بما انكم مكسدين ومفيش حركة في القروب خلوني...

  • بادئ الموضوع بادئ الموضوع Ali Fakree Eldin ElSallabi
  • تاريخ البدء تاريخ البدء
عرض العطلة
A

Ali Fakree Eldin ElSallabi

:: مسافر ::
#1
بما انكم مكسدين ومفيش حركة في القروب
خلوني نحكيلكم قصه صارت معايا وانا مسافر ونبي رايكم في الي صار

المكان: #وارسو_بولندا
الزمن: شهر 8 الي فات

وصلنا انا وصاحبي ادم من برلين الي وارسو وكنا حاجزين فيها 4 ايام بعدها بنمشو منها لباريس ومنها لتونس ومنها ل #بنغاري الكبيده :)

عموما عندنا اسم الهوتيل الي حاجزين فيه مكتوب في الورقه الي طلعناها من موقع ال booking

وصلنا للشارع الي فيه الهوتيل جوجل ماب قاللنا ان الهوتيل مفروض قدامنا ، بحتنا قدامنا ، في بوابه فيها كم عماره ومفش هوتيل بكل

قعدنا انلفوا ربع ساعه في المنطقه واندورو في الهوتيل ونسالوا في الناس محدش عرف المكان
معش عرفنا شن انديروا ، مررت من قدامنا بنت وقفناها وقلنالها ممكن انديروا مكالمه من تليفونك ونعطوك حقها
قالتلنا مفيش مشكله
كلمنا الرقم الي في ورقه الحجز
رد علينا واحد يحكي بولندي ( في بولندا قليل الي يحكوا انجلش )
المهم دوت معاهم البنت
قالولها الحجز باسم من ؟
قالتلهم #ادم_الكوافي
قالولها اشويه تو اتجيك رساله فيها معلومات
سكرت المكالمه
جتها رساله فيها 4 صفحات :)
مكتوب فيها الاتي
( الاستاذ ادم الكوافي ستذهب للبوابه الخارجيه للمبنى وتكتب هذا الرقم 1357 في قفل البوابه
ستفتح البوابه الخارجيه ثم ستتوجه نحو العماره رقم 2 وتكتب الرقم 3474 ليفتح لك باب العماره وتصعد للدور الثالث شقه 6
وتجد خزانه صغيره تكتب فيها الرقم 125643790 لتفتح لك وتاخذ مفتاح الشقه )

درنا هذا كله ومعانا البنت ( الي متعرفنش ) بس تبي اتساعدنا لوجه الله )
خشينا للشقه
فيها 4 ديار وحمامين ومطبخ وجهاز ايرليس نت
وكتب ع الرف كان تبي تقرا :)

المهم
البنت ودعتنا ووصلناها لعند برا وردينا للشقه لقينا الدار الي يلا دارنا انفتحت وطلعت منها بنت قالتلنا hi وخشت للمطبخ خذت عصير وردت لدارها مكانهش اتشوف فينا :)

زبده الموضوع طلعت ان الشقه هذي زي بيوت الطلبه كل واحد في دار وفيها اربع ديار واربع اشخاص ميعرفوش بعضهم وايعيشو مع بعضهم عادي بحسب كل واحد كم مأجر يوم وكل دار فيها سريرين وبلكونين ودولاب كبير واسع ومكيف ودفايه :)

بس السؤال الي سالناه لارواحنا ، ان نحنا مزلنا مدفعنش الفلوس بتاع الحجز
عشان نحنا حاجزين ان نحنا حندفعوا عند الوصول للهوتيل :) او pay later كيف مهيا معروفه عند الي ديما يحجزوا

المهم
اليوم الثاني جانا تليفون من صاحب الشقه الساعه 11 الظهر
قاللنا: هل اعجبتكم الشقه ؟
انا: طبعا انها شقه جميله ونظامكم اعجبني جدا .
هوا: انا سعيد بذلك
(وكمل دوته بكل ادب )
هل يمكننا سحب مستحقاتنا من الفيزا المحجوز بها ؟
ام لديكم اي شكاوي بخصوص الشقه ؟

انا : بالطبع يمكنك السحب :)

هوا.: شكرا مستر ادم ، لا تنسي ان تذوق عصير مزارعنا الطبيعي الموجود في الثلاجه (باسم حضرتك ) . مع السلامه

الصراحه انا قعدت مذهول من الدقه والثقه في التعامل الي عندهم
يعطيك شقه من غير ميتعامل معاك شخصيا. وشقه فيها جهاز انترنت وايرلس وثلاجه فيها عصير باسمك وكتب واشياء ثمينه ميخافش انك تسرقهن واتعدي بل بلعكس ايتعاملوا معاك بثقه تخليك حتا لو فكرت اتدير لي حاجه مخالفه ، اتحشم منهم

قضينا اربع ايام في الشقه من غير منشوفوا صاحب الشقه وكل يوم انوض نلقا في الثلاجه عصير مكتوب عليه mr adam و
Ms elena
و
Dogargdy family
والاخير معش نذكره من

المهم لعند مطلعنا من الشقه وردينا المفتاح في مكانه ونحنا منبهرين بلموقف هذا وكل الي احاط بيه
ثقه وادب ورقي في التعامل ايخليك اتبحت في الوطن العربي واتقول #اه_وخلاص

واسمحولي كان طولت عليكم وانا نكتب :)
#تحياتي
 
#2
منور يا عليوة و البوستات إللي هكي يمتعني الحق و يبين كيف تعامل العالم مع الأمور هذينا ، عمومًا لو فكرت نمشي لوارسو حنقولك عشان تعطيني عنوان المكان :D

إستمر ..
 
عرض العطلة
#7
اووو هو في شي هكي !! سبحان الله عليك اخلاق و رقى ..يعلموك دروس بتصرفاتهم هنا تكمل حياتك و ما تلقاهن ...جدا استمتعت بالموقف تمنيته ما كمل .. يلا ان شاءللة نقعدو زيهم و احسن ..و شكرا ^^
 
#8
Esso Mîlaŋėstã
شكرا جزيلا علي كلامك وبالفعل الاجانب ايعلموك دروس مستحيل اتعلمهن في عالمنا العربي ،،، شكرا علي الكومنت المحفز :)
 
#9
استمتعت كثيراً بقراءة هذه القصة حقيقةً سلوك صاحب الشقة ونظامه وثقته لا يمكن اﻻ ان تجبرك على االتعامل معه بالمثل بل ومحاولة ان تضاعف احسانك !!
اتمنى ان اقرأ المزيد من هذه القصص الرائعة هنا :)
تحياتي ^_^
 
#10
Wiwã Ănã Cûtĕ
شكرا لتعليقك الرائع :)
وفعلا انا وقفت مدهوشا قدام معامله صاحب الشقه
وحتا البنت الي منعرفهش الي صببت معانا بلا اي اسبب :)
تقبلي تحياتي :)
 
عرض العطلة
عرض العطلة
عرض العطلة