هيلوووز ليا كم يوم بنزل البوست بس طبعاً النت...

[Nahla Boushnaf]

هيلوووز ليا كم يوم بنزل البوست بس طبعاً النت بائس جداً و مايبيش ينزل
#رحلتي_إلى_تركيا
ياريت لو اي حد عدا لتُركيا يشاركنا بتجربته و يتبع الهاشتاق هذا حنبدا انا اول وحدة و ان شاء الله يطلعن معلوماتي مفيدة و فيهن جو
الاكل : بدون مُبالغة اسطنبول مافيهش مطعم شين ! كل مطعم يغطي على الاخر
اهم نصيحة .. اي مطعم الجرسون مصبي برة و يقول تعال ماتخشلش لإن حينصب عليك و يحسبلك الوجبة بمبلغ و قدره ..
الهامبورجا متاعهم شينة ماتجوش شورها
الشاورما متاع اللحم احلى الدجاج مش نزيكة واجد و احسن مطاعم شاورما اللي في شارع الاستقلال من الجنب ..
احسن مطاعم الشعبيات نوعا ما تركينة القراند بازار و السلطان احمد .. مشاويهم سماح بكل .. احسن سندوشات كباب في البزار المصري كباب ع الفحم طعمتهن كيف كباب الصابري ..
كباب اسكندر حاجة جميلة خالص
احسن فطور .. شكشوكة من مطعم بامبي او فطور صباحي متاع كافي مادو
الحلويات طبعا الكنافة و البكلاڤا و الكيكات كلهن سماح .. الذ كنافة كنافة ع الفحم في البزار المصري و كنافة مادو كافي
الذ بكلاوة .. بكلاڤا سعيد
احسن كافيات /مادو كافي .. سعيد بكلاڤا..في كافي في القراند بزار بس ناسية اسمه من الدق العصملي ديكوره عتيق بس الجو متاعه سمح بكل .. سميت مكاني تهيالي اسمه هك .. متاع سميت و شاهي و عندهم كيكات سماح .. غير طبعا الكافيات العالمية ستاربكس و اخوانه
في مطعم ايطالي في وسط شارع الاستقلال جاي ع الجنب جربوه و ادعولي الذ اكل ايطالي ممكن تجربوه

انجو للحاجة التانية الشوبينق ...
شارع الاستقلال خودوا منه فكرة بس ماتشروا منه شي لإن الحاجات فيه اغلى ..
في طبعاً لالي بس كله جملة و دبش اقل من عادي
عوصمان بي دبش درجة متوسطة ممكن يتطلع منه كن حاجة
شارع الفاتح للعرايس قفاطين و ڤيلوات اشكال و انواع و درجات
المولات حسب النزاكة..
جواهر مول او شفاهر
استينيا بارك
كانيون
فورم استنبول
سيتي مول
كابيتول
الهوتيلات ... مش اي هوتيل ينسكن فيه لإن في اللي مكتوب عليهن خمس نجمات و هنا الله لا يروعك..افضلهن .. نيبون هوتيل بعد تقسيم سكوير بشوية .. تصميمه حلو و خدماته ممتازة نظراً لإنه في الاصل هوتيل ياباني عيبه إنه غالي حبتين .. يليه سي ڤي كي مقابل شارع الاستقلال علي طول كهوتيل عادي جداً بس جماله في إنه يطل علي شارع الاستقلال و تقدر تطلع امتى ماتبي ..
عيب الهوتيلات اللي في تقسيم ضيقاات لذلك لو تبي مكان مريح ابتعد علي تقسيم
الشقق الفُندقية فكرتهن نزيكة بس حسب الموقع و المكان .. اللي في عصمان بي نزيكات .. اللي في تقسيم صغيرات واجد ..
وسائل النقل ...
عمركم ماتثقوا في تاكسي مدرس و يضبحلك حيضحك عليكم اصلا .. دوروا تكسيات تجرولهن و عندهم عداد.. و الافضل نظرا للزحمة و غلاء التاكسيات الميتروات .. التعامل معاهن ساهل حفظ المحطات ساهل و التكلفة رخيصة جداً ..
دهشت التكملة في الكومنتات

 

[Ali Fakree Eldin ElSallabi]

شرح تفصيلي كامل
جاري القراءة

 

[Amani Alsharif]

نهوله نبوا بوست ع الاماكن السياحيه والمساجد والمتاحف

 

[Mohamed Elselini]

قوية كيف كباب الصابري

 

[فاطمة الفاخرى]

افطنوا للتاكسيات راهم نصابين
وفيه حركة رد بالك اتمدله ورقة الخمسين ليرة راهو ايبدلها بسرعه من غير ما تفطنله وايقولك عطيتنى خمس ليرات

 

[فاطمة الفاخرى]

الكنافة احلى كنافة حافظ مصطفى وعنده فروع فى كل اسطنبول
والسكن سلطان احمد افضل وارقى وأنظف من الاستقلال

 

[اشرقت نفسي]

ولى معداش شن ايدير

 

[Tamy Ali]

مشيتلها مرة وحدة فقط وهيا كبلاد لم تعجبني كثيرا بس كاكل نشهد بالله مافيها نقاش انه اكلها مش عاااادي خصوصا الكنافة