دليلك الشامل لمدينة دهب !

سامح

:: أدارة المنتدي ::
إنضم
8 يناير 2011
المشاركات
12,179
الحلول
15
مستوى التفاعل
89
النقاط
48
دليلك الشامل الجامع لرحلة دهب!
معظمنا إن ماكانش كلنا رحنا دهب.. وفي اللي بيكتب عن تجربته، وبيحكيها من جانب ما، من وجهة نظره وتوصيفه.. في اللي بيختصر وبيكتب بإيجاز.. وفي اللي بيعوم ف التفاصيل.. مش كل حد كتب، ذكر كل حاجة.. لكن كتاباتنا كلنا بتكمل بعضها
لكن ف البوست داه، هتلاقي كل تفصيلة عن دهب ممكن تتخيلها، وبتفصيل التفصيل وباستفاضة تامة.. البوست دا -وبما إني قعدت ف دهب 3 شهور لفيتها كلها من أولها لآخرها-، بعتبره أفضل حاجة اتكتبت عن دهب..
أسيبكم مع البوست...
A trip review to Dahab - South Sinai, Egypt. Winter jan. - Feb. 2018.
ريفيو لرحلة دهب في شتاء شهر يناير - فبراير 2018
دهب من البلاد اللي تعتبر مشتي و في شهر يناير لفبراير تعتبر في الهاي سيزون بتاعها، بتلاقي البلد سعيدة و مسالمة و مش زحمة مهما يكتر فيها الناس بالنسبالنا لاننا عايشين في القاهرة او في المحافظات الاكثر ازدحاما بشكل عام، لكن بالنسبالهم كده زحمة جدا و خصوصاً ان نسبة المصريين للاجانب زادت بعد الثورة و دي حاجة غريبة عليهم، ف بقوا يحسوا انهم زيهم زي اي مدينة "تحت" ؛ (في بلد تحتهم جغرافيا يعني). "او كما يسموا مدن الدلتا كلها".
انا محجزتش رحلتي مع برنامج او Facebook page او مكتب سياحي.
لاني كنت متاكده ان انا هعرف اوفق ال Budget بتاعتي احسن لو طلعت لوحدي، و هستفيد منها اكتر، مش هدفع ف حاجات ملهاش لازمة، كده يعني،، و فعلاً ده حصل.
و ما حبيتش اتربط بناس معينة او برنامج محدد معرفش اطلع منه،، بحب العشوائية في تنفيذ اللي انت عايز تعمله دلوقتي.
سالت على حجز باص دهب، عرفت انه من مكانين
1. موقف الترجمان في وسط البلد - محطة مترو احمد عرابي
2. سوبرجيت الماظه مصر الجديدة
رحت حجزت باص دهب من السوبرچيت في مكتب *شرق الدلتا* في الماظه باص الساعة 12:15، التحرك الساعة 12:30. قبل ميعاد رحلتي ب 3 ايام.
الاوتوبيس بيتحرك الاول من موقف الترجمان في وسط البلد و بعدين يعدي ياخد الركاب من الماظة و يتجه.
سعر التذكرة ب 140 جنيه مصري.
----------------------------------------------------------
** معلومات عن الباص** (شرق الدلتا)
- شرق الدلتا ارخص و باصات انضف من جوباص.
- رحلة دهب لها 8 كراسي من الباص كله.. لو الكراسي من 1 ل 8 متاخدش 1 او 2 تماما.. لانه قدام الباب و ف كل تفتيش هتتبهدل م الهوا ف الفتح و القفل.. اسلم حاجة من 5 ل 8
و لو ال 8 كراسي من ورا
- ابعد عن 23، 24، 25، 26، لانهم قدامهم حديده مش هتعرف تفرد رجليك منهم عشان تحاول تنام.
- لو بنت و لوحدك : فيه زورارين جنب الكرسي اللي جنب الممر، تحت اليد، واحد بيرجع الكرسي لورا،
⭐⭐والتاني واحد بيبعد مسافه بين الكرسيين عشان تبقى قاعدة براحتك و مش مدايقه. عليه العلامة دي"↔".
----------------------------------------------------------
**الطريق **
الطريق لدهب بياخد 11 ساعة رايح،
9 ساعات راجع.
السبب؟
لانه و انت رايح بتقف في مش اقل من 8 كماين تفتيش (اول 7 كماين ظابط بيطلع الباص يشوف البطايق بس).
