طيب انا محتاره بين تروبيتال نعمه باى و راديسون بلو شرم الشيخ وهقعد ان شاء...

[Ma Donna]

طيب انا محتاره بين تروبيتال نعمه باى و راديسون بلو شرم الشيخ
وهقعد ان شاء الله اربع ايام قولولى اعمل فيهم ايه عايزه استمتع فعلا
و نفسى اروح طابا جدا من شرم تستاهل ولا لا
واعمل فيها ايه و بينهم وقت قد ايه

 

[Ahmed El Esawy]

من شرم لطابا ساعتين ،روحي راديسون بلو افضل،

 

[Ashraf Sakr]

انا حجزت في تروبيتال ولما وصلت لغيت لانه سيّء

 

[Mohamed Samir]

راديسون بلو أفضل وان كان في فنادق أفضل من راديسون ونفس السعر تقريبا

 

[Khaled Aly]

تروبيتال نعمة باى
ميزته انه فى خليج نعمة وبيطل على الشارع الرئيسى اللى اسمه شارع ملك البحرين
قدامه ديسكو هارد روك وتحته ديسكو ليتيل بودا وقريب من كل حاجة وكارفور كمان ...
أكله كويس جدا مقارنا بغيره فى شرم الشيخ
فيه 4 حمامات سباحة منهم واحد فيه أكوا صغيرة وزحاليق
والتانى حمام اوليمبى بس خطر على اللى مبيعرفش يعوم لان مالكش طول
والثالث فى أخر الفندق عند فيلات التايم شير
اما الرابع ففى المبنى الرئيسى
الفندق ينقسم لجزئين
الجزء القديم اللى فيه المبنى الرئيسى 5 أدوار وحمام السباحة والمطعم الأساسى
انصح بيه وبشدة خصوصا لو دور أرضى امام البسين ...
لانك قريب من البحر والممشى والميدان الرئيسى
اما الجزء التانى فهو الجديد وحجراته ممتازة اللى بيحتوى على حمامات الأكوا و2 بسين ومطعم كبير جدا جدا
بس علشان تطلع بره تمشى او تاخد عربية جولف وتاخد الأسانسير وتنزل 5 أدوار لحد ما تخرج من الباب الرئيسى...
الشاطئ بتاعه ضيق نسبيا بس شاطئ رملى مناسب للاطفال ولجميع الأعمار
انا عن نفسى مكنتش متضايق منه ...
ومش سئ ... واليومين دول بيعمل عروض حلوة جدا
====================================
راديسون بلو
اسم معروف جدا
مكان ممتاز فى خليج نبق
طبعا بعيد عن خليج نعمه
ولو انت مش مهتم بالنزول والتمشية فى خليج نعمة فبصراحة نبق وخليج القرش وهضبة أم السيت فنادقها احلى من خيج نعمة
اراديسون حتلاقى فيه الخدمة تمام لو توماس كوك منزل فيه أفواج
معظم نزلاؤه انجليز عكس باقى الفنادق روس
حاليا طبعا كله مصريين وخلايجة

اراديسون بيقابله من الجهة الاخرى فندق بارك إن
وده فيه ملاهى مائية كبيرة وحلوة وخدمته ممتازة
لما نزلت فى الراديسون من 4 سنين كان لى الحق فى دخول بارك ان مجانا
فبرضه نسأل فى الموضوع ده الحجز نفسه مش شركة السياحة
عيبه حاجة واحدة
الشاطئ
الشاطئ صخرى
حتمشى على سقالة وتنزل فى مكان كله شعاب مرجانيه وملكش فيه طول
طبعا المناظر الطبيعية مالهاش حل
بس مفيش شاطئ ى نعمة كده تقف فيه وسط المياه وتسترخى
وده طبعا راجع لك
=====================================
لو عايز دوشة وخليج نعمة ووسط البلد وشاطئ مناسب للاطفال والكبار والاسترخاء يبقى توربيتال
لو عايز هدوء واسترخاء وبتحب السنوركلينج ومن هواة مشاهدة الشعاب المرجانية والسباحة يبقى الراديسون
طبعا فيه فنادق كتير زى الهلنان والموفينبيك وكيروسيز وهيلتون دريمز وسيرا وسافوى و جراند روتانا .... الخ
بس انت حددت مقارنة بين 2 فبلاش تشتت نفسك
انا على فكرة منزل الصور بتاعتى على tripadvisor بكامل التعليقات

 

[Khaled Aly]

ما انصحش بالذهاب لطابا وانت فى شرم الشيخ لان المدة قصيرة
طابا لها طريق تانى ( نخل ) بيقطع سيناء من المنتصف
طابا ممكن تنلى فيها مع نويبع
لان حتى دهب كمان صعب تجمعيها مع طابا
لا انصح بدهب ...
نويبع افضل بكتير علشان فيها وادى الوشواش وراس شيطانى
وفى الطريق لنويبع بتاخد طريق نخل فحتعدى على طابا وخاليج الفيورد
وكاسل زمان فكلهم قريبين لبعض
اما دهب فبعيدة عنهم بأكتر من ساعتين
دهب فيها البلو هول ( الكل عارفها ) والثرى بولز ومحمية أبو جاللوم اللى ممكن تتراح بالجمال أو بالمركب ودى مغامرة حلوة
وفيه كمان وادى جنى
اسف للاطالة

 

[Yasser Elsaidy]

للاستفسار وبرامج شرم الداخلية 01122111105

 

[Yahya Zacaria]

انا نزلت في راديسون بلو واتبسطت كان كويس !!!

 

[Yasser Elsaidy]

تروبيتال نعمة باى كويس جدا
فيه كل المميزات خمس نجوم اكوا بارك وفي خليج نعمة قريب من كل شىء
ولو محتاجين حجز باسعار كويسة عندى