#دوله_للنقاش من اكثر الدول الي مفروض علينا ك...

[Ali Fakree Eldin ElSallabi]

#دوله_للنقاش

من اكثر الدول الي مفروض علينا ك ليبيين ان نحنا انسافرولها هيا تركيا
تركيا كانت بلا تاشيره
تركيا كانت المصدر الاول لتجار الملابس في ليبيا
تركيا مليانه ليبين وعندهم شوارع كاملات ساكنين فيهن غادي

نبو كل واحد ووحده يحكيلنا عن مشيته لتركيا
شنو احلي حاجه شافها في البلاد
شنو اسوء حاجه
احسن هوتيلات
احسن مطاعم
واي نصيحه ممكن نسمعوها من الناس الي سافرت تركيا ✈

#انطلقو

 

[Ahmed Gzeri]

مايعرفوش حاجه اسمها ريكسونا ..

 

[Nahla Boushnaf]

ذكرتني بالبوست اللي مفروض انزله ليا اسبوع سوووري بكل النت بائس عندنا حنديرلكم بوست مُفصل شوية اخرى

 

[Meme Ismail]

أحسن مناطق ف اسطنبول هن بيازيت و سلطان احمد و قولهانة و ايمينونو لأنهن أماكن تاريخية فسياحية و فيهن جو بكل و فيهن تنوع فالفنادق كيف ما تبي تلقى ف ال5 ستار و ف حتى 2 ستارز يعني ف متناول الجميع و ميزتهن فيهن عرب يشتغلوا غادي ف لو توحل ف حاجة تلقى من يفهمك و طبعا ف أماكن اخرى بس انا نحب هذين

 

[Orayda S. Gaderbouh]

ماعمريش مشيتلها تركيا ترانزيت فقط

 

[Mouna M Mailod]

اكتر بلاد كارهتها ولا عمري اسهفت عليها وشعبها ثقيل بكل

 

[Esraa Al-Naihoom]

أحلى أماكن هن الأماكن الي تمشيلهن بالصدفة وتكتشفهن بروحك قصاد الوقت هذا السنة الي فاتت كنت نحتفل بعيدميلادي في بورصا وشجعتني نحط بوست عالمكانات الي مشيتيلهن فيها

 

[Hebatallah Suliman]

اسوء حاجه المطار
اتمرمط مرمطه علي كيف كيفك
تنذكر ما تنعاد

 

[Hanan Youssif]

انا من الناس الله هم Turkey haterمع أني ماشيتلها واجد من زمان وتوا وتقريبا زرت كل الأماكن التاريخيه وأكثر مت مدينه
في 2013كانت المفاجأة نشوف في منتجعات تحصلت علي تقييم على trip advisor
لقيت منطقه اسمها بيليك Belek تبعد عن أنتاليا 30كم ومنتجع خيالي اسمه كاليستا calista luxury resort
شدينا الرحال ومشينا
وكان روعه خدماتهم ومستوى المكان مختلف عن كل شيء موجود في تركيا
10ايام صيفيه بأمتياز
وغمضت عيوني اليومين اللي في اسطنبول بأنتظار رحله العوده

 

[Radia Ali]

ماشية لاسطنبول فقط ومرة وحدة، هي ع أساس مشية ترانزيت بس طويلة قعدت فيها 10 أيام.
من الحاجات الحلوة فيها إن المواصلات سهلة والمطاعم في كل مكان. وأخلى مطعم كليت فيه هو "كباب كينغ" والأسعار في كل شي تعتبر رخيصة جدا مقارنة ببعض الدول. قعدت في زيورخ هوتيل أعتبره ممتاز والموظفين يحكوا إنجلش تمام. من أحلى الأماكن هي الأماكن التاريخية: المتحف الإسلامي، وآيا صوفيا، والمسجد الأزرق ومنطقة السلطان أحمد. حضرت صلاة الجمعة غادي كان شعور غريب.
من أسوأ العيوب إنهم أغبى من الفرنسيس في الإنجلش! بس برضو في عرب واجد ويحكوا عربي فيساعدوك.