الثامن و الاخير (اسمه كمين شرم) الباص كله بينزل يقف صف ولاد و صف بنات، كل واحد شنطته قدامه بتتفتش و اثبات شخصيته و ده ارخم كمين فيهم.
و قبل دخول دهب، الباص بيقف ع بوابة المدينة ظابط بيدخل الباص بيسالك ع الحجز بتاعك و رايح تقعد اد ايه، و فين،، كده يعني.
لكن و انت راجع هما 2 كمين بيشوف بطايق و خلاص بينزل.
----------------------------------------------------------
**الوصول**
بتوصل لموقف شرق الدلتا في دهب بتلاقي عربيات التاكسي النص نقل و السواقين البدو بينادوا،، كل جروب بيبقى رايح حته للسكن ف ممكن تتفقوا و تروحوا سوا لو فنفس المكان.
او بتتفق مع السواق و بيوديك مكان ما تحب.
وصلت ع الساعة 11 و نص.. بس قبل ما اروح البيت، رحت الاول عند المسبط او الممشي السياحي، و دورت على مكتب رحلات سياحية عشان احجز برنامجي على قد الفلوس اللي معايا او على قد المدة اللي انا قاعداها. (ايهما اقربلك)
رحت مكتب اسمه كينج سفاري، قدام الكبرى الخشب بالظبط اتعاملت مع واحد اسمه بوب هناك (فلاير المكتب حطاهلكم في الصور) و قلتله انا قاعدة مدة كذا عايزة اعمل برنامج على قد الايام دي... بس، بعد ما حطينا البرنامج، بقيت عارفة هصحي كل يوم اعمل ايه و عندي ايه و الساعة كام و اللبس لو المفروض اتقل زي سانت كاترين او اخفف. و بقي عندي برنامج لرحلتي عارفاه و رتبت على اساسه بقى باقي الحاجات.
و انا طبعاً قبل ما اطلع كنت عامله ال reaserch ال كافي اللي يخليني اعرف هستمتع ب ايه و مش هستمتع ب ايه.. ايه جوي و ايه الحاجات اللي لا،،
ازاي؟ سالت الناس اصحابي اللي طلعوا دهب عن الاماكن اللي تتزار هناك.. طبيعة النشاطات المشهورة هناك عشان مش كلها مستهويني،، انا بحب الطبيعة جداً ف لو اترميت ف اي مكان حواليا طبيعة هبقى مبسوطه اوي.. بس، كله بيقولك رايه و انت بتفهم بقى و بتتوصل لصورة في دماغك كده عن اللي هتعمله ان شاء الله هناك لما تروح.
تمام كده؟
طيب.
----------------------------------------------------------
**هتبات فين؟؟
عندك اكتر من اوبشن كويس للمبيت في دهب.
و المفروض تبقى حاجز قبل ما تروح.
1. اوتيل: ارخص سعر موجود حالياً هو 160 جنيه مصري/ الليلة. و فيه بردو ب 260 ج.م.
و سمعت بردو ان فيه ب 70 جنيه ف الليلة،، ف انت و شطارتك ف التدوير و التخطيط قبل ما تسافر. Be fast, and efficient.
(انت كده كده مش عايز الاوضه 5 stars ف حاجه، اهم شيء عندك مكان ترمي فيه حاجتك و خلاص. انت مش جاي تقعد في الاوضه) و الاكل حتى لو فطار بس انت بتقضيها باي حاجة و خلاص.
2. كامب: فيه 3، 4 كامبات ع المشاية عند كافيه على بابا و كافيه علاء الدين،
فيه في شاطئ اللاجونا (مش امان قد المشاية عشان البدو ال فيها بدو نويبع مش بدو دهب)،
فيه في ابو جالّوم ممكن تبات فيها يوم و ترجع ب 200 ج.م. (بتركب 5 دقايق من وسط المدينة لل البلو هول ومنها لانش ب 80 جنيه للنفر، 7 دقايق باتجاه ايدك الشمال في البحر عشان توصل له، و اخر ميعاد للوصول ليه للمبيت الساعة 5 المغرب)،
لكن الأامن من كل الكامبات دي انك تسيب حاجتك في المشاية اكيد.
3. Couch surfing:
من اي ويبسايت للكاوتش سيرفينج.
