه يبقي تاخد القطر .
قبل ما تسيب المطار علي حسب مزاجك عاوز تجيب الاويستر كارد..... او لا....براحتك ده كارت بيخليك تستخدم المواصلات العامه زي الاندرجراوند والباصات وبعض القطارات مش كلها تطلع تنزل اي وقت بيه من غير اي حاجه.. .. ويطول شرحه لو حد حاب يسال علي حاجه فيه انا موجود انما هو مفيد جدا وموفر لو هتقعد مثلا اسبوع بلندن.. انما لو يوم او اتنين او تلاته تجيب تذامر مفرده احسن.. ...عامه عند كل اندرجراوند هتلاقي في مكن زي ال اATM كده ده بتدفع بيه وتاخد الكارت وهتلاقي ناس كتير من امن المترو في كل محطه وخاصه في هيثرو هيساعدوك لو مش عارف طريقه شحن الكارت .. المهم خد الكارت تقريبا لو هتقعد اسبوع هايغطيلك الاسبوع لو هتستخدم مواصلات عامه وفي نوع اسمه weekly oyestercard ب33استرليني ......فلو هاتجيبه هاته قبل ما تركب الاندرجراوند من المطار الي وسط لندن وده بيغطي zone 1 and 2 زي ماقلنا وتجيب معاه تذكره لوحدها ون واي من المطار الي وسط لندن عشان المطار بره الzones دي :::.ووانت مروح تسترد خمسه استرليني وانا انصح بشده باستخدام المواصلات العامه خاصه الاندرجراوند والباص لو حابين ...

عامه بما ان لندن تقريبا متغطيه كلها بالاندرجراوند والباصات وده اللي اعتمدت عليه طول الوقت وعشان الاندرجراوند متقسم zonesواختيار الكارت بيعتمد علي نوع zones اللي بتختارها وكده وتعتبر من اعقد واكبر واضخم شبكه مترو بالعالم وفي نفس الوقت سهله جدا جدا في استخدامها... عامه انت تختار من الاخر لو قاعد اسبوع مثلا...
Weekly oyestercard zone 1 and zone2
وده بيغطي اكتر من تسعين في الميه من الاماكن اللي هاتروحها جوه لندن اذا ماكانش كلها... وهحطلك كل الاماكن السياحيه باقرب اندرجراوند ليها عشان متوجعش راسك....وبرده لو حد حاب يسال علي طريقه استخدام الباص الاحمر الجميل ابو دورين المميز للندن واللي لازم تجربه انا موجود

ثانيا.. بالنسبه للاقامه... انا قعدت في هوستل وطبعا لاااازم السيرش والبحث كويس قبل متروح اي هوستل.. الحمد لله كنت في هوستل ممتاز جدا وواحد من احسن الهوستلز في لندن حتي التليجراف ترافل نفسها حاطاه من افضلهم بعد ما عملت فرك وحرك واستقريت عليه... وقريب جدا من اندرجراوند وده اهم نقطه في اختيارك.... اللي عاوز اسمه ابقي ابعتهوله عشان ميبقاش اعلان... ..المكان كان نضيف جدا وبكارت لوكر وسيكوريتي وانا شخصيا اتبسطت بيه جدا

في كذا نقطه احب اوضحهم الاول....

