رحلتي الى تايلاند وبالتحديد بوكيت وبانكوك مدعمة بالصور

[loolaa]

رحلتي الى تايلاند وبالتحديد بوكيت وبانكوك مدعمة بالصور


شركة الطيران : الخطوط الجويه القطريه

خط سير الرحله : كويت / قطر ( ترانزيت ) / ماليزيا ( ترانزيت ) / بوكيت



المرافقين في الرحله : أخوي وزوجته وعياله اثنين ( بنت وولد الله يحفظهم ) وولدي وولد اختي ( عشان يونس ولدي ) .


الاقامه في بوكيت : شقق فندقيه بلازا


الاقامه في بانكوك : شقق فندقية ماريوت




نبدي معاكم بسم الله رحلتي الممتعه والتجربه الفريده من نوعها .




موعد الطياره كان الساعه 4,50 فجراً ، وبعد الانتهاء من عملية البوردج والشنط ، قعدنا في ستار بوكس ننتظر موعد الطياره

وصل موعد اقلاع الطائره وصعدناها وطرنا الى قطر ( ترانزيت لمدة ساعتين إلا ربع ) وبعدها طرنا الى ماليزيا ( ترانزيت لمدة ساعه بالطياره ) .


يعني هلكنا خلال الرحله ، وانا عن نفسي ما اعرف انام بالطياره يعني شوفوا حالتنا والحوسه الي احنا فيها ، مابقى شي ما كليناه ولا بقى فيلم ما شفناه ، وميته من التعب وفيني النوم بس ماكو فايده

ووصلنا بالسلامه بوكيت ، وخذينا باص من المطار يوصلنا الى فندق سن سيت بلازا للشقق الفندقيه

الجاكوزي في البلكونه ( بس للاسف ما استخدمناه لأن الجو بارد شوي وما نقدر نسبح بالليل في البلكونه .

هذا المنظر من البلكونه

وهذا المنظر من الباب الرئيسي

 

[loolaa]

رد: رحلتي الى تايلاند وبالتحديد بوكيت وبانكوك مدعمة بالصور

رحلة اليوم الأول ، كان خط سير الرحله كالآتي :

_ رحلة الفيله

_ رحلة سباق السيارات ( Go Cart )

_ رحلة الشوتينج ( المسدسات )

_ الباتونق بيتش للغداء

_ رحلة الفانتازيا


أولا : رحلة الفيله ، وأخليكم مع الصور هي تتحدث عن نفسها .

ثم اتجهنا الى سباق السيارات

انا طبعاً ركبت بس للاسف ما صورت الكاميرا كانت معاي في الجنطه .

ثم اتجهنا الى الشوتينج للشباب

بعد هالمشاوير رحنا شارع الباتونق بيتش للغداء ( تغدينا في ماكدونالدز ) ، وهو شارع مقابل البحر وكله محلات ومطاعم واكشاك ، يعني شارع حيوي ، وطبعاً الشاطئ متروس من الذبايح إلي قاعده تصلخ روحها ، اقصد قاعدين يتشمسون

وبعدها انطلقنا الى آخر مكان في هاليوم ( مكان قمه في الابداع والتفكير ) ، وهو عباره عن مكان يتم عرض لرقصاتهم الشعبية مع حركات الليزر وابداعات والله مادري شلون اوصفه ( للاسف المكان ممنوع التصوير فيه ) .

وخارج المسرح فيه اقسام مختلفه لصناعتهم اليدويه واكشاك لبيع البضائع المختلفه من ملابس والعاب واكسسوارات ومطاعم . بس بصراحه المكان قمه في الروعه .

وبعد هالرحله الممتعه رجعنا الفندق وارتحنا ونستعد لليوم الثاني ولأحلى رحلات رحنالها .

 

[loolaa]

رد: رحلتي الى تايلاند وبالتحديد بوكيت وبانكوك مدعمة بالصور

خط سير الرحله :

_ المعبد + القرود

_ الرافتينج Discovery Rafting

_ A T V ( البقيات او الدباب ) بس رحلة غير شكل

_ الشلال

_ بوتينق بيتش للغداء

مثل ما انتوا شايفين خط سير الرحله مليان وممتع ، ومسافة الطريق كانت لمدة ساعتين ، لأن هالأماكن كلها خارج جزيرة بوكيت .

المكان الأول وهو المعبد وجبل للقرده تقدرين تأكلينهم الموز او اي اكل ثاني ( في اكشاك مخصصه لبيع اكل القرود ) .

وبعدها دخلنا معبدهم وفيها البوذا نايم ( الحمد لله والشكر ياخذ قيلوله الظاهر ) .

