سؤال بخصوص شهادة التحركات.. هى بتبين البلد...

[Faten Abdel Hameed]

سؤال بخصوص شهادة التحركات.. هى بتبين البلد الترانزيت ولا النهاءية.
يعنى مثلا لو واحد راح المانيا عن طريق ترانزيت اتينا.. هيطلع ف الشهادة المانيا ولا اليونان..
محتاجة رد اكيد.. وشكرا

 

[Sam Salah]

اليونان .. بيظهر فيها الترانزيت بس !!

 

[Omar Fathy]

لا تظهر اي دوله ترانزيت ابدا وعن تجربه

 

[Walid Assem]

بتبين وجهة الطائرة اللى انت طلعت من القاهرة عليها و اللى انت رجعت منها ملهاش دعوة انت رحت أو رايح فين

 

[Omar Fathy]

من غير ما حد يفتي اسمع مني اي دوله ترانزيت ما بتظهرش في التحركات الا لو ختمت دخول الدوله الترانزيت لانه لما بيسجل بياناتك بيسجلها بناء علي اختام دخولك وخروجك الموجوده في جواز السفر

 

[Hend Elmansory]

الترانزيت مبتظهرش وانا جربت

 

[Doaa Nassar]

الترانزيت Dina Mamdouh فاكرة؟

 

[Mohamed Elsoubky]

لاء مش بتبان الترانزيت . وعن تجربة شخصية . كنت مسافر ماليزيا على طيران قطر ونزلت ترانزيت الدوحة فى الذهاب والعودة . ولما عملت شهادة التحركات ظهر ماليزيا فقط

 

[Mahmoud Naguib]

شهادة التحركات بتبين بلدما قد ايه انها جميلة
عادي ممكن يكتبولك بلاد انت معتبتهاش او ميكتبولكش بلاد انت زرتها فعلا

 

[Omar Fathy]

في نقطه صغيره عايز اقولك عليها بعد الشهاده ما تطلع راجعها كويس وبتاني لان هتلاقي مكتوب بلاد انت ما سافرتهاش وبلاد سافرتها ومش مكتوبه وعدل الكلام ده وانت هناك

 

[Marian Wahba]

بيظهر الترانزيت ... حمايا سافر استراليا ترانزيت الامارات و شهادة التحركات ظهر فيها الامارات بالرغم ان الباسبور عليه تاشيرة وختم استراليا

 

[Doaa Hassan]

عايزة اقولكم الشهادة دي بطيخ وعك السنين وبتخليني أوقات شاكة في مدى كفاءة الداخلية والجوازات

طلعوا لي بلاد ماروحتهاش
وساعتها اطلب التعديل وقولهم هيا فين البلد دي لو معاك الباسبور القديم مثلا

وساعات مايحطوش بلاد مع ان الفيزا بتاعتها قد كدة ومنورة الباسبور

ومرة دخلوني بلد ومخرجونيش منها يعني ماكتبوش تاريخ مغادرتي اقصد

بالنسبة للترانزيت انا ماتكتبش عندي بس اللي اعرفه ان الترانزيت يظهر في حالة بس لو الدولة الترانزيت ختمت ع الجواز

لان المفترض شهادة التحركات معتمدة على أختام الدخول والمغادرة والمفروض برضه انه متطابق مع سيستم الجوازات اللي ع الكمبيوتر اللي واضح انه مالوش اي ستين لازمة

 

[Omar Fathy]

قولت الكلام ده قالولي لا حاجات تانيه غير

 

[Ahmed Abdelmoneim]

هى شهادة التحركات دى بتتعمل فين فى اسكندرية

 

[Moataz Mohamed Abd Elwahab]

هو الحل في فنجان قهوة يعدل المزاج اقسم بالله

 

[Walid Assem]

مش موضوع فنجان قهوة الموضوع مش طلاسم
بالمنطق كده نظام الجوازات لازم يسجل المعلومات اللى هو متأكد منها طبعا بيانات المسافر من باسبورة و التحركات من وجهة الطيارة اللى خدتك من مصر و الطيارة اللى انت جى عليها و كلة بيسجل فى كارت السفر و الوصول اللى انت بتسجلة على الشباك قبل الختم و الظابط بيراجعة و يديلك الختم ، هما هيتاكدوا منين انك مش هتغير التذكرة بعد متوصل الترانزيت ، فالنظام بيسجل المعلومات المتاكد منها
انت طالع على طيارة اية و جى على طيارة ايه

 

[Faten Abdel Hameed]

يعنى نقدر نستنتج أنه اللى بيتسجل ع السيستم بيكون وجهة الطيارة من والى القاهرة.. وبعد كده الموظف بيكمل من الباسبور اللى بيتقدمله..
وطبعا بيحصل غلطات عند تسجيل البيانات زى اى مصلحة مصرية أصيلة فبنلاقى بلاد زيادة وبلاد ناقصة...
وفى الحالة دى لو الباسبور ضايع مثلا الموظف هيكتب البلاد اللى قدامه ع السيستم فقط.... ولو منطقة شنجن اصلا مالهاش غير ختم واحد دخول وواحد خروج مش هيبقى غير ف الختمين دول لانهم ع السيستم وع الباسبور.. صح كده ولا ايه!!

 

[Walid Assem]

خطأ التسجيل و ارد بس المفاجأة أن لو رايح أوربا على الإماراتية و جى عليها يبقى الدخول و الخروج دبى مش هيبقى فية اى دولة أوربية إلا لو طلب الباسبور عند استخراج الشهادة

حاجة تانية انت لو طلعت أوربا يعنى خدت تأشيرة انت مش هنطلب شهادة تحركات اصلا
لأنها بتتطلب عند أول مرة السفر لأوروبا أو عند طلبها لغرض تانى