رحلتى الى استراليا تقرير رائع

[محبة للسفر]

رحلتى الى استراليا تقرير رائع


تم الحجز عن طريق موقع booking.com

وكانت مدة الرحله اسبوعين ، مقسمه كالأتي :

3 ليالي ----- سدني ( فندق مدينا جراند هاربور سايد )
الليله : 45 دينار
المجموع : 135 دينار

10 ليالي ----- جولد كوست ( فندق كورتيارد باي ماريوت )
الليله : 21 دينار
المجموع : 210


@@ اجمااااالي التخطيط لسفره @@

مجموع التذاكر و الإقامه و الفيرا لعدد شخصين :
(( 1635 )) دينار

** تفاصيل الرحلة في ((سدني )) :
-----------------------
وصلنا مطار سدني الساعه ( 6ونص صباحاااا )

اول يوم : ريحنا بالفندق وعلى المغرب نزلنا الرسبشن وحجزنا رحلة حق باجر والرحله اسمها ( بلو ماوتن blue mauntine) او يسمونها ( الاخوات الثلاث three sister ) وبعدها تمشينا على الهاربر ( الميناء ) واهو جدام فندقنا بالضبط - وتمشينا بالمجمع اللى جدامنا اسمه ( هاربر سايد ) وتعشينا وردينا الفندق

ثاني يوم : كانت رحلتنا حق البلو ماوتن و الرحلة كانت من الساعه 8 الصبح الى 4 العصر ،،،، وريحنا بالفندق وبليل نزلنا انتمشى وحجزنا من الاكشاك اللى على الهاربر رحلة حق باجر واهي غدا على كروز من الساعه 12 الظهر الى الساعه 2

ثالث يوم : قعدنا مبجر و ترقنا بالكافيه اللى تحت بالفندق ،،،،، وخذينا فيري ( مثل تاكسي مائي بس انه طريقته يشيل عد ركاب واجد وله اوقات محدده يتحرك فيها يعني مثل طريقة الباصات بس بالماي واهو ارخص من التاكسي المائي ) ورحنا حق الجهه الثانيه من الهاربر ويسمونها ( السيركلر كي ) وتمشينا وشفنا دار الاوبرا من قريب و كنت انا ابي سوق الاحد مالهم لأن يصير بهالمكان بشارع اسمه ( الروكس the rocks ) طبعا كلا مشي وشريت منهم شغلات غريبه من صناعتهم ،،،، وبعدها ردينا بالفيري حق الهاربر وعلى طول ركبا الكروز حق الغدا --- وبعد الغدا ريحنا بالفندق وعلى المغرب نزلنا حق الكواريوم بعد كان تحت فندقنا وخذينا تذكره شامله ( الاكواريوم: الحياة البحريه - وايلد لايف : الحياة البريه - برج سدني - مشاهدة الحيتان ) وهالتذكره تطلع اوفر من انج تاخذين تذكره كل مكان بروح ،،،، وكنا ناوين اندش الاكواريوم بس هونا وخليناها حق باجر ،،،،، ورحنا حق برج سدني يكون بالشارع اللى ورانا بشارع جورج استريت تمشينا بالشارع وتمشينا بمجمع ( كوين فكتوريا ) ودشينا البرج وردينا الفندق

رابع يوم والاخير : اول شي نزلنا لرسبشن وبلغناهم ان بنسوي جك آوت و طلبنا منهم تاكسي علشان يودينا المطار وكانت رحلتنا الساعه 5،،،،،،،،وبعدها رحنا حق ( الاكواريوم و الوايلد لايف ) لأنهم تحت فندقنا بالضبط وانقضي فيهم وقت ليما يجي وقت طيارتنا وانروح المطار ( وبالنسبه لرحلة مشاهدة الحيتان مارحنالها لأن لازم نروح حق السيركل كي وتحتاج وقت من جذي كنسلنا ومارحنالها )


** الميزانيه :
---------
كان مصروفنا لمدة اربع ايام لعدد شخصين ،،، شامل كل شي من أكل وشرب واماكن سياحيه و مشتروات بسيطه :
(( 1000 دولار استرالي )) يعني بحدود 250 دينار كويتي