أخليكم مع الصور

في هذي الصوره احنا مأجرين سيكل عشان مشاوير الجمعية ، وفي مثل هذه الرحلات نطلع من الفندق واحنا لابسين المايوه الاسلامي ، فكنا في قمة الهلاااااااقه ( بس انا لابسه قميص فوقه عشان أرقع السالفه ) ، بس اكتشفنا ان الكل في بوكيت بنفس المستوى ، يعني ماكو كشخه ومكياج .

وهذي الصور داخل المعبد

وبعد هالمشوار انتقلنا الى امتع رحله رحت لها في حياتي وهي الرافتينج ، وهو عباره عن الطراد المطاطي داخل امواج وصخر النهر .

ما قدرت اصور لأن الكاميرا بالسيفتي بوكس ومافي مجال أصلاً أصور ، فلقيت لكم صور من عمي قوقل .

وهني بعد ما خلصنا واستمتعنا ، وزعوا علينا الأناناس والرقي والماي والقهوه ، وفي الصوره معانا الليدر فيكي مالت رحلاتنا .

بعدها انطلقنا الى مكان ممتع آخر وهو البقيات او ما يسمى A T V

ونفس الشي ما قدرت اصور لأن الكاميرا مو معاي ، وبصراحه انا كنت اتصور ان الرحله عاديه وما فيها شي ، بس يوم ركبنا البقيات ومشينا كانت الرحله من نوع آخر يعني كنا نركب على الصخر ونطب بالماي ونركب فوق صعدات ونزلات ، يعني حده وناااااااسه ، وإلي زاد الوناسه أن كان المطر ينزل علينا بغزاره . وااااااااااو

 

[loolaa]

رد: رحلتي الى تايلاند وبالتحديد بوكيت وبانكوك مدعمة بالصور

يتبع اليوم الثاني


وبعد هالمشوار رجعنا واخذنا اغراضنا وركبونا مثل وانيت وانطلقنا إلى الشلال ، طبيعه ما بعدها طبيعه ، وتسبحنا بالماي الباااااااااارد .

وبعد هالرحله الممتعه رجعنا الى داخل بوكيت ورحنا البوتينق بيتش للغداء والعشاء لأن ميتين من الجوع ، وطبعاً قعدنا بالمايوهات عاااااااااادي خلك طبيعي خخخخخخخ .

تغدينا في مطعم ايطالي Pizza Company

ورحنا للفندق خذينا شور ونمنا مثل المقتولين من التعب .


اكمل معاكم تقريري لليوم الثالث

وخصصنا هاليوم للشوبينج ( غلطة ما تتكرر مره ثانية ان شالله ان نتسوق في بوكيت ) لأن بوكيت للرحلات والمغامرات احلى .

_ آوت ليت ( بريميوم )

_ مول بوتينج بيتش ( ما اعرف اسمه )


رحنا الآوت ليت ( الطريق لمدة نص ساعه ) بس للاسف ما توقعته يكون جذيه ، سوق عادي جداً جداً وما فيه إلا محلاتهم وصناعتهم ، وعدد قليل من محلات الرياضه المعروفه .

يعني مافيه محلات الماركات العالميه مثل ما تعودنا بالآوت ليت .

وبعدها اتجنا الى البوتينج بيتش وفيه مول كبير تمشينا فيه ولقينا محلات بالدور الأرضي لتنظيف البشره ، ومن حسن حظنا احدى المحلات عندهم مكان يصلح لنا نحن المحجبات ، يعني سراير وعليها ستاير ، وبعد ما خذينا موعد لأن المكان كان زحمه رحنا تغدينا في مطعم ايطالي بنفس المجمع وبعدها رجعنا وسوينا تنظيف بشره ، ( بس ما سوينا إلا لما تأكدنا ان إلي يسوون لنا حريم مو جنوس ) واكثر شي موجود في تايلاند الجنوس الله يقطعهم .

وبعدها تمشينا شويه بالمول وما عجبنا شي ، يعني جداً عادي ، وحسافه ضاع يومنا على الفاضي .

وانتهى يومنا الثالث ​

 

[loolaa]

رد: رحلتي الى تايلاند وبالتحديد بوكيت وبانكوك مدعمة بالصور

اليوم الرابع رجعنا حق رحلاتنا ومغامراتنا .

اخترنا كالعاده الأماكن إلي نبي نزورها ، وهالمره دور الرحلات البحريه .