Www.couchsurfing.com
4. وال مش حابب الفنادق في شقق وشاليهات علي البحر للايجار.. و سعرها بيكون بالاتفاق مع صاحب المكان.
و ده رقم واحد من دهب للتسكين لو محتاج لما توصل. اسمه حسام دهب، و طبعاً فاصل ف الاسعار انت مش زبون
01097333979
----------------------------------------------------------
**الاكل**
زي ما اتفقنا الدنيا بتتقضي باي حاجة و خلاص، اسأل عن العسله او السوق التجاري في هناك بقا محلات الخضار و ماركتات وهكذا وتعتبر منطقة تسوق لاي مستلزمات، عندهم كل حاجة زي عندنا بالظبط و نفس اسعارنا، هات تونه، جبن، بطاطس و عيش شامي.
البدو مشهورين هناك بعيش اسمه "الفراشيح" و اكلات زي الغُمسه، البُصره، مدفون، يبقى حظك حلو لو اتعرفت على بدو و دقته معاهم .
و فيه محل اسمه البورسعيدي في المشاية اسعاره تحفه.. اسعاره بتبدأ من 3 و 5 جنيه و اغلى حاجة عنده ب 35 جنيه تقريبا!! و عنده كل حاجه من اول السندوتشات لحد الرز و فراخ و شُربة.. هبقى احطلكم صورة للمنيو بتاعه ف صورة.
فيه محل اسمه "على الله" مشهور اوي بالاكل البيتي و فيه كذا حاجة creative بردو عندهم في المنيو، يمكن احسن طعم انا دقته هناك. و صاحب المحل شخصية محترمة جدا هو و مراته. الخدمة عندهم تحفه و تحس ان انت بتاكل من ايد مامتك فعلا من نضافة الاكلً. و اسعاره رخيصة بردو، لكنه احسن بكتير في الطعم من البورسعيدي ده لو قلنا ان فيه مقارنة.
فيه king chicken ده من الاماكن المشهورة في المشايه بردو هحطلكم المنيو. اسعاره غالية بالنسبة للاكل ف حدود 75 جنيه و انت طالع. ف فنفس الوقت بردو رحلة سنوركلينج للبلو هول بالغداء ب 85، و مثلاً رحلة السهرة الجبلي ب 75، رحلة السنوركلينج لل 3 pools ب 50 جنيه..
ف انا كان بالنسبالي ممكن اقضيها اي حاجة بس اكتّر من الاماكن اللي بزورها ف المده اللي انا قاعداها. يعني شوف انت بقى تكحرت نفسك ازاي و ف ايه علي مزاجك زي ما تستحمل.
----------------------------------------------------------
**التنقل**
سهل التنقل فيها لاي مكان في اقل من عشر دقايق. اي مشوار في دهب بياخد 10 دقايق مشي ده لو مكان بعيد اوي يعني!! و اي تاكسي فيها ب 10 جنيه من و إلى اي مكان.
**الا لو هيطلع بيك اي رحلة بره بيبقى على حسب الاتفاق.
و ده رقم تاكسي هناك لو محتاج تروح مكان و متأخر، على رحلة، على ميعاد الباص، اي حاجة. و متحسسوش انك محتاجه عشان ميغليش عليك.
عبدالرحمن تاكسي دهب
0106 009 1930
----------------------------------------------------------
**خريطة دهب**
دهب عبارة عن 5 مناطق معمورة (غير الوديان)
**العسله : و ده مكان بيوت اهل البلد ؛ (الدهباوية و البدو و الاجانب المقيمين بالبلد). عبارة عن بيوت صغيرة جميلة كلها دور واحد فقط. ف بتطلع من باب البيت تلاقي الجبال و السحاب مكشوفين بالنسبالك و منظر شروق او غروب الشمس بألوان السما مبهر في اي وقت من اوقات اليوم مش محتاجة اتكلم عنها، و انت شايفه دايماً لان مفيش حاجة تحجب المنظر عنك.
العسله اهدي بكتير عن منطقة "المدينة".
----------------------------------------------------------
في بقا اماكن ملهاش اهميه سياحيه عشان كلها مساكن بسكن فيها عائلات دهب وبيوت وشاليهات وهكذا زي منطقتين اسمهم مبارك القديمه و مبارك الجديده
**مبارك القديمة: تبعد مسافة دقيقة 1 و نص من العسله. مفيهاش حاجة تتعمل اوي.
مساكن حكومية، حوالي 20 عمارة، ارتفاع 3 ادوار بحد اقصي. الدور فيه 4 شقق.