** ملاحصات على سدني :
-----------------
1- سدني من اهم المدن اللى تستحق الزياره في استراليا ،، حلوه وشرحه ،، واحلا شي انج تسكنين بمنطقه ( الدارلنج هاربر ) الى اهو الميناء
2- جوها باااارد ،،،، تقريبا بشهر 7 درجة الحراره من 10 الى 14
3-طريقة التنقل :
- اذا كان السكن بالهاربر فتقريبا كل الاماكن اتروحين لها مشي
-اذا تبين اتروحين الجهه الثانيه من الهاربر اللى اهي (السيركل كي و دار الابرا) يا التاكسي المائي او الفيري ( الفيري اوفر من التاكسي المائي)
-استخدام التاكسي بس بحالة من والى المطار
-في عندهم قطار معلق يسمونه ( المونوريل ) حلو حق التنقل بجهة الهاربر اذا بتروحين جورج ستريت او مجمع هاربر سايد .

 

[محبة للسفر]

رد: رحلتى الى استراليا تقرير رائع

جولد كوست مدينه على البحر وحيل حلوه وشرحه وجوها ادفى من سيدني حيل ،،،،، يعني تقريبا درجة الحراره عندهم في شهر 7 بين 18-24 درجه ،،،،،،، وتعتبر جولد كوست المدينه السياحيه الاولى في استراليا ،،،،،، و ( السيرفس برادايس ) هو سنتر المدينه وفيه اغلب الفنادق و مطاعم واماكن سياحيه و صالة العاب مفتوحه من الساعه 9 الصبح الى الساعه 12 منصف الليل وتسمى الصاله ( time zone )

الاقامه :
-----
اقامتنا كانت بقندق ( كورتيارد باي ماريوت ) لمدة 10 ليالي ،،،،، والفندق 4 نجوم بس مستوااه ممتااااز ،،،،، وموقعه بالسنتر بالضبط في منطقة السيرفس برادايس في شارع (جادة كيفل) وتحت الفندق في بقاله ،،،،، وفي مجمع ملاصق للفندق في محلات والسرداب فيه سوبر ماركت ( وول ورث wool worth )

اليوم الاول : تم الوصول ليلا ،،،،، وبهاليوم خذينا جوله بشارع اللى تحتنا واسمه ( جادة كيفل caivll avenue ) وتعشينا بمطعم فاست فود اسمه (oporto) واهو مطعم اسلامي وحيل قريب من الفندق تقريبا كل يوم انتعسى فيه ،،،، وبعدها مرينا السوبر ماركت خذينا خفايف حق الريوق ( وعلى فكره السوبر ماركت ارخص من البقالات ،،،، بس السوبر ماركت يصكر الساعه 9 بليل والبقاله 24 ساعه )

اليوم الثاني : بهاليوم قررنا انسوي لنا جدول ،،،،، وانا عندي اوراق طابعتهم من النت عن الرحلات والاماكن السياحيه ،،،،، وقعدنا بالبلونكه تقريبا نص ساعه علشان انضبط لنا جدول لأن نبي انحجز الرحلات كلهم مره وحده ،،،،، بعد ماسوينا الجدول قارنا الاسعار بين (مكتب الرحلات اللى بالفندق tour disck ) و ( مكتب الرحلات اللى بالشارع info disk ) و ( مكتب اللاوند في فندق هوليدي ان LAWND) وبالنهايه افضل سعر كان في مكتب اللاوند والمكتب اسعاره تناافسيه و تعاملهم راقي و عندهم خدمة المواصلات لرحلات البعيده بس طبعا عليها رسوم بس افضل من الباصات اللى بالشارع لان المواصلات تكون من والى الفندق يعني توصيلهم جدا مريح و مواعيدهم دقيييقه ،،،، والحين راح اكتب لكم الاماكن اللى اخترتها :

** الرحلات البعيده **
---------------
هالرحلات تحتاج مواصلات لأنها بعيده وتحتاج وقت طويل لأنها كبيره ولازم اتحددين اليوم اللى بتروحين فيه لأن فيها مواصلات