خط سير الرحله كالتالي :

_ الكهف

_ جزيرة جيمس بوند

_ A T V بس نوع آخر عن الأولي

_ بوتينج بيتش كالعاده للغداء


انطلقنا في الصباح وبعد طريق تقريباً ساعه ونص ركبنا المركب الطويل وكنا بروحنا كالعاده ، واتجهنا الى الكهف عن طريق الطراد المطاطي الصغير . اليكم الصور عن الرحله

وبعدها انتقلنا الى جزيرة جيمس بوند ( الجزيره إلي صور فيها الفنان جيمس بوند فيلمه وسميت هالجزيره باسمه ) .

وهالجزيره ما فيها سباحه ولكن مخصصه للتصوير وعرض مجموعه من المشغولات اليدويه

وبآخر صوره نكون ودعنا جزيرة جيمس بوند .

وتوجهنا إلى مكان مخصص للبقيات ولرحلة A T V بس مو مثل الأولى ، هذا أخطر وأصعب والصخر أكبر والحفر أكبر ، والله انها تخرع ، وماكو فايده هم جربناها عشان ما نتحسّف

خلصنا وانكتب لنا عمر جديد خخخخخخخخ وملابسنا كلها تراب وغبار ، رحنا الفندق وغسلنا وبدلنا ملابسنا ورحنا للبوتينج بيتش للغداء .

وفي هالمره تغدينا في مطعم سي فوود اسمه رويال بالوم ( اظن جذيه ) وهو تابع لفندق موجود امام شاطئ البوتينج بيتش .

بصراحه المطعم كان رخيص ( غير المتوفع ) الاستكوزا الصغيره طلعت علينا ب 3 دنانير وطلبنا ربيان وقباقب .

والصور تشهد شكثر كان الأكل لذيذ واحنا في قمة الجوع .

​

 

[loolaa]

رد: رحلتي الى تايلاند وبالتحديد بوكيت وبانكوك مدعمة بالصور

وبعدها تمشينا على البحر ( فرصه ماكو ناس تتشمس ) .

وما نستغني عن الأكله المقرره اليوميه بعد العشاء ( كريب الكاكاو مع الموز ) يم يم يم يم

عصير تايم

Money Time

ورجعنا للفندق وخلصنا اليوم الرابع .

انتظروني قريباً جداً مع آخر يوم لنا في بوكيت .​

 

[loolaa]

رد: رحلتي الى تايلاند وبالتحديد بوكيت وبانكوك مدعمة بالصور

اكمل معاكم تقرير سفرتي الى بوكيت وبانكوك .

اليوم الأخير لنا في بوكيت بالنسبه للرحلات

خط سير الرحله كالتالي :

_ تسلق الجبال Climing

_ شاطئ البحر للسباحه وركوب الجيت سكي

_ بوتينق بيتش للغداء


طبعاً خططنا مسبقاً مع قايدتنا ان نختار رحلة التسلق على الجبال بعد ما شفنا البروشور الخاص فيها ، بس بصراحه البروشور شكل وإلي شفناه شكل ثاني ، وانصدمنا بهالرحله .

البروشور محطوط فيه صور 9 مراحل نتخطاها عن طريق التزحلق بالحبل وبس ( الكيبل ) ، يعني ما ذكروا اي شي ثاني .

المهم طلعنا الصبح باتجاه الجبل إلي فيه الرحله ( ماعدا ولدي لأنه بطنه يعوره ونايم وزوجة اخوي لأنها ما تحب المرتفعات والأماكن العاليه ) .

وشرحوا لنا خط سير الرحله ، مشي 20 دقيقه بالغابه وبعدها نركب على الصخر وبعدها نوصل للمراحل التسع وركوب الكيبل .

بس انصدمنا يوم شفنا الصخر إلي راح نركب عليه و
هو الجبل ، يعني نتسلق الجبل بالطريقه إلي راح تشوفونها بالصور .

والصور راح تتكلم لكم عن الرحله كامله .

عدة الرحله

جاهزييييييييييييييييييييييييييين ؟ إي جاهزيييييييييييييييييييييييييييين

المرحلة الأولى : مشي لمدة 20 دقيقه

لبسنا أدوات التسلق واحنا بقمة الوناسه ، وما ندري شنو إلي ينطرنا خخخخخخخخ

المرحله الثانية : تسلق الجبل

المرحلة الثالثه : استخدام الكيبل للتنقل من مرحلة الى اخرى

المرحلة الأخيره : النزول بالحبل

بصراحه تجربه فريده من نوعها وممتعه ومخيفه


بعدها رحنا البحر تسبحنا وركبنا الجت سكي ، وطبعاً ما صورت من الأشكال الموجوده على الشاطئ .

وبعدها اتجهنا إلى البوتينج بيتش وتغدينا بنفس مطعم السي فوود لأن وايد حلو ولذيذ .

