صورجزر الكاريبي | على متن أكبر منتجع عائم في العالم
كانت الكروز هي محطتنا الأخيرة من رحلة أمريكا المكونة من شخصين أنا وزوجي
مخطط الرحلة كان [ لندن - لاس فيغاس - لوس انجلوس - ميامي - لندن - الرياض ]
هالموضوع بتكلم عن الكروز بس لأن كثير تكلموا عن أمريكا + عساي أخلصه
غادرنا من لوس انجلوس إلى ميامي وتقريباً مدة الطيران 5 ساعات ونص على خطوط دلتا
وصلنا لمطار ميامي العصر قبل موعد ركوب الباخرة بيوم ، ريحنا شوي في الأوتيل
ثم طلعنا نتمشى والكاميرا فضى شحنها وماحرصت عليها ولا صورت شيء < ياحظك
المنطقة اللي حول الأوتيل كانت فضيعة وسيئة جداً احنا طالعين الليل بس يعتبر بدري
الشوارع كانت فاضية واحنا نتمشى فكانت تمر علينا أشكال زي الكاوبوي ونظراتهم مريعه !
ميامي حسيتها تقرب للمكسيك أكثر شيء نفس كلامهم وأشكالهم لدرجة بعضهم كأنه سعودي !
بس كيف أدري إنهم موب ربعنا لاشفته يمر ولا بقق عيونه أتنفس الصعداء وآخذ راحتي
بسرعة تعشينا ورجعنا عشان يمدينا ننام ونستكشف ميامي قبل مانروح للكروز
صحينا الصباح وشفنا معنا وقت قبل نروح للميناء لأن آخر موعد لصعود الباخرة الساعة 3 المساء
طلعنا نفطر في [ IHOP ] بما إنه كان أقرب شيء من اوتيلنا
وهذا طلبي
صح قبل ماأنسى ترى الصور الشينه من جوال رجلي والصور الزينه مني
تحملوا تضارب الحضارات شيء من كاميرا وشيء من بلاكبيري سقى الله أيامه
وعاد آيفون رجلي حكاية ثانية لوه مصور بجوال كشاف كان طلع تصويره أزين منه
+ [ أي صور ماعليها حقوقي أنا جايبتها من النت للتوضيح فقط ]
بعد الفطور تمشينا شوي ورجعنا الأوتيل الساعه 12 الظهر سوينا تشك اوت وخذنا تاكسي
في يوم 20 نوفمبر 2011 انطلقنا للكروز وكان مدته أسبوع سبع ليالي وثمانية أيام
الطريق كان يجنن طول الوقت غيوم وأمطار تحسفنا ما جلسنا فيها كم يوم بس ناوين نرجع لها بإذن الله
وصلنا لبوابة الميناء ووقفونا يشوفون الجوازات سألنا أول شيء قال معكم أسلحة أو مواد محضورة ؟
وترى هالسؤال غير مقصود لكم كل من يدخل البوابة لازم نسأله قلنا ايه طيب مصدقينك
ثم جلس يطالع فيني وسألني صحيح المرأة عندكم ماتسوق ؟ < سؤالهم المعتاد
قلت أنا أصلن ملكـة ماأسوق
لما دخلنا بدأنا نشوف البواخر وكل وحدة أكبر من الثانية
رد: صورجزر الكاريبي | على متن أكبر منتجع عائم في العالم
أول مانزلنا من التاكسي استقبلنا اللي يشيلون الحقائب أخذوا بياناتنا واستلموها بعدها دخلنا لشيء يشبه المطار تقريباً تفتيش بعدها تحقق من الجوازات وإصدار بطاقة خاصة لك البطاقة تعتبر جوا الكروز كأنها جواز لك أو أهم ! ماتدخل أو تطلع إلا فيها والدفع والتعاملات كلها عن طريقها يعني اللي معه أطفال لازم ينتبه لبطاقتهم لأن سهل جداً السرقة والشراء فيها وهم غير مسؤولين إذا جو يصدرونها بياخذون صورة لكم فتزبطوا شوي صورة رجلي كانت تضحك مادرى عنهم وكل ما جاء يطلع وحطوا البطاقة في الجهاز أطل في شاشتهم وأشوف خشته وأموت ضحك