عمارات لونها ابيض و اكبر من مبارك الجديدة.
**مبارك الجديدة: نفس الوصف، لكن عمارات اصغر و لونها ابيض ف نبيتي.
(sorry for the boring details )
----------------------------------------------------------
**المدينة: منطقة حيوية، عبارة عن عماير 3 ادوار بحد اقصي، مجمع اكبر و اغلى فنادق، مجمع مدارس و سوبرماركت و قهاوي و محلات اكل و محلات تجارية اخرى. (عندك مصلحة او ورق تخلصه، التأمينات، فرن العيش الصبح بدري، مطافي، القسم و مجلس المدينة) كده يعني.
**الكمين: مدخل منطقة المشربة من ناحية المدينة (مكتوب عليه كمين المشربة).. انت لسه ماشي على الاسفلت كده لسه مدخلتش ف رمله.
**المشربة: عبارة عن شارع طويل فيه كافيهات، قهاوي، تأجير بيتش باجي، فيه ال 4 بنوك اللي في دهب (الاهلي - بنك مصر - CIB - القاهرة) لاهمية السحب و التعاملات المادية الطارئة هناك. و فيه مستشفى تخصصي صغيرة.
المشربة من ع البحر.. اولها فنادق، كافيتريات ع البحر و مراكز غطس كتير.
اخرها شمسية خشب كبيرة كده ارتفاع دور و نص و كده تبقى وصلت شاطيء اللاجونا (Lagoona Beach ) بتلاقي الحجر اللي كنت ماشي عليه خلص و ابتدت تبقى رمل تحتك. مكان water activities, غطس، سنوركلينج، و فيه كامب كمان.
و المشربة تعتبر جزء من ..
**المسبط = الممشى السياحي او الكبرى الخشب.
المسبط عبارة عن ممشي حجري جنبه من الناحية دي اسفلت و بيطل من الناحية التانية على البحر بطوله من اوله بقى لحد اخره، بدأَ من الايل جاردن، مروراً بالمشربه و وصولاً لللاجونا. فيه كافيهات، محلات تجارية، بازارات و عطارات وهكذا.
خلينا نتفق ان اي مكان مياة تطل عليه المشاية ينفع تنزل البحر فيه (مع مراعاة طبعاً مختلف الاحتياطات الواجب اتخاذها لسلامتك الشخصية يعني) و محدش هيقولك انت رايح فين ولا جاي منين او ده شاطئ خاص، اهم حاجه جزمة السباحة عشان متتعورش من الحجر (في حالتي كنت بلبس crocs )، لان مش كل الشواطئ ارضها رملية.
- بيبدأ اول الممشى من عند منطقة العسله، مكان اسمه الاييل جاردن (Eel Garden) دي منطقة سنوركلينج و غطس و تعتبر محمية طبيعية لتعابين البحر الصغيرة الرفيعه (آمنة، مسالمة جدا ومش مخيفة تماما).
- بعد كده منطقة اسمها ال Lighthouse و ده احسن مكان مرجح للغطس هناك و للسنوركلينج بردو من جمال و تنوع الشُعب و الوانها تحتيه.
- و بعد كده الكُبري الخشب ف وسط المسبط وقدامه مكتب كينج سفاري اللي انا رحت حجزت عنده رحلتي كلها. اسال هناك على بوب.
تحت الكبرى الخشب فراغ بسيط كده ارتفاع متر و نص و ده يعتبر مجري السيل؛ امطار سنوية بتيجي من سانت كاترين لدهب تصب فى البحر. "معرفش قلتلكوا المعلومة دي ليه، بس عشان لو سمعت كلمة مجري السيل متستغربش ✋"
----------------------------------------------------------
** الوديان او الجبال**
وادي جُني: مشهور بالسفاري.
وادي connection.
وادي البيضا: مفيهوش حاجة تتشاف.