بعدها اكلنا كريب على الطاير ورحنا الفندق بعد يوم شاق ومتعب .

وجهزنا شنطنا استعداداً للسفر إلى بانكوك .

 

[loolaa]

رد: رحلتي الى تايلاند وبالتحديد بوكيت وبانكوك مدعمة بالصور

ودعنا بوكيت الجميله

وانتقلنا إلى بانكوك عن طريق طيران Asiaareline طيران آسيا . ومدة الطيران كانت ساعه تقريباً .

وصلنا الفندق وبعدها تعشينا في مطعم لوناتر وكان مقابل فندقنا ( ماريوت للشقق الفندقيه )

اليوم الأول في بانكوك :

بعد ما اكلنا وجبة الافطار في الفندق اتجهنا إلى ام بي كي مول M B K Mall والمول شعبي نوعاً ما وشرينا منه اغراض وايده ، ( بس اهم شي المكاسر بالاسعار ) .

وبعدها رحنا إلى براغون مول ، والمول وايد حلو ومتروووووووووس مطاعم في الدور الأرضي ، وجمعيتهم وايد حلوه ، وفي داخل المول محل كبير اسمه براغون أبارت منت وايد حلو .

ورحنا براغون مول عن طريق التكتك

والكروكس شفتها وصورتها

تغدينا في مطعم هندي وبعدها تمشينا بالسوبر ماركت العجيب ورجعنا الفندق .


اليوم الثاني رحنا سنترال مول ، بصراحه المول عادي ما عجبني مع انه كبير كثير .

وبعدها رحنا الى مول مقابله كله ماركات عالميه ( بصراحه نسيت اسمه ) الي تعرف الاسم يفيدنا .


هذا الجسر ركبناه عشان نروح مول الماركات

وبعدها رجعنا الفندق وارحتنا ، استعداداً لليوم الأخير لنا في بانكوك .​

 

[loolaa]

رد: رحلتي الى تايلاند وبالتحديد بوكيت وبانكوك مدعمة بالصور

اليوم الأخير لنا في بانكوك

الصراحه عيالنا ملوا من الشوبينج والسوق ، اخترنا رحله من الفندق الى سفاري بانكوك ، وهي عباره عن حديقة حيوانات مع حديقه ملحقه بها ويكون بها عروض منوعه للدلافين والكابوي وكلب البحر وعروض مختلفه .

صديكااااااااااااااااااااا

وبهالصوره نكون انتهينا من رحلتنا الى سفاري بانكوك


وبعد ما رجعنا للفندق وخذينا شاور وارتحنا ، قلنا نروح للسوق ( ماكو فايده ورانا ورانا هالسوق ) وكانت الساعه 8 مساء .

قررنا نروح بلاتينيوم مول ، ويوم رحنا لقيناه مصكر ( للاسف يصكر الساعه 8 ) ، ولاحظت ان اسواقهم اتصكر الساعه 9 مساء .

قعدنا في ستار بوكس كافيه الي عند فندقنا ورجعنا الفندق استعداداً للسفر .

تركنا الفندق الساعه الخامسه فجراً واتجهنا للمطار وسافرنا بالسلامه ووصلنا ديرتنا الحبيبه الكويت الساعه 3 العصر .


ان شالله اكون قد وفقت في سرد رحلتي وسفرتي المتواضعه

ويكون تقريري مرجع مفيد لكل من يسأل عن تايلاند ويرغب بالسفر لها .

تقبلوا تحياتي ...​

 

[hearty]

رد: رحلتي الى تايلاند وبالتحديد بوكيت وبانكوك مدعمة بالصور

صور جميله وسرد زين بس ما قلتينا في اي شهر كانت السفره وفي اي سنه

 

[Jelenar1978]

رد: رحلتي الى تايلاند وبالتحديد بوكيت وبانكوك مدعمة بالصور

شكرا لولة عالتقرير الرائع والصور الجميلة .. الله يوفقكم ... بس الله يعينكم ترانزيت في دولتين و سياحي ماشاء الله يعني ... موفقين

 

[بوجاسم]

رد: رحلتي الى تايلاند وبالتحديد بوكيت وبانكوك مدعمة بالصور

تقرير رائع وجميل​

 

[سفير الاحزان]

رد: رحلتي الى تايلاند وبالتحديد بوكيت وبانكوك مدعمة بالصور

شكرا كان تقرير جميله ومفيد متنوع بالامكان الترفيه والتسوق .اسم sim discovery مقابل sim centerموال

 

[محمدالحربي]

رد: رحلتي الى تايلاند وبالتحديد بوكيت وبانكوك مدعمة بالصور

الله يعطيك العافية