B
Bandar Mohd
:: مسافر ::
السلام عليكم، اخ عبدالله او شي نبدا بالقبول اذا تبي جامعه كويسه يعني نتكلم عن ال 100 الاوائل لازم معدلك يكون عالي قبل كل شي يعني معدلك لازم يكون 3 من 4 لما تعادله على نظام التعليم الامريكي (ان شاء الله ان معدلك عالي) طبعا حط في بالك انه تقييم الجامعة يعتمد على حاجتين تصنيف الجامعه او ترتيبها وبعدين ترتيب الكلية. يعني ممكن تلقى جامعه ترتيبها 90 بس كلية الادارة عندهم ترتيبها 5 على امريكا، حط الشي هذا في بالك لما تبحث عن جامعات. ثانيا اختبار القبول الجيمات لاتستهين فيه وتجي هنا وتنصدم خل جزئية الرياضيات على جنب الفكره مو في الرياضيات وبس الفكره في طريقة الاختبار وحيثيته لانه اسئلتة عباره عن (الغاز) مو اسئلة عايديه ناهيك عن جزء اللغة واللي امريكان يفحطون فيه فما بالك في اي شخص لغته الاولى مو انجليزي. وبالنسبه للجامعات القوية يطلبون من 550 وطالع (هذا اذا تبي قوية) وازيدك كمان بعض الجامعات القوية يقول لك حنا والله ماعندنا متوسط درجة او حد ادني عندنا متوسط درجة المتقدمين، يعني اذا المتقدمين لسنة 2013 متوسط درجتهم 700 يعني لازم تكون درجتك اعلى من 700. اما الجامعات المتوسطه يمكن اقل بشوي يعني خل املك 500 وطالع في الاختبار، لاتقول تخصصي اداره وتاخذك العزه بالاثم، تبي تعرف الصدق رح لموقع الجيمات وشوف تجارب عن الاسئلة واذا تعرف التورنت حمل نسخه تجريبيه واختبر (على فكره الاختبار 4 ساعات او حولها) وبعدين حدد موقفك، اعرف كثير خريجين اداره فحطو ماجابوا اعلى من 400 (ماودي اخوفك بس لازم تعرف الواقع وماتجي وتنصدم). وبعدين نجي للتوفل ترا الجامعات القوية مايكتفون بدرجة اقل من 90 بالتوفل الا عاد اذا توفقت ولقيت جامعه عندها معهدها الخاص ودرست فيه بحيث يضمنون لك الدخول بشرط انك تتخرج من معهدهم. ثالثا الولاية شوف من تجربتي الشخصية كاليفورنيا هي افضل ولاية من ناحية جامعات فيها جامعات كثير قوية وجوها واهلها والوناسه كلها فيها عيبها الوحيد غلاها (الزين غالي) ولاكن انا اقول تستاهل. اذا تبي متوسط صرفيه وجامعات قوية عندك كولوراد بالتحديد جامعة دنفر (عندهم كلية البزنس من اقوي الكليات بامريكا) عيبها جوها برد جدا بالشتاء. انا اتفق مع الاخت منال برضه من ناحية مدينة سياتل ولاكن برضه عيبها جوها ممطره بشكل طويل وبارد بالشتاء وتراها مهيب غاليه المعيشه فيها مره معقوله والاخت منال ممكن تاكد الاجارات فيها على حد علمي تلقى ب 500 و 600 وصدقني ها الاسعار رخيصه، انا كاليفورنيا حاليا توهم رافعين الاجار ادفع 1275 بالشهر بس اجار (غرفه وصاله ودورة مياه (اكرمك الله والقارئين) ومطبخ. وعموما عزيزي الله يوفقك ويسهل دربك ومعليش للجميع على المعروض اللي كتبته