وادي الطويلات: بيتعمل فيه العشاء و السهرة البدوي، فيه نوعين من السهرات، واحدة اغاني و رقص و حفلة و عشاء بدوي. و التانية تشبه ال star gazing كده ف هدوء و شموع و عشاء بدوي بردو. اختار ال يناسبك. لما سألت صحابي من اهل البلد هناك قالولي فلوس ع الفاضي، ففكست بصراحة و قضيت سهرة ع البحر احلى 100 مرة مع الناس اللي بحبها.
و يوم تاني طلعنا جبل اسمه جبل الدبيل (ابو غزالة) شوينا كنا جايبين فراخ من السوق و رز و عملنا عشاء و كان معانا مزيكيتنا الهادية و مياة و كل حاجة محتاجينها فوق. ف حاول دايما تكيف نفسك باللي هيبسطك انت مش لازم الشائع او اللي بيتعمل يكون هو اللي هيبسطك.
** البانوراما: وادي جميل يشبه جبل المقطم في القاهرة يمكن من خلاله انك تشوف دهب كلها عشان اقصي ارتفاع للمباني في دهب 3 ادوار، فممكن تطلع تشوف الغروب او الشروق مطل على دهب كلها و البحر قدامك .. ينفع تطلعها لوحدك مش محتاج تحجز مع حد، خد الكاميرا و كلم تاكسي قولله طلعني البانوراما و سيبه و لما تخلص كلمه تاني يجيلك ينزلك.
----------------------------------------------------------
**الاماكن اللي تتزار في دهب**
مش كل الاماكن اللي انا رحتها كانت مع كينج سفاري. فيه حاجات كتير انت تقدر تظبتها لوحدك.
مطلعتش مع مكتب كينج سفاري غير؛
رحلة سانت كاترين
و السفاري وادي جُني بس.
و خلي بالك انه فيه حاجات مبتاخدش كام ساعة على بعض،، ف ظبت اكتر من حاجة واحدة تتعمل ف نفس اليوم.
المهم انه يبقى معاك من هنا ماسك السنوركلنج عشان هنا هيبقى سعره ارخص و تأجيره في اي مكان هناك مش اقل من 35 جنيه في كل مرة تعوز تنزل، ف هتكتشف انه ارخصلك تشتري واحد و يفضل على طول ف شنتطك.
**الغطس
و انت في المسبط بردو هتلاقي ميت Diving center اسال على الاسعار كتير الاول و بعد كده احجز في اللي يناسبك. و يبقى ده يوم من ايام برنامجك انت مظبته بردو.
انا حجزت في center اسمه Dahab Divers ال instructor عمرو ابو جريشة.
ال Intro Dive بتكون في ال Lighthouse و سعرها من 300 ل 400 جنيه.
الباقي بقي،، تطلعه لوحدك عادي.
1. Blue Hole:
البلو هول بتضم 3 اماكن تتزار هناك ؛ هي و ابو جالّوم و البلو لاجون.
بتاخد تاكسي يوصلك البلو هول، منها بتركب لانش ب 80 جنيه للنفر، 7 دقايق باتجاه ايدك الشمال في البحر عشان توصل ل راس ابو جالّوم. و منها ممكن تروح البلو لاجون بلانش تاني بردو.
كل ده مش محتاج تحجز مع حد، ممكن تعمله لوحدك. خد معاك ف شنتطك نضارة السنوركلينج و ضروري جدا اكل عشان مفيش هناك.
2. Lagoona Beach:
رحت اللاجونا لوحدي
تاكسي ب 20 جنيه، معاك اكلك و نضارتك ف شنتطك و روح اقعد اعمل سنوركلينج هناك لحد ما تزهق، عايز تكامب يوم هناك ب 200 ج.م تمام، خلصت كلم التاكسي هييجي ياخدك. قضي بقيت يومك بتتمشي في البلد.
3. 3pools:
رحلة السفاري في وادي جُني لما حجزتها من المكتب عرفت انها بتبدأ بعربيه من المسبط بتوصلك للثري بولز تركب البيتش باجي و تطلعوا على وادي جُني و تنتهي في الثري بولز تاني، تسيبوا البيتش باجي و تركبوا العربية ترجعكم المسبط. ف اتفق معاه انك هتقعد هناك في الثري بولز مش هترجع معاهم،، خلص السفاري..