1- SEA WORLD عالم البحار + مواصلات ( من الساعه 8ونص صباحا والعوده حسب اختيارنا في باص يرجع 3 و 4 و 5 )
2-DREAM WORLD عالم الاحلام + مواصلات ( من الساعه 8 و العوده حسب اختيارنا في باص يرجع الساعه 3 و 4 و 5 )
3- MOVIE WORLD عالم الافلام + مواصلات ( من الساعه 8 و العوده حسب اختيارنا في باص يرجع الساعه 3 و 4 و 5 )
4- OUT BACK أوت باك + مواصلات ( هي عباره عن رحله ليليه من الساعه 6 وفيها عرض كاوبوي للحصن ومع الرحله عشاء و لكن عند الحجز لازم تطلبون ان اتكون الوجبه ذبح اسلامي علشان يقدمونها لكم بوقت العشاء )
5-CONTRY BARADISE الريف الاسترالي + مواصلات ( هي عباره عن رحله تعليميه ومدتها تقريبا 3 ساعات عن حياة الاستراليين وكيفيه جز صوف الخروف وكيفيه عمل الكعك الاسترالي ومع الرحله وعند الحجز تقدرون تطلبون اذا تبونها مع الوجبه ولا لأ ،،،،، واحنا خذيناها بدون وجبه لأن اكلهم مو اسلامي )


**الرحلات القريبه**
--------------
هالاماكن قريبه من الفندق وكلهم اتروحين لهم مشي وتقدرين اتروحين لهم بأي وقت لان التذاكر مايكون مسجل عليهم تاريخ معين ولا شي

1- AQUA DUCK البطه البرمائيه ( تاخذج جوله مدتها 45 دقيقه بين شوارع جولد كوست و البحر )
2- برج Q1 ( اعلى برج في جولد كوست تقدرين تصعدين له وتشوفين المدينه من فوق )
3-BLEVE OR NOT صدق او لاتصدق ( متحف في شغلات غريبه وانا شخصيا ماعجبني لأن كل التعليقات بالانقليزي يعني كنا انتمشى وبس بدون لا نعرف شنو سالفه هالتماثيل )
4- INVINITY متاهته انفينيتي ( هاللعب حيل حيل حلوه وممتعه يعني ادشين اللعبه وادورين المخرج ويبيلج نص ساعه على ماتطلعين حيل اعجبتني )
5-DRAKOLA دراكولا ( مثل مبنى من 5 ادوار تصعدين لأعلى دور بالاصنصير وبعدها تنزلين دور دور وانتي تمشين وفي شغلات اتخرع اتمرين عليها وترى في مطعم بعد دراكولا بس بعيد ومارحت له و هاللعبه موجوده بالسيرفس اتروحين لها مشي ،،،،، حلوه اللعبه بس اتخرع وانا طلعت ما كملتنا لنهايه )


تابع اليوم الثاني :طبعا خذينا وقت طويل على ما قررنا من وين انحجز رحلاتنا ،،،،،، و بعد ماحجزنا الرحلات والاماكن السياحه ،،،، قررنا ان ناخذ جولد بالاكوا داك ،،،،،وكانت جوله حلوووه وشفنا جولد كوست كلها


اليوم الثالث
-------

بهاليوم كان عندنا رحله حق السي وورلد sea world وكان موعد الباص 8:30 يمرنا من باب الفندق ،،،،،،، وكانت الرحله حلوه فيها عروض ممتعه وفيها العاب وفيها مطاعم وتمشي ,,,,,,, وانصحكم اول ما تدخلون اخذو الخريطه وجدول العروض علشان مايطوفكم ولا عرض والخريطه اتفيدكم علشان ماتضيعون ،،،،،، وبالوقت اللى مافي عروض يا انكم تلعبون العاب او انكم تاكلون شي ,,,,,, وصج السي وورلد ممتعه جدا وعرض الفقمات و الدلافين لايطوفكم ,,,,,, واحنا رادين خذينا الباص اللى الساعه 4 ،،،، وريحنا اشوي بالفندق وبليل نزلنا لعبنا بالتايم زون وخذينا عشا من مطعم على بابا عندهم شاورما حلال وردينا الفندق .

 

[محبة للسفر]

رد: رحلتى الى استراليا تقرير رائع

اليوووم الرابع في جولد كوست :

بهذا اليوم خذينا بريك من الرحلات و وحنا حق الهاربر تاون ...... أوت لت حلوووو ومفتوح
وطريقة التنقل كان باص و كانت المحطة تحت فندقنا بالضبط

واهناك شفنا مطعم ناندووز تغدينا فيه مطعم إسلامي حلووو حيييييل


وردينا الفندق المغرب ريحنااا

وبليل نزلنا التايم زون لعبنا انترنت و تعيينا وردينا الفندق




اليووووم الخامس بجولد كوست :


