A
Ahmed Maher
:: مسافر ::
حابب اشاركم تجربتي من تركيا للاردن مرورا بالعقبة ثم مصر ثم العودة لتركيا مرة تانيه.
البوست طويل شوية عشان اقدر انقلكم كل التفاصيل اللي ممكن حد يحتاجها
اولا انا عايش في تركيا بقالي اربع سنين . في اول يوم عيد الاضحي سافرت من مطار اسطنبول لمطار عمان علي الخطوط الاردنية . الطيارة معقولة لحد ما لكن لا تقارن بالطيران التركي احسن منها بكتير
- وصلت مطار عمان دخلت من بوابات الجوازات الخاصة بالاردنيين عادي لان ماليش فيزا دخول للاردن . ظابط الجوازات سالني هتقعد فين في الاردن وهتقعد اد ايه ولما شرحتله ووريته حجز الفنادق ختم ع الباسبور وعديت . بعدها بعشرة متر قابلني واحد لابس لبس عادي وشكلة من الامن القومي اخد باسبوري وروحت معاه مكتبه قعدت تلت ساعه تقريبا جوة . كلها اسئلة من نوعية انت جاي الاردن ليه وليك معارف هنا ولا لا وحد يسيب تركيا ويجي يزور الاردن وهل تنتمي لاي احزاب سياسية او جماعات دينية ووريني حجوزاتك وكلام كتير عايز يتاكد من خلاله اني جاي سياحه وماشي . وبعدها اداني الباسبور وقالي حمدلله ع السلامة ومشيت.
- روحت علي مكتب تاجير السيارات AVIS استلمت العربية اللي اجرتها من خلال موقع rentalcars والصراحة كنت مختارعربية شيفروليه سبارك صغيرة ورخيصة ولكن اعتذروا لعدم توافرها حاليا وسلموني بدالها عربية ميتسوبيشي لانسر 2016 كامله بدون ما ادفع اي فرق
- كان معايا رخصة دولية ولكن انتهت بعد دخولي الاردن بيومين . ولكن سالت وعرفت اني اقدر اسوق بالرخصة المصرية في الاردن بس مش اكتر من شهر كسائح.
- قعدت يومين في عمان في منطقة وسط البلد عند الدوار الثاني . اشهر شارع هناك شارع ال rainbow مليان مطاعم وكافيهات ومحلات . بالنسبة للاكل الاردني فالاختيارات كتيرولكن اشهرهم واللي عجبوني جدا ( مطعم طواحين الهوا / مطعم الجبري / مطعم عمان الكبير) . الاسعار بشكل عام غالية في الاردن نسبة لأن الدينار الاردني يعادل 1.4 دولار فمثلا لما ندخل ناكل كفردين في مطعم وندفع 20 دينار يعني تقريبا 30 دولار مش طبيعي ! حتى المايه غالية جدا اغلي من تركيا ومن دول كتير في اوروبا
- زرت جرش وهي تبعد عن عمان خمسين كيلو بالعربية . مدينة بسيطة مشهورة بالمعالم التاريخية القديمة . قعدت فيها ساعتين ورجعت لعمان.
- اتحركت من عمان للبحر الميت وفي طريقي طلعت جبل نيبو وزرت مكان اسمه مقام النبي موسى فوق الجبل . وانت فوق هتشوف فلسطين والبحر الميت . المكان ساحر
- وصلت البحر الميت كنا حاجزين في فندق dead sea spa hotel . الفندق لطيف موقعه ممتاز ع البحر مباشرة ولكن الخدمة مش جيدة جدا وكان زحمة جدا اعتقد بسبب اجازة العيد .. نزلت اعوم في البحر الميت وحسيت اني بعوم في ماية نار
نسبة الملوحة عاليه جدا وكثافة المايه تقيلة وطبعا حذاري حد يغطس او يخلي الماية تلمس وشه .
- اتحركت من البحر الميت في طريقي للكرك. في نص الطريق وقفت دخلت يمين ف وسط الجبال وطلعت طريق حارة واحدة رايح جاي في وسط الجبل لمدة نص ساعه لحد ماوصلت لينابيع مياة منطقة ماعين واسمها بالانجليزي Ma'in Hot Springs ركنت العربية ونزلت اعوم في شلال ماية طبيعية درجة حرارتها 40 درجة في وسط الصخور. احساس رائع انصح اي حد ف الاردن يزورها .