اكلك و نضارتك في الشنطة، لما ترجع بالبيتش باجي قولله انا هقعد هنا و اقعد ف اي مكان هناك و انزل اعمل سنوركلينج في الثري بولز، عشان تستفيد بوقتك هناك و توفر يوم كامل بدل ما تطلعها يوم لوحدها. و ترجع ع المغرب بتاكسي، عايز تنزل المسبط تتمشى، اعمل ال انت عايزه. يعني حاول تظبت كذا حاجة ممكن يتعملوا مع بعض في يوم واحد عشان تكتر الاماكن اللي تشوفها و انت قاعد هناك.
4. الاماكن اللي الناس بتتصور فيها هناك؛
1. فيه حيطه كاملة من بعد الايل جاردن بشوية مليانه رسومات جميلة جداً.
2. Everyday café
جواه كذا حاجة
- المرجيحه ال single اللي ع البحر.
- الاجنحة اللي ع الباب الصاج، بس الاجنحة دي قدام باب القسم الناحية التانية ف بوظوها عشان يمنعوا التجمعات قدامها،، بس فيه واحد تاني عند حيطه الايل جاردن.
3. باب ال why not
4. باب الحياة ف café الخان
5. المرجيحتين ال couple اللي جنب بعض في Taro café، و عنده حيطه تانية جوه بردو حلوه اوي.
6. عندك دهب كلها بقى بطبيعتها.
5. حطالكم الفلاير بتاع كينج سفاري في الصور، ظبت رحلتك زي ما تحب بقى على قد ما انت قاعد هناك. جواه كل اللي انا قلته و اللي ما قلتهوش. و انت و راحتك.
----------------------------------------------------------
**خلي بالك**
اكتب جدولك في ورقة و ظبت على اساسه الهدوم اللي تعمل حسابك عليها عشان كل مكان هناك بجو مختلف، اختلاف جذري بين شتوي و صيفي! و لو مكان فيه بحر كون لابس المايو تحت هدومك.
و اشتري الشال البدوي من اول يوم هناك عشان الشمس/الساقعة. بتجيبه من عند اول بازار يقابلك من بعد الايل جاردن ب 15 جنيه.
حاول متوسخش الشارع، الناس دي بتحب بلدها جدا..
حقيقي مش هزار،، بيحبوا الجبل، الشجر، البحر، الشُعب، الصخر، شوفوا في عنيهم و هما بيتكلموا عن الحاجات دي تستغرب كانه بيتكلم عن حد صاحبه، ف متأذيش جماد لانه من المقدسات عندهم.
دهب فيها stray dogs كتير
حتى كلاب الشارع و الكلاب البلدي، مينفعش طفل يدايق كلب ولا الكلام اللي بيحصل عندنا ده.
و ال locals (اهل البلد؛ الدهباوية/البدو) بيعاملوهم حلو جدا و عارفينهم بالاسم كلب كلب، و الكلاب بتستجيب لاساميها سبحان الله ❤
الكلاب مسالمة جدا و نضيفة اوي،،،، و دايما تجيلك تطبطب عليها شوية و بعدين يسيبك و يمشي. ف متخافش من اي كلب هناك.. حرفياً. و لو الكلب عرفك حيوصلك من المكان اللي انت فيه لحد باب بيتك.. او من مكان للتاني كل ما يشوفك لدرجة ان انت بتعرف الكلب من شكله و لونه من كتر ما بيجيلك و بتشوفه.
و حاولوا و انتوا هناك متخلوهمش يكرهوا وجودنا و ترسخوا فكرة السائح المصري الجميلةالجميلة المنتشرة او نبقى ضيوف تقال عليهم و يتمنوا نرجع بلدنا،، خلونا ذكرى حلوه عند الناس يتمنوا اننا نرجع تاني. خلونا نسيب المكان احسن من ما جينا لقيناه.
حاولت اقولكم على كل اللى يفيدكم هناك، اسفة لتاخير الريفيو للناس اللي استنت. ابدأوا سافروا و شوفوا بلدكم. روحوا دهب و متستنوش حاجة تشجعكم او حد يروح معاكم، الموضوع مش صعب. مش هعرف اوصف جمالها او سحر الجو بتاعها لو قعدت عمري كله. و انا واثقة انها هتبقي من اصعب الاماكن اللي هاتضطروا تفارقوها في حياتكم، لسببين اول حاجة لانها ازاي دي حته من بلدنا و احساس طيب انا هرجعلها تاني امتى، تانى حاجة بيتملكك عدوي من سلامهم النفسي و الروح السكينة اللي هناك بيبقى مش مُستَوعَب بالنسبالك انك هتسيب ده و تمشي!!! انت هتسيب قلبك في دهب حرفياً و تمشي.