 

[Salwa Elallem]

اول مره في حياتي نسافر كانت لتركيا احلي سفره في عمري كله
قعدت في هوتيل
Holiday Inn Istanbul airport
تعرفت علي بنات و قعدت صديقاتي لعند توا
مش عارفه شنو انقول و نعبر كانت رحله مفيده
ماما مرضت و دارت عمليه و انا و بابا بس كنامعاها
وقفو جنبي و سعادوني و مخلونيش انحس روحي في غربه انا بالنسبه ليا احسن ناس
ان شاء الله نعاودها و نمشي للاماكن يلي كتبتوهن كلهن لاني كنت في مكان راقي و هادي
بكل
و مازرتش شارع الاستقلال ولا السلطان احمد انا اول ليبيه تمشي و ماتورهنش
بلعكس هما مش معصيين ولا صعب اتفاهم معاهم

 

[Asia Mohameed]

تركيا بلد من حيث الطبيعة تجنن مواصلاتها متوفرة بكثر وهادي من احسن الحاجات شعبها اغلبيته بليد نعتبر فيه
نزلت في فندق كارتون في تقسيم معجبنيش هلبة بس المرة التانية خدينا شقة فندقية في هوم سويت هوم في عصمان بك كان حلو وهادي وراقي هلبة الاكل كبابهم يجنن والقشطة بالجبنة في الجراند بازار تحححفة وتلقا في امينونو زي القوارب يبيعو في سندوتشات سمك حلوات لازم تجربوهم الحلقوم بطعم الرمان حلو هلبة القهوة العربية في محل في الجراند بازار مقابل السوق المصري قهوته روعة للناس اللي تحب القهوة وفي محل في منطقة بكركوي متع سمك يدير في سردينة مقلية تقول عليها سمينسه حلوة الناس تخش تاخد فيها بروحها تاكلها وتروح
الاماكن كلها تعتبر حلوة خاصة الاماكن التاريخية انا حبيت بورصا فيها اقدم شجرة والجبل فوق كانت الحرارة تحت الصفر قريب يبسنا

 

[Aisha Bubaker Albaylah]

تركيا <3 زمان كنا نمشولها مره مره في الصيف ....باتي يحبها بكل لدرجه انه خششنا مدرسه التركيه بتاع السفاره هنا وخذيت شهاده ابتدائي ( طبعا من فضل ربي انها كان فيها ابتدائي بس هههه) وخذيت اللغه وتوه نسيتها كلها الحمدلله ..مازلت نقرا ونكتب بس ..طبعا نقرا في الكلام بدون مانفهمه ..اخر مشيه لتركيا كانت في 2005 ..ناسيه تفاصيل واجد ..تركيا برمت فيها مكانات واجدات اسطنبول انقره ازمير اسكيشهير اكشهير ..الحلو عندهم انه كل منطقه مشهوره بحاجه معينه مثلا اكشهير هذي مدينه جحا تلقي صور وتماثيل جحا في كل مكان وكل حاجه ..وفي منطقه نسيت اسمها كانت مشهوره براقص التنوره ...احسن هوتيل نذكر hayatt regency . بس الحق غالبا كنا نقعدو في شقق لانه كنا نقعدو في فتره طويله اغلب العطله الصيفيه تقريبا . اسوأمكان في تركيا هو اسطنبول ..نقصد اسطنبول اوروبا الي معبيه عرب وليبيين الي فيها جامع السلطان احمد والحاجات هضينا تهايالي هيا هذي اسطنبول اوروبا .لانه اسطبول اسيا المقابله نذكر كانت احلي واهدي ..اطبعا غادي الاتراك كلهم يحكو عربي ومايطلقوكش نين ينصبو عليك او يسرقوك وهرجه بكل ..واحسن مكان بالنسبه ليا كان kuzuluk منطقه الحمامات الكبريتيه .طبعا هو مكان زي شقق فندقيه فيهن حمامات كبريتيه صحيه وهكي هو مكسد بكل بالنسبه للناس الي تحب الدوشه والسوق وحتي المطاعم فيه كانن بعاد شويه بس مميزات بكل يعني ممكن تحصل طاوله فوق الشجره او حاشيه الجبال مستفيدين من الطبيعه بكل بالمجمل كانن بسيطات واصحابهن عائلات اب وام وعياله تلقاهم فاتحين مطعم صغيرون بس الاكل عندهم والسمك كان احلي حاجه كليتها في حياتي .مش متذكره تفاصيل واسماء الاماكن كان يشيل فينا صاحب باتي هو تركي طبعا ..عندي عرم دوه وذكرايات بس طبعا حايكونن مملا ت بالنسبه لكم لاني مش متذكره اسماء المكانات كويس عشان تجربوهن ..انشالله نردو حوشنا ونلقي الصور والكاميرا وانزلكم الصور بجد من احلي الاماكن الي شفتهمن .مع اني مش بارمه دول واجدات يعني

