تأشيرة السفر الى الهند للمسافرون السعوديون

[العرب المسافرون]

اجراءات تأشيرة السفر الى الهند للمسافرون السعوديون​

- عنوان السفارة: السليمانية - شارع موسى بن نصير -عمارة الصفوة رقم 2 -أمام مركز السدحان .​

- دوامهم من 8.30 صباحاً حتى 5 عصراً (دوام الصيف) كل ايام الاسبوع ماعدا الخميس والجمعة .​

- تأشيرة للجواز الواحد 238 ريال وتطلع بعد 3 إلى5 أيام ، او (400ريال تقريباً) تطلع بنفس اليوم او من بكرا​

رحت من القصيم للرياض مخصوص عشان استخرج التأشيرة السياحية للهند لأن عندي رحلة لكيرلا​

وصلت السفارة بالموعد المحدد 8.30 صباحاً ، طبعاً الدور الثاني فيه اكثر من سفارة من ضمنها سفارة الهند​

- قبل تدخل السفارة الي هي عبارة عن شقة كبيرة راح يفتشك الحارس بالجهاز تفتيش عادي ويطلب منك اغلاق الجوال .​

- اول ماتدخل راح تحصل قدامك موظف الاستقبال الي يعطيك الاوراق المطلوب تعبئتها .​

- راح تحصل معقبين هنود يطلبون منك انهاء الاجراءات عنك ، طبعاً هم موثوقين​

لكن اذا انت لغتك الانجليزية تمام وعارف الاجراءات مضبوط مايحتاج تتعامل معهم​

لكن من رأي شخصي اشوف ان الأفضل انك تتفق معهم على سعر مناسب وتخليهم يخلصون اجراءاتك​

والسبب انه في هذه الحاله يمكن تمشي امورك اذا اوراقك ليست كامله 100% << اقول يمكن​

يعني انا على سبيل المثال اول مادخلت عطاني المعقب سعر 250 على الجواز الواحد وبعد المكاسر اخذ 50 ريال​

طبعاً يمكن يعطيك سعر اكثر او أقل ،، يتحدد على حسب الزحمة والزنقة​

ونصيحة اذا انت لغتك الانجلش مش ولابد انتبه تتوهق وتتخانق مع المعقبين لانك راح تدور وتدور وبالنهاية بتحتاجلهم​

ووقتها مايعطونك وجه أو يضربونك بسعر عالي عقاباً لك وردعاً لإمثالك !!​

وحصل موقف مشابه مع واحد دخلت انا وياه جميع وبعد اقل من ساعة انا خلصت وهو لازال يترجى المعقب يخلص اموره !!​

المهم ،، انا اعطيت جميع اوراقي المعقب وجلست بكراسي الانتظار وبعد نصف ساعة تقريباً جاء المعقب وقال​

توكل على الله وتعال استلم جوازاتك والتأشيرة الاحد القادم يعني بعد ثلاثة ايام ..​

سددت رسوم الجوازات ورسوم المعقب واخذت منه وصل معتمد ومشيت بمان الله...

الاوراق المطلوبه :​

1- الجوازات الرسمية للمسافرين​

2- صورة بطاقة العائلة اوبطاقة الاحوال المدنية اذا لحالك​

3- 2 صورة لكل شخص​

4- صورة حجز الطيران​

5- صورة من حجوزات الفنادق​

- الجوازات راح ياخذون منك الاصل ويرجعونها لك وقت تسليم التأشيرات بعد 3 ايام ..​

- بطاقة العائلة او الاحوال وحجز الطيران راح ياخذون منها صور ويرجعون لك الاصل بنفس الوقت​

- اما بخصوص حجوزات الفنادق راح يطلبون منك (Hotel_Voucher) وهي اوراق تثبت حجزك بالفندق​

ممكن البعض يقول من وين اجيبها ؟؟؟ سلمك الله تجيبها من المكتب السياحي الي انت حاجز عنده ،​

سواءً كان في بلدك او بالبلد الي راح تسافر له تطلب منه يرسلها على الايميل وانت تطبعها طباعة عادية​

وفيه مشكلة ثانية وهي انه ليس كل الفنادق تعطيك (Hotel_Voucher) والحل انك تجيب حجز لـ7 أيام​

يعني السفارة يكفيها حجز فنادق لـ 7 او 6 ايام فقط .. لأنه هذا الشرط روتيني هدفه التأكد من ان رحلتك لغرض السياحة​

والي يقول انا راح احجز الفنادق على راحتي اذا وصلت الجهة الي بسافر لها ،​

اقوله المهم اثبت للسفارة انك رايح لغرض سياحي بطريقتك وممكن تمشي امورك​

وفيه تنبيهات :​

- اذا كانت لغتك الهندية جيدة راح يطالبونك بمبلغ اكثر من غيرك !!​

- نفس الحال اذا لك اصول هندية او صلة قرابة او احد الاشخاص الي معك ..​