1-لو حابب تقوم بكل شيء لوحدك اوك فالموضوع سهل جدا. ولو انت من الناس اللي حابه تتحرك مع برنامج وجايد برده سهل وفي مواقع موثوق فيها كتير.. لو حد حابب اسامي منهم اقلكم عليهم لو مش اعلانات ليهم.. .انا موجود يبعتلي بس...
2-جوجل مابس ده حياتك هناك️️... بالذات في المواصلات العامه وخاصه استخدام الباصات ممتاز ومفيد جدا جدا... وهيقلك كل التفاصيل باستخدام الباص لان استخدامه برده ممكن نشرحه لوحده... انما عامه ممتاز ولا غني عنه وبيعرضلك محطات الباصات بمواعيدها بخط سيرها...
3-من افضل البرامج اللي اعتمدت عليها بالاندرجراوند. ولازم تستخدمه هناك وبعد البحث اعتقد ده افضلهم من وجهه نظري. . برنامج Tube map علي الاندرويد.. ممتاز جدا فيهTrip planner لو عاوز تروح من مكان للتاني بالاندرجراوند هناك بلندن لازم تعتمد عليه... اسمع كلامي..
/Tube Map - TfL London Underground route planner – Програми Android у Google Play
... وده هيبقي حياتك وانت جوه لندن
3-استخدمت خط اتصالات شركه EE وكانت تغطيته ممتازه ماعدا في بعض محطات الاندر جراوند...وكان ب 25 واوفر كويس ممكن تجيبه من المطار يشمل نت و اعتقد كان 10 جيجا مش فاكر اوي بس كان معايا طول الوقت وطبعا هتلاقي ري واي فاي في اماكن كتير في لندن وكان فيه امكالمات فري برده كتير وكفي معايا الايام كلها ...
4-بالنسبه للاكل موجود في اماكن كتير الاكل الحلال وطبعا في كنتاكي وغيره بتلاقي كاتبين حلال ولا لا.. لو قفلت بتقضيها vegan وزي الفل.. انما محستش في مشكله وفي شارع العرب هناك كله اكل حلال..واسمه Edgware road...
5-الشطافه..لا مواخذه... (اسف لقساوه الكلمه... اللي تحت 18 سنه يمتنعون ) .. دي اهم من الرحله نفسها تشتري واحده متنقله وتبقي معاك في كل حته... .. متعرفش الزنقه امتي ولا فين... انا حذرتك اهو.
6-الاهم والاهم والاهم التخطيط الجيد قبل الرحله تبقي عارف هتروح فين وامتي ومنين وهتركب ايه او هتستخدم مواصلات ايه... طبعا مش كل حاجه هتمشي بالورقه والقلم بس علي الاقل يبقي فيه frame في دماغك....
7-انسي وانت هناك انك شخص مصري تماما خاصه في المواعيد... يعني موضوع تبقي علي السرير وتقول لصاحبك انا في السكه والكلام ده تمحيه من ذاكرتك... الناس هناك مبتهذرش في المواعيد.. المترو والقطر بالدقايق مش بالساعات....
8- طبعا لازم يبقي معاك جاكت ووتر بروف او عليالقل شمسيه طول الوقت... الجو متقلب طول السنه نص ساعه مطر ونص ساعه صيف ونصايه خريف ونصايه ربيع انت وحظك...

