الدولة : تايلاند
المدينة : بوكيت
انا بسمة 19 سنة لسه طالبة سافرت لوحدي تايلاند (بوكيت ) 5 تيام
اولا : اجراءات فيزا تايلاند ( سهلة اووووووووووووووي )
1-كشف حساب بنك لاخر سته شهور اخره 10000 جنية و يكون عليه حركة سحب و ايداع
2-صورة شخصية 4*6 خلفية بيضا
3-حجز فندق مبدئي
4-حجز طيران مبدئي
5-تصور كل الورق و الباسبور صوره
6- 300 جنية
7-شهادة قيد من الكلية و ترجميها عند اي مكتب ترجمه ( انا ترجمت في مكتب نعمه للترجمه في شارع قصصر النيل ب 50 جنية )
و تروحو السفاره قدام قسم الدقي في الجيزة
ثانيا : برنامج الرحلة:
اول يوم :وصلت بانكوك (مطار Suvarnabhumi) الساعة 10 الصبح تقريبا كنت حاجزة طيارة تانيه لبوكيت في نفس اليوم الساعة 3 العصر بس من مطار الداخلي ( مطار amari don muang) اخدت اتوبيس مجانا بيوصل بين المطارين اسمه (shuttle bus)
اول لما وصلت سحبت فلوس منatm (.كنت بستخدم كارت debit بنك اهلي ) علشان ماحولتيش دولارات من مطار السعر بيكون اقل من بره كتير
وصلت بوكيت الساعه 4 و نص تقريبا من المطار في ميني باص بتديلوه العنوان بتاع الاوتيل بتاعك بيوصلك ( 180 بات للفرد)
وصلت الفندق بتاعي فندق تحففففة بجد نظيف مكانه قريب اوي من كل حاجة الفندق كان في منطقة patong beach اسمه phunara ب 400 بات في اليوم الاوضة دبل و 300 بات اوضة سنجل ( صوره موجودة تحت )
اول يوم كان ضايع بالنسبالي الصبح نزلت بالليل مول (jungceylon ) و لفيت في الشارع (bangla road) و طبعا كنت جعانه جدا اول لما وصلت كان معايا تونة من مصر قامت بالواجب اول يوم 
و حجزت رحلة تاني يوم و اشتريت (cover waterproof) ب 50 بات من اي محل في السوق هينفعك كتير في كل رحلات المية و جبت (rainning coat ) ب 50 بات علشان لو الدنيا مطرت خليهم معاك في الشنطة علي طول اليوم
-تاني يوم :الصبح الميني باص بيجي ياخد من الفندق الساعة 8 الصبح روحت (phi phi island ) ب 1800 بات علشان كنت واخده مركب سريع ركبنا ( البسو مايوة تحت الهدوم و معاكي فوطة ) اول حاجة في الرحلة هتنزلو تعمله (snorking ) في وسط الشعب المرجانية و سمك الملون حاجة فوق الخيال كدة و بعدين هتوصله علي الجزيرة هينزلكو الغدا و بعد الاكل هتلفو شويه في الجزيرة و هتتحركو تاني بالمركب لجزيرة تانيه اسمها (maya bai ) بنلف شويه يجي ساعه برضوة و بعدين بننزل تاني لجزيرة مش فاكره اسمها نعقد ساعتين تقريبا اللي عايز يركب بانانا بوت ب 500 بات و البيتش باجي ب 1000 بات ( الحاجات ديه موجوده في باتونغ بتيش برضوة الاسعار موجودة في الصور تحت ) و اللي عايز يعقد علي رملة بيعقد و ناس بتاجر كرسي علي ميه تحت شمسية ب 100 بات و ينزلو الميه
سؤال مشهور : هنسيب شنطتنا و فلوسنا فين سيبها في المركب لو نازل سنوركينج عادي و انت علي الشط لو ناوي تنزل المية بلاش تاخدهم معاك سيبهم في المركب مش ناوي خدهم معاك و حط الموبايل في كفر اللي قولنا عليه المهم
نصيحة: قبل ماتركب المركب هيقولولك اجر زعانف اللي بتتلبس في الرجل ديه علشان الشعب المرجانيه و بتاع ديه اشتغاله محديش ياجره ب 200 بات علي الفاضي
و هترجع الفندق تاني علي 6 المغرب ريحت شويه و نزلت تاني لفيت في السوق و كلت فاكهه كتيير في حدود 100 بات و الكريب و الايس كريم كل دة لازم تجربه بجد تحففه
-تالت يوم روحت رحلة (rafting ) ب1600 بات برضوة بتيجي عربية
تاخد 8 الصبح من الفندق و تروحه الاول كهف كدة في قرود و تصوره و تروحه مكان الرافتينج بعد كده
نصيحة : و انتو رايحين خده لبس تاني معاكو زياده لبس كامل من كله حاجة بالداخلي كمان لانكو بتتغرقو مايه في الاول جامد و بعدين بقيت الرحله ناشفة و بتحطو شنطتكو و الفلوس في لوكر كدة و معاك المفتاح متخافوش
هتروحو الاول (ziplining ) و بعدين بينزلك الرافتينج في النهر و ترجعو تغيره هدومكو و تاكلو و بعدين ترووحو تركبه الفيل و بعده البتيش باجي و ترجعو العربيه و تروحو خلاص علي الساعه 5 تقريبا تريحو شويه و
تنزلو برضوة تلفو لو عايزين تروحو مول اسمه (central festival ) لو حد حابب يعمل شوبينج اسعاره حلوة اووي تروحو بتاكسي او توكتوك او موتسيكل لو بتعرفو تسوقه متوسط المبلغ رايح جاي بالتاكسي 800 بات لو توكتوك 600 بات و موتسيكل تاجيره اليوم كله ب 200 بات
( نصيحه اتعلمو سواقة العجل ضروري هتوفرلكو فلوس كتير اووووووي اللي عايز يتعلم يقولولي ممكن اساعده اعرف مكان بيعلم عجل في قاهره و اسكندرية )
-رابع يوم: ممكن تروحو (james bond island ) ب 1600 بات برضوة طول اليوم بتروحو الجزيرة تتصوره و تاكلو و بتركب مركب في البحر كدة بتجدفه فيه و تدخلو جوه كهوف و كدة و بيرجعكو علي 6 المغرب برضوة
و نزلت بالليل اجيب شويه حاجات من السوق ذكري من البلد افيال و تيشرت و حاجات كدة متوسط الاسعار للحاجات ديه حوالي 150 بات
-خامس يوم : كان معايا بنات من الجروب هنا اخدنا تاكسي و اتقسمنا فيه اخد طول اليوم 1000 بات
روحنا اول حاجة بيت مقلوب هناك كدة اسمه (teelanka baan) ب 350 بات كل العفش فيه ملزوق في السقف و شكله تحففه في الصور
و جمبه ( اوتليت ) دة فيه محلات لكل الماركات المعروفه باسعار مش رخيصة اوي بس اقل من مصر دة للناس اللي بتحب الشوبينج
و بعدين روحنا معبد مشهور هناك اوي اسمه (wat chalong ) ببلاش
و بعدين روحنا اعلي مكان في بوكيت بتشوف البلد كلها من فوق تحففة اسمه ( Ranghill)
و ممكن تروحه قبل دة كله ( caron beach ) حلو اووي و الفيو من هناك خرافه و لو حابين تنزلو الميه خده مايوة بقي و كدة
#البنت_بتاعت_الفيل #الصغنونة
[ATTACH=full]131580[/ATTACH]
