أنا سعيد أن أكون في هذا الجروب الرائع المشجع...

[خالد سرور]

أنا سعيد أن أكون في هذا الجروب الرائع المشجع على السفر . وبسبب كلامكم عن السفر لدول مختلفة قررت أطلع رحلة لمدة 20 يوم إلى تركيا أنا والزوجة والأولاد ( طفلين 8، 6 سنوات ) الشهر القادم إن شاء الله . وأنا شايف ان في أعضاء كتير هنا عندهم خبرة كبيرة في السفر لتركيا . رجاء لا تبخلوا علي بالنصائح عن أفضل الأماكن اللي ممكن أزورها في اسطنبول وما هي المدن الأخرى اللي ممكن زيارتها في هذه المدة وهل أستطيع ترتيب برنامجي بنفسي والجولات وغيره علماً بأنها أول مرة أسافر تركيا

 

[Tarek Mohamed Farag]

حضرتك لو هتروح مده 20 يوم يبقي تروح اسطنبول ومدينه تانيه معاها كمان
ممكن طرابزون او انطاليا

 

[Tarek Mohamed Farag]

كارت المواصلات هناك istanbul card مهم جدا للباص والمترو وبتروح به كل مكان
ونصيحه متركبش تاكسيات الا في اضيق الظروف

 

[ماشاء الله الحمد لله]

وتخلي بالك من المحفظة والاوراق ايديهم خفيفة للاسف

 

[ماشاء الله الحمد لله]

بورصة حلوة جدااا لازم تروحها وجزيرة الاميرات

 

[Hussain Elsayed]

بلاش انطاليا شوية منفتحه ، خليك في اسطنبول+ طرابزون. ، ورحلة سعيدة وموفقه أن شاء الله

 

[Tarek Mohamed Farag]

ومتبدلش عمله من واحد واقف في الشارع حتي لو سعره احسن وبيتكلم عربي

 

[Mona Mansour]

ممكن تروح جزيرة الاميرات حلوة قوي وأهم حاجة كارت المواصلات هينفعك جدا في التنقلات ومن أفضل وسائل المواصلات هناك الترام لانك وأنت قاعد فيه بتقدر تتفرج على معالم البلد ولما تطلع من المطار متركبش تاكسي هتلاقيه غالي..ممكن تاخد باص اسمه Havatas لاسطنبول

 

[Tarek Mohamed Farag]

وتروح جولة بورصا يوم واحد

 

[Ahmed Mamdouh]

٢٠ يوم كتير. روح أماكن تانيا هاتتبسط
ممكن تروحوا ليلة أو اتنين على جزيرة من جزر الاميرات

 

[Iman El Sherif]

بورصة تركبوا التلفريك
جزيرة الاميرات ركوب عجل او كارتات وقعدات ظريفة بتروحوها بمركب في البوسفور متعه
اسطنبول فيها متحف دولما باهشه و جامع ايه صوفيا
Farah Wael Hallaba ممكن تقوليلهم على البلاد الريفية الجميلة اللي زورتيها ؟؟؟

 

[Ola Mohamed Hanafy]

بما ان معاك اطفال وديهم الاكواريوم اللي موجود في اسطنبول في فلوريا مول وجنب المول في جنينه وملاهي

 

[Mohammed Zakaria Abou Taqa]

شوف التقارير والڤيديوهات بتاعه عمرو بدوي ..

Amr Badawy

 

[Ola Mohamed Hanafy]

و٢٠يوم مدة طويله علي اسطنبول
لف في باقي المدن وممكن تحجز في الفنادق اللي بتبقي علي جبل اولدوج في بورصه تقعد يومين هناك علشان الطريق طويل من بورصه لاسطنبوا
وبعد بورصه في مدينه يالوڤا قريبه من بورصه وده مكان الحمامات التركي الطبيعيه

 

[Bouaz Hamza]

رحلتى لاسطنبول

سوف اسرد عليكم تجربتى بما لها وعليها لعل يكون بها نقطة ايجابية اتبعتها يستفيد بها احد اخوتى فى الجروب .
• حجزت موعد فى السفاره التركية وقمت بالذهاب فى الميعاد المحدد بعد ان جهزت اوراقى وهى :
. HR من مكان عملى
. تامين سفر بمدة الرحلة
. صوره من حجز الاوتيل على بوكينج
. ورقه مكتوبه بخط الايد انى موصى بحجز الطيران

الحمد لله قالولى استلم التاشيره بعد ثلاث ايام عمل وبالفعل ذهبت واستلمتها .

