كيفية إستخراج الفيزة من السفارة الفرنسية بنفسك لكن الأفضل تعطيها مكتب و تفك راسك من الوجع
السفارة الفرنسية مشكلتها متشددين في الإجراءات أول شئ :
تحجز عن طريق موقعهم موعد وهذا هو موقعم La France en Arabie Saoudite و أفضل شئ الصباح
بدري ( يعني الساعة 8 ونص علشان الشمس ) ولا تنسى تطبع الإستمارة من موقعهم او تأخذها من نفس المكتب اللي حجزت من عنده .
ثاني شئ :
تروح للسفارة في نفس الموعد المحدد و طبيعي تنتظر عند باب الشارع حوالي ساعة إلى ساعة و نصف .
ثالث شي :
راح تدخل وتمسك برضوه سرى في الحوش حوالي من نصف ساعة إلى ساعة
رابع شئ :
تسدد الرسوم ( كاش ) حوالي 357 ريال . و أهم شي تكون مرتب أوراقك للآنسة وهي
الإستمارة و الجواز الأصل ويكون بداخل الجواز الخاص فيك :
1- صور شخصية عدد 3 مقاس 4×6 .
2 ـ صورة الجواز .
3 ـ صورة بطاقة الأحوال ، أو دفتر العائلة إذا كان معك زوجتك .
4ـ تعريف بالراتب من جهة العمل بالانجليزي ( ويكون الراتب مذكور في الخطاب ـ تأمين سفر .
6 ـ حجز فندقي .
7 ـ فاكس من نفس الفندق و عليه شعار الفندق أفضل لك .
8ـ حجز طيران .
9 ـ كشف حساب بنكي بالأنجليزي لآخر 6 أشهر و لازم أنك تعزز الحساب بمبلغ قبل ما تسوي الكشف .
سادس شئ :
إذا قبلو أوراقك راح يعطونك و رقة صغيرة ( ستكر ) ويقولون لك تعال يوم الثلاثاء الساعة 2 ونصف أستلم جوازك من الشباك اللي على الشارع ( لكن نصيحة لا تجي في الوقت المحدد ) تعال لهم الساعة 3 خلك حولهم علشان الشمس اللي ماترحم .. لأن حضرتهم يمكن بفتحون الشباك الساعة ثلاث الاربع والسرا بيمشي بسرعة يعني 15 دقيقة إلى 20 دقيقة لأن المسألة تسليم جواز فقط .
سابع شئ :
راح يقولون لك أن تاريخ خروج الفيزا اليوم الفلاني ( تأخذ من 14 ألى 25 يوم ) وتجي الصباح بدون موعد بس يكون معك الجوازات الأصل و تمسك سرا كأنك أول مرة تستخرج الفيزا بس على أسرع شوي و تعال بدري شوي أحسن لك ( يعني الساعة 7:50 دقيقة ) لأن يفتحون 8 و نص .
بعدها رح سلم الجواز للموظف و تنتظر على الكراسي و تنتظر دورك لين ينادونك بأسمك و تعطيك هي الإستكر و تطلع من عندهم ( ممكن تقولك تعال خذه اليوم الظهر من الشباك اللي على الشارع أو بكرة الظهر ( طبعاً نفس الشئ لا تروح الأ حول الساعة 3 أفضل لك ) .
هذي هي الطريقة لإستخراج الفيزا .
.:: المشــاكل اللي واجهتني ::.
1ـ رفضو صورة زوجتي لأنهم يشرطون أن الحجاب يكون واسع و الآذان طالعة !!:105:
2- رفضوا الفوتشرات و خطاب وكيل الحجز و قالو لي جب فاكس من الفندق نفسه .
3- رفضو خطاب التعريف و يقولون ( لم يحدد فيه الراتب ) .
نصائح عامة :
ــ أحرص أنك تتصل على السفارة قبل لا تجيهم ممكن غيرو نظامهم ، هذا رقمهم : 014881255
ــ تأكد من كل أوراقك و لا ينقصها شيئ وخلها كلها في ظرف كبير .
ــ جب معك موية باردة و جرايد أو حاجة تتسلى فيها لأن الجوال و هويتك محجوزة عند الباب .
ــ أحذر من بعض المكاتب اللي يقولك أنا راح أطلعها لك بس من سفارة ثانية و بحجز لك حجز وهمي بـ 300 ريال و تذكرة وهمية بـ 200 ريال و رسوم المكتب 150 ريال ... قله لا يا حبيبي أنا حاجز من عندك يعني بدفع لك رسوم الفيزا 150 ريال و قله رح أنت للسفارة الفرنسية لطالما أن أموري كلها كاملة ( حجز ، تذكرة ، ... إلخ ) .