نيجي للاماكن المهمه في لندن…

هاحاول احطلك الاماكن السياحيه باقرب اندرجراوند ليها :-

هاحاول احطلك اقرب الاماكن اللي ممكن تروحها بانرجراوند واحد وطبعا لو بتحب التمشيه هتفرق جدا جدا معاك :::: خلينا نتفق انت هتستخدم الابليكاشن بتاع المترو اللي حاططلك اللينك بتاعه فوق هتدخل انت في محطه ايه او اقرب محطه انت شايفها ادامك ايه.. وتدخل المحطه اللي انت عاوز تروحها... :هايطلعلك الوقت وتركب اي خط واي اتجاه وكل تمام وسهل جدا جدا في الاستخدام وتوفير الوقت ::
1-مثلا عندك london eye ,aquarium ,big ben ,lonodn dungeon و معاهم متحف شريك وممكن تاخد جوله في نهر التيمز️ ولازم تجربها ولو اتمشيت شويه في المنطقه دي هتلاقي البرلمان وكنيسه ويستمنستر ابي ودول هتلاقيهم في westminister tube
2- عندك متحف الشمع ومتحف شارولك هولمز وحديقه الحيوان وال regent park دول هتنزل baker street tube احبيبي اشاروك هولمز::
3-عندك متحف التاريخ الطبيعي (لازم تروحه ) ومتحف العلمي ومتحف victoria and albert دول هتنزل south kensington tube
4-عندك شارع اكسفورد طبعا للي بيحب الشوبينج وهتلاقوا فيه كل الماركات اللي بالكون فيه وطبعا فيه premark لازم تروحه اسعاره ممتازه ومتنساش ال tax vat.تاخده وتبقي تبدله من المطار قبل متسافر وتسترد جزء من فلوسك ده تروحه تنزل محطه oxford circus .ومع اكسفورد ممكن تروح piccadilly circus و كمان متحف believe it or not .دول مع بعض في محطه piccadilly circus .وطبعا الناس عشاق M&MS والل LEGO هتلاقو هناك اكبر مكانين في العالم ل ام اند امز والليجو ::هتنبهروا بيهم :::
5-طبعا لازم تعدي علي Harrods ,وتسلم علي دودي وديانا وممكن تكتبلهم في الlove book بتاعهم ( لو رحت هتلاقي واحد رخم كاتب في اول صفحه وبالعربي دا انا لو عاوز تروح تنزل محطه knightsbridge
6-عندك الهايد بارك تنزل محطه hyde park or knightsbridge hاي واحده فيهم.
7-عندك طبعا قصر باكينجهام طبعا لازم تروحه وتشوف تغيير الحرس بيبقي علي 11 ونص ولو عاوز تشوغه كويس روح بدري وخد مكان كويس لانه بيبقي زحمه طبعا تنزل محطه green park
8-التاس اللي بتحب ابل ممكن تروحوا اكبر محل ابل في لندن واعتقد بانجلترا هتلاقوه تلات ادوار اللي عاوز يشحن واالي عاوز يعقد واللي عاوز يشتري وبراحتكم خالص بس خلي بالكم بيقفل الساعه تمانيه بليل وطبعا ده مكانه في حته اسمها covent garden l;jl كله كافيهات وعروض وشوبينج وههتبسطوا فيه جدا خاصه لو روحتوا في وييك اند سبت او حد يعني المهم تنزلوا محطه covent garden
9- trafalgar square ميدان مشهور لازم تعدوا عليه وده بيعتبر ميدان التحرير عندنا كده ده مركز التظاهرات والاحتجاجات والخطب التاريخيه والاحتفالات طبعا زي راس السنه وغيره المهم تنزل في محطه charing cross
10-طبعا من الحاجات المهمه اللي لازم تشوفها ومينفعش تبقي هناك وماتشوفهاش هو جسر لندن او london bridge ,وده ممكن تطلعه وتقف عليه من فوق ويبقي تحتك الجسر وطبعا في جزء زجاجي ممكن تمشي عليه اللي بيخاف ميطلعش ::عامه طبعا تنزل محطه london bridge tube .
11-في شويه حاجات تانيه خفيفه زي تلفريك الامارات وده عباره عن تلفريك بياخدك فوق نهر التيمز رايح جاي ::وفي منطقه ارينا O2 وهي عباره عن منطقه فيها مطاعم وكافيهات بس انا بصراحه حبيت ال covent garden فيها حيويه ولوكال اكتر من ارينا بنت الناس دي:::.
12-شارع العرب او شارع Edgwear roadطبعا ده اول ماتروحه هتحس انك في شبرا كده كله عرب من كل الجنسيات ومطاعم كلها عربي ومصري وسوري وتركي وكل الجنسيات وكافيهات وكده ::ده تروحله عن طريق محطه Edgwear Road tube.
13-في برده لو ليك في جو فينيسيا بس علي صغير قنوات مائيه صغيره ممكن تاجر مركب اسمها little venice ,ودي ترحلها عن طريق محطه Warwick avenue tube .
14- اصحاب المزاج بس ::::الباقي يمتنعون لو نفسك تشوف منظر اللافندر زي اللي بيجي في الافلام وانت واقف فيها وممكن كمان تعمل جلسه تصوير هناك لو عاوز بس تحاول تفضي يوم بقي عشان هتاخد مواصلات ومشوار شويه لحد مزرعه اللافندر هي تقريبا ساعه ونص من لندن هاحطلمك موقعهم وفيه كل تفاصيل الوصول اليها وانت اختار اللي يناسبك لو حبيت تروح هتلاقي الموقع تحت بس اعتقد الوقت دقه قفلت من نص سبتمبر .
/Mayfield Lavender Farm | Mayfield Lavender