بهذا اليوم كانت رحلتنا حق الموفي وورد طبعا الباص يمرنا من باب الفندق ولما نوصل المكان يعطينا مثل تذكرة للعوده و فيها ٣ اوقات واحنا نرجع بالوقت اللى نبيه

ونفس الشي لازم اول ماتدخلون تاخذون جدول العروووض و الخريطه علشان اتلحقون على العروض و كان عرض السيارات موووطبيعي حيل استانسنا فيه و تغدينا أهناك بمطعم اسمه باتمان حيل حلو شكله

وردينا الفندق المغرب ....... بدلنا و بسرعه نزلنا علشان نبي نلحق على البازار لان يومها كان يصادف جمعه وبهاليوم يسوون نفس معرض عالبحر يوووونس و يبيعونه شغلات غريبه مثل الصابون و المربى و العسل كله يكون من شغلهم

و تعشينا بمطعم هندي يم فندقنا عندة خوووش برياااني وردينا فندقنا *



اليووووووم السادس بجولد كوست :


بهاليووم كان عندنا رحلة بليل من جذي الصبح رحمه حق سوق شعبي عندهم اسمه كرارا ماركت بس كللش مايسووووه اذكر شرينا منه هدايا حق الخدامات و السواق خرابيط مايسوه الهوه كلش. حتى ما طولنا فيه وحنا تقريبا الساعه ٩ وردينا الظهر و ركنا بالباص بعد سالنا الفندق اي محطة تودي كرارا ووقفنا عندها ونطرنا الباص و ردينا بالباص بعد

وصلنا فندقنا الظهر قطينا أغراضنا غرفتنا و نزلنا تغدينا باوبرتو تحت فندقنا يهبل هالمطعم وجبات سريعه حلال و لذيذ لان الهمبرجر مالهم مشوي حيل حلوو


والعصر ريحنا شوي لان ورانا رحله بليل

كانت رحلتنا حق الاوت بالاك اهو عباره عن عرض حق خيوول مع عشا بس صج صج رحله حلووووه
لانها رحلة ليليه اول شي بعدين لان المكان بروحة يووونس مدرررجات كرااسي والعرض حلو مع الاضاءه و الصوووت شي عجيب
والعشا بعد حلووو وأحلى شي انهم يراعون المسلمين م مخصصين وجبات حلال
والصراحة من قعدنا و السيرفس شغال اول شي ماي بعدين سلطه و بعدن وجبات يتيحان لحم و دجاج على حسب اللي تبينه و بيبسي او سفن و ري فل فري كل شي السيرفس يمرون معاهم البيبسي و السفن و يهبون لج

وأحلى مافي العرض ان أكششششششن حتى اخر شي لعبونا لعبه
تقريبا كان المدرج ١٠ اسطر و عطو كل بداية سطر كبوس كاو بوووي و مع الموسيقى أنمرر الكبووس و الأسرع اهو الفاايز صج كان ونااااسه

احس هالرحله كااانت غيييييير

وطبعا ردينا الفندق متااخر على طوووووول غرررفتنا *

اليووووووم السابع في جولد كوست :


بهاليوم كانت رحلتنا الصبح حق الريف الاسترالي ...... رحلة حلوو تعليميه ثقافية عن حياة الأسترالين و أحلى عرض بهالرحلة عرض جز صوف الخرووف كان العرض تعليمي وفكاهي بنفس الوقت ...... وهذي الرحلة تعتبر قصيره لانها تقريبا ٣ عروض ورأ بعض و بعدها بوفية غداً بس إحنا كانت وذكرتنا بدون غداً لان اكلهم مو إسلامي فرجعنا مع اول باص ....... و أحلى شي بعد انهم حاطين بعير عند مدخل الحديقة و لاتشوفون الأجانب مو مصدقين يصوروون معاه


ردينا الفندق الظهر و قبل لا نصعد الغرفة كلينا من (أوبرتو) مثل ماقلت لكم مطعم حلال حق الوجبات السريعه

ريحنا العصر بالفندق وبليل ومشينا بالسوق اللى تحتنا لان يم فندقنا في مجمع صغير دور واحد فيه محلات متنوعه ...... ورحنا المطعم الهندي تعشينا خووش بريااني و ردينا الفندق * ​

 

[محبة للسفر]

رد: رحلتى الى استراليا تقرير رائع

اليووووووم الثامن في جولد كوست :