عرفت ناس مش هنساها طول حياتي،،
عندهم لسه مفهوم "الخير".. خير الارض.. خير الجبل و خير البحر..
واقفة في الشارع، مستنية ناس اتعرفت عليهم هناك قدام بيت بدو، لقيت طفلة صغيرة معرفهاش فاتحة الباب و بتسألني "إتغديتي؟؟!" .... !!!! متخيلين!
ساعتها my heart melted...
I was honestly speechless!! ❤
بتسألني كلت ولا لا و هي متعرفنيش و اكيد مثلاً امها شافتني ف بعتتها!! مرحابين جدا و بيتوهم مفتوحه دايما لكل الناس و بسطاء اووووووي، ناس تدخل القلب من غير استئذان كده.
عارفين قيمة كل حاجة في الطبيعة ربنا خلقها ادامة، بيعرف يستفيد منها بكل شكل يقدر عليه.. بالنسباله الطبيعة رزق في المجمل... فلوس و صحة و معيشه!
عيان،، بيستنوا السيل و تلاقي البلد كلها باعته ولادها ع الجبل ينقوا من الاعشاب الطبيعية اللي بتطلع فوق الجبل للبرد و المفاصل و لكل داء.
معوش فلوس بينزل البحر يصطاد اخطبوت او بصره او سمك،، ينزل يبيعه،، خلاص كده بقى معاه فلوس.. متخيلين البساطة!!
او يطلع الجبل ينزل بأحجار/ اعشاب او خلافه و يبيعها.
بتقع ف حب البساطة اللي هناك من اول حاجة بتشوفها.
بتحس انهم واحد مع الطبيعة،، مبتفرقش معاه حافي، مش معاه مياة ع الجبل، نسي يجيب اكل... كل دي مشاكل هامشية عادي هيحلها ف ثانية، من شجرة طارحه ع الجبل، من بدن اصطاده و عمل شعلة من الحجر و سواه و اكل. مبيغلبش و بيتصرف تحت اي ظرف.
و صاحب جدع و رجالة و ستات يعتمد عليهم و طالما عرفت واحد من دهب بدو او دهباوي، البلد كلها بقت تحت امرك حرفياً. فيهم كرم و تحس عندهم اصل و يشيلوك فوق راسهم لو يطولوا. الكلام يطول عن البلد دي بس اظن فهمتوا وجهه نظري. و اللي محتاج حاجة يسألني.
المهم انه
☀Tans fade, but memories NEVER do.
And, If that and more is all I have left, then I'm more than satisfied. ❤


29541928_1660718374042101_8013813952366332333_n.jpg
29542000_1660713064042632_4731989703951558798_n.jpg
29542270_1660718234042115_3514517753676857154_n.jpg
29542434_1660714510709154_3602152885219023328_n.jpg
29542856_1660712647376007_5243547752304509066_n.jpg
29543211_1660712177376054_1736084475269492937_n.jpg
29570337_1660713190709286_8748179905776636428_n.jpg
29570393_1660712447376027_7003611749645311770_n.jpg
29570763_1660712070709398_6054315811858283331_n.jpg
29570806_1660718997375372_6506537808436967535_n.jpg
29571304_1660712564042682_6384023720567213987_n.jpg
29572347_1660718947375377_6319048145467703262_n.jpg
29572384_1660716560708949_8856966701432507458_n.jpg
29572463_1660712770709328_7371226482383027196_n.jpg
29572684_1660712824042656_2036345166353159229_n.jpg
29595246_1660718560708749_620549511778972724_n.jpg
29595508_1660713920709213_2634531622087862900_n.jpg
29597726_1660713127375959_596312733103837686_n.jpg
29598042_1660719167375355_3848757173329453577_n.jpg
29683510_1660718764042062_5950324055287472153_n.jpg
29683596_1660718874042051_5488012446429629278_n.jpg
29683903_1660718480708757_2135565628216769465_n.jpg
29684094_1660712367376035_4876511881150237081_n.jpg
29695543_1660718637375408_3277159515087732148_n.jpg
29790182_1660712987375973_4710308495960121381_n.jpg
 
أعلى