М
Мухамид Самир
:: مسافر ::
السلام عليكم يا شباب مصر انا حابب أوضح حاجه بالنسبه لموضوع جورجيا وأتمنى الناس تفهمنى صح وبدون اى زعل الموضوع ان فى شباب محترموش ان الحكومه الجورجيه كانت مسهله للمصرين السفر سياحه عن طريق شراء فيزا إلكترونيه وحجز تذكره طيران فى ناس وصلت جورجيا كسرت فيز وعملت مشاكل وسرقه ونصب واتعاركوا مع بعض فى الشوارع ونسوا ان دى مش مصر دى دوله فيها قانون بيمشى على اى حد ومراقبه بالكاميرات والشرطه فيها علىً قد انهم محترمين بس شديده جدا فطبعا الحكومه الجورجيه بتسعى لدخول جورجيا الاتحاد الاوروبى خايفه على نفسها من اى شئ يسئ ليها فطالبت السفارة المصريه بقيود وضمانات لرجوع السايح المصرى وعدم كسر الفيزا فى ناس بتقول عشان تركيا أحب أقول تركيا ممكن تدخلها من كذا دوله تانيه ملهومش تصريح امنى طبعا انا بقول الكلام دا لانى مش مقيم فقط فى جورجيا انا متزوج ومعايا اقامه دايمه يعنى مواطن ليا حقوق زى اى جورجى فى البلد حاليا الوضع فى جورجيا ان دوريات الشرطه باستمرار بتوقف اى شخص وتسألوا على باسبوره وبيتم التشيك على ميعاد انتهاء الفيزا ودا مكنش بيحصل قبل كدا ولو الفيزا منتهيه بيسألوا على الاقامه ولو مفيش اقامه بيترحل وبيتعامل معامله سيئه جدا دا غير انهم حاليا بيعملوا احصاء كامل لكل الشقق وبيدخلوا بكل احترام يعرفوا مين عايش فيها وايه وضعوا فى البلد وطبعا لو مخالف للقانون بيترحل فورى بلاش اللى بيزعل الواحد انى لما جيت جورجيا وكانوا يسألونى انت من فين وأقول مصر كانوا بيحترمونى جدا والله حاليا سمعتنا بقت زفت ودا بعد دخول نسبه من الشباب اللى خرب فى البلد وكانوا مفكرين انها عزبه واى شئ متاح لدرجه انهم كانوا بيتحرشوا بالجورجيات فى الشارع الشعب الجورجى شعب عندهم بعض من الطباع الشرقيه وطبعا الناس اللىً مفكره جورجيا بلد غنيه وممكن يوصل لأحلاموا فيها دا مش حقيقه لان هنا البلد غاليه فى معيشتها سواء ايجار او أكل او علاج واللغه الأولى الجورجيه والتانيه الروسيه يعنى الانجلش يعتبر معدوم ونسبه قليله اللى بيتكلموا انجلش وفرص العمل ضعيفه جدااااا تعتبر معدومه من غير اللغه وآسف انى طولت عليكم وأتمنى نتعلم ومنقفلش على الناس الملتزمة والمحترمه باقى الدول اللى مسهله للمصرين إجراءات الدخول وشكرا