15- طبعا لو قعدنا نتكلم لبكره علي الحاجات اللي ممكن تتعمل في لندن مش هنخلص ::في مليون حاجه في برج شريد ممكن تطلعله اكبر ناطحه سحاب في اوروبا ::في كافيه شكسبير :في ممكن تاخد جوله بالهليكوبتر وممكن تتعلم دروس طيران كمان ::في ziplineفوق لندن ::في مليون حاجه اللي مهتم يبقي يبعتلي
16- لو عاوز تشوف خط جرينتش ممكن تنزل محطه North greenwich وتروح تبص عليه وتيجي وممكن طبعا بمليون طريقه تانيه بس انا بحطلك الاسهل في رايي.
17-طبعا عشاق هاري بوتر.. انت جيتلهم في ملعبهم عندك استوديوهات هاري بوتر وعييييش بقي جوه. وعندك في محطه فيكتوريا هتلاقيplatform 9 3/4.. طبعا عشاق هري بوتر هيعرفوه..... .
18 -طبعا في اماكن بره لندن كتير تحفه ولو عندك وقت ممكن تروحها في اكسفورد . ليفربول. ليدز. برايتون . في سالزبري وغيرهم كتير علي حسب وقتك وتنظيمك :

كده خاصنا اغلب الاماكن في لندن وازاي تروحها بالاندرجوند زي ماشفنا فوق :

بعد كده رحت ستونهينج وطبعا ما ادراك ما ستونهنج مكان من تقريبا 3000سنه قبل الميلاد.. وبعتبره واحد من الاماكن اللي كان نفسي اروحها في حياتي... خلفيه الويندوز يا جدعان .... هي عامه تطلع من الصبح تيجي علي سبعه بليل... عاوز تطلع مع نفسك اوك مع شركه من لندن علي طول بالباص زي متحب ... لو مع نفسك هاتظطر تروح الاول مدينه salisbury. تروح بالاندرجراوند من لندن الي محطه ووترلو او فيكتوريا ومن هناك في اتوبيسات مخصصه بتودي ستونهينج.. عامه اختار اللي يعجبك..... اهم حاجه زي مقلنا المواعيد انا اتاخرت ست دقايق بالظبط وانا راجع من ستونهنج لندن فاتني الباص وشنطتي جواه ووش كده... وفضلت تقريبا ساعه مع احجار ستونهينج لوحدينا .. بنحب في بعض‍‍‍‍‍‍‍‍‍.... لحد ماخدت باص لمدينه Salisbury وبصيت عليها بلد جميله وتحس انك جوه القرن التامن عشر او طالع من قصه لتشارلز ديكنز ومن هناك تاخد قطر ترجع بيه للندن تاني....

واحد من الحاجات اللي بنصح بيها بشده انك لازم تجرب المسرح الانجليزي مش هتبقي هناك وتفوت حضور مسرحيه في لندن في قلب عاصمه المسرح العالمي....مع كل ملهمي المسرح والأدباء عاشوا هناك... عامه هتلاقي عروض كتير وكل المواقع بتنزلها وبرده لو حبيت اساعدك قلي.... وطبعا تدرس المسرح الاول اللي هتحضر فيه العرض.عشان تعرف تختار كرسيك كويس ومتضعش عليك فلوس.... عامه انا كنت حاجز من قبل ما اروح مسرحيه من اهم مسرحيات العالم وهي phantom of the opera.. ودي روايه فرنسيه الاصل و تعتبر واحده من اهم العروض المسرحيه في العالم وبتتعرض في اماكن كتير بالعالم و شافها اكتر من 140 مليون شخص حول العالم .. ايوه الرقم صح وكانوا في الشهر ده بيحتفلوا ب السنه 31 لعرضها في لندن... طبعا في مسرحيات كتير وعروض مختلفه علي حسب مزاجك... بس عامه تجربه المسرح انصح بيها بشده وبعتبرها من افضل الحاجات اللي شفتها بحياتي.... هتاخدك لعالم تاني بالتاكيد وعمرك ما هتندم....

