النهارده معانا بوست عن اكتر حاجة بتضايقك ف...

  • بادئ الموضوع بادئ الموضوع Mahmoudx Cairo
  • تاريخ البدء تاريخ البدء
M

Mahmoudx Cairo

:: مسافر ::
النهارده معانا بوست عن اكتر حاجة بتضايقك ف اجراءات السفر لبعض الدول " التصريح الامني " ✋
البوست ده تجميع لكل معلومات عن التصريح الامني اعمله Save ع طول متقدرش تستغني عنه ✈

يعني ايه تصريح امني ؟
•ده تصريح بتاخده من ووزارة الداخلية مختلف عن تصريح الجيش اللى بيطلع للى فى سن التجنيداو خلص جيشه ( سبق و اتكلمنا عنه ف بوست مفصل )
وده لازم لبعض دول هو تصريح مش بتخرج من المطار الا لما تاخده الاول وبتسلمه ومتقلقوش مفيهوش اى مشكله حاجه كده عامله زى تصريح الجيش للى فى سن التجنيد :)

بيطلع منين ؟

ده بيطلع من ظابط إدارة الاتصال بمصلحه الجوزات بمجمع التحرير هتلاقيها فى الدور التانى. غرفة رقم (15 ) ،لو ناس من محافظات لازم تطلعه من مجمع التحرير برضوة

الدول اللي بتحتاج التصريح الامني ؟
لبنان ، الاردن ، قطر ، السودان ، ماليزيا ، اندونسيا ، تركيا ،كوريا الجنوبية ،دول جنوب افريقيا، جيورجيا ، تايلاند

ازاي اطلع التصريح الامني ؟
وهنقلكوا خبرتنا بالتفصيل فى مجمع التحرير عشان نجيب المعلومات المؤكدة ونعرف كل الاوراق المطلوبه علشان نقدر نساعدك لاستخراج تصريح الامني :
1- شهادة انك موظف من الشركة اللي انت فيها لو بتشتغل
2- صورة البطاقة
3- تاشيرة دخول البلد اللي انت رايحها لو البلد دي بتطلب تاشيرة دخول
4- الباسبور

هتاخد الاوراق المطلوبة وهتروح مكتب ظابط الاتصال في مجمع التحرير وهتاخد استماره تملاها بس خلي بالك وانت بتكتب البيانات بتاعتك ولازم تتاكد منها كويس جدااااا
ويكون معاك تاريخ ميلاد الاب ده مهم جدا
وبيحتاج اسم الاب رباعي وبعدين هتقدم الاستمارة والباسبور وهتاخد رقم في ملف وهتروح بعد اسبوع تستلم التصريح ولازم تروح بنفسك
وانت رايح بلاش تروح بدري اوي خليها علي 11 علشان الدنيا بتبقا زحمه

معلومات هامه جدااااا

1- لو بلد زي تايلاند و ماليزيا و اندونسيا قدامك حاجتين :
١- مكتوب وظيفه ف باسبور (وظيفه مؤهل عالي مثل دكتور ، صيدلي ، مهندس ...... )
مش محتاج تصريح امني
٢- طالب او حاصل ع بكالوريس :
محتاج دعوة من اي حد ف البلد نفسها و بعد كده تقدر تطلع التصريح
*غير كده صعب جدا تسافر هتبقي مغامره كبيره

2- تركيا :
١- لو طالب او خريج محتاج تأشيره زياره علشان تطلع التصريح و التأشيره ديه محتاجه دعوة من البلد برضوة
٢-مكتوب وظيفة هتاخد فيزا سياحه عادي و تاخد الورق المطلوب و تطلع ع مجمع تجيب التصريح

3-لبنان فيزتها في مطار عند الوصول :
•لو طالب او مؤهل لازم تطلع الفيزا من سفارة لبنان و تاخدها ع مجمع تطلع التصريح

4-جيورجيا فيزتها اونلاين فيها حالتين :
١- معاك اقامه ف اي دولة عربية تقدر تسافر عادي من غير تصريح
٢- طالب او مؤهل او وظيفة لازم تطلع التأشيره من السفاره ف مصر و بعدين تطلع التصريح

4-الاردن :
•لو طالب او حاصل ع بكالوريوس محتاج دعوه من البلد علشان تقدر تطلع التصريح امني
•لو وظيفه عليا تقدر تسافر من غير تصريح

5- كوريا الجنوبية :
فيها قلق كتير الفتره ديه ،يفضل تاخد التأشيره مش سياحيه ،تاخدها زياره بدعوه من هناك و تطلع بيها التصريح الامني

6- التصريح ده مش بيحتاجه اقل من ١٨ سنه او اكتر من ٤٥ سنة

ملحوظه هامه ✌ :
•ناس كتيير ممكن تقولك انا سافرت الدول ديه من غير تصريح و عادي
تمام احنا مصدقينهم جداا لان ناس من التيم بتاعنا سافروا من غيره قبل كده
بس ده بيرجع لايه ؟؟؟؟
لنظره ظابط الجوازات ف المطار
احيانا بيقيم المسافر من اكتر من جانب :
دراسته و كليته ، محل الاقامه ، سبق ليه السفر ولا الباسبور ابيض ، الهيئه العامه للمسافر
منقول
LgtEupCaH4H7cfvKnRpOr9SNSMado5X4.jpeg
 
طيب انا نازل ترانزيت في مطار اسطنبول ساعة واحدة ومنها رايح لكييف.هل محتاج تصريح أمني.مع العلم أني مش هطلع من مطار تركيا؟
 
مش عارف ليه التعقيد وتحميل المواطن فوق طاقته مش ممكن يطلع التصريح الأمني ده من المحافظات احنا في قمة عصر تبادل المعلومات بأمان وسهوله وبعدين انته عايز تفرز الناس أمنيا كلف نفسك شويه واهو كله من جيب الناس وريحهم بلا قرف
 
سؤال؟
مواعيد العمل في مجمع التحرير من كام لكام!؟
وهل المجمع بيكون شغال في اجازة العيد ولا لأ ولو لأ هيبدأ العمل يوم 28 / 6
 
هيا الإجراءات دي بتاخد كام وقت
سريعه يعني ولا ايه
حد يرد ضروري
يعني انا مسافر ان شاء الله اول ٩
لو بدات في ٨ هخلص ولا لا
 


أكتب ردك...