- نزلت طريق منحدر جبلي خطير لمدة نص ساعة تاني لحد مارجعت الطريق السريع وبعدها كملت للكرك . الكرك مدينة جبلية وبيئتها صحراوية اشهر معالمها قلعة الكرك.
احسن مطعم هناك اتغديت فيه اسمه Kir Heres مقابل لقسم الشرطة الكرك . الاكل فيه لذيذ جدا والاسعار ممتازة والجو العام والديكور تحس بهدوء نفسي جواه.
- اتحركت من الكرك للبتراء حوالي 140 كيلو بالعربية. البتراء تعتبر من اجمل الاماكن الطبيعية والتاريخية علي مستوى العالم.. الفنادق هناك رخيصة . حجزت ليلتين ب 45 دولار في فندق نجمتين . دخول منطقة الاثار والجبال في البترا للاجانب بشكل عام التذكرة ب 50 دينار اردني لكن للمصرييين بشكل عام التذكرة ب 1 دينار اردني فقط . ودا مش في البترا بس لا دا مكان سياحي او تاريخي زورته كنت بتعامل بسعر الاردنيين وليس الاجانب . اتسلقت الجبال لمدة ساعه خلال التسلق تلاقي خيم فيها شاي وماية تريح شوية وتكمل تسلق لحد ماتشوف البترا كلها من فوق . ونزلت كملت ف الصحرا وركبت خيل. البترا بشكل عام البترا عايزة بوست مفصل لوحدة عشان اقدر احكيلكم علي الجمال اللي فيها.
- اتحركت من البترا ل وادي رم كنت حاجز كامب من موقع بوكينج ليلة ب 60 دولار شامل الفطار . اتحركت بالعربية لحد ماوصلت مركز الزوار في وادي رم . ركنت فيه العربية واتصلت علي واحد من الكامب جالي بعربية جيب ياخدني عشان ماينفعش امشي بعربيتي ف الصحرا . عملنا جولة بالجيب ف الصحرا لمدة تلات ساعات شوفت فيها انواع جبالة وصخور ورمال مش طبيعية وبعدها وصلنا للكامب قبل المغرب . طلعنا فوق الجبل نشوف غروب الشمس وبعدها نزلنا قدمولنا شاي بدوي بالمرمرية وكملت الليلة ف الكامب مفيش غير ضوء القمر والجبال . جو ولا الافلام..
- اتحركت ف اليوم التاني من وادي رم للعقبة حوالي 60 كيلو بالعربية. العقبة مدينة صغيرة وانت ع البحر بتشوف طابا في مصر وبتشوف اسرائيل . قضيت يوم ف العقبة وسلمت العربية لمكتب avis اللي ف العقبة . ودا كان اتفاقي من الاول معاهم اني هستلم العربية ف عمان واسلمها ف العقبة
- ف العقبة حجزت تذكرة باخرة لمصر ب 75 دولار من شركة الجسر العربي ودا موقعهم www.abmaritime.com.jo
الرحلة مدتها ساعتين ونص من العقبة لنويبع . في ميناء العقبة ختمت خروج من الاردن وبعد ما الباخرة اتحركت بساعة لاقيتهم بينادوا علي كل الناس ف المايكروفون بتاع الباخرة ان الكل ياخد باسبورة ويتحرك للمكتب اللي جنب الكافيتيريا . روحت لاقيت اتنين ظباط جوازات مصريين معانا ف الباخرة اخدوا الباسبور ختموا دخول مصر وانا لسه ف الباخرة ف نص الرحلة اساسا . وتقريبا كانوا بيعملوا كدا عشان يسهلوا الاجراءات بدل ماتنزل ميناء نوبيع وتستني كتير . وفعلا لما وصلت نوبيع خرجت من الباخرة لاقيت ظابط شاف الختم وخرجت بعدها من الميناء علي طول .. اتحركت من نوبيع لدهب
- بعد خمس ايام في دهب اتحركت لمطار شرم الشيخ . كنت حاجز تيكت لاسطنبول علي طيران بيجاسوس . وهو الطيران الوحيد اللي بيروح اسطنبول من شرم والغردقة . مصر للطيران وتوركش ايرلاين مش بيروحوا دايركت.. ركبت الطيارة وصلت اسطنبول بفضل الله بعد تلات ساعات ونص