 

[Aya ALhebri]

انا حاليا عايشة في تركيا بس في العاصمة ، الصراحة تركيا بلد جميلة جدا من حيث الطبيعة والأماكن السياحية اللي فيها وهي مش بس اسطنبول مع انه اسطنبول جميلة جدا واللي يميزها المتاحف والأماكن الاثرية بطعم التاريخ العثماني الصراحة اسطنبول اجمل مافيها المتاحف والاهم سرايا دولمابهجة والمساجد الجميلة والعريقة والبسفور والقراند بازار وجزيرة الأميرات واللي ماعداش المتاحف والأماكن هذي ماكنش عدا اسطنبول بالنسبة للمطاعم واجدات حلوات بس في كافيه حلو بكل اسمه كارا كافيه وهوتيلات في تقسيم واحد اسمه ottoman palace حلو بكل وتقسيم الواحد مايقعدش فيها بعد 12 الليل لانها بجد خطيرة ومش آمنة وبالنسبة للموصلات إياك والتكاسي لأنهم نصابين فلازم تعود روحك على الباصات والمترو واحلى الحق والاتراك في اسطنبول وبورصا مش واجد تمام بس اذا تكلمت معاهم تركي يقعدوا نزيكيين سبحان الله ، بعدها بورصا جميلة حتى هي وأول حاجة الواحد مايفوتش رحلة التلفزيك وفي قمة الجبل في موتوات وسوق بسيط ومطاعم وشوايات في اجواء حلوة عند قمة الجبل ولون الخضار السمح ومن اهم المعالم عادي جامع ulu اللي معناه العظيم هذا من المساجد العريقة من العهد العثماني ، مسجد جميل جدا ، وتركيا فيها منطقة كابادوكيا مكان سياحي تتميز بالبالونات ومناظر حلوة للجبال ، وفي مدينة ترابزون مدينة صغيرة لكن جميلة جدا تتمتع بجمال ريفي وبحيرة وجبال وهواء نقي ، وفي وااااجد الصراحة انا بنستغل قعدتي في تركيا نلفهم وحدة وحدة ان شاءلله وبالنسبة للعاصمة الانقرة اللي قاعدة فيها تعتبر مدينة حلوة هادية وفيها مناظر طبيعة حلوة والتكاسي ماينصبوش الحمدلله

 

[Dana Ragab]

احلى حاجة فيها الجو امتاعها وخاصة في شهر واحد لما ينزل الثلج والمطر واحلى منطقة ننصح اي حد ايعديها منطقة Bebek هذا لو تحب البحر والتقعميزة قدامه واحلى أكله ممكن تأكلها إسكندر كباب تركيا تعتبر مكان سياحي سمح بكل بس اسوء حاجة فيها الشعب امتاعها اتحسه شعب مش ساهل التعامل معاه

 

[Hanen Ben Noor]

مشالله مشالله كلكم طلعتو مسافرين مفيش حد زي

 

[Rema Rashad]

Hossam Suliman

 

[Mady Gdeeh]

اكثر بلاد نكرها وحتي لما ننزل ترانزيت يوم ولا 2 نقعد في فندق منتحركش ....عل فكره مره طلعت و شميت بنت الشعب السمحه روحت نجري وكرست في فندق

 

[عهود الشريف]

من 2012وانا نمشي ونجى على اسطنبول وحاليا ليا سنه نص مقيمه فيها ولو لقيت فضوه ح نزل بوست كامل على تعرفت فيه عليها
لكن باختصار اسوء مافيهم انه بنتهم شينه رجال ونساء وانهم مايحكوش انجليزى ابدا وان وجد يحكو مكسر
وانهم يكرهو العرب وعند نظره دونيه لهم
افضل مافيها الطبيعيه الحلوه

 

[اصيل الشيخ]

هههههههههههههههههه واقسم بالله بنتهم تصدع الراس