رد: ساعدوني الله يسعدكم
السلام عليكم ورحمة الله وبركاته
اخواني اولا مبارك عليكم الشهر واعانني الله واياكم على صيامه وقيامه وجعلني واياكم من المقبولين ومن عتقائه من النار واسال الله ان لايضيع لنا تعب ...
ثانيا انا مسافر شهر عسل في تاريخ 11 / اغسطس /2015 م ـــــــ 25/10/1436 هـ
والعودة بتاريخ 26 /اغسطس /2015 ـــــ 10/11/1436 هـ
حجزت طيران فقط اما غير كذا ولا شي لافنادق ولا اعرف ولا شي كيف اسوي وايش اسوي
والله العظيم اني محتااار ايش اسوي
.
وكل اللي اقدر اسويه لكم دعوه صادقة عن ظهر الغيب ..
الله يسعدكم دنيا واخره
عليكم السلام ورحمة الله وبركاته
علينا وعليك .. اللهم امين
اول شي ألف مبروك ثاني شي بس سؤال هل انت مدرس فيزياء ؟ :biggrin:
شوف أستاذي أنا حديث عهد على اندو رجعت منها قبل 3 أشهر كانت رحلتي في مارس ، لكنّي بحثت وتبحّرت في البحث قبل الرحلة وبصراحة حسيت اني مسافر حتى قبل ما أروح .. ف الله يقدرنا ونفيدك بالخبرة البسيطة ..
طبعا أولاً اذا هي اول رحلة لك أنا أجزم لك لن تكون الاخيرة الى اندو وباذن الله تنبسط ..
أول شي لازم تسويه انك تبحث الأسابيع الجاية وتتابع تقارير .. تابع وتمتّع وصدقني فيه أشياء ماراح تخطر على بالك راح تحسب حسابها وانت رايح ..
طبعا أهنيك على عدد الليالي تقريبا 15 ليلة ومدة زمنيّة جميلة كونك بتسافر في رحلة مدتها 9 ساعات بدون توقف من جدة
راح يكون وصولك باذن الله يوم الأربعاء 12 أغسطس طبعاً موعد جيّد كونك واصل في نص الاسبوع ومافيه زحمة بالطريق الى الجبل .. راح تريح ليلة وتحرّك صباح االخميس الى الجبل وحاول تحرّك بدري .. وأنا افضل انك تسكن بفلة فيها حارسها باذن الله تكون امنة .. لأن بصراحة اجواء بونشاك ماراح تستمتع فيها من فندق حتى لو انت عريس .. عاد بما انك محرك الصباح ف راح يكون فيك حيل تدور الفلة اللي تعجبك وتتنقى على كيفك ..
توزيع الأيام على كامل الرحلة بيكون كالآتي :-
الأربعاء وصول والمبيت في جاكرتا
الخميس + الجمعة + السبت + الأحد في الجبل
الاثنين التوجه الى باندونق أيام باندونق :- الاثنين+ الثلاثاء + الأربعاء
الخميس ستكون رحلتك الى جزيرة الأحلام بالي أيام بالي :- الخميس + الجمعة+ السبت + الأحد + الاثنين
الثلاثاء رحلة العودة الى جاكرتا والمبيت ليلة ثم العودة يوم الاربعاء 26 اغسطس الى أرض الوطن ..
طبعا وضعنا جاكرتا يوم وصول في اول الرحلة وأخرها لانها بصراحة لا تطاق .. مكتظّة بالسكان وحتى المشي مملّ فيها ..
طبعا في أول يوم وصول لك الى بونشاك راح تحجز رحلة بالي من مكتب كاها .. راح يعرض عليك انه يسويلك بكج للرحلة فنادق + تذاكر .. ارفض طبعا لان فيها استغلال .. خلي حجزك للفنادق من بوكينق وحجزك للتذكرة من مكتب كاها
الجبل جميل لكن يعيبه بصراحة كثرة الشباب السعوديين وللأسف حالهم هناك والله ترأف له .. ف 4 أيام اشوفها كافية له
باندونق مدينة جميلة يندر فيها السعوديين .. راح تستمتع بالمشي في باندونق لأنها مدينة فخمة أغلب سكانها من الطبقة الراقية في اندونيسيا وأسواقها جميلة راح تشوف عكس اللي تشوفه في الجبل لأن الجبل أغلب شعبه فقير وكل الاسواق شعبية ..
بالي يمكن لو اوصف لك جمالها من الان الى بكرة مستحيل أعبر بالكتابة .. والله بدون مبالغة جزيرة الأحلام فعلاً
فيها رحلات كثيرة ومغامرات لا تعد ولا تحصى .. بعضها تقدر تاخذ الحرمة معاك وبعضها لا بس طبعا انت مدام انك في شهر عسل ماراح تسوي شي لحالك ف راعي ان تكون الرحلة مناسبة لك ولزوجتك هههههه :biggrin:
فيه فندق في بالي اسمه SUN ISLAND ولد خالتي زاره في شهر العسل ويقول فخم وقدموله كيكة هديّة وقت وصولهم لأنه كتب في بوكينق انه في رحلة شهر عسل :wink:
لحد يقولك بالي تنفع للشباب بدون العوائل .. لا صدقني تنفع كمان للعوائل .. أهم شي لا تسكن في منطقة كوتا لأنها غير مناسبة للعوائل ..
اسكن في جمبيران واذا كنت من عشاق السمك راح تلقى الشاطئ كله مأكولات بحرية طازة والطاولات على الشاطئ .. ولو تزور المطاعم هناك وقت الغروب مع المنظر الجميل لشاطئ الغروب ( جمبيران ) راح تستمتع أكثر ..
يمكن نسيت اشياء كثير بس انت أسال اي سؤال يخطر على بالك .. واذا شفت نفسك ضايع مره حط رقمك وانا ادق عليك واحاول افيدك باللي أقدر عليه
