ليا حكاية بسيطة حابب أقولها بأنك لا تعتمد...

[Ibrahim El Gayar]

ليا حكاية بسيطة حابب أقولها بأنك لا تعتمد كلياً على معلومات السفر لاخواننا العاملين في مجمع التحرير..

أنا زوجتي لاتينية، و جات لي الفيزا الإليكترونية (الغير مطبوعة) في الباسبور.. و رحت حجزت بيها تذكرتين ذهاب و عودة على (الطيران التركي_ و حط تحت شركة الطيران دي مليون خط) لأنها كان رخيصة و كمان الأفضل ليا علشان مش معايا شنجن علشان أقدر أحجز في أي شركة طيران أوروبية... الترانزيت بتاعي كان ١٢ ساعة.. ليا أصحاب أشاروا عليا إني أجيب تصريح أمني للسفر علشان نقطة الترانزيت هي (تركيا)، و هنا الناس بتتعامل مع اسم (تركيا) على إنها الشيطان الأكبر... دا غير إن نقطة الوصول هي أمريكا اللاتينية و ليست تركيا... و دي أول مرة أسافر فيها و مش عايز أي مشاكل, خاصة إني حجزت قبل تعويم الجنيه, و لو التذاكر راحت عليا مش ح أعرف أعوض تمنها مرة تانية..

المهم.. رحت مجمع التحرير، الست اللي ع الشباك سألتني (رايح فين؟).. قلت(رايح كولومبيا لزوجتي).. قالت (كولومبيا مش محتاجة تصريح سفر).. قلت ( أيوة ما أنا عارف.. بس الترانزيت بتاعي في تركيا).. استغربت و قالت (الترانزيت كام ساعة؟).. قلت لها (12 ساعة).. قالت بشيء من الثقة ( لالالالا.. دا انت لازم تجيب فيزا ترانزيت من السفارة التركية.. و إيه الورقة دي؟؟) .. قلت: ( دي فيزا اليكترونية, القنصل هو اللي مديهالي بنفسه مش القائمين بأعماله).. قالت: (لالالا الفيزا بتكون مطبوعة في الباسبور.. و لا أقولك روح للرائد محمد و اسأله).....

رحت للرائد محمد, سألني ع الحوار و بلغته, جاوبني بنفس الثقة ( انت لازم تجيب فيزا ترانزيت, و الفيزا تجيبها مطبوعة في الباسبور)..

طلعت محطم الآمال و محبط خاصة إن السفر بتاعي كان باقي له أسبوعين.. قلت لما أروح سفارة تركيا لأنها قريبة جدا من مجمع التحرير.. أعطوني موقع السفارة علشان أخد ميعاد, ما فهمتش شيء من الموقع و لا عرفت أقدم عليه..

بقيت محبط أكتر... تاني يوم رحت لسفارة كولومبية و بلغت القنصل باللي قالوه ليا في المجمع, القنصل استغرب بشدة من اللي اتقال و بالفعل طبع ليا الفيزا في الباسبور.. خرجت من السفارة و رحت لشركة الطيران التركي و قلت لهم ( يا جماعة, مش حضرتكم لازم توضحوا ليا قبل لما أحجز إن فيه حاجة اسمها فيزا الترانزيت ح يطلبوها مني علشان التصريح الأمني)..لقيت موظفة الاستقبال أخدت تذكرة الطيران و قالت بعصبية ( يا فندم الفيزا بتاعة حضرتك سليمة, و طالما الترانزيت لم يتعدى الــ 24 ساعة فمحدش له الحق إنه يطلب منك فيزا ترانزيت إلا إذا حضرتك كنت ح تخرج من المطار.. و طالما معاك 2 " بوردينج" يبقى ورقك سليم مية في المية..بتوع التحرير دول بيألفوا)... أخدت الكلمتين دول و قمت رايح لسفارة تركيا, حارس الأمن أُشفق عليا و أعطيته رسالتي يبلغها للمسئولين داخل السفارة و كان ردهم (ما تقلقش, مفيش داعي لفيزا الترانزيت و لا التصريح الأمني طالما انت ترانزيت أقل من 24 ساعة.. و لو فكرت تكسر الترانزيت بتدفع غرامة في المطار و يتم منعك من دخول تركيا لمدة 5 سنوات)..

برضه مبقتش مطمئن.. بعت إيميلات ع مطار القاهرة و اتصلت بيهم كذا مرة, فين و فين لما ردوا.. و اللي رد كان داخل معايا أفشات و إفيهات لزجة مما جعلني أروح المطار ذات نفسه و أسأل شركة الطيران بتاعتي و اللي لقيتهم بيقولوا نفس كلام السفارة و الفرع اللي حجزت منه... و الحمد لله سافرت و بقالي 8 شهور..

