أولا لازم الأول تدخل على موقع الحكومة الإسترالية و تشوف الوظيفة بتاعتك مطلوبة و لا لأ ... هتلاقى فى قايمتين للوظايف SOL دى الوظايف اللى مش محتاجة sponsor و القايمة التانية CSOL و دى قايمة الوظايف اللى محتاجة sponsor يعنى لازم تسافر على كفالة صاحب شغل أو مقاطعة .... و المقاطعات كل واحدة لها سايت خاص بيها و بيكون مكتوب عليه الوظايف اللى بتحتاجها كل سنة .... فى القايمتين اللى إحنا إتكلمنا عليهم كل وظيفة بيكون مكتوب جنبها الجهة اللى بتعادل أو بتقيم الورق بتاعك و شهاداتك
نظام الهجرة لأستراليا بيكون بالنقط زى كندا و لازم توصل للحد الأدنى من النقط عشان يتقبل طلبك كل ماتزيد النقط كل ما تزيد فرصك
يعنى مثلا اللغة عليها نقط ... المؤهل عليه نقط ... سنين الخبرة داخل أو خارج أستراليا عليه نقط ... متزوج عليه نقط .... و هكذا
الأيلتس أفتكر أقل حاجة ممكن تاخد عليها نقط 6 تقريبا ... لو جبت أقل من كده مش هتاخد نقط و لو جبت أعلى من كده نقطك تزيد .... فى وظائف معينة الحد الأدنى اللى بيقبلوه 7
خدت الأيلتس و جبت السكور المطلوب .... بتشوف موضوع المعادلة بتدخل على الجهة المسئولة عن معادلة شهاداتك و خبراتك بتشوف متطلباتهم من حيث ترجمة و توثيق الشهادات و بتبعت لهم الورق بالبريد و بتدفع قيمة المعادلة أون لاين أو حسب الطريقة اللى بيقبلوها ... بيدرسوا الورق و يبعتوا تقرير يقولوا مؤهلاتك و خبراتك متوافقة مع الوظيفة اللى انت مقدم عليها أو لأ
بتروح على موقع الهجرة تعمل اكونت و تملا ابليكيشن و طبعا بيطلبوا بيانات تقرير المعادلة و رقم شهادة الأيلتس .... و بناء على البيانات اللى بتدخلها بيحسب النقاط بتاعتك أوتوماتيك
لو كانت وظيفتك على القايمة الأولى ماعندكش مشكلة
و طبعا فى أنواع من تأشيرات و برامج الهجرة بتختار اللى يناسبك
لو وظيفتك على القايمة التانية يبقى لازم تدور على sponsor و طبعا إنك تلاقى شركة تشغلك قبل ما تسافر يكاد يكون مستحيل ... يبقى الحل التانى إنك تقدم فى المقاطعات اللى طالبة الوظيفة بتاعتك لو واحدة فيهم قبلتك بتكمل الأبليكيشن بتاعك و تقدم على الهجرة و تستنى تتقبل و ييجى الدور عليك .... لما تتقبل إن شاء الله تبدأ فى إجراءات التأشيرة
طبعا الموضوع بيتكلف فى التحضيرات الأول من حيث الأيلتس و المعادلة و بعدين التأشيرة نفسها
بعد كده تكاليف السفر و الإقامة هناك و طبعا لازم تثبت قدرة مادية إنك هتقدر تعيل نفسك لحد ما تستقر و تلاقى شغل هناك
/Visa Finder
