شيء مؤسف جدًا بالنسبة لنا كمصريين أننا نبقى بنمتلك أماكن كتير في بلدنا هي محط أنظار العالم كله وليها أثر كبير في اكتشافات علمية وتاريخية كبيرة ومهمة جدًا، واحنا مانبقاش عارفين عنها حاجة !
من الأماكن دي: "محمية وادي الحيتان" في الفيوم .. المنطقة لها أهمية علمية كبيرة لأنه تم اكتشاف هياكل حيتان وكائنات بحرية وبرمائية بتمثل حلقات وسيطة في بعض عمليات التطور وكان العلماء بيحاولوا يلاقوا ليها إثبات موجود.
المكان هناك عبارة عن متحف مغلق موجودة فيه بعض الهياكل المجمعة لكائنات مختلفة، ومتحف تاني مفتوح هتعدي فيه على الهياكل المجمعة والمتروكة في أماكنها في الصحراء بالإضافة لبعض الحفريات الواضحة في الصخور.
المكان مش بس بيتم زيارته للمتخصصين والمهتمين بالعلوم والحفريات، لأ كمان بيستخدمه المهتمين بالفلك كمكان رصد جيد جدًا للنجوم والكواكب بالليل، نظرًا لبعده عن أي تشوش ضوئي ممكن يعكر صفو السماء أو يخلي رؤيتها مش واضحة.
كفاية كلام لحد هنا، ونسيبكم بقى مع مجموعة صور رائعة بعدسة المصور العبقري "بيشوي فايز" بمنظور عين السمكة لأماكن مختلفة من المحمية.
