95 شارع الميرغني
مصر الجديدة, القاهرة, مصر.
برجر
سولت: برجر لحم معتّق في هليوبوليس
كل ما نفتكر إن مستحيل مطعم جديد يفتح في القاهرة، المستحيل بيتحقق ونلاقي مكان جديد يمتعنا ويشبعنا. من الأماكن دي "سولت-Salt" وهو مطعم برجر وفاست فوود فتح حديثًا في شارع الميرغني في هليوبوليس.
سولت مكان صغير فيه ترابيزتين عاليين وأربعة كراسي جنب الكاشير وأجواءه قريبة من المطاعم الأمريكاني، بأرضيات من الرخام الأبيض والأسود وكراسي باللون الأحمر والأسود والأبيض، مع مزيكا من الخمسينات، ومفارش وتغليف الأكل معمولين باللون الأبيض والأسود.
صحيح المنطقة هناك مليانة مطاعم فاست فوود، منهم شارع منقوشة ووك أند واك، لكن سولت بيركز على طعم البرجر نفسه من غير الزيادة المبالغ فيها في الإضافات واستخدام المكونات الرئيسية زي الطماطم والجبنة والخس والبصل.
المميز في سولت هو استخدامهم للحم معتّق، وفكرته إنهم بيسيبوا اللحم لأسابيع عشان طعمه يكون أقوى وأحلى. المنيو هناك بسيطة وفيها ثلاثة أطباق جانبية بس، تشيكن تندرز (20 جنيه)، وبافالو وينجز (20 جنيه)، وبطاطس (8 جنيه)، ومعاهم ثلاثة ساندويتشات بيف برجر كلاسيك (25 جنيه)، وجبنة (30 جنيه)، وتريبل (35 جنيه)، وثلاثة ساندويتشات فراخ كلاسيك (25 جنيه)، وباربيكيو (30 جنيه)، وبافالو (30 جنيه).
قررنا نبدأ بتشيكن تندرز مع بافالو وينجز. التشيكن تندرز بتتقدم مع صوص هوني مسطرد والفراخ نفسها كانت عليها طبقة مقرمشة سميكة، جايز تكون سميكة جدًا كمان لو هنقارنها بقطع الفراخ الرفيعة، بس طعمها لذيذ مفيش كلام.
أما البافالو وينجز فكانت طرية ومستوية صح، لكن المشكلة إن الزبدة طغت على طعم الصوص الحار اللي بنحب نغمّس فيه الوينجز وكمان تقديم صوص هوني مسطرد مع الوينجز كان غريب شوية.
.
إحنا رايحين عشان نجرب برجر سولت المعتّق، فطبيعي إننا نطلب تريبل برجر. بعيدًا عن طريقة التقديم السيئة، التتبيلة كانت عال العال وطعم الساندويتش حكاية. الطماطم والبصل كانوا طازة وخبز البطاطس، اللي كان نجم اليوم بدون منازع، كان خفيف وجميل، ومعاهم صوص قريب جدًا من صوص السويت أند تانجي الموجود في ساندويتش بيج ماك بتاع ماكدونالدز. كنا ممكن نقول إنه ساندويتش عالمي، بس المشكلة إننا محسيناش بوجود الجبنة.
بعدها دخلنا على البافالو تشيكن ساندويتش. الساندويتش الغرقان في صوص بافالو لاذع كان لذيذ والفراخ كانت هايلة. العيب الوحيد إن مفيش صوص بلو تشيز وحجم العيش مش ماشي مع قطعة الفراخ.
خلصت أكلتنا مع براوني بيتزوكي (25 جنيه)، وهو عبارة عن قطعة كوكي معمولة زي البيتزا. البيتزوكي في منها أربع نكهات، منهم براوني ونوتيلا وReese، لكن وقت زيارتنا كان المتاح براوني بيتزوكي بس.
عمومًا، البيتزوكي كان عليها بولة آيس كريم فانيليا وصوص شوكولاتة، لكن المشكلة إنك تحس مع الأكل إنها أقرب للكيكات اللي بتتباع في السوبر ماركت مش الكوكي اللي نعرفها.