صباح الخير دا بوست عن اسوان اى استفسار تانى اكتبيلى كومنت هنا..
أسوان
-طريقة الأنتقال:-
1/طيران''دى أفضل طريقة ''
2/قطار:-
أ/قطار النوم.
ب/قطار VIPوفيه درجتين
ج/أسبانى مكيف''منصحش بيه''
3/أوتوبيس.
-الأقامة :-
1/ممكن فنادق فى أسوان نفسها او فنادق فى النوبه''حيث الروقان والهدوء'' أو بيوت نوبية، وفى الحالة دى بيساعدنا الموقع الجميل booking.com لكن منعتمدش على أسعاره لانها بتكون اغلى، ممكن نشوف الفندق اللى عاوزينه ونحجز مباشرة من الفندق.
2/نايل كروز من الأقصر لأسوان أو العكس.
*الزيارات ونركز فى دى.....
1/أحلى زيارة فى أسوان هى زيارة القري النوبية وأشهرهم :-
أ/غرب سهيل ودى بنزورها بطريقتين:-
* الأحلى هى عن طريق رحلة نيليه من أى مرسى على كورنيش أسوان لحد غرب سهيل او القريه النوبية.
* بطريق برى بتاكسى وبنمر فى الحالة دى على سد أسوان القديم أو خزان أسوان.
هنلاقى هناك بيوت بسيطة جداً غالباً بتكون من دور واحد أو أتنين بالكتير.
بندخل بيت من إللى قدام المرسى وممكن ناخد مشروب بمقابل بسيط جداً لأن النوبيين ناس جميلة أوى ومش بتدقق على الفلوس خالص!
ونصور البيت من جوا والوانه ورسوماته الرائعه وناخد سيلفى مع التمساح والبنات ترسم على أيديهم حنه نوبى''نتأكد أنها بدون أوكسجين'' وممكن ناخد لفة بالجمل فى القرية أو لحد جزيرة بربر أو العكس.
الأكل هناك مفيش زيه وبيتعمل بالبهارات الأسوانى الجميلة..
ب/جزيرة هيسا ودى بتاخد تاكسى لحد مرسى فيله او مرسى ''بتانول'' وبتاخد بعدها مركب، خلينى اقولك ان الكامبينج هناك رائع.
ج/جزيرة سهيل ودى ممكن تروحها عن طريق مركب بردو من على كورنيش اسوان.
د/قرى غرب أسوان ودى فيها مقابر النبلاء وهتكلم عن زيارتها تحت شويه..
2/زيارة جزيرة معابد فيله وبنروح عن طريق تاكسى لحد المرسى وناخد مركب ''هتلاقو التسعيرة الرسمية فى صفحتى الشخصية مصورها من هناك '' بتودينا للجزيرة وترجعنا تانى بعد مانخلص الزيارة وبعدها نرجع بنفس التاكسى إللى بيكون مستنى عند المرسى.
3/السد العالى ورمز الصداقة المصرية السوفيتية بنروحهم عن طريق تاكسى وممكن نخلى التاكسى ينزل عند البانوراما علشان نشوف محطة الكهرباء من فوق فقط ''زيارة محطة كهرباء السد العالى من الداخل بيستلزم استخراج تصريح من الأمن الوطنى '' وبعد ماتخلصوا السد وراجعين تزوروا رمز الصداقه وممكن تطلعوا فوق بالاسانسير، الفيو من فوق تحفة.
3/معبد كلابشة ''معبد حورس النوبى'' وده بردو نفس فكرة فيله على جزيرة وليها مرسى مراكب قبل مدخل السد العالى.
4/المسله الناقصة بتتزار بتاكسى بس نصيحة لو مش معاك مرشد سياحى أطلب من الحارس أنه يفتح مركز الزوار وتشوفوا الفيلم التسجيلي لان بدونه من هتعرفو شكل المسله أصلاً!
5/مقابر النبلاء وجبل ابو الهواء ''دا موقعه قدام محطة القطار بس ناحية غرب النيل. بتاخد مركب وبعدها يا اما تأجر جمل وتطلع بيه او تطلع السلم'' 165 سلمة''
بس منظر أسوان والنيل من فوق وهم جميل جداً.. 6/ جزيرة الفنتين ودى بردو منطقة أثرية موجودة فى الطرف الجنوبى لجزيرة أسوان وبتروحها بمركب، وفى وسط الجزيرة قرى نوبية اما طرفها الشمالى موجود منتجع موفنبيك.
7/متحف النوبة ودا بتروحه بتاكسى عادى بس خلى بالك ليه تذكرة تصوير خاصة لداخل المتحف.
8/متحف النيل وموقعه عند خزان أسوان وبتروحة بتاكسى بردو.
9/ممكن تعمل زيارة لفندق سوفيتيل أولد كتاركت''جراند اوتيل''وتتغدى او تاخد شاى اثناء الغروب، بس لازم لازم تتواصل الأول مع الفندق بالتليفون.
10/جزيرة النباتات وهى من اشهر الحدائق الاستوائيه فى العالم وممكن نروحها عن طريق مركب من كورنيش اسوان.
*******الأكل
قبل اى شىء لازم تجرب الاكل فى النوبة
أسوان فيها مطاعم حلوة أشهرهم
1/بورتو سونو
2/جزيرة الدوكة
3/مكة
4/المصرى
-الاسماك
1/الشيف خليل
2/جمبرى افندى
3/جمبريكا
-بيتزا
1/اسمه ايه''هو اسم المطعم كدا''
2/قصر الهدى
الكافيهات:--
هتلاقى عند الكورنيش الجديد كافيهات كتير على النيل.
وعلى الكورنيش القديم فيه كافيهات كتير بردو.
انا مكتبتش تفاصيل ممله بس اللى عاوزة تعرفيه تانى اكتبيه فى كومنت هنا
