#قصه_الليله #قصه_الجسر_المخيف باريس 2014...

[Ali Fakree Eldin ElSallabi]

#قصه_الليله
#قصه_الجسر_المخيف
باريس 2014
جيت لباريس بروحي نحضر في راس السنه وبعدها بيوم جو اصحابي وحجزو في هوتيل غير الي انا حجزت فيه
كنت مكسد مع اثتين من اصحابي في الشانزيليزيه خشينا للh&m درنا شوبينج بعدها صاحبي قالي تعال انحطو الشكاير في الهوتيل بتاعه عشان كان اقرب
بعدها نطلعو انهيجو في باريس
المهم وصلنا للهوتيل بتاعه الي كان يبعد عن الشانزيليزيه قريب 3 او 4 محطات
خشينا للدار لقينا صاحبنا الثالث مريض قعدنا معاه ولغينا الطلعه بتاعتنا عشان مرضته جت قويه
المهم جت قريب الساعه 12 وانا بنروح عشان كان عندي موضوع واحد اخر والليله مزالت طويله
قلت لصاحبي كيف انروح ؟ عشان مكنتش عارف المنطقه بتاعتهم كويس ...
قالي اركب الميترو 4 محطات وانزل تلقي روحك في شارعكم
ركبت الميترو
وقعدت نلعب بالتليفون
وفجاءة نعست
ولقيت روحي مغفي شويه
نضت فجاءه مفجوع
بحتت في المحطات معش عرفت وصلنا ولا لا ولا فاتت المحطه بتاعتي ولا مزالت
المهم تفلوجت ونزلت من الميترو علي اساس انها محطتي
لقيتها للاسف مش هيا
وانا هوتيلي معلمه ببرج ايفل يلاه
وركبت فوق لقيت برج ايفل قدامي
بس المشكله ان بيني وبينه بحيره
شن اندير شن اندير
قعدت نمشي مع البحيره قريب 30 دقيقه وانشوف في البرج يلايا ومش قادر انطق فيه الا كان ناخذها عوامه
لعند اخيرا ملقيت جسر يمشي فوق البحيره وايشيلني لمكان البرج
ركبت ع الجسر
ظلام دامس
ونسمع في ناس جايين وصوتهم عالي وهما يحكو
صارلتي الخوفه شويه خصوصا وانا باريس صايرلي فيها موقف شين زي هذا من قبل ومحوتك طلعت منه مطلعوني منه الا جزائريين اصليين ...
فقعدت مستك ننسرق ولا ننضرب علي هالليل وانا بروحي وهما شكلهم واجد
وكل ميقربو مني في الظلام انزيد نرعش
وايقربو
وايقربو
نين وصلو فيا
طلعو الشباب نزيكين وسكرانين طينه مرو من يلايا يضاحكو ومحوتك بش يمشو وصوتهم العالي الي خوفني عشان سكرانين ومش شايفين قدامهم وانا مركب علي روحي وخلاص
المهم اخيرا وصلت للبرج ومنه للهوتيل وكلمت صاحبي ع الفيبر سبيته واجد بكل عشان خلاني نشحور معاه بلا سبب
وغيرت دبشي وطلعت اخري ولا كأن في حاجه صارت
واحلي هياجه في باريس

#بروحي_في_باريس
#ادمن_مركب_علي_روحه

 

[Mustafa Jalal Fteita]

انا قاري ان باريس ماترقدش بكل كيف ماتطلع الساعة 12 في الليل كيف ماتطلع في الظهر
وطبعا في الليل الجو احسن .

 

[Emy Matouk]

حتي الخوف يشكرو فيه ههه. خيره جسر ظلام زعما مقطوع عندهم الضي وقتها

 

[Jeje Farkash]

Mustafa Jalal Fteita. وين تبي تمشي قالت من غيري

 

[Dania Ibrahim]

ههههههههه حي ع الرعب
رد بالك

 

[Mohannad Faraj]

وليد و آدم من يالي مريض فيهم

 

[Hossam Eldin Alawame]

نفس جسر مسوس ؟؟ بس الفرق في مسوس يمشو معاك حواله وبقر في الجسر

 

[Eve Miraculous]

الحمد لله خصوصا اني تابعت مغامرتك متاع الجزائريين ربي لطف بيك

 

[Tama Hadia]

هذي مغامره يعوينك عندك قصص واجد مفروض تألف كتاب و الا مذكرات لأحفادك هذين نوادر خياليه