واستلمنا بطاقاتنا
قبل ماندخل الكروز نتكلم شوي عن خط سير الرحلة والأسعار
| خط السير |
فورت لادورديل - هياتي - جامايكا - المكسيك - فورت لادورديل الإبحار كان من السبت إلى السبت [ سبع ليالي ]
طيب فيه شيء انتبهوا منه إن نفس كروز ألور اوف ذا سيز له وجهتين ! أنا ماعرفت إلا لما أهلي راحوا لها وكل ماسألتهم عن شيء قالوا ماشفناه
صاروا رايحين للوجهه الثانية وتمشي لناسو " الباهاماز " يعني أسبوع تروح للكاريبي والأسبوع اللي بعده للباهاماز أنا بصراحة انبسطت في الكاريبي ويوم شفت صورهم والله جميلة وحتى الأنشطة روعة بس ماأقدر أحدد ايش الأفضل ! خصوصاً جزيرة سانت توماس طبيعتها تسحر وفيها تلفريك تشوفوا الجزيرة من فوق
| الأسعار |
كان تكلفتها للفرد / 9000 ريال يعني أنا وزوجي 18000 ولو حاجزين من بدري تطلع علينا أرخص
احنا حجزنا كان متأخر جداً وآخر غرفة كانت فرفعوا السعر بس بصراحة تعتبر روعة بالنسبة للترفيه لكن يوم نزلنا منها سحبوا زيادة فلوس من البطاقة بقولكم ليه بعدين
| الأحوال الجوية |
كنا جايين من لوس انجلوس ولاس فيغاس وكان مرره برد بس بما إننا رايحين الكاريبي فتوقعنا الأجواء حارة الجو كان معتدل في ميامي لبسنا صيفي ولما أبحرنا صار الجو جداً جمييل لا حر مزعج ولا برد الوقت كان بيرفكت
رد: صورجزر الكاريبي | على متن أكبر منتجع عائم في العالم
Welcome on Board
بسم الله نبدأ نبحر في رحلتنا واللي عنده دوار البحر ياكل حبوب لايبلشنا تكفون
أول مادخلنا وندور الشعب والعالم مالقينا أحد ونحسبنا واصلين بدري عاد وين لقيناهم ؟! بالبوفيه ياملحهم يقدسون بطونهم تونا مامشينا استكشفوا الكروز بالأول طيب
عاد حنا مثلهم من أول مادخلنا رحنا طوالي لـ اللي يسوون بكج المشروبات
أخوي مدرس رجلي لأن كانوا شافطينه قبل كروز أوروبا نرويجيان ايبك 500 يورو عشان مشروبات ! يعني لما تدخلون البوفيه كل شيء مجاني إلا المشروبات غير شاملة فالأفضل تسوون بكج أوفر لكم كلفنا لـ شخصين 100 دولار
يالله نروح نتفرج على غرفتنا وطبعاً مفتاحها نفس بطاقة الباس اللي أعطونا ونروح لجهة المصاعد أول شيء مره عجبني ديكورهم
وضغطنا الدور الـ .... الظاهر إنه 12
أول ماوصلنا غرفتنا لقينا شنطنا تستقبلنا ع الباب
ترى الصورة مو حقت نفس اليوم مالقيت عاد لازم الذمة في التقرير
الغرفة ماعجبتني ضيقة مررره يعني فتح الشنط أزمة فيها بس تعتبر حلوة بالنسبة لكروز ولازم الأغراض تترتب في الدولاب لأن مافيه مكان أبدد الغرفة تحتوي على [ كوفي ميكر - صوفا - صندوق أمانات - ثلاجة صغيرة - مجفف شعر - مشغّل ايبود - تيفي صغير - قنوات خاصة بالكروز - تليفون - كيبورد - إنترنت برسوم ]