المقصد من القصة الطويلة دي إن السيستم الروتيني المصري لا تعتمد عليه لأنه غير مطور و مش عايز يتطور.. الموظفين بتوعنا عايزين كوم ورق و يخبط الختم في كل حتة فيه.. لا يملكوا أدنى معلومة حديثة حتى لو كانت معلومة عن (الفيزا الإليكترونية).. عايز تستفسر, يبقى في شركة الطيران اللي ح تحجز عليها مش موظفي مجمع التحرير... الدوخة اللي أنا دوختها دي كانت بسبب السيستم الروتيني في مصر اللي مش عايز يتطور... يبقى خلاص طوروا نفسكم أنتم و دمتم

 

[Nona Adam]

اول مره اسمع عن فيزا الترانزيت. طالما افضل ف المطار. فيزا لزمتها ايه

 

[Mohamed Emad Eldin]

كلامك صحيح. وتجربتك دليل علي تخلفهم. مرة كان معايا دعوة من مؤسسة فنية في لندن احضر ورشة عمل ليهم بيروت والدعوة بالانجيليش وكنت رايح المجنع اخد تصريح لبيروت. المهم الموظفين شافو الدعوة وقالو الكلام دا مينفعش يبعتوا دعوة بالعربي. قولتلهم هما من لندن هيبعتوا عربي ازاي قالو ليا احنا مش عارفين اللي مكتوب دا ايه وكانو قمة فالجهل والسخافة.

 

[Haitham Yossef]

انا هقولك المقصد والدرس المستفاد ان الدوله اتعسكرت والشرطه بتدخل ف ال ملهاش فيه ليه مش عارف مالهم هما ومال السفر والتأشيرات والكلام دا حاجه غريبه والله ، طالما مفيش حكم محكمه يمنع من سفري تعطلني وتديني معلومات غلط ليه

 

[احمد جابر]

هو أحنا حنفضل لغاية أمتى نجري كده علشان أوراق ملهاش لازمة ؟ أنا كنت حاسس بيك وأنت بتحكي ومتفهم جدا قلقك انا رفضت فرص زي دي كانت ممكن تغير حياتي علشان موضوع الأوراق دي .

 

[Seddeek Mohamed Elsherif]

بص احنا كان عندنا بلد و اتسرقت
ولاد الكلب اللي سرقوها بيبيعو ويشترو فينا بكل بجاحه

 

[Hodhod Soliman]

وما مصر الا سجن كبير

 

[Mohamed Azmy]

الدوله الوحيده اللي اعرفها اللي فعلا محتاجه فيزه ترانزيت عن تجربه أليمه هيا كندا
حتى لو مش هتدخل البلد لازم فيزه ترنزيت

 

[Muhammed Atwa]

بص هو عموما القاعده أن مفيش حد فاهم اى بتنجان
انا خسرت خمس الاف ريال بسبب جهل الناس وجهلى طبعا

 

[Amr Doghim]

ياعم ابراهيم دي ماسر هتاكلوا ماسر يعني لازم يلففوك السبع لفات علشان تحس بقيمة السفر من المخروبه ومتفكرش ترجع تاني

 

[Mohammed Zaky]

طب ايه رايك بقي معظمنا هنا في الجروب وانا واحد منهم فاكريين ان التصريح الامني بنطلعه لو الترانزيت اكتر من 6 ساعات مش 24 ساعه زي ما حضرتك عرفت !

 

[Mohamed Emad Eldin]

ياجماعة الموظفين مبيفكروش بيردود تعليمات بدون اي فهم ان كل شخص ظروفة مختلفة. دا غير انهم غير مؤهلين وجهلة وفكرهم محدود ومتأخر.

 

[Elham Kraman]

معلش سوْال هوا ايه فايده التصريح الأمني ده ؟؟ هوا بيبقا في مصر بس!

 

[Mohamed Badawy]

انت اتصرفت صح بس غيرك مش عارف حقوقه وكمان موظف الجوازات ممكن يكون محترم ويمشي بالقانون وممكن يكون من الناس اللي بتعطل مصالح الناس. عموما في مكتب جوازات في المطار لو حد حصل معاه حاجة بيكونوا متعاونين ومحترمين.

 

[Amr El Fara]

الواحد معدش فاهم اي حاجه في اي حاجه من موضوع التصريح ده . أكتر من ٦ ساعات و لا أكتر من ٨ ساعات و لا أكتر من ٢٤ ساعه ياريت الإدمن يعمل بوست و يكون فيه القول الفصل في الموضوع ده

 

[Angham Salah]

Mahmoud Salah