اسف ع الاطالة ولو في حد عنده اي استفسار لاي حاجة انا موجود
البوست طويل شوية عشان اقدر انقلكم كل التفاصيل اللي ممكن حد يحتاجها
اولا انا عايش في تركيا بقالي اربع سنين . في اول يوم عيد الاضحي سافرت من مطار اسطنبول لمطار عمان علي الخطوط الاردنية . الطيارة معقولة لحد ما لكن لا تقارن بالطيران التركي احسن منها بكتير
- وصلت مطار عمان دخلت من بوابات الجوازات الخاصة بالاردنيين عادي لان ماليش فيزا دخول للاردن . ظابط الجوازات سالني هتقعد فين في الاردن وهتقعد اد ايه ولما شرحتله ووريته حجز الفنادق ختم ع الباسبور وعديت . بعدها بعشرة متر قابلني واحد لابس لبس عادي وشكلة من الامن القومي اخد باسبوري وروحت معاه مكتبه قعدت تلت ساعه تقريبا جوة . كلها اسئلة من نوعية انت جاي الاردن ليه وليك معارف هنا ولا لا وحد يسيب تركيا ويجي يزور الاردن وهل تنتمي لاي احزاب سياسية او جماعات دينية ووريني حجوزاتك وكلام كتير عايز يتاكد من خلاله اني جاي سياحه وماشي . وبعدها اداني الباسبور وقالي حمدلله ع السلامة ومشيت.
- روحت علي مكتب تاجير السيارات AVIS استلمت العربية اللي اجرتها من خلال موقع rentalcars والصراحة كنت مختارعربية شيفروليه سبارك صغيرة ورخيصة ولكن اعتذروا لعدم توافرها حاليا وسلموني بدالها عربية ميتسوبيشي لانسر 2016 كامله بدون ما ادفع اي فرق
- كان معايا رخصة دولية ولكن انتهت بعد دخولي الاردن بيومين . ولكن سالت وعرفت اني اقدر اسوق بالرخصة المصرية في الاردن بس مش اكتر من شهر كسائح.
- قعدت يومين في عمان في منطقة وسط البلد عند الدوار الثاني . اشهر شارع هناك شارع ال rainbow مليان مطاعم وكافيهات ومحلات . بالنسبة للاكل الاردني فالاختيارات كتيرولكن اشهرهم واللي عجبوني جدا ( مطعم طواحين الهوا / مطعم الجبري / مطعم عمان الكبير) . الاسعار بشكل عام غالية في الاردن نسبة لأن الدينار الاردني يعادل 1.4 دولار فمثلا لما ندخل ناكل كفردين في مطعم وندفع 20 دينار يعني تقريبا 30 دولار مش طبيعي ! حتى المايه غالية جدا اغلي من تركيا ومن دول كتير في اوروبا
- زرت جرش وهي تبعد عن عمان خمسين كيلو بالعربية . مدينة بسيطة مشهورة بالمعالم التاريخية القديمة . قعدت فيها ساعتين ورجعت لعمان.
- اتحركت من عمان للبحر الميت وفي طريقي طلعت جبل نيبو وزرت مكان اسمه مقام النبي موسى فوق الجبل . وانت فوق هتشوف فلسطين والبحر الميت . المكان ساحر
- وصلت البحر الميت كنا حاجزين في فندق dead sea spa hotel . الفندق لطيف موقعه ممتاز ع البحر مباشرة ولكن الخدمة مش جيدة جدا وكان زحمة جدا اعتقد بسبب اجازة العيد .. نزلت اعوم في البحر الميت وحسيت اني بعوم في ماية نار
نسبة الملوحة عاليه جدا وكثافة المايه تقيلة وطبعا حذاري حد يغطس او يخلي الماية تلمس وشه .- اتحركت من البحر الميت في طريقي للكرك. في نص الطريق وقفت دخلت يمين ف وسط الجبال وطلعت طريق حارة واحدة رايح جاي في وسط الجبل لمدة نص ساعه لحد ماوصلت لينابيع مياة منطقة ماعين واسمها بالانجليزي Ma'in Hot Springs ركنت العربية ونزلت اعوم في شلال ماية طبيعية درجة حرارتها 40 درجة في وسط الصخور. احساس رائع انصح اي حد ف الاردن يزورها .