• توجهت بعد ذلك الى مجمع التحرير لاستخراج التصريح الامنى بعد ان جهزت اوراقى :
. صوره من الجواز والفيزا
. جواب موجه من العمل لهم
. برنت تامينى مختوم بختم النسر
. تقريبا صورتين

• بعد ذلك حجزت من طيران النيل على رحلة القاهرة مطار صبيحة ، كان سعرها فارق حوالى ١٣٠٠ جنيه للتكت الواحد عن مصر للطيران .

• قمت بحجز يوم باوتيل بجانب المطار لكى استثمر اول يوم وصول وحتى لا استهلكه فى التنقل وازيد من اجهادى ،
وكمان علشان الاوتيل بجانب مول via port انا عارف ان فيه افضل منه ولكن لعلى انتقى ما يناسبنى فيه ، ونوع من انواع التغير ، وعلى فكره به ملاهى كبيره وظريفة للاطفال والكبار كمان ، بخلاف المطاعم والكافيهات.

• وكان الوتيل اسمه miracle istanbul asia ذات الخمس نجوم بقيمة الليلة 49 يورو للفردين .
• وقمت بالصباح باستقلال باص الى تقسيم وجهتى الثانية ، والانتقال من خلال باصات هافانا بتكلفة ١٥ ليره.

• الى فندق feronya hotel ذات الاربع نجوم بقيمة الليلة بالافطار 41 يورو للفردين
. تقيمى للاوتيل ؛ يصلح للعائلات وطبعا للشباب فهو هادئ ومحكم وسوده الاحترام من الستف والجيست وفطاره هايل
والغرف معقوله الى حد كبير ونظيف ، ويبعد سير عن ميدان تقسيم دقيقتين تقريبا ٢٥٠ متر ، فهو مقابل لمحطة هافانا بالظبط ، ولكن يبعد عن ضوضاء الميدان وشارع الاستقلال الذى لا انصح ولا يصلح للسكن سواء عائلات او شباب.


الاقامه فى مثل هذا المكان فى تقسيم جميلة جدا وذلك للاتى؛
• انت فى سنتر شبكة المواصلات لاسطنبول كلها
• بعد ان تقضى يومك فى التجول فى ارجاء البلد ترجع الاوتيل وترجع تنزل تقضى وقت جميل فى الميدان وتتسوق من شارع استقلال وتقوم بتناول العديد من الاطعمه المتاحه بكثره ، زى ما تكون نازل من شقتك تقف على ناصية شارعك هنا .
فده هيوفر عليك كتير علشان المحلات بتقفل الساعة العاشره فى البلد عموما وفى تقسيم من 10 : 11 ده اخرهم.
. لا انصح ان نبعد فى اختيار الاوتيل مسافة اكثر من ذلك ، والاهم ان تتجنب ان يكون فى شارع به منحدر هتتعذب ، لانى جربت ثلاث اوتيلات فى نفس المنطقه ولكن ذكرت افضلهم .

• عايز اوضح ليكم ان اهتماماتى الاكل والشوبنج والجولات الحره واليكم بعض جولاتى :
• توجهت من تقسيم الى مسجد محمود باشا بواسطة باص رقم 47a الى محطة امينونو بجوارها مباشر السوق المصرى وسوق محمود باشا وطبعا المسجد .
ومش تنسوا تستمتعوا باكلت سمك على خليج البسفور اسفل الكوبرى ، المكان قعدته جميلة بمنظر ساحر والتكلفة معقولة نسبيا فى حدود 75 ليره للفردين ( بس على فكره برده خدوا بالكم الاكل عينات ومش شبه سمكنا ، بس عيش التجربه والمنظر حلو والطعم لذيذ )
وفى امام المطاعم مرسا للمراكب بتقوم بجوله فى البسفور

• اسواق الفاتح لو حابب تزورها هتركب من تقسيم باص رقم 61B مش هتختلف كتير عن السوق المصرى
ملحوظه ؛
مش تعتمد كتير فى مشترياتك على الاسواق دى ، لان هتلاقى المولات احلى واشيك بخلاف هتلاقى برندات بسعر معقول جدا.

● طبعا مش ترجع من غير ما تجرب المشويات هناك ممتازه ، والمكرونه بالسى فود هايله ، وممكن تلاقى مطعم فى شارع الاستقلال جميل فى حدود 30 ليره على اليمن فى منتصف الشارع ليه تراس صغير كده .ومش تفوت الابن بوفيه فى بيتزا هت هناك غير هنا خالص .وابعد عن كنتاكى وحش خالص عندنا افضل بكتير .

