Y
Yassine Ghallam
:: مسافر ::
غلام ياسين من مواليد مدينة الدار البيضاء 31 سنة من الصغر ديالي ونا كنحلم نكون رحالة مشهور في العالم ونتعرف على عددكثير من الثقافات والعادات والديانات ونزور كل القارات ونعيش مع الناس الحياة ديالهم وداكشي اللي كان بديت كنسافر داخل المغرب وزرت عدد كبير من المناطق حتى واحد النهار حسيت بالقلب ديالي بغى يخرج من المكان ديالو ملي كنت كنتفرج في وثائقي حول الغابات الإفريقية والحيوانات والشعوب الإفريقية وداك النهار قررت نمشي بأيتها وسيلة و نشوف هدشي بعينيا ونعيش معاهم وفعلا خرجت من العمل اللي بزاف الشباب المغريبي كيحلم يخدم فيه وبداك الخلاص اللي كنت كنتخلص بيه والإمتيازات ووووو.... لكن كلشي هدشي بالنسبالي مكيسوا حتى يوم واحد مع سكان القرى في وسط القارة الإفريقية وخليت كلشي وهزيت صاكي وخرجت وتركت ورايا أم تدعولي بالخير والرضى وأب دائما كان هو المساند الرسمي ليا بالإبتسامة ديالو وإخوة وأصدقاء وحي جميل وبلاد جميلة لكن خوكم متلفتش اللور ومشيت ،فين غادي ياخويا ؟ غادي لطانزانيا كلشي كيضحك على جوابي رغم أنه كان هو الجواب الصحيح وهو الهذف ديالي باش نطلع لأكبر قمة في القارة الإفريقية اللي كتواجد في طنزانيا جبل كيليمنجارو، قطعت من المغرب حتى وصلت للسنغال بالأوطوسطوب والمشي زرت في خلال هذ المدة مدن ودواوير وعشت حياة مع رحل مع صيادة موريتانيين وعشت مشاكل الشوافرية المغاربة اللي كيديو السلعة لإفريقيا وشفت مناضر حتى وصلت لداكار شريت دراجة هوائية بيكالة سميتها سكينة باش تبعث فيا السكنة وراحت البال وقطعت بيها السنغال ودخلت لأكبر بارك سميتو نيكولوكوبا فيه السبوعة مطلوقين كنت كنشوفهم في الطريق وخوكم كيبيدر وفرحان حينت حنا كلنا خلقنا الله باش نعيشو في الدنيا أنا وداك السبع عدنا هذف واحد هو السعادة والحرية والحمد لله خرجت من أول تحدي ليا مع أول غابة وأول مرة وتمكنت من الوصول إلى غينيا كوناكري وتماك دخلت لواحد الفيلاج وشفت واحد الجبل منحوثة فيه إمرأة وسميت داك الجبل la dame de mali yemberi وحكاولي القصة ديال هذ المرأة باللي هية اللي حامياهم وحافضاهم من كل شر والله خلقها ماشي عبثا وتزوجت لأن التقاليد ديالهم كتفرض على أي ضيف يتزوج ولكن خوكم هرب في اليوم الثالث وكملت الطريق اللي كلها غابات وطرق صعبة حتى دخلت الكوديفوار تلاقيت بسحار موريتاني وراني العجب المتعجب ديال السحر وعشت بزاف القصص حتى دخلت لغانا تماك جبرت إنسان واهب حياتو وقتو مالو كامل من أجل اليتامى باني مدرسة ومأوى وقررت حتى أنا نقدم ليهم شي حاجة وبقيت معاهم كنقريهم العربية ونعلمهم بعض الأمور وأساسيات الحياة حتى قرب الوقت وكملت للطوغو زرت واحد الدوار سميتو دافو من أحسن وأجمل الدكريات اللي عشتها مع واحد الطفل سميتو إسرائيل كان رفيقي في كل خطوة كان هو المترجم ديالي في الدوار علمتهم الرسم والصباغة ولعبنا الكرة وخا كنت أنا هو الشارف لكن مكنتش كنحس أنني كبرمنهم وتاني جا الوقت باش نمشي وديك الليلة بقينا نبكيو أنا وإسرائيل تقول عندي 12 سنة هههه إحساس صعيب، من بعد دخلت للبنين ومرضت بالملاريا وتعرفت على أوغاندية كبيرة في العمر تصاحبت معاها عجباتني بزاف جميلة لواحد الدرجة أنني مقضرتش نفرقها وهيا كذالك ولات كتبغيني بزاف وبزز خلاتني نكمل طريقي حينت بغاتني نعيش الحلم ديالي وقاتلي غادي تلحق عليا بالطائرة فاش نوصل لأوغاندا ،دخلت لنيجيريا النهار اللول درت كسيدا كلي تفصلت ونا صايم رمضان تعدبت ولكن كملت لأن الحلم كان عايش معايا وعاطيني الطاقة والقدرة فينما نجبر مشكل كنجبر بزاف الحلول حتى وصلت للكاميرون تهرسات ليا البيكالة سكينة وقفات ليا شنو ندير مشيت للسفارة المغربية شراولي ماما أفريكا حرت بزاف واش نخلي سكينة شنو ندير ليها وفي الأخير جبرت مغربية قاتلي خليها عندي حتى تكمل ورجع ديها وفعلا ركبت على ماما أفريكا مسكينة صبارة دخلت بيها للغابون ومشات معايا لواحد الغابة 400 كلم كلها بيست عشت معاها بزاف المغامرات شفنا الفيل والغوريلا والحناش والغزلان ..... كليت معاهم كلشي داكشي اللي كيطيبو كليت الحناش ولحم القروضة ولحم التماسيح وكل الحيوانات اللي كيصيدوها فديك الغابة كليتها معاهم يعني عشت معاهم الحياة اللي كيعيشوها فديك الغابة وشفنا ناس كيعبدو غيتار كيعتابروه هو الإلاه وشفنا العجب حتى وصلت للعاصمة ليبروفيل اللي فيها أنا دبا وباقي غادي نكمل الحلم ديالي اللي كنسميه الحلم الإفريقي
ومزال عندي بزاف الأحلام اللي هيا نزور كل القاراة ونتعرف على كل الديانات والثقافات ونعيش معاهم الحياة ديالهم
رابط القناة في اليوتيوب
/yassine Everest
رابط الصفحة
/Yassine Everest
ومزال عندي بزاف الأحلام اللي هيا نزور كل القاراة ونتعرف على كل الديانات والثقافات ونعيش معاهم الحياة ديالهم
رابط القناة في اليوتيوب
/yassine Everest
رابط الصفحة
/Yassine Everest