- نزلت طريق منحدر جبلي خطير لمدة نص ساعة تاني لحد مارجعت الطريق السريع وبعدها كملت للكرك . الكرك مدينة جبلية وبيئتها صحراوية اشهر معالمها قلعة الكرك.
احسن مطعم هناك اتغديت فيه اسمه Kir Heres مقابل لقسم الشرطة الكرك . الاكل فيه لذيذ جدا والاسعار ممتازة والجو العام والديكور تحس بهدوء نفسي جواه.
- اتحركت من الكرك للبتراء حوالي 140 كيلو بالعربية. البتراء تعتبر من اجمل الاماكن الطبيعية والتاريخية علي مستوى العالم.. الفنادق هناك رخيصة . حجزت ليلتين ب 45 دولار في فندق نجمتين . دخول منطقة الاثار والجبال في البترا للاجانب بشكل عام التذكرة ب 50 دينار اردني لكن للمصرييين بشكل عام التذكرة ب 1 دينار اردني فقط . ودا مش في البترا بس لا دا مكان سياحي او تاريخي زورته كنت بتعامل بسعر الاردنيين وليس الاجانب . اتسلقت الجبال لمدة ساعه خلال التسلق تلاقي خيم فيها شاي وماية تريح شوية وتكمل تسلق لحد ماتشوف البترا كلها من فوق . ونزلت كملت ف الصحرا وركبت خيل. البترا بشكل عام البترا عايزة بوست مفصل لوحدة عشان اقدر احكيلكم علي الجمال اللي فيها.
- اتحركت من البترا ل وادي رم كنت حاجز كامب من موقع بوكينج ليلة ب 60 دولار شامل الفطار . اتحركت بالعربية لحد ماوصلت مركز الزوار في وادي رم . ركنت فيه العربية واتصلت علي واحد من الكامب جالي بعربية جيب ياخدني عشان ماينفعش امشي بعربيتي ف الصحرا . عملنا جولة بالجيب ف الصحرا لمدة تلات ساعات شوفت فيها انواع جبالة وصخور ورمال مش طبيعية وبعدها وصلنا للكامب قبل المغرب . طلعنا فوق الجبل نشوف غروب الشمس وبعدها نزلنا قدمولنا شاي بدوي بالمرمرية وكملت الليلة ف الكامب مفيش غير ضوء القمر والجبال . جو ولا الافلام..
- اتحركت ف اليوم التاني من وادي رم للعقبة حوالي 60 كيلو بالعربية. العقبة مدينة صغيرة وانت ع البحر بتشوف طابا في مصر وبتشوف اسرائيل . قضيت يوم ف العقبة وسلمت العربية لمكتب avis اللي ف العقبة . ودا كان اتفاقي من الاول معاهم اني هستلم العربية ف عمان واسلمها ف العقبة
- ف العقبة حجزت تذكرة باخرة لمصر ب 75 دولار من شركة الجسر العربي ودا موقعهم www.abmaritime.com.jo
الرحلة مدتها ساعتين ونص من العقبة لنويبع . في ميناء العقبة ختمت خروج من الاردن وبعد ما الباخرة اتحركت بساعة لاقيتهم بينادوا علي كل الناس ف المايكروفون بتاع الباخرة ان الكل ياخد باسبورة ويتحرك للمكتب اللي جنب الكافيتيريا . روحت لاقيت اتنين ظباط جوازات مصريين معانا ف الباخرة اخدوا الباسبور ختموا دخول مصر وانا لسه ف الباخرة ف نص الرحلة اساسا . وتقريبا كانوا بيعملوا كدا عشان يسهلوا الاجراءات بدل ماتنزل ميناء نوبيع وتستني كتير . وفعلا لما وصلت نوبيع خرجت من الباخرة لاقيت ظابط شاف الختم وخرجت بعدها من الميناء علي طول .. اتحركت من نوبيع لدهب
- بعد خمس ايام في دهب اتحركت لمطار شرم الشيخ . كنت حاجز تيكت لاسطنبول علي طيران بيجاسوس . وهو الطيران الوحيد اللي بيروح اسطنبول من شرم والغردقة . مصر للطيران وتوركش ايرلاين مش بيروحوا دايركت.. ركبت الطيارة وصلت اسطنبول بفضل الله بعد تلات ساعات ونص
اسف ع الاطالة ولو في حد عنده اي استفسار لاي حاجة انا موجود