بص يا باشا
اولا لو عايزها رحلة شهر عسل بمعنى فى اول شهر من جوازكم هيكون صعب، انما لو رحلة شهر عسل بمعنى هتكون بعد الجواز بأكتر من شهر مش هيكون فيه مشكلة.
طب ليه: عشان نظام استخراج الفيزا والتصريح الامنى واجراءاتهم.
ثانيا الخطوات بتتم كالتالى:
١ - بتكون مجهز جواز السفر + حجز فندق من بوكنج + حجز طيران مبدئى + تاخد صورتك وصورة مراتك سكان + تأمين دولى لمدة شهر لكل واحد فيكم + خطاب من جهة العمل بالانجليزى او سجل تجارى وبطاقة ضريبية مترجمين انجليزى + كشف حساب بنكى عن اخر ٦ شهور.
كل الحاجات دى بتعملها سكان بى دى اف وتسيفها على الكومبيوتر.
٢ - بتدخل على موقع السفارة وبتملى الابليكيشن لكل فرد على حدة ( بمعنى ان اخر سؤال فى الابليكيشن هيسألك هل فيه مرافق معاك هتقول لا وتنهى الابليكيشن ) وتختار ميعاد المقابلة.
وبعد كدة هتعمل نفس الخطوات مع الزوجة.
٣ - هتروح ميعاد السفارة مع الزوجة وتقدم ورقكم مع بعض حتى لو كان ميعاد المقابلة مختلف و يكون معاك عقد الزواج مترجم بردو وتقدمه هناك.
٤ - هياخدو منك الاوراق ويطلعو عليها وهياخدو صورة عقد الزواج والترجمة ويحددلكم ميعاد تستلم فيه الباسبورات. ودى ممكن تروح انت لواحدك تستلمهم. واكد على موظف السفارة موضوع الزواج عشان بيتكتب فى فيزة مراتك انها مرافقة ليك ( رفيقات) عشان ميعملكش مشكلة فى التصريح الامنى او المطار. وهتدفع ٦٠ دولار ( بالدولار حاليا مش بالمصرى ) وغالبا بتستلم الجوازات بعد ٣ ايام وفيها الفيزا وبتكون سارية لمدة ٦ شهور واقامة ٣٠ يوم.
٥ - بعد كدة بتطلع بالجوازات على مجمع التحرير بعقد الجواز وصورته + خطاب جهة العمل وتكون عارف اسم والدك الرباعى وتاريخ ميلاده وبردو اسم والد الزوجة الرباعى وتاريخ ميلاده وتكتب طلب الموافقة الامنية ودةبياخد حوالى اسبوع وتستلمه.
بعد كدة بقى تحجز فندقك و طيرانك فعليا وتتوكل على الله ومتنساش بردو تاخد اصل عقد الجواز وانت مسافر عشان هيسألك عليه فى المطار مع صورة منه احتياطى.
عشان خاطر الترتيب دة ذكرت انك مش هتلحق فى اول ٣٠ يوم جواز تعمل كدة الا اذا قضيت وقتك بعد الجواز فى استلام اصل عقد الزواج والذهاب لمكاتب الترجمة ومقابلات السفارة ومشاوير المجمع فى شهر العسل.
وبخصوص عمل طلب منفصل للزوجة هذا ما تم معى لانى كنت عامل فى الاول ان هيه مرافقة بنفس رقم طلبى وموظف السفارة رجعنى وقالى لازم طلب منفصل ليها.
ملحوظة: هذا ما تم معى وما قمت بعمله بنفسى بدون اللجوء لشركات سياحة او اى حد.
انا اتجوزت فى شهر اغسطس وبدأت الاجرءات فى اكتوبر وسافرت فعليا فى ديسمبر لما لقيت صلاحية الفيزة طويلة.
