نيبال
من ١٢/٥/٢٠١٦
ل٢١/٥/٢٠١٦
اولا احب اقولكم ان احساس اول سفرية مش ممكن يتنسي وبحذركم من الادمان بعدها ...... لو هتسافر مع حد اختار الصحبه اللي تطلع معاهم انا ربنا كرمنى بمجموعه ماشاء الله عليهم انبسطنا جدا الحمدلله
ندخل بقى على المفيد
بس متنساش خليك بسيط ومتشيلش كتير واهم حاجه حاجاتك ووتر بروف وانت ماشي استمتع بالمناظر الطبيعيه وميبقاش هدفك امتى اوصل
هتبدا تنبهر من وانت في الطيارة وشايف الجبال والمناظر قدامك وقمم الجبال معديه السحاب
نيبال بسيطه جدااا هتكتشف دا اول ما تنزل من الطيارة المطار بسيط جداااا وكنا حاسين اننا صحيناهم من النوم الفيزا في المطار ب٢٥ دولار والاجراءات بسيطه جدا بس خلى معاك صورة
الدولار ب١٠٥ روبيه
وبلاش تبدلوا من المطار
الناس عموما في كل الفتره اللي قعدنا فيها ذوق جدا وطيبين ومش بتوع مشاكل
كاتماندوا العاصمه ... الكل اجمع انها مش ممتعه ممكن تشتري منها التجهيزات اللي نقصاك اسعارها افضل
فيها monkey timple ودا بتطلع له حوالي ٣٦٠ سلمه والقرود بتكون في استقبالك تحت والتكت ب١٠٠ روبيه يعنى حوالى ١٠ جنيه
وفي ... دربار سكوير ...
بس مدخلنهوش بصراحه بس كان عباره عن مبانى اثرية وطبعا الزلزال اثر عليها شوية كان ب١٥٠ جنيه
متتوقعوش كتير في العاصمه لا نظافه ولا مناظر والاغلبيه لابسين كمامات
نزلنا في فندق كان كويس happy home
والمطعم على الروف وسط الزرع ومناظر كاتماندوا كله قدامك
الكهربا بتقطع كتير خلوا بالكم يكون معاكم باور بانك كويس ومفيش ميه سخنه
ويفضل استخدامك كله يكون ميه معدنيه حتى لغسيل الاسنان
الرحله من كاتماندوا لبوخارا حوالى ٧ ساعات وهما ٢٠٠ كيلو بس الطريق صغير. وبتمشي بطيء بس طول وانت ماشي شايف مناظر طبيعيه وجبال طبعا اللي متعود على السواقه في مصر هيزهق خلى معاك كتاب او تسمع حاجه بتحبها وتاخدها من الاخر طيران داخلى ب١٠٠ دولار
بوخارا .... احلى كتيييير من كاتماندوا
نزلنا في فندق splendid كان نظيف واحلى
برضه الكهربا بتقطع كتير
الجو احلى كتير
في اسواق كتير وانواع شاي كتير
روحنا مطعم كان اكله حلو اوى اسمه بوخارا حلال لاند وطبعا فاصلوا في الشرا من المحلات وهتتصدموا لما تلاقوهم بيقفلوا من ٩ 
وفي هناك شلالات وفي بحيرة بتاخد منها مركب Bahari temple دفعنا حوالي ٢٠٠ الفرد يعنى ٢٠ جنيه
بعد كده الصبح اتحركنا لNayapul علشان نبدا التريكينج خلوا بالكم في تصريح وهيطلب منكم صور
هيا بعد بوخارا بحاولى ساعه ونص
اول يوم مشينا حوالي ١٧ كيلو منهم ٣٥٠٠ سلمه
طبعا طول الطريق مناظر طبيعيه جبال وشلالات وفي الطريق بيكون في استراحات للاكل والميه والشاي عندهم اساسي طبعا
من بعد الظهر تبدا تاخد بالك من المطر وخصوصا كل ما ترتفع
اليوم دا هتطلع سلالم مكنتش تتخيل تطلع نصها في حياتك كلها
الاقامه كانت في kamala الاكل طبعا اكل بسيط هحط لكم صور له: اول يوم مشي حوالي ٦ او ٧ ساعات
: ثانى يوم ل Ghorepani
مشى حوالى ٥ ساعات وسط مناظر وجبال تحفه هتبدا تشوفsouth Annapurna
و fishtail و Dhaulagiri
قعدنا في snowland كان ظريف وفي دفايه
ثالث يوم Tadapani بدانا من ٤ الفجر الصعود حوالى ساعه سلالم علشان نلحق نشوف الشروق من انابورنا
على ارتفاع ٣٢٠٠متر
ودا اروع حاجه في الرحله وصول الهدف ومشاهده الشروق
رجعنا تانى الفندق فطرنا ونزلنا بقى نكمل يومنا العادى كان حوالى ٥ او ٦ ساعات مشي برضه ووصلنا همالايا كاقامه كان معدم جدا لكن المنظر منه كان راااااااااائع قدام الجبال تماما
خلال اليوم بتعدى وسط غابات وشلالات ومناظر حلوة اوى ولو محظوظ هينزل عليك مطر وتلج
اليوم الرابع ..... Ghandruk
بدايه النزول وسط الغابات والمناظر حلوة والمشي كان اقل وسهل ووصلنا mushrom tea house
ودا قريب من المتحف والمعبد وممكن تاخد صور تذكارية بالزى النيبالي والاقامه كان الافضل نظافه واكل
اليوم الاخير مشينا حوالي ٥ ساعات علشان نرجع Nayapul ومنها ناخد عربيه تانى لبوخارا
رجعنا لبوخارا وكلنا في المطعم نفسه وعملنا شوبنج واتحركنا الصبح بدرى لكاتماندوا .... في الطريق لكاتماندوا وقفنا للrafting
كلفنا حوالى ٣٠ دولار بالغدا وكانت تجربه حلوة جداااا
وبعد ما خلصنا الطريق لكاتماندوا كان في انيهار ووصلنا الفندق ١ بليل فخلوا بالكم علشان مواعيد المطار اعملوا حسابكم في الوقت
اصعب حاجه بجد كانوا احساس الرجوع بجد الصفاء والهدوء والمناظر والطاقه اللي كنت فيها هترجع لحياتك تانى فرق شاسع بجد
ملحوظه
الميه كل ما ترتفع هتغلى في كاتماندوا وبوخارا مثلا ب٥ جنيه هتوصل في القمه ل١٢
وبعض الاماكن ريفل لميه مغليه بسعر اقل فالافضل تطلب معدنيه جديده
الكانز والعصير بحوالي ٢٠
الاقامه بالاكل هتكلف من ١٥ ل٢٠ دولار في اليوم
الاكل الوجبه في المتوسط ب٣٥
الشحن والنت ب١٠ جنيه
ملحوظه متتفاجئش لما تلاقي طفل ٦ سنين شايل شنطته وطالع يجري وانت مش قادر تمشي عادى دا رايح المدرسة متتصدمش هو متعود
هتنبهر لما تكتشف انك تقدر تبعد عن التكنولوجيا والموبايل واخرك تستخدم الكام اه والله مش هتموت لما تسيبهم وتعيش ببساطه
هتبهر من امكانياتك وانك تقدر تعمل حاجه مكنتش تتوقع تعملها انك تمشي ٧٠ كيلو واكتر من ٤٠٠٠ سلمه وانت اصلا لو عديت الشارع مشي او طلعت دور من غير اسانسير تحس انك انجزت هيفرق معاك كتير بجد
[ATTACH=full]131572[/ATTACH]