وهنا دورة المياه وإنتوا بكرامة أكبر من حق الطيارة بشوي
واحنا بالغرفة سمعناهم بالمايك إنو لازم تطلعون للمسرح المخصص لكل دور عشان تعليمات السلامة الكل لازم يحضر فمقسمين المسارح لإستيعاب جميع الركاب
اجتمعنا في صالة التزلج عرضوا شاشة لتعليمات السلامة لو حدث شيء لاسمح الله ووين نقطة التجمع وبعد ماخلصنا تكلم الكابتن لتلطيف الجو وقال انبسطوا وتمتعوا برحلة العمر هذي اجراءات وقائية فقط وعاد انهبلوا الأمريكان بعدها صراخ وتصفيق
بنفس هالجهة المسابح الخاصة لـ + 16 المهم عندهم فعاليات العصر مسابقات ورقص وفلة حجاج المهم أنا أخلي زوجي عند كرسي المساج وأروح أتفرج عليهم شوي هههههه لين كشفني آخر يومين كان ماشي من بعيد ويشوفني قال أنا اللي مفروض أتسحب هنا موب إنتي
جهة مسابح الأطفال وحولها آلة الآيس كريم أنا تلقوني هناك
zip line من ارتفاع عالي دايم عليه زحمة اللي غرفهم هنا ماحبيتها لاحظوا مافيه أي خصوصية الكل يقدر يتطفل عليكم ولاتاخذون راحتكم
هنا خدمة العملاء ماقد احتجناهم إلا مره كان زوجي يبي نت ضروري والجوالات ماتشبك الشبكة إلا في الجزر بس كان زفت النت صراحة بطيئ جداً
رد: صورجزر الكاريبي | على متن أكبر منتجع عائم في العالم
ترى فيه شخص متدحرج جوا الموجه
ركوب الأمواج حاطين عندها مقاعد للمتفرجين وأنواع الضحك قد صارت سالفة فيها واحد ياحياتي انفسخ سرواله قدامنا هههههههههههه بس لابس شيء تحته طبعاً بس والله فشيله راحت هيبته وهو يدوره بين الموج
نروح جوا ونشوف الساحة الرئيسية ويطلق عليها اسم [ Promenade ] هالساحة كلها مقاهي ومطاعم ومحل للكوب كيك والكوكيز غالبها مجانية لكن يوجد مطاعم برسوم بذكرها في التقرير الجاي
مطعم لبيتزا لذيذة جداً وتنفذ على طلبك طبعاً مجانية ومايسكر إلا 3 الفجر يعني متى ماجعتوا انزلوا
في هالمنطقة في محلات لملابس ومحل كبير للميك اب والعطور
بار بس فيه حركة عجبتني إنه متحرك يروح فوق لأعلى السقف وينزل تحت لو مو بار جلست فيه
محل للكب كيك ماجربته إلا مره طعمه حلو بس مااشتريه ثانية
ستاربكس برضو شربت منه مرتين بس أحس من كثر ماناكل في الكروز معد نشتهي شيء
طبعاً بفلوس نفس القيمة مو رافعينه هذا أحسسن شيء يعني مااستغلونا بما إننا فوق البحر شفتوا الشيء اللي ع اليمين كأنه شاشة أسهم ؟ هذا كاريوكي يجنن الدخول لـ اللي يبي أنا وزوجي نجلس نتفرج على أصواتهم خاصة إذا جوك بايعينها ولا يستحون ونشاز
أتمنى عجبكم تقريري البسيط واستمتعتوا معي واعذروني لو كان مختصر أو يفتقر للكثير باخرتنا في طريقها للجزيرة ألقاكم في [ الجزء الثاني ] بإذن الله لاتحرموني ردودكم موب عاد تحبطوني وتخلوني أكمله في 2020
والخلفية عاد امسحوها بوجهي هذا اللي طلع معي ويـ السياحة الظاهر إنكم حليوين