○● نيجى بقى للجد الشوبنج
• مول جواهر وده محطتين من تقسيم بالمترو فى محطة sisil شيشلى والمول اعلى المحطه وليه مدخل من المحطه نفسها.
وفيه جميع المركات وسينما وملاهى بخلاف المطاعم والكافيهات ملحوظه ؛ اسعاره عاليه نسبيا .
وتقدر بعد كده تخرج منه وتتمشى حوليه فى محلات كتير ممكن حاجه تناسبك

• مول اوليفيوم وده تقدر تروحه من تقسيم بباص رقم 93T وتنزل محطة نيتنبورنو هتلاقيه بجوار المحطه وده ممكن اقولك خليه الترشيح الثانى بعد الى جاى

• واخيرا مول بور 212 تروحه من تقسيم مباشرة بباص رقم 89C وده فى حد ذاته انجاز لان اول مره اروحه ركبتله اربع مواصلات على وصف واستشارة الناس .
المول ده ممتاز اوت لت وبه جميع ما تشتهيه وياريت تبدأ بيه علشان مش تفقد كتير من مخصصاتك المالية للشبوبنج قبل ما تروحه . لان فيه حاجات هتندم انك اشتريتها من بره المول ده لما تلاقى الى فيه . وركز على البرندات فى شرائك لان سعرها مش فارق عن غيرها.

• حاجه اخيره عايز انصح بيها اعمل حصر للاماكن الى هتزورها وشيل صور ليها هتكون وسيلة جيده للتواصل بيها مع الناس لان معظمهم مش بيعرفوا غير التركى
وشكرا ليكم ويارب تطلعوا بحاجه مفيده من رحلتى . ورحله سعيده . ❤
منقول..

 

[Ramy Pasha Reda]

حضرتك طالع من مصر ولا من برة؟

 

[Soumaya Chouchene Ashraf]

بصراحة مع احترامي تركيا لو ببلاش ماراروحهاش تاني مصر احلى منها مليار مرة و كنت غيرت وجهة كذا اصدقاء بدل تركيا لمصر و كلهم قالو مصر احلى بكثيييير و بطلو يروحو تركيا و بقوا يجيو مصر

 

[Amr Borham]

انا رحت تركيا وشايف انك تقدر تلفها كلها .
انت تمسك مدينة مدينة وتشوف الاماكن اللي تروحها وتاخد بالك من ارهاق التنقل الكتير.
اعمل برنامجك بنفسك
شوف مثلا عاوز تروح بحر فتحط انطاليا معاك
شوف اهتماماتك وحاول تستفيد بالمدة دي
بالتوفيق واحنا موجودين لو عاوز اي استفسار

 

[Nody Metawe]

رحلات مدينة اسطنبول
الجامع الازرق .
توب كابي والمقتنيات النبوية العظيمة .
ايا صوفيا .
قصر دولماباهشه قطعة فنية رهيبة الجمال.
تلال اسطنبول تل العرائس ومنطقة تشاملجا .
بيرلوتي ومقتنيات الكاتب العظيم .
برج الفتاه وقلعه روملي .
تقسيم وشارع الاستقلال .
البسفور والايمنونو .
جراند بازار .
السوق المصري .
متحف الشيكولاته .
اكواريوم .
حديقة منياتورك .
رحلة مدينة بورصا 130 ليرة شاملة الغداء + ركوب التلفريك .
رحلة صابنجا ومعشوقيه 130ليره شامله الغداء + تذكره دخول حديقة الحيوانات .
رحلة مدينة شيلا واجفا .
رحلة جزر الاميرات .
وطبعا انطاليا ورحلاتها ومغامراتها الجميله .
وفيه طربزون ورحلاتها المميزه .
وفيه كمان فتحية وبودروم وروعه البحر والجمال الخلاب.
وفيه مارمريس جنة الله في الارض فعلاً.

 

[Nody Metawe]

من اجمل المناطق والرحلات هي رحلات واقامة مدينة طربزون الحقيقة ماشاء الله تبارك الله علي جمال الطبيعة .
وكمان موجود فيها نشاطات كتيره .
رحلات مدينة طربزون
رحلة مصنع الشاي وبحيرة اوزونجول
رحلة اوردو - جرسون
رحلة معالم مدينة طربزون ودير سوميلا
رحلة ريزا - آيدر