وبهاليوم كانت رحلتنا حق ( دريم وورلد ) هالحديقة ألعابها عجيبه اللى يحب اللعب والإثارة بيستانس فيهاا ...... من كثر اللعب و الوناسه تقريبا الظهر دشينا مطعم بوفيه تغدينا و ريحنااا لان بعد ورانا لعب ....... و ردينا الفندق المغرب ريحنا عقب اللعب و نزلنا متأخر لعبنا انترنت بالتايم زون وتعشينا باوبرتو و صعدنا غرفتنا *

اليووووم التاسع بجولد كوست:


بهذا اليووم ماكان عندنا رحلة لان ناوين انتسووق ..... و رحتا حق الباسفيك فير خووووش مجمع و كبير و طريقة التنقل كانت بالباص
اول شي سألنا االفندق اي محطة اتودي الباسفيك فير وقفنا عندها و رحنا بالباص و بالرده نفس الشي بالباص

واهناك تغدينا بعد باوبرتوو صرنا ما نثق الا بهالمطعم اول شي لان حلال ثاني شي لان نظيف ولذيييذ

ردينا فندقنا العصر و بدينا انرتب جناطنا لان كان مشيتنا بعد يومين وبليل قلنا بنمشي

وتمشينا صوب فندق الشيفرون و كان أهناك في مطاعم و لا أشوف اغلب اللي قاعدين خليجين لما سالت عن الاكل و لا يقولون لي حلال حساااافة مادرينا الا على اخر يوومين لان الصراحه المكان يوووونس نافورة صغيره بالنص و مطعم ايطالي و مطعم هندي و وستاربكس صج صج المكان يوووونس عاد قعدنا بالمطعم الايطااالي يهبل اكككله و بعد العشا ردينا الفندق



*اليووووم العاشر ( قبل الاخير) بجولد كوست :

بهاليوم بعد كنا بنتسوق و رحنا حق مجمع اسمه روبينا هذا يعتبر مجمع جديد عندهمم و حلووو وكبييير بعد نفس مستوى الباسيفيك فير .... و تقريبا هذول احدث و اكبر مجمعين عندهم ...... و رحنا للمجمع بالباص ومشينا فيه من الصبح لي الظهر لان كنا ناوين أنتغدا بالشيفرون بالمطاعم اللى طحنا عليهم امس .....

وصلنا فندقنا الظهر قطينا أغراضنا بغرفتنااا و نزلنا أنتغدا بالمطعم الهندي اللى بالشيفرون والله كان حلوو خوش مطعم و عقب هالغدا الحلووو رحنا ريحنا بالفندق و رتبناا جناطنا و من كثر أغراضنا ماكفت جناطنا

نزلنا بليل تمشيناااا باخر يوووم لنا بجولد كوست و اخر شربنا هاندباق وصعدنا غرفتنا نرتاااح لان بأجر ورانا سفره طوييييله *


اليوووووم الحادي عشر ( الاخييير) في جولد كوست :

بهاليوووم قعدنا متأخر تقريبا الساعه ١١ لان طول ايام سفرتنا نقوم من الصبح من ساعه ٨ لان ورانا رحلات و طلعات بهاليوم قلنا بناام على راحتنا لان ورانا سفره متعبه و طويله ....

رتبناا أغراضنا و صكرنا جناطنا و دقينا على الرسبشن يشوفون وزن جناطنا و الحمدالله وزنا طلع اووكي مو متعدين الحد المسموح لنا ......

سوينا جك أوت الظهر و خلينا جناطنا تحت عند الرسبشن ورحنا أنتغدا باوبرتو وردينا الفندق قعدنا باللوبي ننطر الباص اللي يوصلنا المطار لان كان موعدنا الساعه ٣ ......

و الباص مرنا ساعه ٣ بالضبطططط و رحنا ( مطار برزبين الدولي) اللي يبعد عن جولد كوست بسااعه ..... وصلنا المطار الساعه ٤ وكانت رحلتنا الساعه ٧ يعني وصلنا المطار مبجر الحمدالله و كانت الإجراءات سهله و ماصادفتنا اي مشكله

و الحمدالله طارت الرحلة بالوقت ماتاخرنا ولا شي و المشافه كانت طويييله تقريبا ١٣ ساعه لي مطار دبي و قعدنا بدبي ٣ ساعات ترانزيت و بعدها كملنا رحلتنا الى الكويت ورجعنا وبالسلاامه من بعد رحلة لمدة أسبوعين ممتتتتععه جددددااااا و لله الحمد


​