من الاماكن الحلوه اللي رحتها وناس كتير متعرفهاش لدرجه واحد صاحبي لندني مارحهاش قبل كده ولا سمع عنها...
كنت قررت اروحها وهي
. . . . . . . . . . Durdle door Beach.
وده شط فيه تكوينات صخريه من الاف السنين في مقاطعهDorest
جنوب غرب لندن علي القنال الانجليزي وتقريبا بالباص تلات ساعات من لندن... هتروح هناك هتلاقي منظر غير عادي من جبال وبحر و cliff ولو شفتوا فيلم Dunkirk . هتحس انك جوه الفيلم لان نفس الاماكن ونفس الجبال اللي اتصور عندها هناك.... الصور تحكي اكتر...بس وانت نازل الشط خلي بالك لان مسافه كبيره من اعلي الجبل الي الشط... وبعديها رحت طالع علي بورنموث احلي شط في انجلترا كلها... وفي هناك مطعم من افضل واشهر مطاعم fish&chips في العالم من سنه 1928.. وبالمناسبة دي اشهر اكله في انجلترا عامه الفول والطعميه بتاعنا يعني... علي فكره لما عملوا استطلاع راي من اكثر سكان انجلترا سعاده طلعوا سكان بورنموث.... .

اخريوم قررت اني اطلع اسكتلندا واروح عند الناس اللي بتلبس جيبات دول واشوف الناس دي فين بنطلوناتها يا وديع
قررت اروح ادنبره خدت قطر من محطه فيكتوريا الساعه سبعه الصبح (ابوس ايديكم مفيش هزار في المواعيد تاني القطارات هناك مواعيدهامش بالساعه القطارات بالدقيقه يعني لو قطرك سبعه ولاقيت قطر تاني واقف في نفس الرصيف سبعه الا عشره او سبعه الا خمسه اوعي تركبه زيي وتفتكر محطه مصر وكده ::لانه في الغالب هتلاقيه رايح مكان تاني وممكن متلحقش زيي وتنزل وهو بيتحرك )فخليك مصدقهم قالولك سبعه يبقي سبعه بلاش تستنصح
المهم وصلت ادنبره الساعه 11 وتلت وهو للاسف يوم اللي عندي لان طياره العوده الفجر ::فققرت اني اعدي علي المعالم كلها وانزل واتفسح طبعا مع الحل السحريHOP ON HOP OFF Bus وقررت زياره قلعه ادنبره ودي اهم مكان في ادنبره لازم تشوفه ::وطبعا لبست الجيبه الاسكتلندي دي اهم حاجه وتحس في كل حته ان ريحه وليام والاس مسيطره علي المكان :::وممكن تتصور معاه شخصيا زيي كده طبعا لو عندك وقت افضل اسكتلندا تبقي تلات ايام تقدر تروح فيهم highland , nich lake ,wallace villageلو عندك وقت يبقي كويس المهم خلصت وخدت قطر الساعه سبعه ونص كنت بلندن الساعه اتناشر بليل ….روحت حضرت نفسي ليوم طويل من السفرتقريبا 22 ساعه مهم 16 ساعه طيران من سته الصبح لغايه اربعه الفجر تاني يوم :::وصلت و طلعت علي شغلي الساعه اربعه العصر لازم نضحي نعمل ايه !!!!!!
اي سوال عندي اجابته لن اتردد في الاجابه عليه ويارب حد يستفيد من القرير ده !!!!
اخيرا.... في مقوله مشهوره ل د/صامويل جونسون (كاتب انجليزي قديم شويه) بيقول فيها....
When a man is tired of London, he is tired of life
وكالعاده لازم انا اقول بقي اشمعني هو :
“Traveling—it leaves you speechless, then turns you into a storyteller.”
اسيبكم مع الصور.... للاسف الاخ مارك عاوز 47 صوره بس:::