الدوله: تونس <3
المدينه: تونس العاصمه
تاريخ السفر: من 4 اغسطس 2016 الى 12 اغسطس 2016
السفر و الرجوع على مصر للطيران
مكان الاقامه: بيت اهل زوجتى
مجرد دخولك المجال الجوى لتونس و انك تشوفها من الطياره, المنظر باهى برشا, التخطيط الصح للاراضى, الجبال واللون الاخضر ولون البحر... منظر يشرح القلب ويفتح نفسك
الجوازات اصلا مافيهاش زحمه ولا تعقيدات ولا وشوش كئيبه مبوزه وتقريبا كل الموظفين مبتسمين فى وشك وبعد ما تخلصهم وقبل ما تروح تجيب شنطك تلاقى بتوع شركة Orange واقفين بيدى لك خط PrePaid هديه على بسبورك
تطلع من المطار تلاقى فى نظام لسواقين التاكسى.
تطلع على الطريق من المطار, طريق نظيف وواسع, شايف جبال وسحب وسماء نظيفه زرقا وخضره حواليك فى كل مكان, مش هاكدب واقول مافيش زباله فى البلد بس مقارنة باللى عندنا هنا تكاد لا تذكر.
الجو هناك الصبح اكتر من رائع مع نسمة هواء ساقعه جدا و فى عز الظهر فعلا حر ودرجة الحراره اقصاها 33 فاعمل حسابك انك هاتشترى دبوزة ماء على الاقل وبالليل ممكن توصل لحد 20 او 18 ومافيش رطوبه, بالليل شئ طبيعى انك ممكن تتغطى رغم انك فى اغسطس. هناك فعلا بتتنفس هواء نقى بدون تلوث.
هانتكلم على الفسح:
اول حاجه تروحها فى تونس هى سيدى بوسعيد, عباره عن جبل, تحت فى ميناء لليخوت و فى كافيهات وفوق كافيهات كتيره برشا وباهيه ياسر غير ان المنظر من فوق لا يوصف, ممكن تطلع لفوق عن طريق الدروج للقهوه العاليه بس متعبه شوى ولما هاتطلع فوق هاتبقى قاعد وشايف كل ال view تحت بالبحر كله قدامك و الجبال والسفن اللى جايه من اوروبا. اول حاجه لازم تاكلها فى سيدى بوسعيد هى (البمبلونى) مش هاوصفها بس نصيحه لازم تاكلها و ادعيلى.
ممكن تسافر من تونس العاصمه للحمامات, سوسه او نابل و دى مدن سياحيه زى شرم الشيخ وقريبه مش بعيده, تاخد ساعه بالكرهبه او ال Car (الكرهبه اللى هى العربيه و ال Car اللى هى الاتوبيس).
هتشرب حاجه جيب Boga Cidre و دى معشوقتى والمفضله بالنسبه لى حاجه كده زى شويبس كريم صودا بتاعت زمان على أحلى أو Apla تفاح مش Normal نووورمال (مش عادى).
تونس مشهوره بسوسا وجربا والحمامات كأماكن سياحيه و شواطئ... لكن فى برشا اماكن تانيه احلى وفاضيه اكتر زى بنزرت, مهديه. غار الملح, سيدي على المكي, قليبيا اللي زرقان بحرها اكتر من المالديف , توزر, نابل برضوا لون مية بحرها شفافة لدرجة انك شايف السمك الصغير حوليك, طبرقه و غيرهم... ضرورى تيجى هنا خصوصا فى الصيف الجو تحفه طول الوقت.
التوانسه شعب مضياف لأقصى درجه, اشهد لهم بذلك وابصم بالعشره.
عادى جدا انك تلاقى وانت فى التاكسى اغانى مصرى او و انت ماشى فى السوق فى منطقة باب بحر او حتي محلات شارع الحبيب بو رقيبه تلاقى المحلات مشغله اغانى مصرى وهنا تظهر اهمية الفن والأغانى المصريه لما تعرف إن شعب كامل مأثر فيه عادل إمام وعبد الحليم و إنت محبوب ومفهوم بسبب ده, التوانسه عارفين كل حاجه عن مصر فاستعد لمناقشات سياسيه فنيه ثقافيه بحته.
اتفرج على الاثار هناك, روح المسرح الرومانى فى تونس قرطاج, متحف Bardo او سافر للجم واتفرج على المسرح الرومانى (معلش بعيده شويه, 3 ساعات تقريبا بالكرهبه او ال Car)
ممكن و انت في الحمامات تروح البرج القديم Le Fort المنظر من فوق ياسر برشا.
روح اقعد في كافيه في Lac de Tunis و استمتع بمنظر الميه قدامك وهدوء برشا والطيران التونسي بيعدي من فوقك عشان ينزل المطار.
اكتر الكلمات التونسيه المستعمله: برشا و صحه: خلصت اكل؟ صحه صحه, عملت حاجه باهيه (حلوه) لنفسك؟ صحه عليك, عملت حاجه باهيه ليهم؟ يعطيك الصحه.
عادى جدا تيجى تطلع من المطعم و حد قدامك ماتعرفهوش تلاقيه بيقولك صحه و اذا الدنيا بالليل تلاقيه بيقولك تصبح على خير, و اذا حد خبط فيك من غير قصد تلاقيه يطبطب على كتفك ويقولك سامحنى.
نصيحه اخويه, اذا راكب مع سواق تاكسى اوعى تولع سيجاره لانك كده هاتغرمه 150 دينار لمجرد انك عايز تشرب سيجاره مع العلم ان هناك ماينفعش توقف تاكسى وتقول له يوصلك مكان ويقولك لا.
هناك التاكسي انواعه Passat, Jetta, Polo, Golf, Peugeot, Citroen و كله اخر موديل.
هناك ممكن تركب القطر او المترو "فوق الارض" او ال Train (كلهم مكيفين) و باهيين برشا، بس دير بالك اذا هاتركب ال TJM لأن ممكن اذا معاك شنطه في ايدك او علي كتفك او حد لابس سلسله تتشد منك، ال TJM كيف كيف المترو بس درجه اقل وبيعدي علي مناطق ساحليه وسياحيه في تونس زي سيدي بوسعيد، حلق الواد، قرطاج، و الجدير بالذكر ان اكبر و اطول زحمة كراهب ممكن تقف فيها هاتكون ٣ دقايق و ده اسمه في وقت الذروه و خروج الموظفين في وسط تونس.
اكتر الاكلات التونسيه هتلاقي فيها (عضم) البيض و (التن) التونه وطبعا (الهريسه) الشطه التونسى, لازم وانت فى تونس تاكل (لبلابى, فريكاسيه, بمبلونى, ملاوى, بريك, طاجين, كسكسى تونسى و الملوخيه التونسيه اللى بتتعمل فى 6 او 7 ساعات, نواصر و كسكروت تونسى معشعش) و طبعا المشروبين الاساسيين فى تونس هما Boga Cidre و ال Citronade الزوز المحببين الي قلبي
انصح بشده السفر لتونس، هاتتفرهض (تتفسح) واموركم كلها هاتكون مريقله ومن كتر جمال الطبيعه هناك في كل مكان هاتقول "يا حليلي ناي أبي حني" 
صدق من سماكى تونس الخضراء <3
[ATTACH=full]131585[/ATTACH]
